LUKA 13
13
Nami Kat nak Nami Ng’zu Ba Baw Vai Nami Sih Baw Vai
1Cun yah ung chang amshah gui cu Bawipa Jesuh ah law u ne, Khanpughi ah ami taigü yah ung Pilat naw a ngawn gui ah Kalile chang gui ah a mawng pyein lawk ci gui. 2Bawipa Jesuh naw, “Cun ah chang gui cun ah ami ngawn gui cu, a hei Kalile chang gui ah mä katnak bi pi ci gui ah nami ngai ci ma? Ngami cu katnak bi pi ci gui ah kä kyak ci nei. 3Cun ah mäih ah nangmi phi kä nami ng’yu ba ung sih maih nak ung nami gawk khai. 4Siloam tänghän ng’gäi sei sik ciah chang sing gha-lei-cheit mä Jerusalem ah om ciah chang gui yah tah katnak bi pi ci gui ah nami ngai ci ma? 5Ngami cu kat nak bi pi ci gui ah kä kyak ci, ci cu ka ning m’thein gui hlük ci. Cun ung nangmi phi kä nami ng’yu ba ah a kiak ung ngami ah mäih ah nami si tuk khai” cik ci.
Kä M’theih Ciah K’thei ghing awn Amtumtäng Nak
6Cun kawn ah Bawipa Jesuh naw shin ah m’tumtäng nak pe gui ci. Chang tumat ah chaam kyong ah ami geit ah k’thei ghing tumat om ci. Ka mah law ne teng law netah, cun ah thei ghing ah am theih cu kä hmuk ci. 7Ka mah naw, “Kei law ne, shin ah thei ak theih la kä ak theih ah ka teng law nak kum thum law lawk ci. Cun ung phi pum ät ah phi kä m’theih ci, cun ne ghawt-en ä, khomdek tai düt ci nei” ci ne chaam ngäng ci-am pyen nak ci. 8Chaam ngäng ci naw, “shin ah thei ghing kum ät om ba cang sä, m’dek ni awn vui ne ka m’htah ba cang khai nei. 9Hngeng kum läi m’theih khai nei, kä a m’theih ah a kyak ung chu pit ne ghawh vai nei, cine pyein tu ba ci” cik ci.
Bawipa Jesuh Naw Ng’khem Ciah Hnumi Pum Hnüüp ung A Gai Sak ah Mawng
10Pum hnüüp ung Bawipa Jesuh cu pum im ah m’theithang gui ne om ci. 11Acun ah khoshe naw kai sei, khokum gha-lei-cheit ung ng’khem ne ng’yän ciah hnumi tumat om ci. 12Ani cu ak khei ng’khun sei kä yäih ba hlawt ci. Bawipa Jesuh naw cun ah hnumi cu hmu netah, a pei ah khü ne, “hnumi aw, na gaw nak maih pyi ci nei” ci netah 13ak khan ah a kut taih sei, ani cu acun vai-am ak khei yäih ba sei gai ba ne, Khanpughi m’hlüngtai ci.
14Cun ah Bawipa Jesuh naw pum hnüüp ung ak gaw am gai ba ah, phäh ah pum im ngäng cicu m’lung k’she netah, “Bi bi nak vai kho hnüüp chuk om ci. Acun yah ung law ne gai nak nami ng’yoih law vai, Pum hnüüp ung kä nami law-en vai,” cine chang gui am pyen na gui ci.
15 Bawipa Jesuh naw, “Chang thuvi gui, ‘Nangmi cu pum hnüüp ung nami sei gui, nami k’se gui gui k’phian ne saw ne tui nami tu man ciah kä kya ne ang? 16Abraham ah hta ah kä kyak ciah shin ah hnumi cu khokum gha-lei-cheit ung satan ah khih pawn nak gah ci. Ani cu cun ah khih pawn nak ungka pum hnüüp ung kä m’hlawt vai ma?” cik ci. 17Cun ci khätah, Bawipa Jesuh ah a gaa gui cu ng’aa ci gui. Chang gui akda cu Bawipa Jesuh naw cäi aih vai abi gui ah hmawk ah yeikyai ci gui.
Anhta Ui Awn Amtumtäng Nak
(Mt 13:31-32; Mk 4:30-32)
18 Bawipa Jesuh naw, “Khanpughi ah uknak ah kho cu a i awn täng ci ang? 19A i awn m’tumtäng vai ang? Khanpughi ah uknak kho cu shin ah mäih ah kyak ci. Anhta ui cu chang tumat naw la netah, a lo ma ah geit ci. A ui cu ng’lih pyou ne phung ghing law sei, ang ban ung kha gui ngo ne ng’bu tuk ci gui” cik ci.
K’caw Awn Amtumtäng Nak
(Mt 13:33)
20Cun kawn mä Bawipa Jesuh naw, “Khanpughi ah uknak ah kho cu a i awn m’tumtäng vai ang? 21Cun cu shin ah mäih ah kyak ci. Hnumi tumat naw k’caw la netah m’htut den pyi them thum ung k’caw sei m’htut avan tho ne pai ci” cine pyein ci.
Ng’hteik Ciah M’kawt
(Mt 7:13-14, 21-23)
22 Bawipa Jesuh cu Jerusalem ah a hteh nak lam ah gawnu gawhta a gawk nak päng ah hei m’hteihtang vü gui ne hteit ci. 23Chang tumat naw, “Sayapa, chang api naw ma hun nak ami gah kaw?” cine ng’shik ci.
Bawipa Jesuh naw, 24“Nangmi cu ng’hteik ciah m’kawt ung nami luh vai ah k’tha na vä. Chang akda naw cun ah m’kawt ung luh vai ah k’tha nak ci gui. Cun ung phi ami luh nak hlawt vai ah k’thagui kä om ci. 25Im ah naw choh khai sei, nangmi akpung ah nami om khai. Nangmi naw choh hei khäk ne, “Im mah aw, choh na ak hmawn tu gui ä,” ci ne nami kyak ung phi im mah naw, “Nangmi a hawi kaa nak mi lawk ci ang? Kä ka ning hmat gui ci nei” cik khai. 26Nangmi naw, “Keimi cu nang awn a täng ah mi ei awk ciah chang nei, keimi ah pigaw ung nang naw na na m’hteihtang gui te ci nei,” nami cik khai. 27Cun ung phi ani naw, “Nangmi a hawi kaa nami lawk ciah kä ka ning hmat gui ci, chang k’she gui a hei ah hteit vä” 28Nangmi naw Khanpughi ah uknak kho ah Abraham, Isaak la Jakob ni, profet ni gui cu, hmu tu lang u ci sei, akpung ah ami ning k’täm gui ung nami haa kyeet ne, kyap ne m’lau ne nami kyak khai nei. 29Chang gui cu a htum a siip ak khei ak kiang ah kaa law u ne, Khanpughi ah uknak pawi ung hteit khai gui. 30Cun ah kho hnüüp ung tuhbäi hnu ciah chang cu ma khai, tuhbäi ma ciah chang cu hnu khai” cine m’cäi gui ci.
Bawipa Jesuh Naw Jerusalem Am Hni Nak
(Mt 23:37-39)
31Cun yah ung Pharisee gui law u ne, “A hei lam ah hteit ne om mei ä, Herod mang naw ning ngawn khai pawng ci nei” cik ci gui.
32 Bawipa Jesuh naw, “Kei cu tuhngawi la ngawi yung khoshe gui k’täm ne, ak gaw gui ka gai sak gui khai. Ak hnüüp thum ung ka bi cu ka pyi khai nei cine kyak ci, ciah sa ui-am m’thein ba vä. 33Cun ung phi tuhngawi, ngawi ung la cituh cu, ka lam ung ka hteit gäk gäk khai. Profet nak cicu Jerusalem ah kawn ah a hawi phi chang naw a ngawn vai ah kä ng’hlawi ci nei” cine pyein ci.
34“Aw Jerusalem, Jerusalem, Profet gui na ngawn ci, Khanpughi ah ng’shä chang gui lung awn na vawi ci, ai nu naw ai hta gui ak boop gui ah mäih ah kei naw nang ah hta gui ka k’bum nak hlü gui cu da lawk ci, cun ung phi nang naw, kä na ng’ya hlük ci. 35Cun ah kyasei, nang ah pum im cu Khanpughi naw nawng lawk khai, kei naw akcang ka pyein cu, Khanpughi ah ang ming awn lawk ci cu, ang mingthang sä! cine na kyak nak ah hnüüp kä a gawk pha ah chuih kei cu kä na na hmuk khai nei” cine m’thein gui ci.
المحددات الحالية:
LUKA 13: CBC
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Cho Bible Common Language © Bible Society of Myanmar, 2016.