GENESA 18
18
Ta Abrahama loko a khongelela Sodoma.
1Yehovha a tikombisa eka Abrahama emikuhlwini ya Mamre, a tshamile enyangweni ya ntsonga wa yena ninhlekanhi lowukulu. 2A tlakusa mahlo, a languta, kutani a vona vavanuna vanharhu va yimile ekusuhi na yena; kuteloko a va vonile, a suka enyangweni ya ntsonga, a tsutsuma ku ya hlangana na vona, kutani a khinsama ehansi, 3a ku: “Hosi, kungakuloko ndzi kume tintswalo emahlweni ka wena, ndza ku khongela leswaku u nga hundzeli nandza wa wena. 4Ha nga lava matinyana, mi hlamba milenge, mi wisa ehansi ka murhi. 5Ndzi ta ya lava xipandzwa xa xinkwa, mi tiyisa matimba; hi kona mi nga ta khaluta, hikuva mi hambukele swona eka nandza wa n'wina.”
Kutani va ku: “Hi swona, endla hilaha u nga vula.”
6Abrahama a hatlisa a nghena entsongeni eka Sara, a ku eka yena: “Hatlisa u teka mimpimo minharhu ya mapa, u kanyanga, u endla swinkwa.” 7Kutani Abrahama a tsutsumela etihon'wini, a hlawula rhole ra nyama ya ku olova ni ya ku nandziha, a nyika nandza leswaku a hatlisa a ri lunghisa. 8Kutani a teka mafurha, ni ntswamba, ni rhole leri lunghisiweke, a swi veka emahlweni ka vona; kambe yena a yimile ekusuhi na vona ehansi ka murhi, kutani va dya.
9Kutani va ku eka yena: “U kwihi Sara, nsati wa wena?”
A ku: “Hi loyi, entsongeni.”
10Kutani un'wana a ku: “Ndzi ta tlhela ndzi vuya eka wena haxawu hakunene, kutani vona, Sara, nsati wa wena, u ta va ni n'wana.”
Kasi Sara a a ri karhi a yingisisa enyangweni ya ntsonga, endzhaku ka yena. 11Kambe Abrahama na Sara a va dyuhele, a va hanyile ngopfu, yena Sara a a hundzile nkarhi wa ku veleka. 12Kutani Sara a hleka embilwini ya yena, a ku: “Ndzi nga ha kuma ku tsaka ndzi ri xikoxa, kasi n'wini wa mina u dyuhele na yena!”
13Kutani Yehovha a ku eka Abrahama: “Xana Sara u hlekela yini loko a ku: ‘Xana ndzi nga kumisa ku yini n'wana ndzi ri xikoxa?’ 14Xana yi kona mhaka leyi nga hlulaka Yehovha? Enguveni leyi, ndzi ta vuya eka wena haxawu, kutani Sara u ta va a kume n'wana.”
15Kambe Sara a kaneta, a ku: “A ndzi hlekanga,” hikuva a a chava.
Kutani yena a ku: “Wa hemba, hikuva u hlekile.”
16Kavaloko vavanuna lavo va suka va famba, va kongoma etlhelo ra Sodoma, Abrahama a famba na vona ku va heleketa. 17Kutani Yehovha a ku: “Xana ndzi nga fihlela Abrahama leswi ndzi nga ta swi endla? 18Hikuva kunene Abrahama u ta va tiko lerikulu, lera matimba; ha yena ku ta katekisiwa matiko hinkwawo ya misava. 19Hikuva ndzi n'wi hlawurile leswaku a lerisa vana va yena ni yindlu ya yena endzhaku ka yena, ku hlayisa ndlela ya Yehovha, ni ku endla leswo lulama leswinene, Yehovha a kondza a humesela Abrahama leswi a n'wi tshembiseke swona.”
20Kutani Yehovha a ku: “Leswi huwa leyi humaka eSodoma na Gomora yi kuleke, ni ku homboloka ka vona ku kuleke ngopfu, 21ndzi ta rhelela ndzi ya vona xana va endlile kunene hilaha huwa yi ndzi fikeleke hakona: loko swi nga ri tano, ndzi ta swi tiva.”
22Kutani vavanuna lavo va famba va kongoma eSodoma, kambe Abrahama a yima emahlweni ka Yehovha. 23Kambe Abrahama a tshinela, a ku: “Xana kunene u ta lovisa la lulameke swin'we ni la hombolokeke? 24Kumbe xana va kona lava lulameke va ntlhanu wa makume emutini? Xana u nga wu lovisa kunene, u nga ka u nga wu rivaleri hikwalaho ka lava ntlhanu wa makume lava nga kumeka eka wona xana? 25A swi ve kule na wena ku lovisa la lulameke swin'we ni la hombolokeke, swi va leswaku la lulameke a endliwa leswo nge u hombolokile! A swi ve kule na wena! Loyi a avanyisaka misava hinkwayo, a nga ka a nga avanyisi hi ku lulama xana?”
26Yehovha a ku: “Kungakuloko ndzi kuma eSodoma vanhu va ntlhanu wa makume lava lulameke exikarhi ka muti, ndzi ta rivalela muti hinkwawo hikwalaho ka vona.”
27Abrahama a tlhela a ku: “Waswivo, ndzi tiyisile mbilu, ndzi vulavula ni Hosi, mina ndzi nga ntshuri ni nkuma! 28Kumbe eka lava ntlhanu wa makume lava lulameke, ku ta pfumaleka va ntlhanu; xana u nga herisa muti hinkwawo hikwalaho ka vanhu lava ntlhanu?”
Kutani a ku: “A ndzi nga wu herisi loko ndzi va kuma va ri mune wa makume na ntlhanu lava lulameke.”
29Abrahama a engeta a vulavula, a ku: “Kumbe va ta kumeka va ri mune wa makume ntsena.”
Kutani a ku: “Ndzi nga ka ndzi nga swi endli hikwalaho ka lava mune wa makume.”
30Kutani a ku: “Hosi yi nga tshuki yi holova loko ndzi vulavula: Kumbe va ta kumeka va ri makume manharhu ntsena?”
Kutani a ku: “Ndzi nga ka ndzi nga swi endli loko ndzi va kuma va ri makume manharhu kona.”
31Kutani a ku: “Waswivo, ndzi tiyisile mbilu ku vulavula ni Hosi: kumbe va nga kumeka va ri makume mambirhi ntsena?”
Kutani a ku: “Hikwalaho ka lava makume mambirhi ndzi nga ka ndzi nga wu herisi.”
32A engeta a ku: “Hosi yi nga karihi loko ndza ha vulavula kambe: Kumbe va nga kumiwa va ri khume ntsena?”
Kutani a ku: “Ndzi nga ka ndzi nga wu herisi hikwalaho ka lava khume.” 33Kavaloko Yehovha a suka loko a hetile ku vulavula na Abrahama, Abrahama a tlhelela ekaya.
Currently Selected:
GENESA 18: TSO29
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.