HADUI DAHA' SIHU TUHAN 1
1
Aring na'
1 #
Lk 1:1-4
Té' pah dengah aleng una' di uh ek ngalung, u Teofilus, marung tuk-tuk lim-lim hadui dahin katuk aleng en Yesus atoh, 2#Lk 6:13 ateng dau Iha' tei peju, iha' tih men'uh dau Iha' ma'uk tebara alem tingan Belua' Ma'ang men daha' sihu Tuhan aleng uh Na' mili. 3Men daha' atih nah Iha' petula batung Na' baya men'uh katé' Na', dahin kuri-kuri tada' aleng bara Iha' murip. Avin alem dara pat-pulu dau anan, tutek lan Yesus nei tula té' daha' dahin bara marung tuk keligem Allah.
Yesus bara marung Belua' Ma'ang seng nei
4 #
Lk 24:49; Yoh 15:26; HST 10:41 Tegu Yesus peji dahin daha' atih, en Na' bara nah men daha', “Meng melek Yerusalem, sayu pidah jaji Taman tam aleng uh kam kelenghi men Akui. 5#Mat 3:11; Mk 1:8; Lk 3:16; Yoh 1:33 Avin lan Yohanes meduh kelunan té' ata', bi ikam anih seng duh té' Belua' Ma'ang, nusi' nuno' dara dau anan la'an,” ken Na'.
6 #
Lk 24:21; HST 3:21 Avin anan, tegu daha' uh pepeng, daha' meteng Iha', ken daha', “U Tuhan, seng kerei inih nah Tuhan seng meju keligem la'an men pahu Israel iah?” 7#Mk 13:2 Lun kuma' nah Yesus men daha', “Nusi' pekwat ikam seng jam marung jaka' na' dahin tegu na' aleng uh en Taman tam nageng alem tingan Na' dep. 8#Mat 28:19; Mk 16:15; Lk 24:47-48 Bi ikam seng ala tingan tegu Belua' Ma'ang nei té' ujung kam, ikam pah seng pedengah Akui ha' Yerusalem, nurei pah ha' lim daléh Yudea, dahin Samaria, ateng-ateng ji usun tana anih pah lahuh.”
Marung tuk Tuhan Yesus tei ha' Surga
9 #
Mk 16:19; Lk 21:27; 1 Tim 3:16; K Tula 1:7 Uh Ha' kuma' nunan, pelalau peju nah Iha' alem daha' atih nyineng Iha', dahin ji avun nyavun ala Iha' men unan daha'. 10#Lk 24:4 Alem daha' atih ngehaneng nyineng ha' langit alem Ha' tei peju, tenup-tenup tula nah dua' kelunan béh daha' ngebasung puti, 11#Mat 26:64; Lk 21:27; 1 Tim 3:16; K Tula 1:7 aleng kuma', “U ikam kelunan Galilea, nun tavit na' ikam nekring nyineng ha' langit? Té' pah Yesus anan dih aleng uh peju tei ha' Surga men hang kam anih, nunan pah lahuh Iha' seng nei la'an awi ikam nyineng Iha' tei peju ha' Surga tih.”
12 #
Lk 24:50-53
Men'uh atih, uli nah daha' men ngalang aleng aran na' Zaitun atih, aleng béh Yerusalem, pelalau tei ha' Yerusalem, su na' awi su anau Dau Kelarah. 13#Mat 10:2-4; Mk 3:16-19; Lk 6:13-16 Uh daha' tei alem daléh, tei nah daha' ma'un alem ji amin aleng hujung, ngavan daha' melo', iha' tih ngavan Petrus dahin Yohanes dahin Yakobus dahin Andreas, dahin Filipus, dahin Tomas, dahin Bartolomeus, dahin Matius, dahin Yakobus anak Alfeus, dahin Simon kelunan Zelot dahin Yudas anak Yakobus. 14#Mat 13:55; Yoh 7:3-5; HST 2:1 Lim daha' anih pa'en peji kenep sebayang dahin kuri-kuri la'ung daha' doh dahin Maria hinan Yesus, dahin dalo' harin Na'.
Matias en daha' mili ngalui Yudas
15Tegu atih nekring nah Petrus té' hang lim daha' peharin atih (kelunan aleng pepeng atih kio'-kio' ji atuh dua'-pulu la'ung ngahum daha'), pelalau ken Petrus, 16#NDI 41:9 “U kelo' harik lim, adang surat Tuhan atih seng la'ung, awi aleng dahun Belua' Ma'ang menuna' men alem ba Daud, marung tuk Yudas aleng geri daha' kelunan aleng mapuh Yesus. 17Avin Yudas uh peji dahin tam, dahin uh nyadui piah dahin tam anih. 18#Mat 27:3-10 (Té' pah kelunan anih ala ji tana té' tibah hadui na' aleng em teneng, pelalau petabam nah iha', pelalau mepek peso' buréh na', ateng huang buréh na' pah murei. 19Uh tula nah dengah atih alem lim-lim daléh Yerusalem, ateng tana atih en daha' na aran na' alem dahun daha' dep, Hakal Dama, aran na' Tana Daha.) 20#NDI 69:26; 109:8 Avin té' uh kalung alem surat Nyanyi Daha' Israel,
‘Sayu nah avan na' tei henung tua,
dahin meng mun kelunan murip halem na',
ji lahuh,
‘Sayu nah kelunan aleng ha' béh ala hadui na' tih.
21 #
Yoh 15:27
Avin atih, té' hang tam kelunan aleng pa'en peji men tegu Tuhan Yesus panau té' hang tam, 22men tegu dau Yohanes meduh ateng dau avan Yesus tei peju men unan tam pah, tekep mi'at ji la'ung men hang tam anan pedengah piah-piah dahin tam marung tuk Tuhan Yesus uh nei peju murip.”
23Pelalau daha' mili nah dua' la'ung, iha' tih Yusuf aleng aran na' Barsabas aleng anak Yustus, té' pah lahuh Matias. 24#Yoh 2:24-25; 6:70 Lun sebayang nah daha', ken daha', “U Tuhan, Ika' aleng jam marung kenep lim-lim kelunan, bara nah marung tuk dua' la'ung anih, ano' aleng Im mili 25seng ala hadui masi anih dahin balui sihu Ka', avin Yudas uh legak men ngavan anih, ateng iha' menangen tei ha' ngavan na' dep.” 26#Ivun 16:33 Lun en daha' na nah tikem surat men dua' la'ung atih, Matias aleng ga' na', pelalau daha' itung iha' aleng i'at daha' pulu-ji aleng sihu Tuhan atih.
المحددات الحالية:
HADUI DAHA' SIHU TUHAN 1: TDK1990
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Bible in Today's Dahun Kayan Version © Bible Society of Malaysia, 1990.