JOHN 16
16
1“Note na puakhah lo nadingun keima in na kung vuah tam thute kang gen zo hi. 2Amate in kikhopna inn panin note ang nawmang ding uhi. A tahtahin, no ang thatte in tua banga a bawlna uh ziehin Pasien bie-a a kingaisut ding uh hun ang tung ding hi. 3Amate in Pa ahi a, kei ka hi zongin ei thei lo ziehun tam bang ang sem ding uhi. 4Ahi vangin a hun uh ang tun ciengin tam thute kang gensa ahi lam na phaw nading vua tu-a kang gen ahi hi.
Hla Siengtho’ Nasepna
“A kipat cilin note tawh ka opton ziehin na kung vuah tam thute kang gen vateh sih hi. 5Tu-in ei sawlpa kungah ka pei ta ding hi; koima khat beh in, “Hei-a pei ding na hei? ci-in nei dong vawt sih uhi. 6Ahi vangin tam bang ka ci ziehin lah na da mama vanuh uhi. 7Ahi vangin thuman thutah kang gen hi: Kei pei leng no adingin a hoizaw hi, azieh pen kei pei sih leng na kung vuah Hupa ang pei sih ding hi; kei ka pei leh na kung vuah ama kang sawl ding hi. 8Ama ang tun ciengin leitung mite’ mawna, dihna le thukhennate kawhin leitung mite’ khielna teltahin ang lah ding hi. 9Mawna thu-ah, amate in kei ei up lo ziehun a maw uhi. 10Dihna thu tawh kisai-in, Pa kungah ka pei ding a, nei mu nawn sih ding uhi. 11Thukhenna thu-ah, tam leitung uhpa in mawsah thukhenna a thuoh zo ta hi.
12“Na kung vua kang gen ding thu tampi om lai hi, hizongle tu-in na sang thei nai sih uhi. 13Thuman Hlagau Siengtho ang tun ciengin ama in thuman zosie-ah ang pui ding hi; azieh pen ama’ thu ang gen ding hi loin, a thu zah popo ang gen ding hizaw a, na kung vuah ang tung ding nate ang gen ding ahi hi. 14Ama in kei-a’ teng la-in note kunga ang gen ding ahi ziehin ama in ka min a thangsah ding hi. 15Pa neisa zosie kei-a’ ahi hi. Tami thu ziehin ama in kei-a’ teng la-in na kung vuah ang gen ding hi, a ci ka hi hi.
Dana, Lungdamna Suoh Ding
16“Bakhat sung kei nei mu nawn sih ding vua, bakhat zaw ciengin nei mukia ding uhi,” a ci hi. 17Tua ciengin a nuazuite pawlkhat khatlekhat kiho-in, ‘Bakhat sung nei mu nawn sih ding vua, bakhat zaw ciengin nei mukia ding uh,’ a ci le, ‘A zieh pen ka Pa kungah ka pei ding hi,’ ci-a i kunga ang gen pen bang a cinopna ahi diei?” a kici uhi. 18Amate in, ‘Bakhat sung a ci pen bang a ci na adiei? Ama bang gen ahei, ci i thei sih uhi,” a kici uhi. 19A dot nop lam uh Jesu in a thei ciengin amate kungah, ‘Bakhat sung kei nei mu nawn sih ding vua, bakhat zaw ciengin nei mukia ding uhi,’ ka ci pen kidong na hi uh amah? 20A tahtah a kang ci-in, note kapin na mau ding vua, ahi vangin leitung mite a lungdam ding hi; note na da ding vua, ahi vangin na danate uh lungdamna a suoh ding hi. 21Numei khat in a tasuo hun tung ahi ziehin a na a thuoh hi. Ahi vangin nau a suo ciengin leitungah nausen khat a pien ziehin lungdamin a gimthuoh teng a phawhkha nawn sih hi. 22Tuaci’n note in tu-in gimna na thuoh uhi; hizongle keima in note kang mukia ding a, na kipah ding uhi, note kung panin koima in na kipahna uh ang lahpieh thei sih ding hi. 23Tua ni ciengin note in bangma nei dong ta sih ding uhi. A tahtah a kang ci-in, keima’ min suongin Pa kunga na nget popo uh ama in ang pie ding hi. 24Ka min tawh tu dongin bangma na ngen nai sih uhi. Na lungdamna uh a bukim thei nadingin ngen un, na nga ding uhi.
Nuazuite ading Lungnopna
25“Keima in note tungah thugentena tawh tam thute kang gen zo hi. Thugentena tawh ka gen nawn lo ding hun ang tung ding a, Pa tungtang thu cientahin kang genzaw ta ding hi. 26Tua ni ciengin note in keima’ min suongin na ngen ding uhi. Keima in note tangin Pa kungah hing ngetpieh vang a ci ka hi sih hi; 27azieh pen note in keima ei itin, Pa kung pana ang pei ka hi lam nei up ziehun, Pa mama in zong note ang it ahi hi. 28Pa kung pan hing pei-in leitungah kang tung zo hi; leitung nuasie-in Pa kungah khatvei ka peikia ding hi,” a ci hi.
29A nuazuite in, “Hi hi, tu-in thugen tena zang loin cientahin na gen hi! 30Tu-in na zosie na thei a, koima’ dawh kisam lo hi, ci ka thei tah ziehun, Pasien kung pana ang kipan na hi lam kang um ta uhi,” a ci uhi. 31Jesu in, “Tu-in nei um ta sam vuoi mah? 32Note kithethangin na inn ciet uh zuonin kei guoh nei nuasie ding uh hun ang tung ding a, tu-in ang tung tahtah ta hi. Ahi vangin Pa tawh omton ka hi ziehin kei matang ka hi sam sih hi. 33Note in keima sungah lungnopna na nei thei nadingun na kung vua tami thu kang gen ahi hi. Note in leitungah gimna na thuoh ding uhi. Ahi vangin kihangsansah un; keima in leitung ka zozo hi!” a ci hi.
المحددات الحالية:
JOHN 16: ZBOTF01
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Zo Bible © Bible Society of Myanmar, 2018.