LUKIN 22
22
Isua dui Mipui ngai
(Mt 26.1-5; Mk 14.1-2; Jn 11.45-53)
1A hun ahonga nai zeia chol anchel lui Vaipol Panta, hava ha Zokna Panta ei anti. #Ant 12.1-27 2Chaizung ngai le Dan minchu ngai han mipui achi u na, hasik han maruka Isua thatna lampui amandon u.
Judan Isua mansur ranga azot
(Mt 26.14-16; Mk 14.10-11)
3Hatuka Juda Iskariot anti han a sunga Soitan alut. 4Ase viaka chaizung ngai le Biakina a ulian ngai le ava chong u hontinmo Isua ansurna rang. 5Azot u na sum apek rang ati u. 6Judam azota achan arok zei Isua ansura amani kom apek ranga mipuiin hava rui riat luia.
Isua Rakan Kut Bu Nek ranga Ansin
(Mt 26.17-25; Mk 14.12-21; Jn 13.21-30)
7Chol anchel lui Vaipol Panta lai han nikhua ahonga suaka Zokna bu nekna rang bera that ranga anang. 8Isuan Pitor le Johon a tira, “Se u tan Zokna bu khalai ha anek thei len ranga lei ansin sua rase,” ati na atho dan aril.
9“Hovan mo lei ansuk rase atia nei zot?” Atia arakel u.
10A masanga, “Khopuia na va lut u le mikhat tikok anvan na lei antong pui unti. Ei lutna ina va zi u ro, 11hatuka in puma kom ti u ro; ‘Minchupun, hova ina mo ka zolai ngai le koi Zokna bu kei nek rang ati?’ 12Aman mun anliang sua chunga na man mu unti, hava han ansua vanga mu u na ti.”
13Ase u na Isuan ei ti anga aloma ansin chita ava mu u, hatuka Zokna bukhalai amansuk u.
Puma Zandui
(Mt 26.26-30; Mk 14.22-26; 1 Kor 11.23-25)
14Ahun ahonga suak Isuan a zolai ngai le asutmun alak a. 15Amani kom ati, “Hiva Zokna bu hi anek rang achan ka zot nangni bila antak ka tiar man! 16Kei na ril u ni zei Pathian rama a omzia tatak akip maseng ne thak lai no ning.”
17Hatuka Isuan khuri alaka raisanna Pathian kom a mantung, hatuka, “Hiva hi la u tan ansem u ro. 18Kei na ril u ni zei atun ata hiva uain hi ne lai no ning Pathian Ram ahong maseng.”
19Hava suale Isuan vaipol tap alaka Pathian kom raisanna mantung, a khiaka a manlona ati, “Hiva hi ka taksa nangni na ranga anpek. Koi nei na riattit u na rang tho u ro.” 20Havan tin anga han khuri alaka a manlon khului bu nek suale, hintin hin ati, “Hiva khuri hi Pathian chongtin athar ka thisen le mor anzem nangni na rang azan. #Jer 31.31-34
21“Tenchu en u ro! Anan sur rang ha ka bila om! #Sam 41.9 22Miring Sapa ei thi rang Pathianin ei ti anga, tenchu ansurpa itukmo avan aduai ba!” 23Amani kara ankel u na, “Tumo ei ni rang hantina atho thei.”
Tumo Alian atia Ankhal
24A zolai ngai bila tumo alian khit atia ankhalna asuaka. #Mt 18.1; Mk 9.34; Lk 9.46 25Isuan amani rang ati, “Jentail reng ngaiin a mi ngai chunga chong anei, ram ulian ngaiin, ‘Mi ngai mal’ nina azong u, atia. #Mt 20.25-27; Mk 10.42-44 26Tenchu nangni le chu hintin nima, nangni bila alian khit ha asin khit anga ni rase hatuka aruai ha suak anga ni rase. #Mt 23.11; Mk 9.35 27Tumo alian, anek ranga ansut mo, hanle adorbo andompu mo? O, hanle ansut tak ha.Tenchu na bila kei om u hi dorbo andompu ang kei om ke. #Jn 13.12-15
28“Ansinnana na chul kar pei ka bila na om u zei, 29hatuka ka pan ningneina ei na pek anga koi um hava anga ka na pek u. 30Ka rama Ka bila nek, sak, u na ti Israel nam som le nam anni ngai rui aril ranga reng sutmuna ansut u na ti. #Mt 19.28
Isuan Pitorin Riatnokom Eitho rang Aril
(Mt 26.31-35; Mk 14.27-31; Jn 13.36-38)
31“Simon, Simon, rangai ro! Soitanin ei na mansin kiar u na ranga phalna man asiat ata asa khai ranga, lui atho pun sarasi le bu tak ei zen anga. 32Tenchu Simon nang na ranga bor ka zong nei iamna ei siat nokna rang.Hatuka ka tiang nan hoi le na parual ngai manrat ro.”
33Tenchu Pitorin, “Puma na bila lungina se le athim kei ngam keng do!”
34“Na ril ka ti, Pitor,” Isuan ati, “Avian zan voi anthum re makung na na ti maseng ar khuang no ni!”
Marsa, Juli, Khendai
35Hatuka Isuan a zolai ngai arakel, “Marsa, juli, kekok abuia ka na man se u lai nei ansam u mo om?” #Mt 10.9-10; Mk 6.8-9; Lk 9.3; 10.4
“Ite ansam mak me,” atia amasang u.
36“Ten atun chu marsa mo juli mo a don tak choi rase; tenchu khendai nei lui chu apuan zuara racho rase. 37Kei na ril u ni zei Pathian chongin ei ti anga, ‘Ama chu mi salui bila atel u,’ ti ha ka ruia ei hong dik rang, asik chu imo anziak ha koi ka rui ei hong dik rang.” #Isa 53.12
38A zolai ngaiin, “Enta! Hiva hin khendai anni om hile Puma!” ati u. “Hava ha ahun,” atia aman amasang.
Isua Oliv Muala Borazong
(Mt 26.36-46; Mk 14.32-42)
39Isuan ha khopui amaka ase, ei tho babang anga Oliv Muala; hatuka a zolai ngai um abila se. 40Hava mun asuak u le, amani kom ati, “Borzong u ro, themnana nei chul u nokna rang.”
41Amani kom ata ankhai lungtang adeng dor alana, hatuka sutkuluka bor azong. 42“Ka pa, na zot ten, hiva antak tengna khuri hi ka kom ata khai ro. Ka racham ni ma, tenchu na racham anga ni rase.” 43Vanram ata vanpalai ahong anlanga ranak a man nei. 44Rathatak sabaka borazong malung apek sabaka; arathan ha thisen ramal anga phila chul.
45Borzong ata anthuia a zolai ngai tiang ase reta amalung ei na u sika a ina ava mu. 46Amani kom ati, “Ichangmo nei in u? Anthui u tan borzong u ro anthemna na nei chul u nokna rang.”
Isua Ansur
(Mt 26.47-56; Mk 14.43-50; Jn 18.3-11)
47Isua ala chongtit, a zolai somleianni bila Judan mipui ahong ruai han, Isua kom abiang atum rang a honga. 48Tenchu Isuan a lei ti na, “Juda biang atuma mo Miring Sapa nei mansur rang?”
49Hatuka Isua bila a zolai ngaiin imo ei ni rang amu u na arakel u, “Puma khendai mang mani mo?” 50Amani bila angkhatin Chaizung Lian asuak atana achang kuar asat ving.
51Tenchu Isuan, “Hiva le chu ahun zei,” ati. Hava nai akuar atona a mandam pe.
52Hava suale Isuan chaizung ngai le Biakin arung ulian hanuk patar asur ranga ahong ngai kom ati, “Khendai le raimol le ahong mo na nang u koi hi asel ranga mo nei na iam u? 53Na bil u na anikhua Biakina kei om tenchu ana sur rang ti u mak che. Atun hi na singansa hun u azing rachama rui anril le.” #Lk 19.47; 21.37
Pitorin Isua Remaking ati
(Mt 26.57-58,69-75; Mk 14.53-54,66-72; Jn 18.12-18,25-27)
54Isua asur u na Chaizung Lian ina aruai u; ral ata Pitorin a zi. 55Kholaia moi atho u na anua ngai le avan lop. 56Suak nupang khatin ei mu le moi kola ei ansut ha andinphita ava ena ati. “Hiva nai um Isua bila mi ke.”
57Tenchu Pitorin nupang rang, “Hava mi ha remaking,” ati.
58Nuk beta pasal khatin amuna Pitor rang ati, “Nang um amani bila keng na ni.” Tenchu Pitorin a masanga, “He e, remakung,” ati.
59Hava suale dar angkhat sua mi khatin achan ana sabak ati, “Hiva nai hi Isua bila mi keng ati a iam nok rua ite om mak asik chu amam Galili mi keng!”
60Pitorin a masanga, “Hongmo nei ril re ngal makung ati!” Anlaiseka a chong lai tak ar akhuang. 61Puma anhoia andinphita Pitor atiang a en, hatuka Pitor anriat zei. Puman ei ti ha, “Ar akhuang man voi anthum remakung na ti na ti.” 62Pitor asuaka ana sabaka annuk.
Isua rang Maniero Athona Azem u
(Mt 26.67-68; Mk 14.65)
63Isua arung ngai han elsekara athona azem u. 64A mit akhit pe u na, “Tumo anazem reta,” ati u. 65Hatuka ala ero sabak u na.
Ruirilna Matona Atuang u
(Mt 26.59-66; Mk 14.55-64; Jn 18.19-24)
66Khua ei var le patar ngai, chaizung ulian ngai le Dan minchu ngaiin lokona antong u, hatuka Isua ha ruirilna matona ahong tuang u. 67“Na ril ta, nang hi mo Messia?” ati u.
A masanga, “Ka na ril u ten na iam u no ta ni; 68ankelrua khat ka na rakel u ten na masang u no ta ni. 69Tenchu atun ata Miring Sapa Athotheikiar Pathian changtiang ansut inti.”
70Alom u na ati u, “Nang hi Pathian Sapa mo na ni?” Amani amasanga, “Nangni keng a na ti.” 71A ti u na! “Ariat atei nang mak me! Koini len hi ariat na ni imo ei ti!”
المحددات الحالية:
LUKIN 22: RANGBSI
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Ranglong NT with PSA - Dankit Athar Le SAM
Copyright © 2017 by The Bible Society of India
Used by permission. All rights reserved worldwide.