JOHAN 6
6
Bawipa Jesuh naw Chang Phia-hma-kip Ei M’bei ci
(Mt 14:13-21; Mk 6:30-44; Lk 9:10-17)
1Cun kawn ah Bawipa Jesuh cu Kalile tuili (Tiperih tuili) hei ga lam ah vang kat ci. 2Gawpai ci gui a gai sak ba gui cäi aih vai ah hmu tu te ci gui ah chang akda naw a hnu ah läk lawk ci gui. 3Bawipa Jesuh cu m’htung khan ah hang kai ne, ang düihpüi gui awn a täng ah ngok ci gui. 4Cun yah ung Jew chang gui ah phiawn nak pawi cu ng’et lawk ci. 5Bawipa Jesuh naw a pei ah chang akda a law hmu netah, “Chang shikchü naw a ei vai a hawi khleih vai ang?” cine Philip cu ng’shik ci. 6(Cun cu Philip am nüm nak ah ang shi ah kyak ci, a mät naw a i a bi vai avan hmat pyi ci.)
7Philip naw, “Ngui phia-goi phu khleih ung phi, chang shikchü naw api ciah phi käng küh khai gui nei” cine pyein ci.
8Ang düihpüi tumat Siomn Peter ah anau Andrew naw, 9“shi ah ak hmaw tumat naw m’hut pum hma la nga pahnih sho ci nei. Cun ung phi chang shikchü-am ng’büh khai ah käm bei hlawt vai nei” cik ci.
10 Bawipa Jesuh naw, “Chang gui cu ngoh sak gui vä” cik ci. (Cun yah ah ngoh nak vai nep ci.) Cun ah kyasei phia-hma-kip ah däm ciah chang gui cu ngok ci gui. 11Bawipa Jesuh naw m’htut cu la ne Khanpughi ah taigü netah, chang gui-am tei gui ci. Nga phi la ne tei gui ci. 12Chang avan naw ami phü ciah ei ci gui. Chang avan naw ei ne ami phü kawn ah Bawipa Jesuh naw ang düihpüi gui-am, “Ami ei pawih gui käng theh-en khai ah m’dawn ne gim ba vä” cine kyak na gui ci. 13M’htut pum hma la nga pahnih Bawipa Jesuh naw a tei, chang gui naw ami ei pawih avan m’dawn ba u sei, them-dawn gha-lei-goi ung be lawk ci.
14Cun ah Bawipa Jesuh naw cäi aih vai abi gui hmu tuk ciah chang gui naw, “Shin ah chang cu khomdek khan ah gawk lawk khai ami ciah, profet akcang ah kyak ci nei” cik ci gui.
15Cun ah chang gui naw Bawipa Jesuh cu, ghangpughang ah ling ne k’hmoh lawk khai gui ah hmat netah, amät bäng khomhtung khan ah kai ne om ci.
Bawipa Jesuh Tui Khan ah Hteit Ci
(Mt 14:22-23; Mk 6:45-52)
16Mühun lam ah Bawipa Jesuh ah ang düihpüi gui cu, Kalile tuili ah yu kyum ba u ne, 17hleiko ng’cum ne Kapenaum gawnu gaa ah vang kat vü ba ci gui. Khomü law güt sei Bawipa Jesuh cu ang düihpüi gui ah om nak ah kä gawk law ba ci. 18Cun yah ung kho ng’pheet ne khi law sei, tuili ung tui ng’hnawk lawk ci. 19Ang düihpüi gui cu, maing thum phli vai ung hleiko awn ami hteh kawn ah Bawipa Jesuh cu tui khan ah ng’düi ne ana a vü sei hmu u netah, cäicat ne kyikyawk ci gui.
20 Bawipa Jesuh naw, “Kä kyikyawk vä, kei nei” cik ci. 21Cun kawn ah ang düihpüi gui cu yeikyai u ne, Bawipa Jesuh cu ng’hleiko khan ah ana dou ba ci gui. Acun vai-am vang gaa tui kam ah gawk ne va kai ci gui.
Chang Gui Naw Bawipa Jesuh Shui Ci Gui
22A ngawi ung vang gaa ah om shüt ciah chang gui naw, hleiko tumat om te ci, cine shui ba ci gui. Acun ah hleiko ung Bawipa Jesuh kä om tu sei, ang düihpüi gui bäng ami hteh ba cu hmuk ci gui. 23Cun ung phi Tiperia ah kaa lawk ciah hleiko gui cu Bawipa Jesuh naw taigü ne chang akda-am ei am bei nak gui te ah pei ah gawk lawk ci gui.
24Chang gui naw acun ung Bawipa Jesuh la ang düihpüi gui cu kä hmu u netah, hleiko ung kai ba ne Bawipa Jesuh shui ba khai gui ah Kapenaum kho gaa ah vang kat vü ba ci gui.
Bawipa Jesuh cu Ghin nak M’htut ah kyak ci
25Chang gui naw Bawipa Jesuh cu tui vang gaa täng ah hmu ba u netah, “Sayapa, a i yah ung shin gaa ah na gawk law ba ci-ang?” ci ne ng’shik ci gui.
26 Bawipa Jesuh naw, “Kei naw akcang ka pyein cu, nangmi naw kei nami na shui cu, cäi aih vai kabi nami hmuhmat su ah kä kyak ci, m’htut nami phü ah nami ei tu ah hmawk ah kyak ci. 27Shekaa thei ciah ah ei awk cu käk tha nah ne, kä shekaa thei ciah, angtäi ghin nak ah ei awk cu tha na vä. Khanpughi naw hlüngtai nak a ap pyi ah kyasei, chang ah Htapa naw cun ah ei awk cu nangmi-am ning pe gui khai nei” cine m’cäi gui ci.
28Chang gui naw, “Keimi cu Khanpughi ah ng’yak hlü ah kami hnünthawh hning vai ah a i ang kami bi kaw?” cine ng’shik ci gui.
29 Bawipa Jesuh naw, “Khanpughi ah ang yak hlü cu amät naw a tüih law ah akchang cu nami yum vai ah kyak ci nei” cine kyak na gui ci.
30Cun ah chang gui naw, “Keimi naw hmu u netah, kami ning yum nak hning vai ah, a i cäi aih vai gui ang nam dang kaw? 31A i gui ang nabi kaw? Cacim theing ung, “Ani naw khankho ah kaa m’htut cha lawk ci” ciah a om ah mäih ah kami pughi gui naw, bungpuk khong-gau ah Mannah m’htut cu ei ci gui nei” cik ci gui.
32 Bawipa Jesuh naw, “Kei naw akcang ka pyein cu Moses ah ning peit gui ah m’htut cu, khankho ah kaa ei awk ah kä kyak ci, Kapa Khanpughi naw a ning peit gui cu, khankho ah kaa m’htut akcang ah kyak ci. 33Khanpughi ah na peit gui ah m’htut cu, khankho ah kaa kyum law ne, khomdek chang gui-am ghin nak pe gui ciah kyak ci,” ci ne m’thein gui ci.
34Cun ah chang gui naw, “Bawipa, cun ah m’htut cu keimi am angtäi sei na pe gui ä” cine ng’yoi ci gui.
35 Bawipa Jesuh naw, “Kei cu ghin nak m’htut ah ka kyak ci, kei ah lawk cicu a i sangung phi ei kä cawi ba khai; kei na yum cicu a i yah ung phi tui kä gha ba khai. 36Cun ung phi nangmi naw, kei cu, na hmu lang u ne, kä nami na yum ci, ka ci pyi ci nei. 37Kapa naw a na ap ah chang phung cu kei ah lawk khai gui. Kei ah lawk ciah chang phung cu a u phi kä ka m’hlat ba khai. 38A i ah kyasei ci ung, kei cu kamät ah ng’yak hlü ka bik khai ah khankho ah kaa ka kyum lawk ciah kä kyak ci, na tüi lawk ciah ng’yak hlü ka bik khai ah ka kyum lawk ciah kyak ci. 39Na tüi lawk ciah ang yak hlü cu, amät ah na ap ah chang gui di maih nak ung kä gawk khai gui ah, akhnu hnüüp ung sihnak ung kaa ka thawh ba sak gui vai ah kyak ci. 40Kapa Khanpughi naw A Htapa hmu ne yum ciah chang phung cu, angtäi ghin nak a gah vai ah ng’ya hlük ci. Kei naw phi, ngami cu, akhnu hnüüp ung sihnak ung kaa, ka thawh ba sak gui khai” ci ne m’thein gui ci.
41 Bawipa Jesuh naw, “Kei cu khankho ah kaa kya lawk ciah m’htut ah ka kyak ci” cik ci. Cun a cicu chang gui naw ngai khit u netah, 42“Shin ah chang cu Josef ah hta, Jesuh ah kä kya ne ang? Ani ah anu la apa phi mi hmat yawp ci maw, a i ah kyasei tuhbäi, ‘Kei cu khankho ah kaa ka kyum lawk ci’ a ci ang?” cik ci gui.
43 Bawipa Jesuh naw, “Nami mät naw kä ngaih-tüh khit vä, na tüi lawk ciah Kapa naw kä a law püi ung, 44a u phi kei ah kä law hlawt khai, kei ah lawk ci cu akhnu hnüüp ung sih nak ungka ka thawh sak ba khai. 45Profet gui ah ca guk ung, “Chang avan cu Khanpughi naw m’theithang gui khai, Kapa ah ng’thu ng’ya ne akni ah ng’thei ci gui phung cu kei ah law ci gui. 46Kei naw ka pyein hlü cu, chang naw Khanpughi hmu man ci, ka ci ah kä kyak ci, Khanpughi ungka lawk ciah chang bäng naw, Khanpughi cu hmu man ci.
47Kei naw akcang ka pyein cu, “Kei na yum ciah chang cu angtäi ghin nak gah ci. 48Kei cu ghin nak m’htut ah ka kyak ci. Nami pughi pa gui cu, 49bungpuk khonggau ah, mannah m’htut cu ei u ne phi, si yawp ci gui. 50Cun ung phi khankho ah kaa kya lawk ciah m’htut ei ci cu, sih nak kä hmuk khai. 51Kei cu khankho ah kaa kya lawk ciah ghing ciah m’htut ah ka kyak ci. Cun ah m’htut ei ciah chang phung cu, angtäi ah ghing khai. Kei naw ka ning peit gui ah m’htut cu, khomdek chang gui naw ghin nak ami gah nak vai ah, ka sa ah kyak ci,” cine m’thein gui ci.
52Cun ci khätah chang gui naw, “A i hawkchaa ah ani naw mi ei vai ah asa na pe gui khai ang?” cine m’lungshe ne ng’cuh ci gui.
53 Bawipa Jesuh naw, “Kei naw akcang ka ning m’thein gui cu, chang ah Htapa ah asa kä ei ne, asi kä nami awk ung, nangmi naw ghin nak kä nami gah khai. 54Kei ah sa ei ne kei ah si awk ci cu, angtäi ghin nak gah ci, akhnu hnüüp ung ani cu kei naw sih nak ungka ka thawh ba sak khai. 55Kei ah sa cu ei akcang ah kyak ci, kei ah si cu awk akcang ah kiak ci. 56Ka sa ei ne ka si awk cicu kei ung om ci, kei phi ani ung ka om ci. 57Ghing ciah Kapa naw ana tüih law ah kya ne, kei cun phi Kapa awn ka ghing ci. Acun ah mäih ah kei na ei ciah chang cu, kei awn ghing khai. 58Shin ah m’htut cu khankho ah kaa kya lawk ciah kya ne, ei kawn ah sik nak ah kyak ciah, nami pupa gui ah ei ah m’htut awn kä täng ci. Shin ah m’htut ei ciah chang phung cu angtäi ah ghing khai” cine m’thein gui ci.
59Shin gui cu Kapernaum gawnu ah pum im ung Bawipa Jesuh naw am theithang gui ah kyak ci.
A ngtäi Ghin nak ah Ng’thu Gui
60A hnu ah läk ci gui ah chang akda naw, shin ah ng’thu gui cu ng’ya u netah, “Shin ah am theithang gui cu ghaat aih ci, a u naw läk m’khüt khai ang?” cik ci gui.
61Cun ah ami ngaih khit cu a u naw kä am thein ah, Bawipa Jesuh naw hmat netah, “Shin ah ng’thu ah hmawk ah nami m’lungk’si ne ma? 62Chang ah Htapa cu a om nak htük ah kho ah a hang kai vü ba nami hmuh law ung mä, a i ah nami ngai khai ang? 63Khanpughi ah Mumcha Theing naw hnun gui cu ghin sak ci, chang ah hlüngtai nak naw a i käm khüt ci. Kei naw tuhbäi ka ning m’thein gui ah ng’thu cu, Khanpughi ah ghin nak Mumcha ah kyak ci. 64Cun ung phi nangmi ungka amshah naw kä yum ci” cine kyak na gui ci. (Kä yum tuk ciah chang gui la ga ah kut ung ap khai ah chang cu Bawipa Jesuh naw akhtük ge ung hmat ci.) 65Cun ah kyasei Bawipa Jesuh naw, “Kei naw tuhbäi ka pyein hlü cu, Kapa Khanpughi naw kä am gein ung a u phi, kei ah kä law hning ci” cine pyen na gui ci.
66Cun ung tün ne Bawipa Jesuh ah angkhah püi gui akda cu kängläk tu ba ne ng’hlat ba shüt ci gui. 67Cun ah kyasei Bawipa Jesuh naw, angdüihpüi chang gha-li-goi am, “Nangmi mä, kei ah hnu ah nami na läk nak ungka nami ng’hlat ba hlük ci ang?” cine ng’shi gui ci.
68Simon Peter naw, “Bawipa, a u ah om nak ah keimi kami hteh vai ang? Nang Bawipa bäng naw vah angtäi ghin nak ah ng’thu cu na pyein ci. 69Nang cu Khanpughi ungka kyum lawk ciah, khanchang theing ah na kiak cu, tuhbäi hmat ne kami ning yum ci nei” cine pyein ci.
70 Bawipa Jesuh naw, “Kei naw chang gha-lei-goi ka ning ghü gui ciah kä kya ne ang? Cun ung phi nangmi ungka chang tumat cu, khoshe ah kyak ci nei” cine pyen na gui ci.
71Simon Iskariot ah hta Judas cu, angdüihpüi gha-lei-goi ung kaa ah kya tu pang ne phi, Bawipa Jesuh cu gaa ah kut ung ap khai ah chang ah kya khätah, cun ah a pyein ah kyak ci.
المحددات الحالية:
JOHAN 6: CBC
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Cho Bible Common Language © Bible Society of Myanmar, 2016.