KEJADIAN 34
34
Hele Dina aben hilingitukwa wene
1Lingge misik sambul hele Dina hun Yakub inom he Lea inom ina'logo a'nogo helime o Kanaan mene andoma isa lagain iluk lagaikhe. 2Lagaikhesik hilingitunemen he hun Sikhem, Hemor amlogo a'nogo at o andoma raja mendek logolik hele Dina a'nogo eilenggen hasikhesik waluk lagaikhesik he, inom at omameba nogosukwa. 3A'nogo nogosukwaba nen he, hele Dina andi faget endawinggen nasikhemo, abo a'nogo nen hele andi endawinggen noageluk ninghogo hilingitikhe. 4A'nogo hilingitikhesik at Sikhem en eisena yagati logolik, ”An hele andi helagain namolo enggere neisena haren hele andi hendawimo wenggel hambik wo'nom o,” iluk yagatikhe. 5At Yakub esanggo holhugunem en he a'logo a'nogo aben weaget faga ugunem holhikhe. Oba nen he, at againafuri inebe wam konhu o leimo oan were'ma nogo nen he, aren yi'nogo ti'nogo igi'lek afe mot fisasikhesik welagaikhe.
6Were'ma hun Hamor at Sikhem eisena a'nogo nen ninane sikhiphogo ugun iluk Yakub ambit wagaikhe. 7Aremnogo sambul at Yakub againafuri omanogo o leimo nen wagaukwasik inesanggo holhugunem en he wene hilinglagaikhe aple a'nogo faget holhukwasik youk lagaukwasik ina'mage hokho mene lagasikhesik inobaharo agaukwa. At Yakub a'logo a'nogoba inomameba weak hilingfesukwa andi nen he it Israel mene nen anggikhi logolik nit he at Sikhem en weak hilingisogo ninobagaikhe iluk isukwa. 8At Hamor en Yakub yagati logolik, ”An namlogo hat ha'logo faget endawinggen ninggemo, hele andiat heloakhogo, fano in o. 9An nunggulenu mene inom hat hunggulenu mene inom inagagwi inaguni hesangge wok-wok aga logouwagen ninane misik seberogo lambuluogo. 10A'nogo hilingisugun halok he, hit hinebe o kweang yomaba nit ninom logogun. Nen, hit yoma logolik he hiren hinangge yi mene ti mene onggo paligik, hunitik ikhi logolik, hinangge hokhorogo saburikhi logogun o,” iluk yagatikhe.
11A'nogo yagatikhesik, hobuk at Sikhem en hele Dina eisena inom ogogwi inom yagaisikhi logolik, ”Hiren yi mene ninamolo ugun halok he wokhisagain enggere an nen kino yagahisikhi lagi mene yi tak holnobagani o. 12Nen, hiren hele ari onggore ti mene ninamolo iluk katokhogo yagane'ni o, nen an he nendawimo ebeti aple andi faget, hiren ogo hele andi helan ugun halok he, nit he onggo yi huli ninamolo ugun mene ogore wokhisagain enek,” iluk yagaisasikhe.
13At Sikhem en hun Yakub againafuri omanogo inagot Dina a'nogo weaget fesukwa andi nen he, it Yakub againafuri omanogo nen he, at Sikhem inom eisena Hemor inom inoba ineranhogo wene yagaisikhi logolik he, 14”Ap inagap inenggalimo mene palek lek mene inom nit ninagot andi lomboletu aplere ninenggali o. 15Hit mene ap hinebe mondogat nit hakhogo hinagap hinenggalimo mene palik logoin iluk, wene misik andi nek katoget fogoin halok enek he, hiren kino yaganisegep mene andi i o, iluk ogo aplerek. 16A'nogo hilingisumo nek he, nit ninebe hit hinangge le'ma logolik ninunggulenu hit ninom misik mene asimbik he, nit ninagainafuri inom hit hinagainafuri inom wok-wok aga logogun egep mene a'nogo fano anggogoin. 17Oba nen he hiren hilingisugun aple niren yi'nogo hilingi'ni iluk yagahisogo mene andi herakfisaluk, hinagap hinenggalimo mene palugun lek halok he nit he hele yi ninambotkwe helaluk louwogeluk wago,” iluk yagaisasukwa. 18A'nogo ayagai sasukwama re, at Sikhem inom Hemor inomen anggikhi logolik, ”Yi'nogo hilingisugun iluk yagaisasukwa mene a'nogore elok hilingisu mene aga,” anggasukwa. 19At Sikhem ogogwi agoromi eisok erokwe hokhorogo were'ma nogo nen he, at hele Dina a'nogo faget endawinggen ninggi logolik a'luk he, ”Yi'nogo hilingisugun iluk yaganisaga mene andire weak-weak hilingisugun,” anggasikhe.
20A'nogo anggasikhesik, at Hemor inom Sikhem inom o kota kuogeluk kwe ambe palek kwe nen kuluk afuni wene paluogeluk kabogetarek oba andoma lagaukwasik, it afuni o kota andiba werek mene omanogo yagaisikhi logolik, 21”Afuni Israel mene andire nit ninarugwi hilingi'mo re, o kweang yoma re it faget ogo mondogat wogolek werek. Andi nen he, it nit ninom o kweang yiba lambulogo logolik it ogo inendaimo anggili'lagwiba andoma kwelakhaluk logouwak, logolik he, niren it ina'logomi woginafik, nen iren nit nina'logomi woginafik, ikhi logugun. 22A'nogo meneat he, it nit ninom lambulogo logogun aple andi re we wene misik nit alage ninebe mondogat ninagap ninenggalimo mene palhu halok enek he it afuni andi nit ninom logolik ninunggulenu misik mene asugun. 23Andi halok, it nit ninom logolik iren yi'nogo hilingi'ni iluk yaganisaga mene andi hilingisuok. Nen, it inangge yi mene ti mene inom inanggo inom ogore nit mene asugun o,” iluk yagaisasikhe. 24A'nogo yagaisasikhemo, it afuni o kota andoma kaboksek welagaukwa mene omanogo nen, Hemor inom, Sikhem inomen yagaisasukwa aple a'nogo fano anggasukwasik it ap inaluendek mene nek o kota andi oba welagaukwa mene omanogo inagap inenggalimo mene mondogat palinabik lagaukwa.
25A'nogo palinabik lagaukwasik inenggi henagan welagaukwasik it ap inenggalimo mene palinabik lagaukwa mene a'nogo oan ouen were'ma, at hele Dina ogogwi hun Yakub againafuri inom, Lewi inom Simeon inom aremnogo nen karok lisogo waluk hinak-hinak wagaukwasik o kota a'nogo kwi wagaukwa. Kwi wagaukwasik iren ap omanogo mondogat pinggi inoati logolik, 26at Sikhem inom Hemor inom aremnogo ogo inoatukwaat. Inoatukwasik at hele Dina a'nogo Sikhem aiba nen waluk lagaikhe. 27It inebe pire aremnogo pin talogo inoasi kwisukwa, at Yakub againafuri fenakwe omanogo nek he ninagot weaget fagama iluk inendawimo sebelek welagaukwasik o kota a'nogo pin kwisukwa. 28Pin kwikhi logolik, iren wam kambing, domba, sapi, keledai inom, yi mene ti mene o kota andiba welagaikhe mene omanogo mondogat inom, o leimo welagaikhe mene mondogat inom feleleng e'luk wagaukwa. 29Iren yi mene ti mene onggo werek mene inom, hemi inom, yenggerugwi magendek mene inom, hele warogo woginarek waga logolik he, yi mene ti mene mondogat inawilokwe weregengge inom feleleng e'luk wagaukwa.
30A'nogo hilingitukwama, at Yakub en Lewi inom Simeon inom yagaisikhi logolik, ”Yogondak he, it Kanaan inap inom, Feris inap inom, afuni o sili yiba werek mene inom, an inabiret nobagagasik werek. Enggere nit ninebe hokho welago lek hilingi'mo it afuni o sili yoma werek mene inebe misik sebe imbik, an noasi kwi wesumo nen he, an nagainafuri neisok erokwe menere mondogat lek asu hago,” iluk yagaisasikhe. 31A'nogo yagaisasikhemo iren onggo yagati logolik, ”Nit ninagot he hambenan hilingitu mene hakhogo hilingisogo fuluk logou re ninabiro,” iluk yagatukwa.
المحددات الحالية:
KEJADIAN 34: inohap
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول