Lucas 22
22
Juda a nö nabäblou
lä wawädoono wei tä a̦
1Bei. Nii juluno mlai bä ja, judio showadi bä iyaö ca̦i lä co̦camou wei tä ajeoma. Yai Bada a waiteli lä jayuano wei a nofi showadi lä co̦camoaö wejei tä lä cui. 2Nofi bäyäalewä blowäjäwä bä ma cuinö, Moisesi tä a̦ ja täbä lä damaö wejei bä ma cuinö, Jesús a shäbeje a nofi washuamaje. Yanowamö täbä nö quili tamaje yalo, a wa̦fa wayoaö ja̦toomaje.
3Ö̦jö däjä, Juda nija Sadanasi a lucälayoma, Juda Icaliode a wa̦fa lä cuono wei nija. ¿Ö̦jö tawä? Jesús nija bä 12 lä nocaono wei ai e cuoma. 4Nofi bäyäalewä blowäjäwä bä ma cui, Yai Bada etä yafi jamö bä bada lä läono wei bä ma cui, ö̦jö bä sho bä a̦ wayobä, Juda a alayoma. Ö̦jö bä nija a jömabä, Jesús a nia lä nomojoliano wei a wa̦fa wäamoma.
5Bä bufi bada doblaloma. Jesús a nia lä jömaö wei tä nowa ja, blada ebä a̦fa wäa showadaquemaje. 6Juda a fa ja̦omodonö, a nia lä nomojoliano wei tä nofi dayäaö showadaoma. Bä showadi lä co̦camou wei bä cuo mlao däjä, a nia nomojoliaö balöoma.
Bä iyaö ca̦i co̦camobä
täbä baamaö lä bufino wei tä a̦
7Nii bä juluu lä mlai bä ja bä iyaö ca̦i co̦camou co̦obä, oweja ocalo bä shäbeje tä mö jalu cublaliyoma. 8Ö̦jö cudeenö, Jesúsnö Pedro, Juan sho cäcöbö shömöa balölema. Abinaja cäcöbö nowa tama.
—Yai Bada a waiteli lä jayuano wei bäma a nofi co̦camoaö co̦obä, täbä da baböcudu, bämacö iyabä —cäcöbö nowa tama.
9A wa̦liböö ja, abinaja cäcöbö cuma.
—¿Wedinaja wa bufi cuu? ¿Wedi jamö yafi lä cui jamö yafä bä nii baabä?
10Abinaja cäcöbö nowa tama.
—Bei. Shabono jamö wafäcö co̦blou däjä, mau ubä befi ca̦i lä döcömabole wafä a mö nia wa̦lo baamadayou. Ö̦jö nija wafäcö fa nocalofälönö, cama a lä faö wei jamö wafäcö falö. 11Ö̦jö a yafibö lä cui nija, ya tä a̦ lä wäyäö wei ya lä cui wafäle wa̦no wäabä. Wafä yano wa̦li. Ö̦jamö iba bämacö lä nocamabole wamacö sho bämacö nia iyaö, Yai Bada a waiteli lä jayuano wei bäma a nofi co̦camoaö co̦obä. 12A yano lä feyacale tä bada jömöaö wä, madofi bä befi ca̦i. Ö̦jamö lä bämacö iyabä wafä bä nii bacö —cäcöbö nowa tama.
13Cäcöbö fa alufälönö, Jesús a lä cuu weinaja inaja showawä tä dabölalema. Yai Bada a waiteli lä jayuano wei a nofi co̦camoaö co̦obeje, ö̦jö a yafi jamö täbä nii baböquema.
Jödödö bä ca̦i
lä iyalayono wei tä a̦
14Bä iyabä tä cublou däjä, Jesúsnö bä shömabä bä lä yaileno wei bä ca̦i looma, bä iyabä. 15Abinaja Jesús a cuma.
—Yale nö bleaamaö showao mlaoje däjä, cafä wamacö nija ya iyaö ca̦i co̦camou bufi doblaoma, Yai Bada a waiteli lä jayuano wei bäma a nofi co̦camoaö co̦obä. 16Bämacö lä cuaale ya tä nia taö co̦o jaöo malä mlai. ¿Ö̦jö tawä? Cafä bämacö nowa taö lä cule. Yai Bada tänö cama ebä ca̦i cuobä jamö, cama ebä yai co̦aö cadidio däjä, ö̦jö däjä ya tä nia shino waö co̦o —a cuma.
17Ö̦jö däjä ji̦shima a fa dälönö, toubä nia lä coano wejei toubä ja, Yai Bada nija a bufi a̦fa doblalou fa wäyämonö, cama ebä nija a wa̦ fama.
—Bei. Ei ji̦shima a ja wamacö nö bluca liyobä, a da dälöje. 18Cafä bämacö nowa taö lä cule. Ei uba bäma nashiwä toubä lä coale ya toubä nia coaö co̦o jaöomi. Yai Bada tänö cama ebä ca̦i cuobä jamö, ö̦jamö ya toubä nia shino coaö co̦o —a cuma.
19Ö̦jö däjä nii a fa dälönö, Yai Bada nija a bufi a̦fa doblalou wäyämou co̦oma. Ö̦jö däjä a fa joyolalönö cama ebä nija bä jöbäö cuaama. Bä jöbälanö abinaja bä nowa tama.
—Ei nii a lä cui, camiyä ya nia lä jöböo wei, ei bei ya ya̦ji nö owä, cafä wamacö bayeliblamobä ya nia lä jöböo wei. Bämacö iyaö lä cuaalenaja bä cuaaö da juo, wamale nofi jaducubobä —bä nowa tama.
20Inaja showawä, bä fa iyalönö, ji̦shima a ja, nashiwä toubä befi ca̦i däa nomöjölema. Abinaja a cuma.
—Yai Bada tänö tä a̦fa lä wäqueno wei tä a̦ bejedi cublobä, ö̦jö bei lä ya i̦yäbö nö owä. Wamacö bayeliblamobä ya i̦yäbö läblalio. Ö̦jö wama tä a̦ nofi dude jaducubobä, ei a li ji̦shima.
21’Ö̦jö ma cui, yale nia lä nomojoliaö wei a lä cui, camiyä bämacö nija a iyaö ca̦i coyocoa lä cule. 22Camiyä ya lä yanowamöblaleyoluno wei ya lä cui, bejedi lä wale nia nomamaöje, Yai Bada tänö tä taamaö lä bufiono weinaja showawä. Ö̦jö ma cui, wale yai nia lä nomojoliaö wei a lä cui, ö̦jö a nö nia shino yai bleaaö dodijio —a cuma.
23Cama ebä wa̦liyou ja, abinaja bä cuma.
—Bä nö lä nabämou wei bä nija, ¿wedi jamö a lä cuinö a nia jömöaö? —bä cuma.
Cama bä bada cuo
bufi lä doblaono wei tä a̦
24Jesús nija bä lä nocaono wei, cama bä bada cuo bufi doblao fa ayaonö, bä a̦fa tayoa dicolayoma. 25Abinaja Jesúsnö bä nowa tama.
—Bluca bä lä bälöblai bä nijamö bä bada lä läblai, cama bä a̦ shino ji̦liamou bufi doblao talei. Cama bä bada lä cui, “Ya bä bayeliblabä ya li läo”, bä li cama cuu. 26Ö̦jö ma cui, inaja cafä wamacö nofi tamamobä wamacömi. Ma, cafä wamacö nija bada a cuo bufi lä doblao wei a lä cui, jai a oshe a shino yai cublobä. A lä nosiemou wei a lä cuinö bä nosiemaö fe balojoo mlai, bä shino yai bayeliblabä. ¿Ö̦jö tawä?
27’Ai a lä cui, a iyabä a loquei. Ai a mö feduwä lä cuinö a iyamabä ebä nii baaquei. ¿Wedi jamö a lä cui, a yai bada, ö̦jö lä? A lä iyale a shino yai bada, ¿ö̦jö tawä? Ö̦jö ma cui, camiyä ya lä cui, cafä wamacö nijamö ya lä cuaale, jai bämacö nosie juabä ya cua yalo, ya ja̦omou si ijejewä.
28’¿Ö̦jö tawä? —a cuma—. Wale nö ma bleaamaö wejei ma cui, wamacö nocao fe lä yadio wei wamacö. 29Ö̦jö cudeenö bada bämacö nia tablaö, Fayänö camiyä wale lä taamano weinaja showawä, 30iba ya bä ca̦i nia lä cuo wei jamö, camiyä nija wamacö nö liyobä. Bada bä döcäobä täbä lä cui, afä 12 täbä ja wamacö fa döcäalunö, Isaeli ebä nija wamacö nia bada läo, ö̦jö bä ijilubö 12 ebä nodiwä lä yaiablalou wei bä nija—a cuma.
Pedronö Jesús a nofi nia
jole lä mojodubono wei tä a̦
31Simón Pedro nija abinaja Jesús a cuma.
—Simón. Wale a̦ da ji̦lilä, Simón. Sadanasinö wa wababä, Yai Bada nija a wa̦ faö waiquiwä. I̦cali wa fa laecanö, nii bä lä taö wejei jamö bei tesibä joyamou lä culenaja, wa nia tablamou. 32Ö̦jö ma cui, Yai Bada nija bäfä nö bayeli nacaö waiquiwä, wa bufi lojodoo fe yadiobä. Wa bufi mö yabajablou co̦o däjä, aifä wa bä bufi lojodoamaö mö feduobä —a cuma.
33Abinaja Pedro a cuma.
—Tä a̦ wäyäle. Bäfä nia daaimi. Täbä fe lä lamaö wejei jamö wa fe ma laquei wejei ma cui, wa shäö ma cujei, cafä nija ya nia nocao fe yadio showao —a cuma.
34—Ma, Pedro —Jesús a cuma—. Bäfä nowa taö lä cule. Cadala a wa̦ faö showao mlao däjä, 3 wale nofi nia jole jole mojodubou cuo —a cuma.
Jesús ebä nö nia bleaaö
lä majöono wei tä a̦
35Cama ebä nija abinaja Jesús a ca̦i cuma.
—Bämacö jaba lä shömano wei däjä, blada wama bä besibonomi. Wama täbä didibofälöbä tä ma cui, wama täbä däanomi. Wamacö mamicö didio nomöjöobä täcö ma cui, wama täbä bolacabonomi. Wamacö shinoco lä juno wei däjä, ¿wamacö nö bleaama tawä? —a cuma.
—Ma, bleaanomi —bä cuma.
36Abinaja bä nowa taö nomöjöoma.
—Ö̦jö ma cui, abinaja ya cuu nomöjöo. Blada wama bä besibou ja, ö̦jö bä ca̦i da juje. Wama täbä didibofälöbä wama tä tabou ja, inaja showawä. Ai wanö, shocobi wa taboimi ja, camishi wa cö fa jöböcönö, shocobifä a da lululä. 37Bämacö nowa malä tale. Yai Bada etä a̦ oni jamö ya wa̦fa lä tamou wei tä a̦ nia bejedi wawäblou. Abinaja tä a̦ cuu.
Wa̦lidiwä talewä bä nija a yädämaquemaje.
’¿Ö̦jö tawä? —a cuma—. Einaja tä a̦ cuu. Yai Bada etä a̦ ja, ya wa̦fa lä tamou wei tä bluca wawäblobä tä malä cui.
38Abinaja bä cuma.
—Tä a̦ wäyäle, möblaa. Ei shocobi bolacabö cäcöbö cua —bä cuma.
—Inaja lä waiquiwä —a cuma.
Oliba tä balöcö jamö Jesús
a nö bayeli lä nacaono wei tä a̦
39A fa sibolunö, Oliba tä balöcö jamö Jesús a ayofälöma, showadi a lä cuaano weinaja showawä. Cama ebä lä nocamabono wei bä yauablalou showaoma. 40Bä showadi lä cublaaö wei jamö bä fa waloicunö, abinaja bä nowa tama.
—Yai Bada nija bä nö ca̦i bayeli da nacao, Sadanasinö wamacö yabäcäblaö däjä wama a wa̦ juaö yacläo dicoo mlaobä —bä nowa tama.
41Cama bä jilao juo däjä, maa mabä blajawä shäyämou lä culenaja Jesús a bayäcäwä fa cuicudunö, a diyäliquedayoma. A fa diyälibodunö a nö bayeli nacaoma.
42—Fabe. Fei däjä wale nö yai nia lä bleaamaö wejei tä lä cui, wa tä blajamabä tä cua ja, tä da blajamalö. Ö̦jö ma cui, camiyä ya cuaaö bufi lä doblao weinaja mlai, cafänö wale taamaö bufi lä doblao weinaja wale da taama —a cuma.
43Ö̦jö däjä Yai Bada etä a̦jele fa wawäblaliyonö, a bufi lojodoblamalema. 44Ö̦jö däjä Jesús a bufi jo̦lijou fe fa balojoonö, a nö bayeli yai nacao fe balojooma. Bei wäyäcu yobli lä cui, mashita jamö jai i̦yä i̦yä bä cuwä bä bläläma.
45Yai Bada nija a wa̦ faö fa waiconö, a fa ubladalunö, cama ebä lä nocamabono wei bä jilaa lä jäle jamö a waloa fa co̦iquiyonö, bä mia dalalema. Wajä wajä bänö bä fa malishalönö bä mioma. 46Abinaja bä nowa tama.
—¿Wedi tä tabä wamacö li mia dicoa cule? Bä da jocäcälalu. Yai Bada nija bä nö ca̦i bayeli da nacao, Sadanasinö wamacö yabäcäblaö däjä wama a wa̦ juaö yacläo dicoo mlaobä —bä nowa tama.
Jesús a lä juwäleno wejei tä a̦
47Jesúsnö inaja bä nowa taö showao däjä, bä lä toujublaliyono wei bä bluca juu showaimama. Jesúsnö bä 12 lä nocamabono wei ai e lä cuinö bä luluboma, Juda a wa̦fa lä cuono wei a lä cuinö. Jesús nija a icua ajedequema, a nomojoli mamocacö buyucabä. 48Ö̦jö ma cui, abinaja Jesús a cuma.
—Juda. Wale nomojoli lä buyucaö wei tänö, camiyä ya lä yanowamöblaleyoluno wei ya lä cui, bä nö lä nabämou wei bä nija, ¿bei wale nia li jömöaö dicoo? —a cuma.
49Jesús ebänö tä nia lä cublou wei tä fa dalalöjenö, abinaja Jesús nija bä cuma.
—Tä a̦ wäyäle. Shocobi bänö bäma bä nabä quequei tawä? —bä cudaliyoma.
50Inaja bä fa cudalunö, ai e isholayoma. Nofi bäyäalewä bada a nosie juamobä a nabä fa queicunö, a yömöca baquequeblalema. 51Ö̦jö ma cui, Jesúsnö a wasölema.
—Ma, bä isho dijä —a fa cunö, bei yömöcacö lä baquequeblaleno wei yömöcacö fa jubanö, a jaloa co̦malema.
52Ö̦jö däjä, a nabä lä juno wejei bä nija Jesús a wa̦ fama. Nofi bäyäalewä blowäjäwä bä ma cui nija, Yai Bada etä yafi jamö bä lä läono wei bä ma cui nija, judio bada ai bä ma cui nija, abinaja Jesús a cuma.
—Tomömolewä bä nabä juu lä culajeinaja, ¿wedi tä tabä bei wamale nabä li juu cuaaö dicoo cufe? ¿Wedi tä tabä shocobi, nablushi wama bä ca̦i juu cuboyoi? 53Yai Bada etä yafi jamö bämacö ca̦i loo däjä wamale juwäano malä mlai. Ö̦jö ma cui, wamacö cuaaö bufi lä doblao wei wamacö cuaabä tä cublou lä cule, mö didi jamö a bada lä läle a nosiemobä —a cuma.
Pedronö Jesús a nofi
jole lä mojodubono wei tä a̦
54Ö̦jö däjä Jesús a fa juwälöjenö, nofi bäyäalewä bada e yafi jamö a öbölefälömaje. Pedro a jäwäjäwä yauafälöma. 55Yafi sibo lä ji̦coloi tä möamo ja, cowa wacö fa yäbalöjenö, bä bomobä bä loquema. Ö̦jö däjä Pedro a ca̦i loo coyocoquema. 56¿Ö̦jö tawä? Pedro a loobä jamö, cowa wacö shi̦i wacacawä ja a fa dalalönö, bada a wa̦ juamobä a suwä lä cuinö a möö dodijoma. Yoca lä jolemabou wei a suwä cuoma. Ai e nija abinaja a cuma.
—Jesús nija fei a ca̦i cuoma —a cuma.
57Ö̦jö ma cui a wa̦ jole mojodumou ja, abinaja a Pedro cuma.
—Ma. Ö̦jö ya daimi —suwä nija a cuma.
58Tä nö fa dedejedalunö, ai anö Pedro a daa fa nomöjölalönö, abinaja e cuma.
—Cafä ma cui cama wa e ca̦i —a cuma ma cui,
—Ma, ö̦jö ya emi —Pedro a cuma.
59Tä nö dedejedou fa co̦lonö, ai a wa̦ faö nomöjöo ja, a wa̦ fe blacäjoma.
—Bejedi lä ö̦jö bä nija ei a ca̦i co̦caoma. Calileateli a malä cui —a cuma.
60Ö̦jö ma cui abinaja Pedro a cuu mö feduoma.
—Cuwi. Camiyä nija wa lä cufe ya tä daimi —a cudou däjä, yedu cadala a wa̦ nocablaliyoma.
61Ö̦jö däjä Bada tänö Pedro a möa ashädalema. A fa mödalönö, Bada anö a nowa lä tano wei Pedronö tä nofi jaducudalema. “Cadala fei däjä a wa̦ faö showao mlao däjä, 3 wale nofi nia jole mojodubou”, a nowa malä tano wei. 62Ö̦jö däjä a bufi fa wajäblalunö, a siboa fa showadalunö a ö̦cöma.
Bada bänö Jesús a
dobloimi lä jömano wejei tä a̦
63Jesús a lä juwäbono wejei bänö a nö waiblamaje. A ca̦i shämaje. 64Mamocu fa jo̦yabojenö, a nö waiblaöje ja, a ca̦i wa̦limaje.
—Yai Bada a wa̦no wäyälewä wa jo̦wa lä cui, tä a̦fa wäa da cadidiba. ¿Wedinö bei wa shälei cufe? —a nowa tamaje.
65Bä a̦ wa̦lidiwä falanö a nö waibladimaje.
66Tä mö fa jalulunö, judio bada bä yododaö fenaoma. Nofi bäyäalewä blowäjäwä bä ma cui, Moisesi tä a̦ ja täbä lä damaö wejei bä ma cui, ö̦jö bä yododoobä jamö a icuobä, Jesús a öbölefälömaje. Abinaja a nowa tamaje.
67—Yai Bada tänö a shömabä a lä yaileno wei, ö̦jö lä cafä bei wa e waiquiwä ja, a wa̦ nö da wäbo —bä cuma ma cui, abinaja Jesús a cuma.
—Bämacö nowa taö ma cui ja, wamale a̦ nia bejedi bufiimi. 68Cafä bämacö wa̦lii ma cui ja, wamale a̦ nia ca̦i juaimi. 69Ö̦jö ma cui, ya fe fa weyadalunö, camiyä ya lä yanowamöblaleyoluno wei ya lä cui, Yai Bada tä nö wa̦lojaö lä ayao wei boco jayu mashi jamö ya nia döcöodayou —a cuma.
70Ö̦jö däjä, abinaja bä bluca cuu showaoma.
—¿Yai Bada cafä bei wa e Ijilubö, ö̦jö lä? —bä cuma.
—Wamacö a̦ cadidou. Ö̦jö ya e —Jesús a cuu mö feduoma.
71Ö̦jö däjä, abinaja cama bä nowa tayoma.
—¿Ö̦jö tawä? ¿Wedi tä tabä ai bäma bä a̦ li ji̦liaa co̦lei? Cama bäma a wa̦ ji̦lia malä waiquilufe —bä nowa tayoma.
المحددات الحالية:
Lucas 22: GUU
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
©2012, All Rights Reserved