JOHN 17
17
Jesu in a Nuazuite ading Thungen
1Jesu in tam thu teng a gen zaw ciengin vantung ento-in, “Pa aw, a hun ang tung ta hi; Tapa in na min ang thansah thei nadingin nang in na Tapa’ min hing thangsah in, 2bangzieh ahei cile ama na piehsa mi zosie tungah ama in nuntah tawntungna a pieh thei nadingin mi zosie tungah thuneina ama na pie zo hi. 3Tuale amate in nang beh Pasien man tahtah na hina le na sawlpa Jesu Khris a thei siemna uh pen kumtawn hinna ahi hi. 4Keima in sep dinga nei pieh nasep ka mansiengna tawh leitungah na min ka thangsah zo hi. 5Tuaci’n Pa aw, leitung pien masangin na kunga ka neisa minthanna tawh tu-in na omna munah ei minthangsah ta’n.
6“Leitung mite sung panin nei piehsate tungah keima in na min ka kitheisah zo hi. Amate nangma-a’ hi a, nangma in kei tungah amate nei pie zo ta a, amate in na thu a mang uhi. 7Tu-in ahile amate in kei nei pieh zosie nang kung pan ahi lam a thei ta uhi; 8azieh pen kei nei pieh thute ma amate ka pie a, amate in zong tua thute a sang vua, nangma kung panin thuman thutah sunga ang pei ka hina thu amate in a thei uhi; tuale amate in nangma’ ei sawl ka hi lam zong a um uhi. 9Kema in amate tangin thu kang ngetpieh hi; leitung mite adingin thu ka ngen sih a, nei piehsa mite adingin thu ka ngenzaw hi. Bangzieh ahei cile amate nangma-a’ ahi uhi. 10Keima’ neisa zosie nangma-a’ hi a, nangma’ neisa zosie zong keima-a’ ahi hi; tuate sungah keima ei kiminthangsah zo ta hi. 11Tu-in leitungah ka om nawn sih hi, ahi vangin amate pen leitungah a omlai vua, kei ka hile nangma kungah kang pei ta ding hi. Siengtho Pa aw, ei gel pum khat i hi ma bangin amate zong pumkhat a suo thei nadingun, na min tawh keima nei piehsa amate dal in. 12Amate tawh ka opton laitahin nei piehsa amate na min tawh ka kem zo hi. Amate ka dal a, Lai Siengtho a tangtun nadingin a mangthai dinga kilaitansa mipa khat simlo#17:12 Gk “Kisietna’ tapa longal” koima khat beh a pelem a om sih hi.#Late 41:9; Jhn 13:18 13Ahi vangin tu-in na kunga ang pei ding ka hi ta a, amate mama sungah#17:13 Ahi sihle “amate lahah” ka lungdamna bucing a nei thei nadingun leitung ka op lai-in tami thute ka gen zo hi. 14Keima in amate tungah na thu ka pie zo hi, kei leitung-a’ ka hi lo ma bangin amate zong leitung-a’ ahi lo ziehun leitung in amate a muda hi. 15Leitung panin amate na lahkhiet ding ang ngen ka hi sih a, gilopa kung panin#17:15 Ahi sihle “sietna pan” na dal ding ang ngen ka hizaw hi. 16Kei pen leitung-a’ ka hi lo ma bangin amate zong leitung-a’ ahi sih uhi. 17Thuman thutah sungah amate na siensuo in; na thu in thuman ahi hi. 18Leitungah kei nei sawl ma bangin, kei zong amate leitungah ka sawl hi. 19Thuman thutah sungah amate zong a kisiensuo thei nadingun, amate ka khuolna-in keima le keima ka kisiensuo hi.
20“Tam mite ading beh ang ngen ka hi sih a, amau’ thugenna ziehin keima ei um ding mite adingin zong ang ngen ka hi hi. 21Pa aw, kei nei sawl lam leitung mite in a up thei nading ule kei sungah nang na om a, nang sungah kei ka op bangin, amate zong eite sungah omin#17:21 Adang tang laibute ah “eite sungah pumkhatin omin” ci-in kigiel hi. a unpi-un pumkhat a suo thei nadingun thu kang ngen hi. 22Nang le kei pumkhat i suo bangin amate zong pumkhat a suo thei nadingin keima in nei pieh minthanna amate ka pie zo hi. 23Amate pumkhat a suo sieng thei nadingun amate sungah kei ka om a, kei sungah nang na om hi, tuaci’n kei leitunga nei sawl ahi lam le kei nei it bangin amate zong na it lam leitung mite in a thei ding uhi. 24Pa aw, nei piehsate in zong leitung pien masanga kei nei it zieha nei piehsa ka minthanna a mu dingin ka opna ah kei tawh amate ang op ding uh ka lunggul hi.
25“A thuman ka Pa aw, leitung mite in ang thei sih vangin keima in nang kang thei hi; tuale tamte in zong kei nei sawl lam a thei uhi. 26Amate na min ka theisah zo ta a, amate sungah kei nei itna za itna a op thei nading le, amate sungah kei ka op thei nadingin keima in na min ka theisah lai ding hi,” a ci hi.
المحددات الحالية:
JOHN 17: ZBOTF01
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Zo Bible © Bible Society of Myanmar, 2018.