LUKE 15
15
Tuu Mang Thugentena
(Mat 18:10-14)
1Tua ciengin a thugen ngai dingin siehdongte le mawneite in ama a nai uhi. 2Tuale Pharisee-te le thukham hil siete in, “Tam mipa in mawneite ngai-in an a neton hi,” ci-in a phun uhi.#Luk 5:29-30
3Tuaci’n ama in amate kungah tami thugentena a gen hi: 4Note lahah mi khat in tuu zakhat nei a, tua sung panin khat mansuo leh, gamlahah sawmkuo le kuote nuasie-in a mu masangsie-in tua a mang pen a sui lo ding koi na hi uh ahei? 5Ama in a mu ciengin lungdamin a liengko-ah a puo hi. 6Inn a tun ciengin a lawmte le a vengte hlanin, ‘Ei lungdampi un, azieh pen a mangsa ka tuu ka mukia ta hi,’ a ci hi. 7Tua ma bangin ke’n kang ci-in, vantung gamah kisiakia ding a kisam lo midih sawmkuo le kuote sangin a kisiakia mawnei mi khat tungah lungdamna lienzaw ding hi.
Sum Mang Thugentena
8“Tua ahi sihle numei khat in dangka#15:8 Gk “drachmas”, nasempa khat in a nga nitha tawh kikim hi. tang sawm nei-in khat mansuo leh tua nu in meivah vahin innsung teng phietin a mu masang limtahin sui lo ding amah? 9Tua sum a mu ciengin a lawmte le a vengte hlanin, ‘Ka sum mansuo ka mukia ziehin ei lungdampi un,’ a ci hi. 10Ke’n kang ci-in, tua ma bangin a kisiakia mawnei mi khat ziehin Pasien’ vantung mite lungdam mama uhi,” a ci hi.
Tapa Taimangpa Thugentena
11Tua ciengin Jesu in, “Mi khat in tapa ni nei hi. 12A nauzaw pa in a pa kungah, ‘Pa aw, ka nga ding gou teng ei pie in,’ a ci hi. Tuaci’n a pa in a neisa teng a ta tegel a hawmpieh hi. 13Ni tawmkhat zaw ciengin a naupa in a neisa zosie khawmin a gamla mama gam khatah zin a, tua gamah a neisa teng a phengzah sieng ta hi. 14A neisa teng a zah sieng zaw ciengin tuami gam buppi-ah kielpi tung a, ama zong neh ding a kitasam ta hi. 15Tuaci’n tua gammite khat kungah sum thalaw dingin pei a, tuapa in a lo-a voh an pie dingin a sawl hi. 16Ama in vohte neh begapte a dugaw mama a,#15:16 Adang tang laibute ah “tua tawh a gil a vasah a” ahi vangin koima in bangma khat beh pie lo hi. 17Ahi vangin ama in thu a ngaisut theikia ciengin, ‘Ka pa guoisa nasemte in khawn tal loin an khamval tampi a nei ding vua, ahi vangin kei lah tam sungah gilkiela a si ding ka hi ta hi! 18Kei tho-in ka pa kungah ka pei ding a, “Pa aw, vantunga Pasien le nangma mai-ah ka khiel zo ta hi. 19Na tapa ci dingin zong ka kilawm nawn sih hi; na guoisa na nasemte khat bangin kei ei bawl lel in,’ ka ci ding hi,” a ci hi. 20Tuaci’n ama tho-in a pa kungah a pei hi. Ahi vangin gamlapi mun khatah ama a gei laitahin a pa in na galmu a, khuotuohuoi a sa hi; tuale ama zong tai phei pai-in na ngawngkawi a, a na nam vatuh hi. 21Tua ciengin a tapa in a pa kungah, ‘Pa aw, Pasien le nangma mai-ah ka khiel zo a, tu-a kipanin na tapa ci dingin zong ka kilawm nawn sih hi,’#15:21 Adang tang laibute ah “na guoi na nasemte khat bangin ei bawl lel in” a ci hi. 22Ahi vangin a pa in a silate kungah, ‘Mallangin puon hoipen khat hing la unlen ama silsah un; a khutah khutsip bunsah unlen a kengah kedap zong bunsah un. 23Tuale bawngno thau khat manin go unlen, tua khu ne-in lungdamin pawi bawl vai; 24azieh pen tami ka tapa a sisa ahi a, ang hingkia ahi hi; ama pen a mangsa ahi a, tu-in a kimukia ahi hi!’ a ci hi. Tuale amate lungdamin pawi bawl a kipan uhi.
25A tapa uzaw pen lo kuon hi a, vai pei-in inn a tun kuon ciengin tumging le lamnate a za hi. 26Ama in silate khat hlanin bang kibawl ahei, ci-in a dong hi. 27Tuapa in, ‘Na naupa ang tungkia a, cidam ludamin ama ang tun ziehin na pa in bawngthau khat a gaw hi,’ a ci hi. 28Tua ciengin ama lungthah mama a, inn sungah a lut nuom ta sih hi. A pa pusuohin ama a va zawl ta hi. 29Ahi vangin ama in a pa kungah, ‘En in! Tami kum tampi sungin silate khat bangin nangma adingin na ka sem a, na thu zong kang niel ngai sih hi; hizongle ka lawmte tawh ka guolnop thei nadingin keelno khat zong nei pie ngai nai sih hi. 30Ahi vangin tu-in numei pahtatte tawh a neisa teng a netum tami na tapa ang tun ciengin bawngno kivathau na go hi!’ a ci hi. 31Tua ciengin a pa in ama kungah, “Ka ta aw, keima tawh nang na om den a, ka neisa zosie nangma-a’ ahi hi. 32Ahi vangin tami na naupa pen a sisa ahi a, ang hingkia ahi hi; ama a mangthapsa ahi a, a kimukia ahi tah ziehin kipahna le guolnopna bawl ding a kilawm ahi hi,’ ci hi,” a ci hi.
المحددات الحالية:
LUKE 15: ZBOTF01
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Zo Bible © Bible Society of Myanmar, 2018.