Matt. 6
6
Aveküsami Kuphu keu
1“O chipiumikucho kümlà ithulu peniye timi zülo pephe-piye keu shimo nike kutokupui alo. Tsalá nongu no tishiaye, Apù kungugha lo akeu lau no asaxu ithumla nani.
2“Tighenguno nongu no kughou aveküsami kuphuni keno, nongu ye kühaküghamiqo no synagog eno alaghilaqo lo ighamuku kütami pelo panongu gihu peniye asheshu keu toi shi kevilo. Kuchou no I no nongu vilo pìní, panongu ye pano sala qesaxu kuchopu ithuluvae. 3Ikemu kughou nongu no aveküsamiqo kuphuni keno, O u ajeu no kiu tsü ani keno O u piyiu pelo ithi pe kevilo, 4tishianguno nono tsü akeu ye tuqhou shilu nani ke. Tishi keu vechewo nongu Papù khuu nongu no tuqhou no kiu mülà acheni keno ithulu akeu hu no asaxu nongu tsü nani.
Akighini Vehu
5“Eno kughou nongu no akighini shini keno kühaküghamiqo toi shi kevilo, kughengu panongu ye synagogqo lo puthugho no akighini shinishi cheni eno kütami pelo ithulu peniye alaghila chekuqo lono akighini shi cheni. Kuchou no I no nongu vilo pìní, panongu ye pano sala qesaxu kuchopu ithuluvae. 6Ikemu kughou nongu no akighini shini keno, nongu chebo lo ilo no ahukikha khavelo eno nongu Papù khuu ithulu chemo keno pa vilo inikhulo. Tishiaye nongu Papù khuu nongu no tuqhou no kiu mülà acheni keno ithulu akeu hu no qesaxu nongu tsü nani. 7Eno kughou nongu no akighini shini keno Jewkumomiqo toi adou tsa za kevilo, kughengu panongu no kümsü keu no kutomo za keu ghenguno chilutsü nani küghashi kümsü cheni ke. 8Panongu toi shi kevilo, kughengu nongu Papù ye nongu no kiu avehupu shi ani keno khu mphi lonomu ithi anike.
9“Tishiaye, nongu ye hitoi inikhu moayesae:
“ ‘O ningu Papù kungugha lo küau,
O je akimthe shi pelu pelo,
10O yekipe ighilo,
kungugha lo toi ayeghi lo ghí
O pulou shilu pelo.
11Tsalakipe chuqupu ishí tsalà lo ningu tsülo.
12Eno ningu no kütami no pimive keu kipimíqo qhivetsü keu toi
ningu no pimive keu kipimíqo ghí qhive tsülo.
13Eno ningu pelo ghukuju#6:13 Greek tsa lo ghukuju ipi akeu kiqi ye theju ipi akeu kiqi ghí ke. lo ilove pe kevilo
ikemu küsakügha lau no ni xaphe tsülo.
Kughengu akükaphu,
aküka eno ajekipi ye alhokupuju lo ow ke. Amen.’#6:13 Ashekhau tsajo ye atüghiu kakuqo lo ye küha eno ashekha láu no süküqha püani.
14Kughengu timi kütami no nongu lau axiné shive kelo, nongu no panongu kipimí qhivetsü aye, nongu Papù kungugha lo küau ghí nongu kipimí qhivetsü nani. 15Ikemu nongu no kütami no axiné shive keu kipimíqo qhive tsümo aye, nongu Papù kungugha lo küau ghí nongu kipimíqo qhitsümo nani.
Kümvü keu Vehu
16“Kughou nongu no kümvüni keno kühaküghamiqo toi agi küzü pìye kevilo, kughengu panongu ye timi kütamiqo pelo kümvü anike ipi ithi peniye panongu gi kilive cheni ke. Kuchou no I no nongu vilo pìní, panongu ye pano sala qesaxu kuchopu ithuluvae. 17Ikemu kughou nongu no kümvü nike no thazü pesü O kütsü lo sǘvelo eno O gi phavelo, 18tishianguno timi kütami zülo nongu ye kümvü ani ipikeu ithi pemo nani ke, ikemu nongu Papù khuu ithulu chemo keno eno nongu Papù khuu nongu no tuqhou no mülà akeu ithulu acheni keno, pa no qesaxu nongu tsü nani.
Kungugha lo Kiníqo
19“Nongu likhi nongu sala ayeghi lo akiní pekütsü kevilo, kughengu tiye amila ngò ayisa no tsapühave eno küpükamiqo no hepho ilo püka pewuve cheni. 20Ikemu nongu likhi nongu sala kungugha lo akiní pekütsü lo, tilehi ye amila ngò ayisa no tsapühave müla, eno küpkami no hepho ilo püka müla nani ke. 21Kughengu nongu kiní khilehi ani keno nongu mlo ghí tilehi anani ke.
22“Anhethi ye aphimpi küvü ke. O nhethi no vi aghí aye, O phimpi kuchopu aküvü no chhitoi nani. 23Ikemu O nhethi no vi aghimo aye, O phimpi kuchopu àküzǘ no chhitoive nani. Tsalá O lolo aküvü akeu hu no àküzǘ shive aye, àküzǘ tipau ye kiutoi àküzǘ kijè shive nani kea!
24“Timi khumu ampeu kini qüaxemi shimlae. No ye lakhi mithive no lakhiu kimiye nani, momu no ye lakhi qhoqhü püzü lakhiu phimo nani. No ye Alhou eno küakini küma kinikujo qüaxeu ye shimlae.
Amlosa kevilo
25“Tighenguno I no nongu vilo pìní, nongu küxü lo chu kepu ghenguno amlosa kevilo; momu nongu phimpi lo pepumini nikeu ghenguno amlosa kevilo. Aküxü ye achuqupu nguno akhotou ke kumo keshea, eno aphimpi ye tiphimini nguno akhotou ke kumo keshea? 26Atsütsǘ lo aghauqo pishipuku julo; panongu ye kiumu yisü chemo momu ghile hu chemo momu ale lo kiumu pekütsü pe qhi chemoe. Tishiaghi pinamu nongu Papù kungugha lo akeu no panoqo lojí acheni. Nongu ye tipaqo nguno alau akughupu ke kumo keshea? 27Nongu dolo khuala no amloküsa shikeu vechewo pa küxü lo ayì kihedo lakhimu süküphalu nani keshea?
28“Ike nongu ye kushiye tiphimini ghenguno amlosa acheni kea? Axamunuqo no kíshi aluqa lo thuwu acheni keno julo. Panongu ye akümlà shichemo momu aphì ghò chemoe. 29Ikemu I no nongu vilo pìní, Solomon ye pa kiní kütsasa anamu axamunu hipaqo no qhivütsüni akeu toi tiphimini pepu lumoe. 30Nongu aküpülü miqemilei kemiqo! Aluqa lo ishí ye xüa püzü thoghiu ye ami lo vesüve niye akeu axamunuqo kutólo ghí Alhou no tucho-mjo aye, pa ye tinguno alau nongu tuchomoni keshea? 31Tighenguno amlosa ghi ishi pi kevilo, ‘Ningu ye kiu chuni kea?’ momu ‘Ningu ye kiu shoni kea?’ momu ‘Ningu ye kiu pepuni kea?’ 32Kughengu Jewkumomiqo no thime hipaqo kümtsü phu acheni, eno nongu Papù kungugha lo akeu no nongu no hipaqo avehupu shi akeu ithi anie. 33Ikemu Alhou kükaphu eno pa chipiumikucho paghi phululo, eno thime hipaqo kümtsü nongu küphatsü nani ke. 34Tighenguno thoghiu vehu pesü amlosa kevilo, kughengu thoghiu no thoghiu tsalà ghenguno amlo sakepu anani ke. Atsala-atsala lo amlo küsapu akeu no tipau tsalà ghenguno lukümkha ke.”
المحددات الحالية:
Matt. 6: STB
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Puloshoqhi Akitheu, Sümi Tiqhelimi Bible™
Yekiphechipiu © 2023 by Biblica, Inc.
Puloza lu no peitha ani. Ayeghiqha kümtsü lo puloza lu no peithalu kepu chipiu ani.
New Testament, Sümi New Generation Bible™
Copyright © 2023 by Biblica, Inc.
Used with permission. All rights reserved worldwide.