MAKUH 11
11
Ng’näng Nak awn Jerusalem Mang Gaw ah Aluh ah Mawng
(Mt 21:1-11; Lk 19:28-40; Jn 12:12-19)
1 Bawipa Jesuh la ang düihpüi gui cu Jerusalem mang gaw k’et law u ne, Betfeit la Bethani gawnu pei Olive m’htung ah gawk lawk ci gui. 2Cun kawn ah Bawipa Jesuh naw ang düihpüi chang sing goi cu, shin ah m’cäi ne lam ma sak goi ci. “Mi hei ma ah om ciah pigaw ung ma ne ana hteit nä, pigaw ah nani luh vai-am a u naw phi kä ang cun nak man ah ng’se hta, gui awn khit ne ami k’pawn cu nani hmuk khai. 3Gui cu k’phian ne cun ah ng’se hta cu nani law püi vai. Chang naw ‘A i vai ng’se gui nani k’phian ang’ cine a ning shi goi ung, “Shin ah ng’se cu kami Bawi naw ng’ya hlük ci, ang ghit ah ning thak law ba gui vai nei’ cine nani pyein vai” cine m’cäi goi ci.
4Ang düihpüi goi cu hteit ni ne, im kawt pei ah lam ung ami k’pawn ah ng’se hta cu hmu ni netah, gui cu k’phian ci goi. 5Lam ung düi ciah chang amshah gui naw, “Ng’se gui cu a i vai nani k’phian ang” cine ng’shi goi ci gui.
6Ang düihpüi goi naw Bawipa Jesuh ah m’cäi goi ah mäih ah pyein ni khätah, ng’se cu k’phian ne ani hteh püi vai ah pyein ci gui. 7Ang düihpüi gui naw ng’se hta cu Bawipa Jesuh ah om nak ah law püi u netah, ami suisak gui cu ng’se ah khan ah phah ci gui. 8Cun kawn ah Bawipa Jesuh cu ng’se ung ng’cum ne hteit ci. Chang gui naw ami yih ng’vai gui cu lam ung ana phah ci gui. Am shah naw sing hnah gui tuh ne lam ung ana phah ci gui. 9Bawipa Jesuh ah a hnu ah hteit ci gui la ama ah hteit ci gui naw, “Khanpughi cu m’hlüngtai vä, Khanpughi ah ang ming awn kyum lawk cicu yeikyai nak om sä. 10Gawk lawk khai ah mipa David Ghangpughang ah uknak kho cu yeikyai nak om sä, Khanpughi cu m’hlüngtai vä” cine m’lau ci gui. 11Bawipa Jesuh cu Jerusalem mang gaw ah gawk law netah, pum im kyong ah hteit ne a päng k’tä ne teng ci. Cun kawn ah khomü hun law khätah ang düihpüi gui awn Bethani pigaw ah hteit ba ci gui.
Bawipa Jesuh naw Baangghing Taam Ci
(Mt 21:18-19)
12A ngawi ung Bawipa Jesuh la ang düihpüi gui cu, Bethani ah kaa ami law ba lam ah, ei cawi lawk ci. 13Cun yah ung a hnah khlum sei ghing ciah baangging cu hmu netah, m’theih hman khai cine, a pei ah hteh shi ci. Am theih khin ah kä kyasei a ghing cu a hnah gui bäng om ci. 14Cun ah kya khätah Bawipa Jesuh naw, “A ngawi ah phi nang ah m’theih a u naw kä ei-en sä” cine k’phyun ne taam shüt ci.
Cun ah a pyein cu ang düihpüi gui naw ng’yak ci gui.
Bawipa Jesuh cu Pum Im ah Hteit Ci
(Mt 21:12-17; Lk 19:45-48; Jn 2:13-22)
15 Bawipa Jesuh la ang düihpüi gui cu Jerusalem mang gaw ah gawk u netah, Bawipa Jesuh cu pum im ah hteit ne, pum im kyong ah sumlei ci gui cu k’täm gui ci. Ngui m’thawng ci gui ah tawnglang la müm kha yoi ci gui ah ngoh nak gui cu lat pe gui ci. 16Pum im sun pah ne khawh cham, a u naw phi kä am kawn m’hteh ba vai ah phi pyein ci. 17Cun kawn ah Bawipa Jesuh naw, “Cacim ung Khanpughi naw, ‘Kei ah pum im cu kho nüng ung, chang päng ah taigü nak ah mang im ah sui vai’ ciah om ci. Cun ung phi nangmi naw m’guk ei ah ng’thuh nak ah im ah nami pyang pyi ci nei” cine chang gui cu m’cäi ne m’thein gui ci.
18Taigü ng’vai gui la thukhän saya gui naw, acun a ci cu ng’ya u netah, Bawipa Jesuh ngawn nak vai ah lam cu shui ci gui. Chang gui naw cun ah am theithang gui cu cäicat ne ngai khit u netah Bawipa Jesuh cu kyihkyawk ci gui. 19Khomü hun k’awi law sei Bawipa Jesuh la ang düihpüi gui cu a hei lam ah hteit ba ci gui.
Baangghing ah Mawng ungka Thamah nak
(Mt 21:20-22)
20A ngawi ung kho ngawi hta ah Bawipa Jesuh la ang düihpüi gui cu lam ami hteh yah ung baangghing cu hmu ba ci gui. Cun ah baangghing cu a phyaa ah khüt khai ah ng’yai ne chawng ci. 21Peter naw shüm law ba netah, ‘Bawipa, Teng ä, nang naw na taam shüt ah baangghing cu ng’yai ne chawng pyi ci nei” cine pyein ci.
22 Bawipa Jesuh naw, “Khanpughi cu yum vä, 23Kei naw akcang ka pyein cu, kam lung kyong ah kä ngaih gep nak kä om ciah kang thu cu, akcang ah bä khai, ciah yum ciah chang naw, ‘Shin ah m’htung cu ng’nawn ne tuinu ung lut sä’ ci ne a pyein ung, a pyein ah mäih ah kyak khai nei. 24Cun ah kyasei kei naw ka ning m’thein gui cu,’ Taigü ne kami ng’yoih cu, kami gah ci, ciah nami yum vai, cun ung nami ng’yoih phung nami gah khai. 25Nangmi cu ng’düi law ne nami taigü ung katnak gui nüng nami m’gein vai. Cun ung khankho ah om ciah nami pa naw nami kat nakgui cu ning m’gein gui khai. 26(Nangmi naw chang ah katnak gui cu kä nami m’gein ung, khankho ah om ciah nami pa naw, nami katnak cu kä ning m’gein gui khai)” cine ang düihpüi gui cu m’thein gui ci.
Bawipa Jesuh ah Huhamnak Ami Ng’shi ah Mawng
(Mt 21:23-27; Lk 20:1-8)
27 Bawipa Jesuh la ang düihpüi gui cu Jerusalem mang gaw ah gawk law ba u netah, Bawipa Jesuh cu pum im lam ah a hteh yah ung, taigüpa gui, thukhän saya gui la chang ng’vai gui cu Bawipa Jesuh ah pei ah law u netah, 28“Nang naw shin ah a mawng ama gui cu a i huham awn ang na bi? Cun ah huham cu a u naw ang a ning peit?” cine ng’shik ci gui.
29 Bawipa Jesuh naw, “Kei naw tumat ka ning shi gui khai, cun nami pyein kawn ah, shin ah a mawng ama gui cu, a i huham awn ka bi ah ka ning m’thein gui khai. 30Johan naw tuihnim nak a peit cu, Khanpughi ah huham awn ang a peit, chang ah huham awn ang a peit, nami pyein vai” ci ne kiak na gui ci.
31Ngami naw ami mät ng’teng tu u netah, “A i mi cik khai ang, Khanpughi ah huham awn mi ciah a kiak ung, a i ah kyasei Johan kä nami yum ang? cine nang shi ba gui khai. 32Chang ah huham awn cine mi pyein khai ang?” ci ne ngahtüh khit ci gui. (Chang gui naw Johan cu Profet ah k’bäi ne yum ci gui ah kyasei, chang gui cu ngami naw kyih ci gui.) 33Cun ah kyasei ngami naw, “Kä kami hmat ci nei” cine pyein ci gui.
Cun ah kyasei Bawipa Jesuh naw, “A cun ah mäih ah kei naw phi, shin ah a mawng ama gui cu a i huham awn ka bi ah, kä ka ning m’thein gui khai” cine kyak na gui ci.
المحددات الحالية:
MAKUH 11: CBC
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Cho Bible Common Language © Bible Society of Myanmar, 2016.