लूका 7
7
कप्तानको बिश्वासके येशू अचम्मो मानी
(मत्ती. 8:5-13)
1अपन सब बात आदमीनके सुनाएके येशू कफर्नहुम सहरमे प्रबेश करी। 2कोइ एक आदमी कप्तानको एक अच्छो कमैया रहए, जौन बिमार हुइके मरन बारो रहए। 3जब येशूके बारेमे बो सुनी, तओ बोको कमैयाके अच्छो करदेए कहिके बो यहूदी अगुवनको समुहके बिन्ती करन पठाइ। 4बे येशूके ठिन आएके बिन्ती करके कहीं, “रोमी कप्तान नेहत्तओ तुमसे मदत पान लायकको हए, 5काहेकी बो हमर जातिके अपनए कता प्रेम करत हए, और बहे हमर यहूदी सभाघर बनाइ रहए।”
6येशू बिनके सँग गओ। और कप्तानके घरके जौणहीं होत पेती, कप्तान अपने सँगीनके येशूके ठिन अइसे कहिके खबर पठाइ, “हे प्रभु, दुख मतउठाओ, काहेकी तुमके मिर घर भितर प्रबेश करबान लायकको मए नाए हओं, 7मए अपनए फिर तुमर ठिन आनको लायक नाए हओं। पर बचन इकल्लो बोलदेओ, और मिर कमैया अच्छो हुइजएहए। 8मए जाके सम्झत हओं, काहेकी मए फिर आधिकारीक आदमी हओं, और मिर अधीनमे सिपाही हएं। मए एकसे ‘जा’ कहात हओं, तओ बो जातहए, और दुस्रेसे कहात हओं ‘आएजा’ तओ बो आत हए। मिर कमैयासे ‘अइसो कर’ कहात हओं, तओ उइसी बो करत हए।”
9येशू जा बात सुनके कप्तानसे अचम्मो मानी, और घुमके अपन पिच्छु आन बारे भिडसे कही, “मए तुमसे कहात हओं, मए इस्राएल देशमे कभु फिर इत्तो बडो बिश्वास नाएदेखो रहओं।” 10तओ जित्नो फिर आए रहएं, बे सब सँगी घरे लौटके गए, और बे बो कमैयाके अच्छो भओ भेँटीं।
बिधवाको लौंणा जिन्दा भओ
11दुस्रो दिन येशू नाइन नाउँको सहरमे गओ, और येशूके चेला और एक बाणी भिड येशूके सँग गइ। 12जब येशू गाउँके ढिँगै पुगो, तओ मनै एक लहास बोकके बाहिर लैजात रहएं, बो लहास अपनी अइयको इकल्लो लौंणा रहए। और बोकी अइया एक बिधवा रहए, और बोके सँग लहासके मट्टी देनके ताहीं सहरके बहुत मनै जात रहएं। 13बोके देखके प्रभुको ह्रदय दयासे भरीगओ और कही, “तुम मत् रोबओ।”
14तओ ढिँगै जाएके येशू लहासके छुइ; और लहास बोकन बारे ठाणीगए, तओ येशू कही, “ए जवान, मए तोसे कहात हओं, उठजा।” 15तओ मरो आदमी उठके बैठिगओ, और मसकन लागो। येशू बोके बक अइयाके जिम्मामे लगाए दइ।
16तओ सब जनै डराइगए, और परमेश्वरको महिमा करीं, और कहीं, “एक जनै महान अगमबक्ता हमर बीचमे आओ हए, और परमेश्वर अपने आदमीनके रेखदेख करनके आओ हए।” 17और बाके बारेमे जा बात सारा यहूदिया परदेशमे और आसपासके सब जिल्लामे फैलीगओ।
खबर पुगान बारो यूहन्नाको प्रश्न
(मत्ती. 11:2-19)
18खबर पुगान बारो यूहन्नाको चेला जा सब बातको समाचार बोके दइदइ। 19यूहन्ना अपन चेलन मैसे दुई जनैके, प्रभु ठिन जा पुछन पठाइ, “का तुम बहे ख्रीष्ट हओ, जोके पठानके बचा परमेश्वर करी रहए? कि हम कोइ औके आसरा करएं?” 20जब बे आदमी येशू ठिन आए, तओ बे कहीं, “खबर पुगान बारो यूहन्ना हमके जा पुछन तिर ठिन पठाइ हए कि, जौन आन बारो हए, का तुम बहे हओ? कि हम दुस्रेक आसरा करएं?”
21बहे समयमे येशू गजबनको रोग, व्यथा और भुतसे छुटकारा दइ, और बहुत अन्धरा मनैनके देखन बारो बनाइ। 22तओ येशू बिनसे कही, “जाओ, और जो तुम देखे और सुने, जाएके खबर पुगान बारो यूहन्नासे कहीदेओ; अन्धरा मनै देखन बारे हुइगए हएं, लंगणा मनै नेँगत हएं, कोढ रोग लागे मनै अच्छे हुइगए हएं, बहिरा मनै सुनन बारे हुइगए हएं, मरे भए मनै जिन्दा हुइके उठे हएं, और गरीबके अच्छो समाचार परचार करोजाए रहोहए। 23धन्यको हए बो मनै, जौन मिर उपर शंखा नाए करत हएं।”
24खबर पुगान बारो यूहन्नाके चेला हुवाँसे चलेगए तओ येशू यूहन्नाको बारेमे भिडसे कहान लागो, “तुम जंगली इलाकामे का देखेन गए रहओ? का ब्यारसे हालरहो नरकुटाके? 25तओ तुम का देखन निक्रे रहओ? का अच्छो लत्ता लगाओ भओ आदमीके देखन? देखओ, चमकन बारो लत्ता पैँधन बारे और सुख बिलासमे बैठन बारे त राजदरबारमे होत हएं। 26तओ तुम का देखन निकरे? का परमेश्वरको अगमबक्ताके? हाँ, मए कहात हओं, तुम परमेश्वरके अगमबक्तासे फिर महान आदमीके देखे। 27जा बहे हए, जौनके बारेमे लिखो हए,
‘देख, मए मिर खबर पुगान बारो आदमीके तुमर अग्गु-अग्गु पठामंगो, जौन तुमर अग्गु तुमर ताहीं डगर तयार करैगो।’
28मए तुमसे कहात हओं, बैयरन मैसे जन्मो भओ बप्तिस्मा देन बारो यूहन्नासे महान दुस्रो कोइ नाए भओ हए। तहुँफिर परमेश्वरको राज्यमे जो सबसे छोटो हए, बो बोसे जद्धा महान हए।” 29और जब, सब मनै हियाँतककी कर उठान बारे फिर येशूको कहो भओ बातके सुनीं, तओ परमेश्वर धर्मी हए कहिके बे स्वीकार करीं, काहेकी बे यूहन्नासे बप्तिस्मा लइ रहएं। 30पर फरिसीनको समुह और नियम कानुन सिखान बारे, परमेश्वरको इच्छाके अपने ताहीं अस्वीकार करदइं और यूहन्नासे बप्तिस्मा लेनसे इन्कार करीं।
31येशू कही, जा पिढीके आदमीके मए कौनसे तुलना करओं? बे कौन कता हएं? 32बे त बजारमे खेलन बारे छोटे-छोटे बच्चा कता हएं, जौन एकदुस्रेके अइसे कहात हप्कात हएं, “हम तुमर ताहीं बसुली बजाए और तुम नाए नाचे। हम बिलौना करे, और तुम नाए रोए।” 33यूहन्ना बप्तिस्मा देन आओ, और बो नए रोटी खाइ रहए, नए अंगुरको रसा पिइ रहए। तुम, बोके भुत लागो हए, कहात हओ। 34मए, आदमीको लौंणा खात और पित आओ, और तुम कहात हओ, “देखओ, दलद्दर, दरोहा, कर उठान बारो और पापीनको सँगी!” 35पर परमेश्वरको ज्ञान, बो आदमीको जीबनमे सही दिखात हए, जो बो ज्ञानके पालन करत हए।
पापी बैयरके क्षमा
36फरिसीनको समुह मैसे एक जनै बाके भोजन खानके निउतो दइ, और बा बो फरिसीके घरमे जाएके खान बैठो। 37बहे गाउँकी एक बैयर अनैतिक जीबन बितान बारी रहए। तओ येशू, फरिसीनको समुह मैसे एक आदमीके घरमे खान बैठो रहए करके बो बैयर सुनी, और जटामसीको तेल सिङगमरमरकी शीशीमे, बहुत महिंगो महाँकन बारो तेल लैके बहे घरमे पुग्गइ। 38और येशूके पिच्छुसे आएके बाको पाउँ ठिन ठाणके रोनलागी और आँसुसे येशूको गोडो धोए दइ, और अपन मुणको बारसे पोछनलागी और येशूको पाउँके चुमके जटामसीको तेल अख्नाएके मिस्लन लागी।
39बो देखके, फरिसीनको समुहमैको एक आदमी जौन येशूके बुलाइ रहए, अपने मनमे सोँचन लागो, “अगर जा परमेश्वरको अगमबक्ता हुइतो कहेसे, बाके छुन बारी बेश्या बैयर हए, कहिके जान लित्तो।” 40येशू बोको बिचार पता पाएके बोके जबाफ दइके कही, “ए सिमोन, मोके तोसे कुछ बात कहानके हए।” बो कही, “बताबओ, गुरुज्यू।”
41तओ येशू जा कहानी कही: “कोइ जिम्दारको दुई कर्जीदार रहएं। एक जनै पाँच सओ चाँदीको सिक्का और दुस्रो पचास चाँदीको सिक्का कर्जा लइं। 42पर बिनके ठिन फिर्ता करनके कुछ नाए हुइके कारण, बे दुनौको कर्जाके माफ करदइ। जहेमारे बे दुनए आदमी मैसे कौनछो कर्जीदार, जिम्दारके जद्धा प्रेम करैगो?”
43सिमोन कही, “मिर बिचारमे, बो कर्जीदार जद्धा प्रेम करैगो जौनको जद्धा कर्जा माफ भओहए।” येशू बोसे कही, “तए सही कहो।” 44तओ बा बैयर घेन घुमके सिमोनसे कही, “का तए जा बैयरके देखो, कि जा मेरे ताहीं का करी? मए तिर घर भितर आओ, पर तए हमर चलन अनुसार मोके गोडो धोनके ताहीं पानी नाए दओ। पर जा मिर गोडो आँसुसे भिजाइ, और अपन बारसे पोँछी।” 45हमर चलन अनुसार तए मोके चुमो नाए, पर मए जबसे हियाँ आओ हओं, तबसे मिर पाउँ चुमनके नाए छोडी हए। 46तए मिर मुणमे जैतूनको तेल नाए लगाएदओ, पर जा मिर टाँगमे जटामसीको तेल लगाएके मालिस करिहए। 47“बहेमारे मए तोसे कहात हओं; बहुत पाप जो जा करीहए बो क्षमा भओ हए, काहेकी जा बैयर बहुत प्रेम दिखाइ। पर जौनके पाप थोरी क्षमा भओ हए, बो थोरी प्रेम करत हए।”
48तओ येशू बो बैयरसे कही, “तिर पाप क्षमा हुइगएहएं।”
49तओ जौन आदमी येशूके सँग खानु खानके बैठे रहएं, बे अपने मनमे सोँचन लागे, “पाप क्षमा करन बारो जा कौन हए? जोके त सिरफ परमेश्वर कर सकत हए।” 50पर येशू बैयरसे कही, “परमेश्वर तोके बचाएलैहए, काहेकी तए मिर उपर बिश्वास करोहए, शान्तिसे जा।”
المحددات الحالية:
लूका 7: THRNT
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Rana Tharu Bible (राना थारु) by The Love Fellowship is licensed under Creative Commons Attribution-ShareAlike 4.0 License.