LUKIN 21
21
Arong Nuampek
(Mk 12.41-44)
1Isua anhoia a en anei ngai nuampek apek u Biakina nuampek siakna na, 2arong anriang, ten ei pek sumsen sumru anni hava ham amu. 3Hatuka, “Atei ngai ranga hiva arong nu keng apek atam khit ati. 4Asik chu atei ngai chu anei aliak ata apek u na; tenchu ama chu ei dam na ranga ei don selep ata ke ei pek.”
Isuan Biakin ei Siat rang Aril
(Mt 24.1-2; Mk 13.1-2)
5Zolai senkhat Biakin rui achong u na, itukmo ei sa alung ngai le Pathian matona nuampek andar ngai. Isuan ati, 6“Aloma nei mu u dora hi hun la hong inti hava tika lung angkhat ngal amuna om no ni; aloma la chul inti.”
Anpon le Ansinsakna
(Mt 24.3-14; Mk 13.3-13)
7“Minchupu, hiva hi itikmo nini? Hatuka imo ei ni ranga ahong tung zei ti nei riat theina ranga?”
8Isuan ati, “Anrung u ro, na huang u ni, mi tampa honga Isua rang rila, ‘Koi hi Isua ka ni!’ hong ti inti, ‘A hun atung zei!’ hong ti inti. Tenchu zi u ta ni. 9Ankap, ansual rui na riat u le achi u ta ni, hiva ngai chu ei ni mansa rang ke, tenchu hava ngai ha ahekna nai zei tina nimak.”
10A la ril tira, “Ram le ram ansual inti, rengram le rengram andui inti. 11Ninun rik hong inti, maitam le rikhua om inti muntina; tichangabui le anchirua anvan ata hong inti. 12Hiva ngai atung man, ansur u na ti na sinsak unti; ankel ranga na tuang unti Sinagogue a; hatuka lungina na khum unti; reng ngai le ruaitu ngai matona na tuang unti koi ka sika. 13Hava ha na rang Thanga Ahui rilna hun. 14Man ata na malung lei sin u ro hava tika hontinmo naninga nei zok theina rang andon u no ro. #Lk 12.11-12 15Na raldui ngaiin ei na sua u nokna ranga mur le hianna na pe u ka ti. 16Na nu, na pa le na parual, na sarnu hatuka na nai, na mal ngaiin na mansur unti, senkhat chu na that unti. 17Mi doran ka sika na mumak unti. 18Tenchu na sam sangkhat ngal na lu u ata anpei no ni. 19Ngirtit ro zokin na ti.
Isuan Jerusalem ei Siat rang Aril
(Mt 24.15-21; Mk 13.14-19)
20“Sipai ngaiin Jerusalem ahual u tik asiat rang anai zei ti re ta ro. 21Judai rama om ngai chu mual tiang tan u rase; khopuia om ngai chu khopui ma u rase, rama om ngai chu khopuia se u no rase. 22Hava nikhua ngai ha, ‘Phuba lakna nikhua,’ la ni inti, Pathian chongin ei ti ngai ei kipna rang. #Hos 9.7 23Nupang anrai ranga hava nikhua ngai ha ituk antak mo ei ni rang hanuk naite annui adon ngai rang! Hiva rama hin antak sabakna la tung intia, Pathian sinsakna mi ngai chunga la chul inti. 24Asen chu khendaia anthat om inti hatuka atei ngai selkei ranga ramtina tuang unti, hatuka Jerusalem ha Jentail ngai ke thuaia om inti ahun ahek maseng.
Miring Sapa Hong rang
(Mt 24.29-31; Mk 13.24-27)
25“Hava tik chu ani, tha, arasina tichangabui pangai la ni inti, phila ram dora anning inti, tipuia han rasa le tipui ansok achi unti. #Isa 13.10; Ez 32.7; Joel 2.31; Anl 6.12-13 26Ramuala imo ei nin zei anchina, mi ngai anmoi inti, chung tianga thotheina la bui inti. 27Hava suale Miring Sapa ansuma, thotheina le anliana hong anlang inti. #Dan 7.13; Anl 1.7 28Hiva ngai ahong ani tik anding tan tang u ro nei zokna rang anai zei.”
Theipui Kunga Anchuna
(Mt 24.32-35; Mk 13.28-31)
29Hatuka Isuan hiva ankhina aril: “Theipui kung mandon u tan, atei thing kung um. 30Abua athar ancher le kholum anai zei ti na riat u. 31Havantin anga hiva ngai atung le re u ro Pathian ram anai zei.
32“Chongdik kei na ril u ni zei hiva ngai atung sua maseng atuna khuk ngai thi kiar u no ni. 33Anvan le phil ke ei anpei rang tenchu ka chong anpei no ni.
Aveng tit ei Nang Rui
34“Anrung u ro! Anek asaka achan anmang u no ro hanuk ramual damna ranga andon u no ro, asik chu ha nikhua ha hong tung rak ni, 35chang anga. Mi dora ranga ramual muntina hong inti. 36Hasik han hava ahong atung rang ngai dora nei len theina rang le Miring Sapa matona anding thei ranga borzong u tan tang u ro.” 37Isuan hava nikhua ngai han Biakina a manchu chachaka, khului ani le asuaka ase zana Oliv muala ava om chachak. #Lk 19.47 38A zingtin Biakina mipui asena ava rangai u.
المحددات الحالية:
LUKIN 21: RANGBSI
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Ranglong NT with PSA - Dankit Athar Le SAM
Copyright © 2017 by The Bible Society of India
Used by permission. All rights reserved worldwide.