LUKE 4
4
Jesu Khemna
(Matt. 4.1-11; Mk. 1.12-13)
1Jesu, Kha Siangthou in a dim a, Jordan lui a kipan a kiknawn a, Diabol khemkawm in gamdai ah ni sawmli Kha pi in a om hi. 2Huai nite in bangmah a ne kei hi. 3A tawp in a gil a hong kialta hi. Diabol in a kiang ah, “Pathian Tapa na hihleh hiai suang tanghou suak ding in thupia in” a chi hi. 4Jesu’n a kiang ah, “Mihing tanghou kia in a hing kei ding, Pathian kam a thupawt in a hingzaw ding” chih gelh ahi, chi in, a dawng hi. 5Huan a pitou a, mitphiat kallou in khovel gam tengteng a ensak hi. 6A kiang ah, “Hiai tengteng tung a thuneihna leh a thupina k’on pe ding; ka kiang a piak ahita hi, ka ut peuh kiang ah leng ka pe zel hi. 7Huchi in hon bia inla, avek in nang a ahi ding” a chi hi.
8Jesu’n a kiang ah, “Toupa na Pathian na biak ding a, amah na kia na sep ding ahi” chih gelh ahi, chi in, a dawng hi.
9Huan Diabol in Jerusalem khua ah a pi a, Pathian biakin tungzum ah a koih a, a kiang ah, “Pathian Tapa na hihleh hiai a kipan ke khesuk in; 10Nangmah humbit ding in na tungthu ah zaw a angelte thu a pe ding a, 11amau a khut un hondom ding uhi, huchilou in zaw na khe in suang na sui kha ding” chih gelh ahi ngal a, a chi hi.
12Jesu’n a kiang ah, “Toupa na Pathian ze-et ken” chih gelh ahi, chi in a dawng hi.
13Huan Diabol in a khemna ding teng a a khem khit in a lemtan hun chiang ding in a paisanta hi.
Galili Gam Ah Jesu’n Nasep Pan
(Matt. 4.12-17; Mk. 1.14-15)
14Jesu, Kha thilhihtheihna in Galili gam ah a pai nawnta a; a tanchin huai kim gam teng ah a thangta hi. 15Huan kikhopnainte ah thu a hilhzel a, mi tengteng phat in a om hi.
Nazaret Ah Jesu Deihlouh In Om
(Matt. 13.53-58; Mk. 6.1-6)
16Huan a khanletna khua Nazaret a hongtung a; khawlni a a hihdan ngeina bang in kikhopnain ah a lut a, sim ding in ading hi. 17Zawlnei Isai laibu a kiang ah a pia ua, aman laibuzial a phel a, hiai thu kigelhna laitak a sim hi:
18Liangvaite kiang a
Tanchinhoih gen ding a n’on seh ziak in Toupa
Kha tuh ka tung ah a om;
Aman a honsawl, salte kiang ah pawtna thu leh,
mittawte kiang a mitvak neih nawnna thu gen ding,
simmawh thuakte pawtsakna ding.
19Toupa lungkim kum thu gen ding in” chih.
20Huan laibu a zial a, nasepsakpa a penawn a, a tuta hi. Huan kikhopnain a mi tengteng mit a tung ah a tuta hi. 21A kiang uah, “Hiai Laisiangthou thu tuni in na zak un a tangtungta” chi in a gen pan hi.
22Avek un amah a phat ua, a kamsuak hehpihna thute lamdang a sa mahmah uh. “Hiai mi Joseph tapa ahi ka hia?” a chi uhi.
23Aman a kiang uah, “Nou hiai thupil thu, Daktor, nang leh nang kihihdam in, Kapernaum khua a na thilhih ka na zak peuh uh, hiai ah nangmah kholam ah leng hih in chi in, honchi khong ding zaw neive ua” a chi hi. 24Amahmah in, “Chihtaktak in, k’on hilh ahi, zawlnei kuamah amah kholam ah min a kipahpih ngeikei hi. 25Huchi in diktak in k’on chi ahi, Elijah damlai a, kum thum leh kha guk van a bin a, khovel a kial nakpitak a a hongtun in, Israel gam ah meithai tampi a om uhi. 26Himahleh a lak ua kuamah kiang ah Elijah sawl ahi kei, Sidon gamlama Sareptha khua a numei, meithai kiang kia a sawl ahizaw hi. 27Huan zawlnei Elishah damlai in leng Israel gam ah phak tampi a om ua; himahleh a lak uah kuamah hihsiangthou in a omkei, Naaman, Suria mi kia hihsiangthou in a om zawta hi” a chi hi.
28Huan kikhopnain a mi tengteng in huai thute a zaktak un, a heh mahmah uhi. 29A ding suausuau ua, khua a kipan in a sawnkhia ua, paihkhiak ding in a khaw omna kawlkhou ah a pi uhi. 30Himahleh amah a kikal uah a paisuak a, a paimangta hi.
Pasal Dawininpai Hihdamna
(Mk. 1.21-28)
31Huan Galili gam a khua khat, Kapernaum ah a va hohsuk hi. Khawlni’n mite thu a hilh hi. 32Thuneitaka a gen ziak in a thuhilh lamdang a sa mahmah uhi. 33Huan kikhopnain ah dawinin paimi khat a na om hi; 34Amah aw ngaihtak in a kikou a, “Eh! Nazaret Jesu, kou leh nang bang ahia i kizolhna om? Honhih mangthang ding in na hong maw? Nang k’on thei, Pathian Misiangthou na hi” a chi hi. 35Jesu’n a tai a, “Dai inla, asung a kipan pawt in” a chi hi. Huan dawi in a lai ah a hihpuk a, hihnalou in asung a kipan a pawtta hi. 36Huan avek un lamdang a sa mahmah ua, “Bang thu ahia le? Thu neitak leh thilhihtheitakin dawininte thu a pia a, a pawt uh” chi in, a kihou uhi. 37Huan huai kim gam khua teng ah a tanchin a thangta hi.
Simon Zi Nu leh Mi Tampi Hihdamna
(Matt. 8.14-17; Mk. 1.29-34)
38Huan a thou a, kikhopnain a kipan a pawt a, Simon inn ah a lut hi. Simon zi nu nakpitak in a khosik a, huchi in amah ading in a na ngetsak uhi. 39A kiang ah ading a, khosik a tai a, a daita hi; a thou paha, a na uh a sep sakta hi.
40Huan ni tumkuan in natna tuamtuam a na, damlou nei peuhmah in a kiang ah a honpi ua; avek un a tung uah a khut a koihchiat a, a na hihdam zel hi. 41Huan dawite’n leng, “Pathian Tapa na hi” chi a kikou in, mi tampi sung a kipan in hongpawt uhi. Huan amau a tai a, Khrist ahi chih a theih ziak un a pau uh a phal kei hi.
Kikhopnain Ah Jesu’n Thugen
(Mk. 1.35-39)
42Huan khovak tak in a pawt a, kuamah omlouhna mun ah a hoh a; mipite’n a zong ua, a kiang ah a hong ua, amau a paisanlouhna ding in let a tum uhi. 43Himahleh a kiang uah, “Khaw dang ah leng Pathian gam Tanchinhoih ka hilh ding ahi, huai ding a sawl ka hi ngal a” a chi hi. 44huchi in Galili gam a kikhopnainte ah thu a hilhta hi.
المحددات الحالية:
LUKE 4: PAITBSI
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.