प्रेरित.कामी 6
6
सात से-सेवा कु के चुचुनाव
1हिमीन बेरा चेलाकु आला गनती बढ़ाव सेनोः केना, दो युनानी भाखा क-कंहड़ी जाहुदीकु, इब्रानी भाखा क-कंहड़ी जाहुदीकु के कुड़कुड़ाअ केनाकु, ची रोज-दिन रअः से-सेवा रे आले आलकु राँड़ीयाहीकु के, एतान धेयान होः काकु एमाअ दिकुआ। 2हिना लःअय बारहो चेलाकु जामा बिसवासीकु के सभा दुड़ूः केते, “नोःआँ उचित कनोआँ ची परमेसर आला बचन रअः पापरचार के बाई केते, आले घोटो पोपोरसा रअः सेवा कुआले बेता लिकुआकु। 3हिना लःअय ए बोकोकु, आपे मेसे रे सात झन बढ़ियाँ नामी हेरेलकु के चुनाव कुपे, जे पबितर आतमा तरअः भरल-पुराल हुसियार, आबु हुंकू के होना काम के जिम्मा ओकू-आबु। 4बकिर आले दो जामा बेरा, बिनती आउर बचन रअः सेवा-सुसार रे लगाव ताहीनोआले।”
5नोःआँ बात मंडली रिनकु जामेकु के बेस आदा लिदकुआ। आउर स्तेफनुस नुमू रिनी मियांड हेरेल के, जे बिसवास आउर पबितर आतमा तरअः पेरेःग ताही नेनाय, आउर फिलिप्पुस, आउर प्रुखुरूस, तेकर नीकनोर, तेकर तिमोन, तेकर परमिनास, तेकर अन्ताकिया रे तहिनोः वाला निकोलस के, जे जाहुदी मत के मनाअ अवला ताही नेनाय, निबाड़ लिदकुआकु। 6आउर हुंकू के प्रेरितकु दुबाःड़े आगु लिकुआकु, आउर प्रेरितकु बिनती केते हुंकू तेङ रे तीः दोहो लअकु।
7परमेसर आला बचन फैलाव सेन नेना, आउर जिरोसलेम रे चेलाकु आला गनती बढ़ाव सेनोः केना, आउर ढेर पुरोहितकु होः बिसवासी पाड़ीअ नाकु।
स्तेफनुस के बड़े पंचाईत रे इईदी
8स्तेफनुस दया हेतरअ परमेसर आला सवांग रे पेरेःग केते, होड़कु तलारे बड़े-बड़े चिनहा आउर छकरित काम कामी केनाय। 9हिमीन बेरा लिबिरतीन नुमू बिनती ओड़ाअ रिनकु थोड़ेक होड़ कुरेने आउर सिकन्दरिया सहर, किलकिया तेकर एसिया राईज तरअः स्तेफनुस लोः झाझमेला हीःग नेनाकु। 10बकिर हुंकू होना बुधी आउर होना आतमा रअः जेकर से हुनी कंहड़ी केनाय, झुठा काकु ठहराव दाड़ी लिया। 11“आले नुई के मुसा तेकर परमेसर रअः बिरोध रे निन्दा कंहड़ी यअते आयुम तदियाले” मेन केते, ढेर होड़कु के घुस एमा केते झुठा गोवाह एमाअ ची लिकुआकु। 12नोःआँ लकान हुंकू, होड़कु के, आउर नेताकु, आउर धरम पुथी सि-सिखावकु के भड़काव केते, अचाका स्तेफनुस दुबाःड़े हीःग सोदोर नेनाकु, आउर हुनी के सःब केते बड़े पंचाईत रे ईदी लियाकु। 13“नुई होड़, नोःआँ पबितर बड़े बिनती ओड़ाअ आउर मुसा आला कनहुन रआ जामा बेरा निन्दा एकायाय,” मेन केते झुठा गोवाह तिंगु उनकु कंहड़ी लअकु। 14“आले नुई तरअः नोकान क-कंहड़ी आयुम तदियाले ची, हिनी नासरत रिनी ईसु नोःआँ बड़े बिनती ओड़ाअ के धसाव केआय, आउर मुसा आले के सोंपाव थिलाआय होना आबु आला दसतुर के बदलाव केआय!” 15बड़े पंचाईत रे दुड़ूः उनकु जामे होड़कु संहित स्तेफनुस पखा लुड़ीगे केनाकु, दो हुनी आला मेःड-मुहांड़ सिरमादूत लकान नेल नेना।
Currently Selected:
प्रेरित.कामी 6: ASR
ማድመቅ
ያጋሩ
አወዳድር
ኮፒ
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© 2023 NLCI CC BY-NC-ND 4.0