LUKA 4
4
Bawipa Jesuh Atüihtok nak
(Mt 4:1-11; Mk 1:12-13)
1 Bawipa Jesuh cu Mumcha Theing awn be ne Jordan tuinu ah kaa law ba khätah, Mumcha naw bungbuk ah khah püi ci. 2Acu ah hnüüp phli-kip ung khoshe ah tüihtok nak gah ci. Hnüüp cun gütung Bawipa cu ei kä ei ah om ci kya ne ang htei ah ei cawi lawk ci.
3Cun kawn ah khoshe naw, “Nang cu Khanpughi ah hta ah na kyak ung shin ah lung cu m’htut ah pyang ä” cine pyen nak ci.
4 Bawipa Jesuh naw, “Cacim naw pyein ci, chang cu ei ei bäng awn ghing ciah kä kyak ci” cine kyak na ci.
5Akhnih vei nak ah khoshe naw, Bawipa Jesuh cu chaang ne, khomdek khan ung Bawimang uknak avan cu m’hnuh netah; 6“Shin ah bämang hlüngtai nak avan kei naw ka ning pek khai, shin gui avan cu kei ah kut ung om ci, a u-am phi kei naw ka pe hning ci. 7Kei na na khawihnah ung shin gui avan ka ning pek khai” cine pyen nak ci.
8 Bawipa Jesuh naw, “Cacim naw pyein ci, ‘Na Bawipa na Khanpughi bäng khawihnah taigü ne, ani ah bi bäng na bi vai” ci ne kiak nak ci.
9Cun kawn ah Bawipa Jesuh cu Jerusalem ah hteh püi ne, a hlüng nak pi k’bäih ah ngoh sak netah, “Nang cu Khanpughi ah htapa akcang ah na kyak ung, shin ung na ng’phäi khai; 10Cacim naw pyein ci,’ Nang ning m’htei khai gui ah Khanpughi naw khankho chang gui cu m’düih gui khai; 11Ngami naw ami kut naw ning chaang u sei, na kho phi lung naw kä ning plawh khai’ ciah om ci, cine pyein ci.
12 Bawipa Jesuh naw, “Cacim naw pyein ci,’ Na Bawipa la Na Khanpughi cu kä na phawtcam vai” cine pyen nak ci.
13Khoshe naw Bawipa Jesuh cu akda vei tüihtok netah ng’hlah ta ne a hei ah hteit ci.
Bawipa Jesuh naw Kalile Kho ung Tün ne Bi Bik ci
(Mt 4:12-17; Mk 1:14-15)
14 Bawipa Jesuh cu Mumcha Theing awn be ne, Kalile kho ung law ba khätah, ani ah mawng cu cun ah kho avan ung thang ci. 15Ani naw chang gui ah pum nak päng ah hteit ne m’theithang gui sei, chang gui naw m’hlüngtai ci gui.
Bawipa Jesuh cu Nazaret Kho ah Maa nak ci Gui
(Mt 13:53-58; Mk 6:1-6)
16Cun kawn ah Bawipa Jesuh cu a däm ng’vai law nak Nazaret gawnu ah hteit ba ci. Ani cu kyin hnüüp ung a hteh man ah, pum im ah hteit ne, cacim cu phat khai ah ng’düi law khätah; 17Pum im ngäng ciah chang naw profet Isaiah ah guk ah ca-uk cu pe lawk ci. Bawipa Jesuh naw cun ah ca-uk cu kawt netah;
18“Khanpughi ah Mumcha cu kei khan ah gawk law pyi ci,
Geinvai ci gui-am Thu Ni m’thein gui vai ah
Kei cu na ghü pyi ci,
Thawng ung kium ci gui ah phiawn nak vai,
A mik m’dauh ci gui ah m’dei ba nak vai la
Shedam nak gah ci gui ah phiawn nak vai ah mawng
shäu ne pyein vai ah kei cu ghü ne na tüi pyi ci
19Khanpughi naw akchang gui a hun nak gui ah khin
a gawk law ah mawng ng’shäu ne pyein vai ah,
Kei cu ana tüih law nei’ ciah cacim cu phat ci.
20 Bawipa Jesuh cu, aphat ah ca-uk chaw ne pum im ngäng ci-am pe be netah ngoh ba ci. Pum im kyong ah lawk ciah chang avan naw cäi ne teng ci gui. 21Bawipa Jesuh naw, “Shin ah cacim ung om ci cu, tuhbäi nami ng’yak ah mäih ah küm pyi ci nei” cine pyein ci.
22Chang gui naw ani cu m’tamkhah u ne, ang thu pyein cun phi ngaihtüh u netah, “Ani cu Josef ah hta ah kä kya ne ang?” ci ne kyak ci gui.
23 Bawipa Jesuh naw, “Nangmi naw, ‘Nang seibawi, na mät ah nat nak, na mät naw na gai vai ah m’htei ä’ ciah khuishui ah mäih ah nami na ng’thu püi khai, Kapernaum ah na bi ah mäih ah, na mät ah pigaw ung phi na bi vai, cine nami kyak khai; 24Bawipa Jesuh naw khen gui netah “Kei naw akcang ka pyein cu, a u profet phi amät ah pigaw ung a u naw m’tamkhah ne kä dou man ci nei” ci ne pyen na gui ci.
25Ka pyein cu ngai vä, Eliah a om yah ung Israel kho ung hmeinu akda om man ci. Cun yah ung kho kum thum la avang ung kho ng’kyang sei chang gui cawigha geinvai ci gui. 26Cun ung phi profet Eliah cu Khanpughi naw a u ah om nak ah phi kä tüih ah, hmeinu tumat ah om nak Sidon khopäng Zarephat pigaw bäng ung tüi ci. 27Profet Elisha ah om yah ung phi Israel chang gui akda khei-lei ung gaw u sei, a u phi kä gai sak ci, Sirian ah kaa Naaman bäng gai sak ci” cine m’thein gui ci.
28Cun ah ng’thu ng’ya u netah pum im kyong ah chang gui cu, m’lung she ci gui. 29Ami van ng’düi law u netah, Bawipa Jesuh cu ami pigaw m’htung lai ah kheing ung, buh hlit vai cine, hteh püi ci gui. 30Cun ung phi Bawipa Jesuh cu chang gui ah ng’lung ah lut ne, ahei lam ah hteit ei ci.
Mumcha She Ah Kai Chang Tumat
(Mk 1:21-28)
31 Bawipa Jesuh cu Kalile kho Kapernaum gawnu ah hteit ne, pum hnüüp ung pum im ah hteit ne m’theithang gui ci. 32Bawipa Jesuh ah ang thu k’aw cu huham ah aih khätah chang gui cu cäi ci gui. 33Cun yah ung khoshe ah kai chang tumat om ci. Acun ah chang naw m’lau ne, 34Nazaret ah kaa Jesuh awi, nang cu keimi awn a i ah na ng’mäihyah ci ang? Na na m’di gui khai ah ang na law? Kei naw, nang cu a u ah na kyak ah ka ning hmat ci nei, nang cu Khanpughi ah theingcim ciah ng’shä k’ni ah na kyak ci nei” cine pyein ci.
35 Bawipa Jesuh naw khoshe cu huuttaap ge ne, “Khoshe, kä chawkchek ne, shin ah chang ungka lut law ne, a hei ah hteit ä” cine k’täm ci. Acun vai-am, ami ma ge ung khoshe cu, chang a i ah phi kä plawh kheih shüt ah lut law ne dawng ci.
36Chang gui cu cäicat u netah, “A ni a i hlawk ah huham ah ne ang, khoshe hngaw aktäm hning? cine ami mät ng’ce ng’cäk u netah hteit ba ci gui. 37Bawipa Jesuh ah a mawng cu acun ah kho avan ung thang yawp ci.
Bawipa Jesuh naw Chang Akda Gai Sak Ci
(Mt 8:14-17; Mk 1:29-34)
38 Bawipa Jesuh cu pum im ungka kyum law ba ne, Simon ah im ah hteit khätah, Simon ah akchu ah anu, ang htei ah gaw sei anam htei ci gui. 39Bawipa Jesuh naw akgaw ah pei ah hteit netah, gawnak cu k’taap ge ne k’täm ci. Gaw nak maih sei, acun vai-am ani cu tho law ba ne, ngami cu khin na gui ci.
40Khohni a sip kawn ah chang gui naw akgaw gui akda law püi u sei, ak gaw gui ah khan ah tän ne a kut taih ne gai sak gui ci.
41Khoshe gui cu chang gui ungka lut law yawp u netah, “nang cu Khanpughi ah Htapa ah na kyak ci nei” cine ng’shäu u ne dawng yawp ci gui.
Bawipa Jesuh Messiah ah a kyak cu khoshe gui naw hmat ci gui ah kiasei, acun ah mawng kä ami pyein vai ah m’cäi gui ci.
Pum Im ah Bawipa Jesuh ah Ng’thu Pyein
(Mk 1:35-39)
42Kho thai law khätah Bawipa Jesuh cu, pigaw ungka ading gei nak ah hteit ci. Chang gui naw shui ba ne hmu law u netah, kä a hteh taak gui vai ah cho ci gui. 43Cun ung phi Bawipa Jesuh naw, “Kei cu Khanpughi naw ka hteit khai ana tüih law ah kyasei, Khanpughi ah uknak ah mawng ng’Thu Ni cu, akho hei yung ah phi hteit ne ka pyein khai nei” cik ci.
44Cun kawn ah Bawipa Jesuh cu Judah kho avan, pum im päng ung hteit ne ng’thu pyein ci.
المحددات الحالية:
LUKA 4: CBC
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Cho Bible Common Language © Bible Society of Myanmar, 2016.