MAKUH 12
12
Sapyit lo ah Ng’hlawh Ci Gui awn Am Tumtäng Nak
(Mt 21:33-46; Lk 20:9-19)
1Cun kawn ah Bawipa Jesuh naw ngami-am m’tumtäng ne am thein gui cu, “Chang tumat naw sapyit lo cu bi ne, geit ne ng’vong ci. Sapyit m’theih m’seh nak vai ah khui phi shawk ne, tängkyäng phi co ci. Cun kawn ah ani cu a sapyit lo khah gui ne bi sak gui netah, a kho hei yung ah hteit ci. 2Sapyit bih nak vai ah a khin gawk lawk khätah, ak chang shäm tumat cu lo ng’vat ne bik ci gui ah tüi ne, k’phlam cu ng’yoih sak ci. 3Lo ng’vat ne bik ci gui naw cun ah ak chang tüih cu pha ne that u netah a i kä peit ah tüi ba ci gui. 4Kho mah naw ak changshäm tumat cu tüi ba mä ci. Lo ng’vat ci gui naw alu ung that pawk pawk ne ng’a khai ah cik ci gui. 5Kho mah naw a hei ak changshäm tumat tüi ba mä sei lo ng’vat ci gui naw cun ah changshäm cu ngawn ci gui. A cun ah mäih ah a hei ak changshäm amshah gui cun phi amshah that ne, amshah ngawn ci gui. 6Kho mah ung a hta pami tumat om ci. Cun ah kya sei, ‘Ka hta läi cu kyih aa khai gui’ cine ak hnu ah a hta pami cu tüi ci. 7Cun ung phi ngami naw, “Shin cu kho mah ah pakhui m’düng ciah kyak ci, law vä, ani cu mi ngawn khai nei, cun ung vah ani ah khomdek mikmi naw mi khäm khai” cine ng’ge u netah; 8Ani cu pha ne ngawn u ne, ng’vong pung ah ghawt ci gui.
9Cun ah a kyak ung kho mah naw a i cha ah bi bik khai ang? Ani cu law ne lo ng’vat ci gui ngawn gui yawp netah, cun ah lo cu a hei gui-am bi sak gui khai nei.
10Cacim ung om cicu nami phat man khai nei;
‘Lung im co ci gui naw, ami nawng düt ah lung cu, Ak küikyang pibäih ah lungtung ah kya lawk ci nei.
11Shin cu Khanpughi ah bi bi ah kyak ci, Mik mi ah ma ah cäicat aih vai kyak ci nei” cine kyak na gui ci.
12 Bawipa Jesuh naw ngami a pyein nak gui ah am tumtäng cu Jew chang gui ah ami ng’vai gui naw hmat u netah, Bawipa Jesuh cu phak khai gui ah k’tha nak ci gui. Cun ung phi chang khli cu kyih u netah a hei lam ah hteit ba ci gui.
Phlam Soh ah Mawng Ami Ng’shi nak
(Mt 22:15-22; Lk 20:20-26)
13Cun kawn ah pharisee amshah gui la Herod ah pati chang amshah gui cu Bawipa Jesuh ah tüi law u ne, phawtcam nak ah ng’shi sak gui ci gui. 14Cun ah chang gui cu Bawipa Jesuh ah law u netah, “Bawipa, nang naw ng’düng nak awn thu na pyein ci, chang ah ngaih kä nam tung ci, chang ah hmai kä na teng ci, Khanpughi ah ang yak hlü ah ng’düng ciah nam theithang nak cu kami hmat ci nei. Cun ah kyasei Roman ghangpughang-am k’phlam peit vai ang, kä peit vai ang, keimi naw mä kami pek khai ang kä kami pek khai ang? cine phawtcam nak awn ng’shik ci gui.
15 Bawipa Jesuh naw ngami ah phawtcam nak cu hmat netah, “Nang mi naw a i ah kyasei kei ka shetkat vai ah nami ng’yak hlü ang? Tangka tumat ka teng vai law püi vä” cine kyak na gui ci.
16Law püi u khätah Bawipa Jesuh naw,
“Shin ah gup, shin ah ming cu a u ah gup, a u ah ming ah ang a kiak?” cine ng’shi gui ci. Ngami naw,
“Ghangpughang ah gup, ghangpughang ah ming ah kyak ci nei” cine pyein ci gui.
17 Bawipa Jesuh naw, “Ghangpughang ah kaa cu ghangpughang-am ap ba vä, Khanpughi ah kaa cu Khanpughi-am ap ba vä” cine kyak na gui khätah ang htei ah cäicat ci gui.
Sihnak Kung kaa Thawh ba ah Mawng Ami Ng’shi nak
(Mt 22:25-33; Lk 20:27-40)
18Sih nak ungka thawh ba nak kä om khai cik ci gui ah Sadducee amshah gui cu, Bawipa Jesuh ah law u netah; 19“Bawipa,’ chang tumat cu kä hta phah ne a sih ah a kyak ung akchu cu a phäi nau naw akchu nak tu ba vai. Sik ciah pakhui cu khäm tu ba ciah a hta anau naw m’düng khai’ cine Moses naw nam thein gui shüt ci. 20Hngü-ät ung ng’phäi nau gui chang sing chih om ci gui. Ami phäi ang vaipi cu chumah netah kä hta pha ne sik ci. 21Akchu cu a nau ang vai tuba naw khäm tu ba netah, ani phi kä hta pha ne sik ci. Acun ah mäih ah anau ba tumat cun phi acun ah a phäi ah chu khäm tu ba netah kä hta pha ne sih ba mä ci. 22Acun ah mäih ah ang phäi nau gui chang sing chih cu ami van naw cun ah hnumi cu chu na u netah, ami van kä hta ne sih yawp ci gui. 23Ak hnu ah cun ah hnumi phi sik ci. Ang phäi nau gui chang sing chih ami van naw cun ah hnumi cu chu nak ci gui kyasei, sih nak ungka thawh ba nak ah kho hnüüp ung, cun ah hnumi cu a u ah chu ah kyak khai ang?” cine ng’shi ci gui.
24 Bawipa Jesuh naw, “Nangmi cu cacim phi kä nami hmat ci, Khanpughi ah hlüngtai nak phi kä nami hmat ci, cun ah kya ne nangmi cu lam nami hma ci. 25Chang gui cu sih nak ungka ami thawh law ba hnüüp ung kä chu cei mah ba khai gui, khankho ah khanchang gui ah mäih ah kyak khai gui. 26Sih nak ungka thawh nak ba ah mawng Moses ah cacim cu kä nami phat man ne ma? Cun ah cacim, mei ah däi ciah cap-plum ah a mawng ung, Khanpughi naw, “Kei cu Abraham ah nak Khanpughi, Isaak ah nak Khanpughi, Jakob ah nak Khanpughi nei” cine Moses ah ma ah thu pyein ci. 27Ani cu sik ci gui ah Khanpughi ah kä kyak ci, ghing ci gui ah Khanpughi ah kyak ci, nangmi cu akcang ah cheishoh nak ung nami hteit pyi ci nei” cine kyak na gui ci.
Ak Küikyang Pi ah Thukhän
(Mt 22:34-40; Lk 10:25-40)
28Cun ah Bawipa Jesuh la Sadducee gui ami ng’thu yah ung, ami pei ah thukhän saya tumat om tuk ci. Ani naw Sadducee gui-am Bawipa Jesuh naw akni ah m’hlan ne am thein gui cu ng’ya netah, Bawipa Jesuh ah pei ah law ne, “Thukhän gui nüng ung ak küikyang pi cu a i ang?” cine ng’shik ci.
29 Bawipa Jesuh naw, “Israel chang gui, ngai vä, mikmi ah Bawipa Khanpughi cu tumat bäng nak ciah Khanpughi ah kyak ci. 30Ak küikyang pibäih ah thukhän cu, ‘Na Bawipa nak Khanpughi cu, nam lung kyong avan, na hmuhmat nak avan, na ngaih-tüh nak avan la nak thagui avan awn nam hni vai’ ciah kyak ci. 31Ak hnih nak ah ak küikyang pibäih ah thukhän cu, na mät ah paw chang cu na mät awn m’täng ne nam hni vai’ ciah kyak ci. Shin ah thukhän goi ah kawn ah a hei thukhän kä om ba ci” cine m’thein gui ci.
32Cun ah thukhän saya naw, “Bawipa, nang ah thu pyein cu ang htei ah bä aih ci nei, Khanpughi cu tumat bäng om ci, Khanpughi ah kawn ah a hei kä om ba ci nei. 33Khanpughi cu m’lung kyong avan, hmuhmat nak avan la k’tha gui avan nawn m’hni vai, mät ah paw chang cu mät awn m’täng ne m’hni vai’ ciah thukhän hnih läk cu Khanpughi-am ak ghing ngawn ne m’khih ne khawihnah nak la Khanpughi-am a hei gui peit nak nüng ah tah bä pi ci nei” cine pyein tu ba ci.
34Ani naw cun ah hmuhmat nak awn a pyein cu Bawipa Jesuh naw hmat netah, “Nang cu Khanpughi ah kho awn kä nani ng’shawng ba ci nei” cine pyen nak ci.
Cun kawn ah a u naw phi Bawipa Jesuh cu kä ng’shi ba yäi ci gui.
Messiah ah Mawng Ami Ng’shi nak
(Mt 22:41-46; Lk 20:41-44)
35 Bawipa Jesuh naw pum im ah am theithang gui yah ung, ani naw ang shi gui cu, ‘Messiah cu David ah hta ng’shong ungka ah kyak khai’ cine, a i hawkcha ah thukhän saya gui naw ami pyein hning ang? 36Mumcha Theing naw David ang thu m’sak cu;
‘Khanpughi naw ka Bawipa-am, Nang ah na ga gui cu, na kho pha kaa ah,
Kä ka gawk sak pha ah chuih, Kei ah kak pat lam ah na ngoh vai nei’ cine kyak nak ci” ciah kyak ci.
37Shin ung David amät naw Messiah-am Bawipa cine khü ciah kyasei, a i cha ah Messiah cu David ah hta ng’shon ah kya hning khai ang?” cine m’theithang gui sei chang gui naw yeikyai ne ngai yak ci gui.
Thukhän Saya Gui Hnu Ng’tuk Püi gui ne Ang Cäi nak
(Mt 23:1-36; Lk 20:45-47)
38Cun ah am theithang gui yah ung Bawipa Jesuh naw, “Thukhän saya gui cu nami geing nak gui vai, ngami cu suinu sui ne, chang ah ng’shei ne hteithton hlük ci gui. Sumlei hmun ung phi chang naw ak chang m’sui gui vai ng’ya hlük ci gui. 39Pum im kyong ah phi ng’khoikhei hlük ci gui, ng’bum law nak ung phi ani nak pibäih ung ngo hlük ci gui, 40Hmeinu gui ah khawh cham gui gut u netah, chang naw ang ngaih ung ani vai düt ah akshonu taigü ci gui. Cun ah kyasei ngami ah khan ah Khanpughi naw am katnak gui cu khak pibäih khai” cine kyak na gui ci.
Hmeinu ah Peit nak
(Lk 21:1-4)
41 Bawipa Jesuh cu pum im kyong ah khawh ami peit nak ah m’küm pei ah ngoh netah, cun ah m’küm ung chang gui naw ami peit ah ngui ami ghawn law cu teng gui ci. Bühmang ciah chang gui naw ngui akda ghawn ne pek ci gui. 42Ghawi-pyam ciah hmeinu tumat cun phi law tu ne, pia-gha phu nak khai ah ngui pia goi cu yuk ghawn tuk ci. 43Cun kawn ah Bawipa Jesuh naw, ang düihpüi gui khü gui netah, “Shin ah pyamtham ciah hmeinu naw, pum im ah peit nak ah m’küm ung ghawn ne pek ci gui nüng ah da pi sei pek ci nei’ ciah akcang ah ka ning m’thein gui ci nei. 44Chang hei gui cu ami ei-mang ah k’pawih ami ngui pek ci gui, cun ung phi shin ah hmeinu naw, am hu awi ne bi ne a gah, avan pek ci nei” cine m’thein gui ci.
المحددات الحالية:
MAKUH 12: CBC
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Cho Bible Common Language © Bible Society of Myanmar, 2016.