MAKUH 13
13
Bawipa Jesuh naw Pum Im Ashet Vai ah Mawng Pyein ci
(Mt 24:1-2; Lk 21:5-6)
1 Bawipa Jesuh cu pum im kyong ah kaa a luh law ba yah ung ang düihpüi tumat naw, “Bawipa, teng tuä, lung nu gui phi däm ne, im nu phi chün aih ci nei” cine pyein ci.
2 Bawipa Jesuh naw, “Shin ah chün aih ciah im nu cu tuhbäi nang naw na hmuk ci. Shin ah im ungka lung gui cu avan she ne ng’gäi yawp khai, lung tumat phi amät ah om nak ung kä om ba khai” ci ne pyein ci.
Yaica nak Gui la Dukdeiu nak Gui
(Mt 24:3-14; Lk 21:7-19)
3 Bawipa Jesuh cu Olive khomhtung ah pum im lam ah va mang ne amät a ngoh yah ung, 4Peter, James, Johan la Andru ni cu a pei ah law u netah, “Bawipa, nang naw na pyein ah a mawng gui cu a i yah ung küm lawk khai ang? Cun ah a mawng ama gui a khüm law yah ung a i gui dang lawk khai ang? Nam thei gui ä” cine ng’shik ci gui.
5 Bawipa Jesuh naw, “Chang naw kä a ning m’hleei m’hlak-en gui vai ah nami ngaih nak vai. 6Chang akda cu kei ah mäih ah ng’hlawk ne lawk khai gui. Ngami naw ami mät cu Messiah ah pyein u ne chang khli cu m’hleei m’hlak khai gui. 7Nangmi naw a shou nak, ang et nak ung ng’tuk nak ah mawng nami ng’yak ung kä nami kyihkyawk vai, Cun gui cu akcang ah küm khai, cun ung phi kho ah khüt nak vai cu kä gawk law phak ci. 8Chang pakhui tumat la tumat, kho päng tumat la tumat ng’tuk bi nak om khai. A kho pääng ung shihpi thüng khai, ei awk vai maih ne kho yo khai. Cun gui cu hta lawk khai naw nau poi am neh law ma ah mäih ah ma lawk khai ah dukdeiu nak ah kyak khai.
9Nangmi cu ngaih na ne nami om vai. Chang gui naw nangmi cu yung ah m’kawt ung ning ap gui khai gui. Pum im ah k’caw ah ning that gui khai gui. Nangmi cu kei ah hmawk ah bawimang gui la ghangpughang gui ah ma ah gawk u ne, Thu Ni pyein ne nami ng’shä khai. 10Kho kä a khüt pha ung nangmi naw Thu Ni cu ng’shäu ne chang pakhui avan-am nami m’thein khai. 11Nangmi cu ning pha gui u ne yung ah ami ning ap gui ah a kiak ung, a i cha ng’thu vai ang, cine ng’dawt ne kä nami ng’ä vai. A cun ung nami m’lung kyong ah dang lawk cicu nami pyein vai. Cun ah ng’thu gui cu nangmi ah ng’thu ah kä kya ne, Mumcha Theing ah ng’thu ah kyak khai. 12Chang gui cu ami mät ng’phäi nau goi sih nak vai ah ng’ap tuk khai gui. Apa naw a hta cu a sih vai ah ap khai, ami hta gui naw phi ami nupa cu ng’küknet püi u ne, ami sih vai ah ap khai gui. 13Kei ah hmawk ah chang van naw nangmi cu ning gen gui khai, cun ung phi akhnu ah khüt sei düng ciah chang cu hun nak gah khai nei.
Tükyai Shemshai Ciah Mawng
(Mt 24:15-28; Lk 21:20-24)
14“Tükyai shemshai cicu kä om nak khin ung om sei nami hmuk khai. (Shin ah a mawng cu ca phat ci naw ngai thei sä.) Cun nami hmuh law ung Judea kho ung om ciah chang gui cu khomhtung ah dawng u sä. 15Im m’kiung khan ah om ciah chang cu, im kyong ah lut ba ne, a i baw la ba khai ah kä a yu kyum men ba cang vai. 16Lai ah om ciah chang phi yih sui la ba khai ah im ah kä hteit-en ba sä. 17Cu hnüüp ung käu mah ci gui la htayüt shäm ciah chang gui cu yaica aih khai gui nei. 18Cun ah akhin cu khosik kho ah kä a kiak-en vai ah nami taigü vai nei. 19Khanpughi naw khomdek a tüi pyan ung tün ne, a i yah ung phi shin ah mäih yaica nak cu, a u naw kä awt man ci, ngawi ah phi a u naw kä bui awt ba khai. 20Khanpughi naw cun ah akhin cu kä a tawi sak ah a kyak läi ung a u naw sih nak cu kä phiawn ah hlawt khai nei. Cun ung phi, Khanpughi naw aghü pyi ah chang gui ah hmawk ah cun ah khin cu tawi sak khai nei.
21“Cun ah khin ung chang tumat mat naw, ‘Teng law tu vä, shi ah Messiah om ci nei, cä ah Messiah om ci nei,’ cine a pyein ung kä nami yum-en vai. 22Messiah ah ng’hlawk ci gui la profet ah ng’hlawk ci gui cu, akda ng’dang lawk khai gui nei. Ngami naw ami näng ah a kyak ung Khanpughi naw a ghü ah chang gui hngaw m’hleei m’hlak nak gui hning vai ah cäicat nak gui vai la cäi aih nak gui vai cu m’dang khai gui nei. 23Nangmi cu ngaih na ne nami om vai, shin ah a mawng gui kä ang dang law pha ung ng’dawt ne ka ning m’thein gui nei.
Chang ah Htapa Akyum Law Vai ah Mawng
(Mt 24:29-31; Lk 21:25-28)
24Zaica nak gui a gawk law kawn ah khohni cu mü ne hmüp khai, Cha phi kä vai ba khai. 25Aisi gui phi khankho ah kaa kiawi ne kya law yawp khai gui. Khankho mik ung hlüngtai ci gui ah hmun-lam gui phi ng’phleng yawp khai gui. 26Cun kawn ah khomei gui ah ng’lung ah hlüngtai nak la bämang nak awn kyum lawk ciah chang ah Htapa cu nami hmuk khai. 27Cun kawn ah chang ah Htapa naw, khankho chang gui cu tüi gui ne, khomdek khankho cawi ungka naw, khankho, kho cawi ung khüt khai ah, a ghü pyi ah chang gui cu, khäm ne k’bum sak gui khai.
Ng’baang Ghing awn Am Tumtäng Nak
(Mt 24:32-35; Lk 21:29-33)
28“Baang ghing ungka theithang vai tumat cu ka ning m’thei gui khai. Cun ah a ghing ung ang ban tawt ba ne a hnah am khek law ba ung kho cha lawk khai ah nami hmat ci. 29Acun ah mäih ah ka pyein gui ah a mawng ama gui a khüm law ung, chang ah Htapa cu nangmi ah pei ah m’kawt ung gawk law pyi ciah nami hmat vai. 30Kei naw akcang ka pyein cu, shin ah a mawng ama gui kä a khüm pha ung, tuhbäi chü chang gui kä si yawp phak khai gui nei, 31Khankho la khomdek a maih ung phi kei ah ng’thu cu kä maih khai nei.
Cun ah Akhin Cu A U Naw Kä Hmat Ci
(Mt 24:36-44)
32“Cun ung phi cun ah akhin cu a u naw kä hmat ci. Khankho chang naw phi kä hmat ci, A Htapa naw phi kä hmat ci. 33Pa Khanpughi amät bäng naw vah hmat ci. Cun ah akhin cu a i yah ung gawk lawk khai ah kä nami mi hmat ci kyasei, ngaih nah ne nami ngäng vai nei, ci m’gang ne nami om vai nei. 34Cun ah mawng cu shin ah m’tumtäng nak awn täng ci; Chang tumat cu a kho hei ah hteit vai netah, a im cu ak chang shäm gui-am ap gui shüt ci. Ngami-am ami bi phäh phäh vai ah bi cu phäh m’sak gui ne ap gui shüt ci. M’kawt ngäng ci-am phi geing na ne a ngäng vai ah m’cäi shüt ci. 35Nangmi naw imah a i yah ung a gawk law ba vai cu kä nami hmat ci, mü lam ung phi gawk law hning ci, kho cawih ding ah phi gawk law hning ci, ai khong k’htük ung phi gawk law hning ci, kho thaih hta ung phi gawk law hning ci. 36Cun ah kyasei imah a gawk law ghet ung, ip uk ci sei kä a ning hmuh en gui vai ah ngaih nah ne nami ngäng vai nei. 37Nangmi ka ning m’cäi gui ah mäih ah chang avan kam cäi ci nei, ngaih na ne ngäng vä” cine pyen na gui ci.
المحددات الحالية:
MAKUH 13: CBC
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Cho Bible Common Language © Bible Society of Myanmar, 2016.