Luk 13
13
Mulɛnɛ wɔ yimɔ Ɛbɨrɔkpabi
1Ra kɛgbɔ achifɛ, ɛfɔnɔ ani mba wa kani Jisɔs abaŋa ania Galili, mba Pailait ɔnyɛ nsɨm wa wulɔ bɛ wa waga mayi mabɛ, ndi wa sia kɔya wa nyaŋa Ɛbɨrɔkpabi. 2Jisɔs ofini bɛ na, “Ra nkatir owun, ania Galili mba wara asia obia wa siŋɛ ania Galili ndɨmdɨm-ɛ, ndi wa chɛ ɛdɔɔ esinisini nyi-ɛ? 3Nkani wun, Inyii! Gbɔ abɔ ri bi fɔranɛ itimɔ, awun fɛb kɨn riba irigirigɔ mɨnɛ. 4Din ani rokurɔ ra atal bɛ, mba wa ba ndi ɛnyɔŋ a Sailoam ɛtɔɔ ɛnyɛgɛ bɛ. Ra nkatir owun, asia obia mba wa biwɔ wa siŋɔ ani mbalɛkɨlɛ fɛb mba wa tuma ra Jɛrusɛlɛm-ɛ? 5Nkani wun, Inyii! Gbɔ abɔ ri bi fɔranɛ itimɔ, awun mɨnɛ kɨn riba irigirigɔ.”
Rɛkanɔ ra fig nwu obi wugɔ radɨnoti
6Kadi ɔkani bɛ rɛkanɔ ndifa na, “Ɛfɔnɔ keti ka fig ra kɛkɔ radɨnoti ka odumini wunɛ, ndi odulɔ ɔka dug radɨnoti, obichɛ tum dinɛ. 7Rɛfɔ adifɛ, ɔkani oni nwu ɔbagala kɛkɔ nchɛn na, ‘Jɛɛ rital faŋandi, nra nwɔŋa nwa dug radɨnoti ra keti ka fig nchifafa, gbɔ mbɨri chɛ tum dinɛ. Kɨbi chɛ fumɔ! Esinan kebina rɔchɛ?’
8“Odumini nwɛn ofini mɔ na, ‘ƆKƆKƆ, lɔɔ chɛ ketumɛ jɛɛ ndufa kɛkɨla, ntɔ rɛtɨnɔ rɛdɛn nrɔ kɔjɛ. 9Kebowug jɛɛ rodudu, eliu. Gbɔ abɔ kebiwugɔ kadi akɨbi chɛ atu.’ ”
Jisɔs ɔgbanɔ ɔwani kɛkpɔg Reyi Kɛfuɛkpa
10Reyi kɛfuɛkpa dinɛ, Jisɔs ɔra ɔkɔga ra ɛtɔa nyɔm a Jus yinɛ. 11Mɨnɛ ɛfɔnɔ ɔwani wunɛ nwu ɔrafɛ nwu kebia roifɛ kesimɔ ɔgbɔ kɛkpɔg jɛɛ rokurɔ rital (18). Ɔgbɔ mɛnɛmɛnɛ, obiya ɔnawɛnɛ-ɔnawɛ kpakpak. 12Ndi Jisɔs ɔchɛ mɔ, oyinɔ mɔ ɔwɔ ɛkparoisɔ, kadi ɔkani mɔ na, “Ɔwani, ntawu ntibɔ ra ɔfɛn obu mbufa.” 13Kadi Jisɔs origɛ mɔ kɔbɔ, mɨnɛ ɔmɔmɛɔmɔmɛ ɔnawɛnɛ, mɨnɛ ɔbɨnɛ ɔnyaŋa Ɛbɨrɔkpabi ɛkalɛlɛ. 14Gbɔ etimɔ ɛra ɔkɔretu ɛtɔa nyɔm a Jus, kum Jisɔs ɔgbanɔ oni Reyi kɛfuɛkpa. Ɔkani ani mba wa rafɛ na, “Rayi ratital dɛ ɛlɔmɛnyɛ na oni osi rotumɔ. Riwɔ riwa tama ɛgbanɛlɛ ra rayiada, rika wɔ Reyi kɛfuɛkpa.” 15Jisɔs ɔkɔkɔ ɔkani mɔ na, “Awun ani ikparobug! Nɛɛ riyɔ taa ifɔm iwun din nyanya owun ra kɛban ka itin Reyi kɛfuɛkpa wɛka ŋɔ mani? 16Ɛra kebia na wɔnɔwani a Ɛbɨraam nwu Sɔtan obo fin mɔ ra mkpokobi jɛ rokurɔ rital (18), ɔtama ɛtaɛlɛ atibɔ ra birɛ mbi wɛbɔ mɔ Reyi Kɛfuɛkpa-a?” 17Ndi ɔkɨlɔ lam alɛ, anianjɨŋ abɛn aba gbɔu wosibɛ, gbɔ ani mbalɛkɨlɛ fɛb ra rɛkau etimɔ ɛdɔmɛ bɛ ra birɛ reju mbi Jisɔs ɔra osia.
Rɛkanɔ abaŋa rɛkɨm ra Ɛbɨrɔkpabi
(Mat 13:31-32; Mak 4:30-32)
18Kadi Jisɔs ɔbɨbɔ na, “Rɛkɨm ra Ɛbɨrɔkpabi rɛra amɔm bu? Mɨnɛ nluma dɛ ra bu? 19Rɛra amɔm egbigbɛd emuu-a ndug, nyi oni otimɔ ɔbaŋɔ ra kɛkɔ kɛchɛn. Eruɔ tata echimininɛ ɔkɨmkɨm keti, mɨnɛ oninɔɔn kayu wo ri ralug ra obibɔ ɔbɛn.” 20Ɔbibɔ ɔkɨla na, “Mambum bɛ nluma rɛkɨm ra Ɛbɨrɔkpabi ra? 21Rɛra amɔm iyis, nyi ɔwani otimɔ ɔsɔgara ra aŋgbaŋ ibɔ iwa atal nyi wa kɔgɔ kechila, rɛtɨnɔ fɨlam.”
Ɔkegere nwu ɔra mɨmamɨma
(Mat 7:13-14,21-23)
22Kadi, Jisɔs ɔchɛŋɛ ɔfɨrɔ nkɨmkɨm ɔkɔga ani ndi osiŋa ɔya Jɛrusɛlɛm. 23Oni ɔbɨbɔ mɔ na, “ƆKƆKƆ, ani nla giriri bɛ wa nɨŋɔ fɔn ɛnaninani-ɛ?” Ɔkani bɛ na, 24“Ri nyɔgɔ nɛ rinɔlɔ okegere nwu ɔra mɨmamɨma, kum nkani wun, ani esii kɨn wa rɨŋɔ na wa yɛ wa nɔlɔ, gbɔ wa wabiyaa. 25Ɔkɔ ɛtɔ ɔbɔ tɨmnɛ ofinɔ okegere; kɨn ribarɔ rɔfa rikɨba mɨnɛ ridɨa na, ‘ƆKƆKƆ, kugɛlɛ wul okegere.’ Gbɔ kɨn ofini wun na, ‘Ami nyi wun. Mbigbɛra kumka risi riwɔ.’
26“Awun kadi kɨn ri fini na, ‘Rɛ jɛ mɨnɛ rɛ ŋɔ ra wu, mɨnɛ akɔgɛ ra ɔfɨrɔ obul.’
27“Gbɔ amɔ kɨn ofini na, ‘Ami nyi wun, mbigbɛra kumka risi riwɔ. Ri tɨmɔnɛ nfa, awun fɛb mba kebia kɛda wun esiɛlɛ!’
28“Ribɔ resuɛlɛ kɨn riyawɔ afɛ, arigɛ rasalɔ rejiɛlɛ. Kɨn ri chɛ Ɛbɨraam, Aisig, Jekɔb akɨla alamaremu ra Ɛbɨrɔkpabi ra rɛkɨm ra Ɛbɨrɔkpabi, gbɔ kɨn wa fumo wun rɔfa. 29Ani kɨn wa si ɛkpa-kodumɔ arigɛ ɛkpa-kofid, ɛkpa-mbira arigɛ ɛkpa-ntɔla wa wɔ, wawa tim otu ɔbɛ ra kɛtɔmɔ rɛkɨm ra Ɛbɨrɔkpabi. 30Ri chɛ, ani mba wara akugirɨmɔ kɨn wa tumɛ arɨŋɛtɨma#13:30 arɨŋɛtɨma Nfa ani ra nkatir ɔbɛ koliwɔbɛ oliuw, birɛ kɨn we chimininɛ, mɨnɛ mba wara arɨŋɛtɨma kɨn wa tumɛ akugirɨmɔ#13:30 akugirɨmɔ Nfa ani mba wara ra sugum, esinisini, ntau, Ɛbɨrɔkpabi kɨn echimini birɛ kɛdɔmetimɔ arigɛ ɛtɔmɛlɛ ɛnyɛ bɛ.”
Ɔsɛŋɛ wosii Jisɔs abaŋa Jɛrusɛlɛm
(Mat 23:37-39)
31Ra kɛgbɔ achifɛ, Farɛsi wa wɔwa yimɔ Jisɔs mɨnɛ wa kani mɔ na, “Gbɛ kumka fa, dɔŋ nkum kadudu, kum Ɛrɔd ɔra duga na owulɔ wu.”
32Ofini bɛ na, “Ridɔŋ rika kani kɛrɔwɔ achi na, ‘Ami kɨn dulɔ ɛkparoisɔ nyima obia roifɛ, ngbana rifɛn ɛdɛndifa akɨla refu, ra rayi ratal, kɨn wɛ rotumɔ rodum.’ 33Tum ndi ɛralɛ, ɛdɛn, refu akɨla kefilɛ kɨn dulɔ ɛtɨma ɛyɨm. Kum ebisiŋɛ ra Jɛrusɛlɛm dɛ ɔlamaremu ra Ɛbɨrɔkpabi ɔba!”
34“O Jɛrusɛlɛm, Jɛrusɛlɛm, awu nwu awulɔ alamaremu ra Ɛbɨrɔkpabi, atuba mba wa tigɛ wanyewu rata, ɛgbɔɛmɛ yɛ mbo bum ntugɛlɛ bɔnawun nkum kanɛ, kɛmanchi ɔma ɛkɔg ɔkɨba bɔn ikɔg abɛn ɔkpɨbɛ, gbɔ ebidawun! 35Chɛ nɛ, ɛtɔ eyi ɛgbɔ kɛkpaga. Mɨnɛ abɔ chɛ mɛ akɨla, tata alamɔ na, ‘Ɛmɔlɛmɔlɛ ɛfɔnɔ oni nwu ɔwɔŋa ra ridɨnɔ ra ƆKƆKƆ!’#13:35 Ichɛrɔ 118:26 ”
المحددات الحالية:
Luk 13: Olulumo-Ikom
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
©️2024 Luke Initiative for Scripture Translation