लूका 1
1
लूकाको उदेश्य
1बहुत जद्धा माननीय थियोफिलस, हमरे बीचमे भए घटनाके बारेमे एक विवरण सँग्रह लिखनके ताहीं बहुत आदमी कोसिस करी हएं। 2बे ठिक बहे लिखीं, जो हमके बे आदमीनसे बताओ गओ रहए। जौन बे येशूको सेवकाइके सुरुसे देखी रहएं, और जौन पिच्छु परमेश्वरको बचनको सेवक बनिगए। 3माननीय थियोफिलस, मए फिर जे सब बातके ध्यानसे जाँच करो हओं। और मोके जा अच्छो लागो, कि मए तुमर ताहीं जा घटनाके क्रम अनुसार लिखो। 4मए हियाँ जाकेमारे कहात हओं, ताकी तुमके हरेक बो बातकी पुरा सच्चाई पता चलए, जौन आदमीनसे तुमके बताओगओ हए।
जकरिया और एलीशिबा
5जब राजा हेरोद, यहूदिया परदेशमे राज्य करत रहए, तओ अबियाको दलको जकरिया नाउँ भओ, एक जनै यहूदी पुजारी रहए। बोकी बैयरको नाउँ एलीशिबा रहए। और बो फिर इस्राएल देशको एक पुजारी, हारूनको पिढीसे रहए। 6और बे दुनए परमेश्वरके अग्गु धर्मी रहएं, और परमप्रभुको सब आज्ञा और धार्मिक बिधि-बिधानमे निर्दोष हुइके नेँगत रहएं। 7पर बिनको कोइ सन्तान नाए रहए, काहेकी एलीशिबा बाँझी रहए, और बे दोनए बुढे हुइगए रहएं।
स्वर्गदूतसे यूहन्नाको जनमकी भबिष्यबाणी
8एक दिन जकरिया परमेश्वरके अग्गु यरूशलेमके मन्दिरमे, यहूदी पुजारीको रितीरिबाजको काम करत रहए, काहेकी बो हप्ता जकरियाको समुहके पुजारी, सेवा करत रहएं। 9तओ यहूदी पुजारीको रितीरिबाजके अनुसार चिट्टा डरात यरूशलेमको मन्दिर भितर घुसके धुप पजारनको काम जकरियाके पणो। 10और धुप पजारन बेरा आदमीको सारा भिड बाहिर यरूशलेमको मन्दिरके आँगनमे परमेश्वरसे प्राथना करत रहए।
11परमप्रभुको एक स्वर्गदूत धुप-वेदीको दहिना घेन ठाणो दिखाइ दइ। 12और जकरिया बोके देखके घबणियाइ गओ, और बहुत डराइगओ। 13पर स्वर्गदूत जकरियासे कही, “मत डराए जकरिया, तेरो परमेश्वर तिर प्राथना सुनलैहए, और तेरी बैयर एलीशिबा तिर ताहीं एक लौंणा जन्माबैगी, और तए बोको नाउँ बप्तिस्मा देन बारो यूहन्ना धरीए। 14तोके खुसी और आनन्द होबैगो, और बहुत आदमी बोको जनम्मे खुसी होमंगे काहेकी बो पैदा भओ हए। 15काहेकी बो प्रभुके अग्गु महान होबैगो; और बो दारु और कुछु फिर नसा लगन बारी चीज नाए पिबैगो, और पहिलीसे अपनी अइयाके गरबसे बो पबित्र आत्मासे भरो होबैगो। 16और बो इस्राएल देशके बहुत आदमीके बिनके प्रभु परमेश्वरके घेन घुमए लेबैगो। 17बप्तिस्मा देन बारो यूहन्ना एक अइसो आदमी होबैगो, जौनके सँग परमेश्वरको वक्ता एलियाको आत्मा और शक्ति होबैगो। बो प्रभुको डगर तयार करैगो। और दौवाको मन लौंणालौंणीयाके घेन होबैगो; अनाज्ञाकारी आदमीके, परमेश्वरको ज्ञानके स्वीकार करन बारो बनाबैगो; और प्रभुके ताहीं एक योग्य प्रजा तयार करैगो।” 18तओ जकरिया स्वर्गदूतसे पुँछी, “जा मए कैसे जानंगो, कि हमर सँग अइसो होबैगो? मए बुढो हुइगओ हओं; और मेरी बैयर फिर बुढी हुइगइ हए।”
19स्वर्गदूत जकरियासे कही, “मए गब्रिएल हओं, मए परमेश्वरके अग्गु ठाणो रहात हओं। तिर सँग बात करन और जा अच्छो समाचार परचार करनके ताहीं मए पठाओ गओ हओं। 20और देख जौन दिनतक जा बात पुरा नाए हुइहए, बो बेरा तक तए गुँगो होबैगो, और मसक नाए पबैगो। काहेकी तए मिर, बो बचनमे बिश्वास नाए करो, जौन बचन ठिक समयमे पुरा हुइहए।” 21जकरियाको आशिर्बाद लेनके ताहीं मनै मन्दिरके आँगनमे असियात रहएं, और मन्दिरमे बोके देर हुइगओ देखके बे हैरान हुइगए। 22जब बो बाहिर निकरके आओ, तओ बिनसे मसकी नाए पाइ, और बो यरूशलेमको मन्दिरमे दर्शन देखिहए, कहिके बे बुझलैं। बो बिनके इसारा करन लगो और बो, गुँगो रहातए रहो।
23जब यरूशलेमको मन्दिरमे एक पुजारीके रुपमे बोको सेवाको हप्ता खतम हुइगओ, तओ बो यरूशलेम सहरसे अपन घर गइ भओ। 24कुछ दिनके पिच्छु बोकी बैयर एलीशिबा गरबबती भइ; और पाँच महिनातक दुस्रे पता नाए पामएं करके लुक्के घरमे बैठी। 25एलीशिबा कही, “प्रभु मिर उपर भलो काम करीहए, बा मिर उपर अनुग्रह करीहए। और आदमीके अग्गु मिर बाँझोपनाके दुर करीहए।”
स्वर्गदूत मरियमके अग्गु प्रकट
26जब एलीशिबाको पेटमे छय महिनाको बच्चा रहए, तओ परमेश्वर गब्रिएल स्वर्गदूतके गालील परदेशको नासरत गाउँमे पठाइ। 27बो, एक कन्या-लौंणीयाके ठिन गओ जौनको मंगनी राजा दाऊदके घरानाको योसेफ कहान बारो एक आदमीसे भओ रहए। बो कन्याको नाउँ मरियम रहए। 28और स्वर्गदूत बोके ठिन जाएके कही, “तोके अभिबादन, परमेश्वर तिर उपर बहुत बढो कृपा करीहए! प्रभु तिरसँग हए।”
29तओ बो जा बचनके सुनके बहुत घबणियाइ गइ, और सोँचन लागी, कि जा अभिबादनको अर्थ का हए। 30स्वर्गदूत बोसे कही, “मतडराबए मरियम, काहेकी तए परमेश्वरसे कृपा पाओ हए। 31और देख, तए गरब होबैगो, और एक लौंणा जन्माबैगो; तए बाको नाउँ येशू धरीए। 32बा महान होबैगो, और परमप्रधानको लौंणा कहोजाबैगो, और परमप्रभु परमेश्वर बाके बक पुर्खा, राजा दाऊद जैसो राजा बनाबैगो। 33और बा याकूबके पिढीके उपर सदादिन राज्य करैगो; और बाको राज्यको कभी फिर अन्त नाए होबैगो।”
34मरियम स्वर्गदूतसे कही, “जा कइसे होबैगो, मए हबए एक कन्या हओं।” 35स्वर्गदूत बोके जबाफ दइके कही, “पबित्र आत्मा तिरमे आबैगो, और परमप्रधानको शक्तिको छाहीं, तिर उपर पणैगो; जहेमारे तिरसे जनम लेन बारो लौंणा पबित्र होबैगो, बा परमेश्वरको लौंणा कहोजाबैगो। 36सुन, तिर नातेदार एलीशिबा फिर, बुढेम गरब रहए, और जो बाँझी कहीगइ रहए, हबए बक पेटमे छय महिनाको बच्चा हए। 37परमेश्वर सब चीज कर सिकतहए, कुछु फिर बाके ताहीं असम्भब नाएहए।”
38तओ मरियम कही, “देखओ, मए परमप्रभुकी दासी हओ, जैसी तुम कहेहओ, उइसी मिर सँग होबए।” तओ स्वर्गदूत बोके ठिनसे चलोगओ।
मरियम और एलीशिबाकी भेँट
39कुछ दिनके पिच्छु मरियम यहूदिया परदेशको पहाडी क्षेत्रको एक गाउँमे गइ। 40और जकरियाके घरमे घुसके एलीशिबाके अभिबादन करी। 41जब एलीशिबा मरियमको अभिबादन सुनी, तओ बोको गरबको बालका उछलपणो। और एलीशिबा पबित्र आत्मासे भरीगइ। 42एलीशिबा चिल्लाएके कही, “बैयरन मैसे तए धन्यकी हए, और बो बालका धन्यको होबैगो, जोके तए जनम देहए। 43मए तोके हियाँ भेँटके अपनएके सम्मानित महसुस करत हओं, मिर प्रभुकी अइया मोसे भेँटनके ताहीं आइ हए! 44और देख, मए तिर अभिबादन सुनतएखिना, गरबमे भओ मिर बालका आनन्दसे उछलपणो। 45और तए धन्यकी हए, काहेकी तए बिश्वास करो, कि प्रभु जो तोसे कही हए, बा बोके पुरा करैगो।”
मरियमकी स्तुतिगान
46तओ मरियम कही,
“मए परमप्रभुको स्तुतिगान करत हओं,
47और मए मिर उद्धार करन बारो परमेश्वरमे आनन्दित हओं,
48काहेकी बा अफ्नी दासीकी दिनतामे
कृपा-दृष्टि करीहए,
देखओ, अब उप्रान्त सबए पिढीके
आदमी मोके धन्यकी काहमंगे।
49काहेकी परमेश्वर, जो शक्तिशाली हए,
बा मिर ताहीं महान काम करीहए। बाको नाउँ पबित्र हए।
50परमेश्वरको दया, पिढीसे पिढीतक बे आदमीके उपर बनी रहात हए,
जौन परमेश्वरसे डरात हएं,
51परमेश्वर अपनो महान सामर्थ्यके उपयोग
महान काम करनके ताहीं करत हए। बा घमण्डीन्के तितरबितर करत हए।
52बा सासकन्से बिनको शासन करन बारो अधिकार छिन लेतहए,
और नम्रन्के सम्मान देतहए।
53भुखानेन्के परमेश्वर अच्छी चीजसे तृप्त करीहए,
और धनीके परमेश्वर खाली हात पठाइ हए।
54बा हमर पुर्खासे करो अपन बाचा याद करीहए,
अपन सेवक इस्राएल देशके आदमीनके सहयोग करनके आओ हए,
55बा अब्राहामके और बोके सारे पिढीके हमेसाके ताहीं दया दिखानके ताहीं याद करीहए।”
56मरियम एलीशिबा सँग लगभग: तीन महिना बैठके अपने घरमे लौटी।
बप्तिस्मा देन बारो यूहन्नाको जनम
57अब एलीशिबाको बच्चा होनको बेरा आओ, और बो एक लौंणा जन्माइ। 58परमप्रभु बोके उपर बडो दया दिखाइ हए करके एलिशिबाके परोसी और नातेदार बोके सँग रमाइं।
59आठौ दिनमे बे बालकाको खतना करन आए। और बालकाको नाउँ बोको दौवाको नाउँ जैसो जकरिया धरन चाँहत रहएं। 60और बालककी अइया एलीशिबा कही, “नाए, जाको नाउँ बप्तिस्मा देन बारो यूहन्ना होबैगो।” 61बे एलिशिबासे कहीं, “तिर नातेदारमे अइसो नाउँ भओ, कोइ नाए हए।”
62तओ बे बालकको दौवासे इसारा करके पुछीं, “तए जाको नाउँ का धरन चाँहत हए?” 63और जकरिया एक लिखन बारी पाटी मँगाइ और बोमे लिखदइ, “जाको नाउँ बप्तिस्मा देन बारो यूहन्ना हए” और बे सब छक्क पणिगए। 64तओ जकरियाको मुँहुँ और जिभ तुरन्त खुलीगओ; और जकरिया मस्कन लागो, और परमेश्वरको प्रसंसा करन लागो। 65और उनके सब परोसी डराइगए; और जे सब बात यहूदिया परदेशके पहाडी मुलुकभर फैलीगओ। 66और सुनन बारे सब अपने-अपने मनमे बिचार करीं, “जा लौंणा कैसो होबैगो?” काहेकी प्रभुको सामर्थ्य बालकाके सँग रहए।
जकरियाको स्तुतिगान
67और बोको दौवा जकरिया पबित्र आत्मासे शक्ति पाएके अगमबाणी बोलन लागो,
68“धन्य हए प्रभु, इस्राएल देशको परमेश्वर!
बा अपने प्रजाके ठिन आओ हए,
और बिनको उद्धार करीहए।
69और बा हमरे ताहीं शक्तिशाली मुक्ति देन बारो पठाइ हए,
जो परमेश्वरको दास राजा दाऊदको पिढी हए।
70-71बहुत पहिले, प्रभु अपन पबित्र अगमबक्तासे कही,
कि बा हमके हमर शत्रुसे
और बे सब शक्तिसे उद्धार करैगो,
जौन हमसे घिणना करत हएं।
72बा हमर पुर्खान्के दया दिखानके,
और अपनो पबित्र करार याद करनके ताहीं आओ हए।
73-74बा हमरे पुर्खा अब्राहामसे कसम खाएके,
बाचा करीभइ बचन पुरो करके,
बा हमएं हमरे शत्रुसे छुणाबैगो,
ताकी हम बिना डरसे जीवित परमेश्वरको सेवा करपामएं।
75जब तक हम जिमंगे तबतक पबित्रतामे और धार्मिकतामे बाके अग्गु बाको सेवा कर पामएं।
76बो बालका परमप्रभु परमेश्वरको
अगमबक्ता कहोजाबैगो,
काहेकी बो परमप्रधानको डगर तयार करैगो।
77बो अपन आदमीनके पाप क्षमा द्वारा उद्धारको बारेमे ज्ञान देबैगो।
78जा हमर परमेश्वरको कोमल दयासे होबैगो;
जैसी दिन हमके प्रकाश देनके ताहीं चम्कत हए, उइसीयए येशू फिर हमरे ठिन स्वर्गसे आबैगो।
79और अन्धकारमे और मौतकी छाहीँमे बैठन बारेके प्रकाश देबैगो।
जहे प्रकाश हमके जीबनमे मार्गदर्शन करैगो, जौन हमके परमेश्वरके सँग शान्ति देतहए।”
80और बो बालका बप्तिस्मा देन बारो यूहन्ना बढतए और बलियो होतए गओ, और इस्राएल देशके आदमीके बीचमे शिक्षा देनके दिनतक जंगली इलाकामे रहो।
المحددات الحالية:
लूका 1: THRNT
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Rana Tharu Bible (राना थारु) by The Love Fellowship is licensed under Creative Commons Attribution-ShareAlike 4.0 License.