LUKA 10
10
Sawmsarihte tirh chhuah
1Tin, chumi zawhah chuan Lalpan mi dang sawmsarih a ruat a, a kalna tûr khaw tinah leh hmun tinah, a hmaah pahnih zêlin a tîr a. 2Tin, an hnênah, “Buh seng tûr a tam hle a; nimahsela, a thawktute an tlêm; chutichuan, a buh seng tûra thawktu tûrte tîr tûrin buh Neitupa hnênah chuan ngên rawh u. #Mt 9.37-38
3Kal rawh u; ngai teh u, chinghne zînga berâmno awm angin ka tirh che u hi. #Mt 10.16 4Tangka ip te, iptê te, pheikhawk te keng suh ula, kalkawngah tu mah chibai bûk suh u. #Mt 10.7-14; Mk 6.8-11; Lk 9.3-5 5Tin, in luhna in apiangah a hmasa berin, ‘He inah hian thlamuanna thleng rawh se,’ ti ang che u. 6Tin, chutah chuan thlamuanna fa a awm chuan, in thlamuanna thu chu a chungah a awm reng ang; a awm loh erawh chuan in chungah a lo kîr leh ang. 7Chumi inah chuan awm reng ula, an pêk apiang che u eiin bâr ang che u; hnathawktu chu hlawh hmu tlâk a ni a. In tinah kal lâwr suh ang che u. #1 Kor 9.14; 1 Tim 5.18
8Tin, khua in luhna apiangah an lawm che u chuan, an hlui apiang che u chu ei ang che u; 9an khuaa damlo awmte pawh tidam ula, an hnênah, ‘Pathian ram in kiangah a lo thleng ta,’ ti ang che u. 10Khua in luhna apiangah an lawm loh che u erawh chuan, an kawtthlêrahte kal chhuak ula, #Tirh 13.51 11‘In khaw vaivut kan kephaha kai pawh hi in chungah kan tah fai hi; nimahsela, Pathian ram in kiangah a lo thleng ta tih hi hre rawh u,’ ti ang che u. 12Ka ti a che u, chumi nîah chuan chumi khuate tuar tûr ai chuan Sodom khaw tuar tûr chu a zia a awm zâwk ang. #Gen 19.24-28; Mt 10.15; 11.24
Ring duh lo khuate
(Mt 11.20-24)
13Korazin, i chung a pik e! Bethsaida, i chung a pik e! Nangmahnia thilmak tak tihte kha Tura leh Sidon khuaa tih ni sela, saiip puan sina vut zînga ṭhuin an sim daih tawh ang. #Is 23.1-18; Ezek 26.1—28.26; Joel 3.4-8; Amos 1.9-10; Zak 9.2-4 14Nimahsela, ngaihtuah nîah chuan nangni tuar tûr ai chuan Tura leh Sidon khaw tuar tûr chu a ziaawm zâwk ang. 15Tin, nang Kapernaum, vân thlengin chawimawi i ni dâwn em ni? Mitthi khaw thlenga nam thlâk asin i nih dâwn. #Is 14.13-15
16Tu pawh nangni thu ngai chu keima thu ngai a ni e; tu pawh a duh lo che u chu kei mi duh lo a ni e; tu pawh kei mi duh lo chu mi tîrtu duh lo a ni e,” a ti a. #Mt 10.40; Mk 9.37; Lk 9.48; Joh 13.20
Sawmsarihte lo kîr leh thu
17Tin, sawmsarihte chu lâwm takin an lo hâwng a, “Lalpa, ramhuaite pawh i hming avângin kan thû thûin an awm,” an ti a. 18Tin, ani chuan an hnênah, “Ṭêk anga Setana vân aṭanga a lo tla kha ka hmu asin. 19Ngai teh u, rûlte, khawmualkaikuangte rah theihna thu ka pe che u a; eng mahin a tina tawp lo vang che u. #Sam 91.13 20Nimahsela, ramhuaite in thû thûa an awm avâng hian lâwm suh u; vâna in hming ziak a nih avângin lâwm zâwk rawh u,” a ti a.
Isua a lâwm
(Mt 11.25-27; 13.16-17)
21Tin, chumi lai tak chuan Isua chu Thlarau Thianghlimah a lâwm êm êm a, “Aw ka Pa, lei leh vân Lalpa, nangin mi fing leh mi bengvârte hnênah hêng thu hi i zêpa, nausênte hnêna i puan avâng hian ka fak a che; a ni, ka Pa, chutiang tih chu i ngaihin a ṭha a ni. 22Ka Pain engkim mi kawltîr tawh, Fapa chu tu nge a nih, Pa lo chuan tu mân an hre lo; Pa pawh chu tu nge a nih, Fapa leh an hnêna Fapain a puan duhnate chauh lo chuan tu mân an hre lo,” a ti a. #Joh 3.35; 10.15
23Tin, zirtîrte lam a hawi a, a rûkin, “In thil hmuhte hi a hmuhna mitte chu a vânnei e! 24Ka ti a che u, zâwlnei tam tak leh lal tam takte pawhin in thil hmuhte hi hmuh an châk ṭhîn a; nimahsela, an hmu si lo; benga in hriatte pawh hi hriat an châk ṭhîn a; nimahsela, an hre si lo a ni,” a ti a.
Samari mi ṭha tehkhin thu
25Tin, ngai teh, dân hretu tu emaw a ding a, amah fiah nân, “Zirtîrtu, chatuana nun neihna tûrin engtin nge ka tih ang?” a ti a. #Mt 22.35-40; Mk 12.28-34 26Tin, ani chuan a hnênah, “Dân lehkhabuah eng nge inziak ni? Chutah chuan eng nge i chhiar ṭhin?” a ti a. 27Tin, ani chuan, “ ‘Lalpa i Pathian chu i thinlung zawng zawngin, i thlarau zawng zawngin, i chakna zawng zawngin, i rilru zawng zawngin i hmangaih tûr a ni,’ ‘Nangmah i inhmangaih angin i vêngte pawh i hmangaih tûr a ni,’ tih hi,” a ti a, a chhâng a. #Lev 19.18; Deut 6.5 28Tin, ani chuan a hnênah, “I chhâng dik zet mai e; chutiang chuan ti la, i nung ang,” a ti a. #Lev 18.5
29Ani erawh chuan thiam inchantîr a tum a, Isua hnênah, “A nih leh, ka vêngte chu tute nge ni?” a ti a.
30Isuan a chhâng a, “Tu emaw Jerusalem khua aṭangin Jeriko khuaah a zuk kal dâwn a, suamhmangte a tâwk hlauh va, chu mite chuan a silhfên an hlihsak vek a, an vaw nek a, thi lek lekin an kalsan ta a. 31Tin, puithiam tu emaw chumi kawngah chuan a zuk kal kher a, a hmuh veleh kawng sîr lehlamah a hêl ta mai a. 32Tin, chutiang bawkin Levia chi mi pakhat pawhin, chumi hmun chu a lo thleng a, a hmuh veleh kawngsîr lehlamah a hêl ve ta mai a. 33Amaherawhchu, Samari rama mi tu emaw a zin kalin a awmna chu a lo thleng a, a hmuh veleh a khawngaih êm êm a, #2 Chr 28.15 34a hnênah a va kal a, a pemahte chuan hriak leh uain a leih a, a tuam a, ama sa chungah a chuantîr a, khual bûkah a kalpui a, a enkawl ta a. 35Tin, a tûkah chuan duli pahnih a phawrh a, khual bûk vêngtu hnênah a pe a, ‘Lo enkawl la, hemi bâka i sên zawng chu ka lo kîr leh hunah ka rawn rûl leh ang che,’ a ti a.
36Chu mite pathum zîngah chuan, suam hmangho tâwka vêngte chu tu ber nge nia i rin?” a ti a. 37Tin, ani chuan, “A khawngaihtu chu,” a ti a. Tin, Isuan a hnênah, “Nang pawh chu ang bawk chuan va ti ve rawh,” a ti a.
Isuan Marthi leh Mari a tlawh
38Tin, an zin pahin khaw engah emaw a lût a; tin, hmeichhe pakhat a hming Marthiin a lo thleng a. #Joh 11.1 39Chu mi chuan laizâwn pakhat a nei a, a hming chu Mari a ni a, chu mi chu Lalpa ke bulah a ṭhu a, a thu a ngaithla a. 40Marthi erawh chu rawngbâwl ngawtin a buai hle a; tichuan, a hnênah a lo kal a, “Lalpa, ka laizâwnnun keimah chauh rawngbâwl tûra mi thlahthlam hi pawi i ti lo vem ni? Mi pui tûrin ti rawh khai,” a ti a. 41Tin, Lalpan, “Marthi, Marthi, thil tam tak i ngaihtuah a, i buai a nih hi; 42thil pakhat chauh a pawimawh e: Marin chan ṭha chu a thlang a, chu chu lâk sak tûr a ni lo ve,” a ti a, a chhâng a.
المحددات الحالية:
LUKA 10: MIZOVBSI
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Mizo OV - Re-edited Bible
© The Bible Society of India, 2017.
Used by permission. All rights reserved worldwide.