लूका 2
2
बेथलेहममे येशूको जन्म
(मत्ती. 1:18-25)
1बे दिनमे रोमको महाराजा कैसर अपनो सबए रोमी साम्राज्यके आदमीनके नाउँ दर्ता करनके ताहीं हुकुम जारी करी। 2कुरेनियस सिरिया परदेशके बडो हाकिम होनबेरा जा पहिलो दर्ता रहए। 3और सबए आदमी, नाउँ दर्ता करनके ताहीं बे अपने-अपने पुर्खनके गाउँमे गए।
4योसेफ, राजा दाऊदको पिढीको हुइके कारण, बो गालील परदेशके नासरत गाउँसे यहूदिया परदेशको बेथलेहेम गाउँमे गए, काहेकी राजा दाऊद हुनै जन्मो रहए। 5और बो अपनी गरबबती बैयर मरियमके सँगमे लैके नाउँ दर्ता करनके ताहीं गओ। 6-7जब बे बेथलेहममे रहएं, तओ बिनके ताहीं बो ठिहामे रहनके कोइ घर नाए रहए, जहाँ डगरोही रहात रहएं। जहेमारे बे एक सारमे बैठे। जब मरियमको बच्चा जन्मन समय आओ, तओ बे हुवाँ अपन पहिलो लौंणाको जनम दइ। बो लौंणाके चिथरमे लपेटी और लौंणाके डोणामे धरी, जहाँ आदमी जानबरके जंगल खानके देत हएं।
बकरेहेरनके स्वर्गदूतसे खबर
8और बो इलाकामे कुछ बकरेहेरा रहएं, जौन रातके बँग्रमे रहिके अपन भेंणनकी लख्बारी करत हएं। 9और एक स्वर्गदूत बिनके ठिन देखा पणो; और प्रभुको महिमामय ज्योति बिनके चारौ घेन चमको, और बे बहुत डराइगए। 10तओ स्वर्गदूत बिनसे कही, “मत् डराओ, काहेकी देखओ, मए तुमके बडो आनन्दको अच्छो समाचारको परचार सुनामंगो, जो सबए आदमीके ताहीं होबैगो। 11आज बेथलेहम सहरमे, जो राजा दाऊदको सहर हए। हुवाँ तुमर ताहीं एक मुक्तिदाताको जनम भओ हए, जौन ख्रीष्ट प्रभु हए। 12जा चिन्हसे तुमके पता चल जाबैगो, कि बो बालका कौन हए: बो बालकाके लत्तामे लिप्टो भओ, और डोणामे सोत पाबैगे।”
13तओ इकबरी बे स्वर्गदूत सँग स्वर्गीय सेनाको एक दल देखा पणो। परमेश्वरको स्तुति करतए बे कहीं,
14“स्वर्गमे परमेश्वरको महिमा,
और पृथ्वीमे बे आदमीनसे जौनसे बा प्रसन्न हए, बिनके शान्ति!”
15जब स्वर्गदूत बिनसे बिदा हुइके स्वर्गमे गए, तओ बकरेहेरा आपसमे कहीं, “आओ, हम बेथलेहेम सहर तक जामएं, और हुवाँ घटो भओ, जा घटना और परमप्रभु हमके बताइ भइ बात जाएके देखएं।”
16और बे तुरन्त जाएके मरियम और योसेफ दोनएके, और बालकाके डोणामे सोत पाइं। 17जब बकरेहेरा जा देखीँ, तओ बो बालकाके बारेमे जो बात स्वर्गदूत बिनके कही रहएं, बो बात बताए दइं। 18और बे सब, बो बातमे अचम्मो मानीं, जो बात बकरेहेरा बिनके बताइ रहएं। 19पर मरियम जे सब बात समखत मनमे धरी। 20और बकरेहेरनके स्वर्गदूत बिनके बताइ कता, सुनके और देखनके पाएके कारण, बे परमेश्वरको महिमा और स्तुति करत लौटिगए।
येशूको खतना और नाउँ
21बालका येशू जन्मो भओ आठौँ दिन भओ, और बाको खतनाको समय आओ, तओ बाको नाउँ येशू धरीं, जौन नाउँ स्वर्गदूतसे मरियमके गरबमे आनसे अग्गु दओगओ रहए।
22-24और मोशाको नियम कानुन अनुसार मरियम और योसेफके शुद्ध होनको दिन पुरो हुइगओ रहए। तओ बे यरूशलेमके मन्दिरमे गए। बे हुवाँपर दुई कबुतरके बच्चनके बलिदान चढानके लैके गए। जा प्रभुको नियम कानुनके पालन करनो रहए। बे येशूके लैके यरूशलेम सहरमे फिर गए, येशूके प्रभुके अग्गु प्रस्तुत करएं, काहेकी प्रभुको नियम कानुन जहे कहात हए, “हर एक पहिलौठो लौंणा प्रभुके ताहीं, पबित्र होत हए।”
शिमियोनको स्तुतिगान
25बो समय यरूशलेम सहरमे शिमियोन नाउँ भओ एक आदमी रहए। और बो धर्मी और भक्ता रहए; बो ख्रीष्टको आनको आसरा और इस्राएल देशके आदमीनके तसल्ली देनके डगर देखत रहए, और पबित्र आत्मा बोकेसँग रहए। 26पबित्र आत्मा बोके बताइ, कि प्रभु येशू ख्रीष्टके नाए देखेतक मरैगो नाए। 27बो दिन, पबित्र आत्मासे अगुवाइ पाएके यरूशलेमको मन्दिरमे आओ; जब अइयादौवा बालका येशूके, मोशाको नियम कानुनको रितीरिबाजके अनुसार करनके ताहीं मन्दिर भितर लैके आए, 28तओ बे बालका येशूके, अपन गोदीमे लइं, और परमेश्वरके धन्यबाद दइके कहीं,
29“हे परमप्रभु, अब तुम करो बाचा अनुसार, मोए तुमर दासके शान्तिसे मरनके देओ।
30काहेकी मए उद्धारकर्ताके देखलओ हओं, जौन तुम सब आदमीनके बचानके ताहीं पठाइ हए।
31जो तुम सबए, आदमीके अग्गु तयार करेहओ,
32बा गैर-यहूदीनके ताहीं परमेश्वरके प्रकट करबान बारो ज्योति हए,
और तुमर अपने इस्राएल देशके आदमीनके ताहीं आदर हए।”
33और येशूके अइयादौवा शिमियोन बालकाके बारेमे कही बातमे अचम्मो मानीं। 34तओ शिमियोन बिनके आशिष दइ, बाकी अइया मरियमसे कही, “देख, बा त इस्राएल देशमे बहुत आदमीके नष्ट करैगो, और बहुत आदमी बचंगे। बाके परमेश्वरके घेनसे एक चिन्हाके रुपमे पठाइ हए, तओ बहुत आदमी बाको बिरोध करंगे। 35बे अपनो बिचार प्रकट करंगे और तरबार कता बडो दु:खसे तुमर अपनो ह्रदय फिर छिदैगो।”
हन्नाको गवाही
36आशेरको कुलमे फनुसलकी लौंणीया हन्ना नाउँकी एक बुढी अगमबक्ता रहए, जो कुमारी अवस्थामे बेहा करके सात बर्ष इकल्लो अपने लोगा सँग रहेपाइ। 37तओ बिधुवा रहिके बो चौरासी बर्ष पुग्गइ हए। बो यरूशलेमको मन्दिरके कभु नाए छोडत रहए, पर उपवास और प्राथनाके सँग रात दिन आराधना करत रहए। 38और बो बहे बेरा हुवाँ आएके परमेश्वरके धन्यबाद देन लागी, और जौन यरूशलेम सहरके आदमीनके उद्धार करन ताहीं येशूके पठानके परमेश्वरको प्रतीक्षा करत रहएं, बे सबके येशूके बारेमे कहान लागी।
योसेफ और मरियम घर लौटे
39और जब योसेफ और मरियम प्रभुको नियम कानुन अनुसार सब काम करके निभटाइं, तओ गालील परदेशको अपनो नासरत गाउँमे लौटके चलेगए। 40बालका बुद्धिसे भरिपूर्ण हुइके बढतए और बलियो होतए गओ, और परमेश्वरको अनुग्रह बालकाके उपर रहए।
बालका येशू मन्दिरमे
41येशूके अइयादौवा हर साल यहूदीनको निस्तार तेवहारमे यरूशलेम सहरमे जात रहएं। 42जब येशू बाह्र सालको भओ, तओ बे तेवहारको रिति अनुसार यरूशलेम सहरमे गए। 43और जब येशूके अइयादौवा तेवाहर खतम करके घर घेन लौटे, तओ बालका येशू यरूशलेम सहरमे रहिगओ; और हियाँ येशूके अइयादौवा पता नाए पाइं। 44येशू यात्रीके दलमे हुइहए, कहिके बे दिनभर नेगीं। येशूके बे, नातेदार और चिननजानन बारेनके बीचमे ढुँणीं, 45पर नाए पाएके बे येशूके ढुणत फिरसे यरूशलेम सहर घेन लौटे। 46तीन दिन पिच्छु, बे येशूके यरूशलेमको मन्दिरके आँगनमे मोशाको नियम कानुन सिखान बारेनके बीचमे बैठो, बिनकी बात सुनत और बिनसे प्रशन करत पाइं। 47सुनन बारे सब येशूकी समझशक्तिमे और येशूको जबाफमे छक्क पणत रहएं। 48येशूके अइयादौवा येशूके देखके अचम्मो मानीं, और बाकी अइया कही, “हे लौंणा, तए हमके काहे अइसो करो? देख तिर दौवा और मए तोके ढुणत-ढुणत हैरान हुइगए।”
49येशू बिनसे कही, “तुम मोके काहे ढुणत हओ? का मए अपन दौवाके घरमे होन पणैगो करके तुमके पात नाए हए?” 50पर येशू कही बात मरियम और योसेफ नाए समझ पाइं।
51तओ येशू अपन अइयादौवाके सँग नासरत गाउँमे घुमिगओ, और बिनको अधिनमे हुइके बैठो। येशूकी अइया मरियम जे सब बात अपनो मनमे धरे रही। 52और बालका येशू, परमेश्वर और आदमीनके अनुग्रह पाएके शरीर और बुध्दिमे बढतए गओ।
المحددات الحالية:
लूका 2: THRNT
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Rana Tharu Bible (राना थारु) by The Love Fellowship is licensed under Creative Commons Attribution-ShareAlike 4.0 License.