Matt. 7
7
Kütami Shou Küghathabe Keu
1“Kütami shou küghathabe kevilo, tishianguno O shou küghathabemo nani. 2Kughengu nono kütami shou küghathabe keu qhemi O shou küghathabe nani. Nono kütami shou kiu qhemi mighibeni keno titoi Alhou no tipau qhemi O shou mighibe nani ke.
3“No ye kushiye O likhi O nhethi lo asülu akeu jukutomo püzü O thiküzüu nhethi lo amihi akeu jukuto ani kea? 4No ye kíshi no O likhi O nhethi lo asülu akeu jukutomo püzü O thiküzüu vilo, ‘O nhethi lo amihi akeu I no ikhipheve tsüní,’ ipi luni kea? 5No ye kühaküghamie, atüghishi O nhethi lo asülu akeu ikhive paghilo, tishianguno no ye O nhethi tsüghükhüi shi püzü, O thiküzüu nhethi lo amihi akeu ikhi phelu kepu shi nani ke.
6“Akimthe thime pe atsǜqo tsü kevilo; nonguw mülaputuqo pesü awoqo zülo veqhitsü kevilo. Tsalá nono tishiaye, panongu no apukhu no thime tipaqo qodave nosake, eno ighowo nongu süthapiniyive nosake.
Khulo, Phulo, Kukhulo
7“Khulo eno ti nongu tsü nani; phulo eno nongu no phulu nani; kukhulo eno O ghenguno ahukikha khaqhi tsü nani.” 8Kughengu khu kemi kümtsü tsü cheni; phu kemi no ithulu cheni; eno ahukikha kukhu kemi lau khaqhisü tsü nani.
9“Nongu khuu no O nu no asho khu aye atu pesü pa tsü nani kea? 10Momu tsalá pa no akha khu aye apighi pesü tsü nani keshea? 11Tishiaye nongu küsaküghami thotsü thime kivi pesü nongu tianuli tsüke ye ithi aghí aye, nongu Papù kungugha lo akeu ye kíshi tinguno alau aghokivi pesü pa vilo khukemiqo tsü nani kea? 12Ikehu thowkha kümtsü lo, O lau shipe nishi ketoi kütami lau shilo, tishianguno Moses yeza eno Tungkupumiqo kükütsü shikupuve anike.
Kibikhoi eno Ililai keu Khagho
13“Kibikhoi keu khagho veche ilolo. Kughengu ililai keu khagho eno ililai keu laghi ye kütsakungo keu lo sawu cheni, eno timi kutomo no tipau là lo püla ilo acheni. 14Ikemu khagho aghulo eno kibikhoi keu laghi ye aküxü lo sawu cheni, eno timi aghulo likhi no tipau là phulu cheni.
Kuchou eno Kichileu Tungkupumiqo
15“Kichileu tungkupumiqo lau no kutokupui lo. Panongu ye ashou ye ambe toi nongu lau ighi cheni, ikemu panongu lolo ye ayiküsa tüngtüghaqo ke. 16Panongu kümlà vechewo nongu no panongu kimchilu nani. Timi ye asahubo lono atsaithi xolu cheni keshea, momu koghesahubo lono mubuthi xolu cheni keshea? 17Titoi, asübo kivi kümtsü axathi kivi pithí cheni, ikemu asübo lhoküsa lono axathi lhoküsa pithí cheni ke. 18Asübo kivi lo ye axathi lhoküsa pithí chemoe, momu asübo lhoküsa lo ye axathi kivi pithí chemoe. 19Axathi kivi pithímo keu sübo kümtsü yeqhive no ami lo vesüve cheni. 20Tishiaye, kichileu tungkupumiqo ye pano kümlà vechewo nongu no kimchiluve nani.
Kuchou eno Kichileu Khopemiqo
21“I vilo, ‘Ampeu, Ampeu,’ ipi kemi kümtsü kungugha kükaphu lo ilomo nani, ikemu khuu no I pù kungugha lo akeu pulou shi cheni keno tipaqo likhi no ilolu nani. 22Küghakütha tsalà lo timi kutomo no I vilo, ‘Ampeu, Ampeu, ningu ye O je lono tungkuptsa pi eno O je lono tüghaküsaqo haphe eno O je lono akümzapu kümlàqo kutomo shiche ke kumo keshea?’ ipi nani. 23Tile no I no panongu vilo mütsümishei ishi pi nani, ‘Ni ye nongu khuu kela mthae. I lau no chevelo, nongu küsaküghamiqo!’
Alokütsü eno Mübomzü Aki Kishimi
24“Tighenguno I tsa hipaqo chilu no tipaqo pape kemi kümtsü alokütsümi lakhi no atuqu shou pa ki shipuku keu toi ke. 25Tsütsüghu ighi, atshünazü qò ighi, eno pasapagha mülhü ighi eno aki tipau tukuchoqhi; ikemu aki tipau ye ilaiqimoe, kughengu aki tipau ye atuqu shou aboqha shipüa ke. 26Ikemu khuu no I tsa hipaqo chilu no papemoni keno pa ye mübomzümi lakhi no asàye shou pa ki shiqhepuku keu toi ke. 27Tsütsüghu ighi, atshünazü qò ighi, eno pasapagha mülhü ighi eno aki tipau tukucho kelo aki tipau ye müzamghalei ilaiqive.”
28Kughou Jisü no hipaqo kümtsü pitave keno, timi aqokitikhiqo ye pa kükütsü ini pe akümzave, 29kughengu pa ye panonguw ayeza kükütsümiqo toimo püzü kükagha akemi toi kütsü ke.
المحددات الحالية:
Matt. 7: STB
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Puloshoqhi Akitheu, Sümi Tiqhelimi Bible™
Yekiphechipiu © 2023 by Biblica, Inc.
Puloza lu no peitha ani. Ayeghiqha kümtsü lo puloza lu no peithalu kepu chipiu ani.
New Testament, Sümi New Generation Bible™
Copyright © 2023 by Biblica, Inc.
Used with permission. All rights reserved worldwide.