YOHANES 21
21
Tuhan Yesus tula benghé' bawang Tiberias
1Men'uh tuk-tuk atih Yesus petula Iha' té' dalo' anak sekulah Na' la'an té' béh bawang Tiberias. Nunih tuk Iha' petula Iha'. 2#Yoh 1:45 Tinan té' Simon Petrus dahin Tomas aleng en daha' na aran Didimus dih, dahin Natanael men Kana daléh Galilea, dahin dawa' anak Zebedeus dahin dua' la'ung anak sekulah ha' béh pah té' tinan lahuh. 3Ken Simon Petrus men dalo', “Akui seng tei ngejala' anih,” ken na'. “Kalo' pah ngenep nei dahim lahuh,” ken dalo' nyu'ei iha'. Tei nah dalo' peharuk, ji-ji pah dalo' em ala malem anan.
4 #
Lk 24:16; Yoh 20:14 Tegu dau pebekat nekring nah Yesus té' benghé, bi nusi' dalo' anak sekulah jam Iha' Yesus. 5#Lk 24:41 Iha' nah Yesus meteng dalo', “U arin, ala kelo' masik iah?” “Nusi' té',” ken dalo' nyu'ei Iha'. 6#Lk 5:4-7 Iha' nah Iha' kuma' men dalo', “En kelo' biving jala' kelo' bah ta'o haruk nan kereng, nurei té' kelan kelo',” ken Na'. En dalo' biving nah jala' dalo', beka' em deng loh dalo' mejat na' avin masik kelalau kahum halem. 7#Yoh 13:23 Iha' nah anak sekulah aleng ngavan Yesus nyalam atih kuma' men Petrus, “Tuhan anan,” ken na'. Kitan Simon Petrus Iha' Tuhan, pelalau ha' ngebasung, avin ngelungang iha' men'a, nesau nah iha'. 8Dalo' anak sekulah aleng ha' béh tei té' haruk atih avin nusi' dalo' su men benghé', té' awi lima'-pulu depah tua, en dalo' jat nah jala' atih hangan-hangan masik.
9Uh dalo' tei ma'un hujung tana, beka' dalo' jam baha' apui uh té', masik pah té' en Na' nyihei ujung paha', luti peksak pah té' lahuh. 10Iha' nah Yesus kuma' men dalo', “Geri balei masik aleng kelan kelo' maring anan,” ken Na'. 11Pelalau Simon Petrus tei ha' haruk mahin jala' anan tei ujung tana, penu masik dekaya'-dekaya' halem na', matuh lima'-pulu-telo' kahum daha'. Lan pah masik atih kahum, bi nusi' jala' atih birak. 12Iha' nah Yesus kuma' men dalo', “Nei nah kelo' kuman,” ken Na'. Ji la'ung pah men dalo' em makang meteng Iha' kuma', “Hi Ika' anih?” avin dalo' jam Iha' Tuhan. 13#Yoh 6:11 Nei nah Yesus, ala luti peksak atih dih ma'ih na' men dalo', masik pah lahuh en Na' ih.
14 #
Yoh 20:19,26 Anih nah aleng ketlo' hangun Yesus petula Iha' men dalo' anak sekulah Na' men'uh Iha' peju men hang kelunan matei.
Tuhan Yesus meteng Petrus
15 #
Yoh 1:42
Uh dalo' kuman, iha' nah Yesus meteng Simon Petrus, “U Simon, anak Yohanes, té' kah ika' halam té' Akui lalau men'uh dalo' anih iah?” ken Na'. Pelalau Petrus kuma', “U Tuhan, Ika' kah aleng jam akui dekaya' kenep té' Ika',” ken na'. “Makan nah anak duba Kui,” ken Yesus men iha'. 16#1 Pet 5:2,4 Iha' pah Iha' meteng iha' nekulah kedua' hangun na', “U Simon, anak Yohanes, té' kah ika' halam té' Akui iah?” ken Na'. “U Tuhan, Ika' pah aleng jam akui dekaya' kenep té' Ika',” ken Petrus men Iha'. “Puboh nah duba Kui,” ken Yesus men iha'. 17#Yoh 13:38; 16:30 Pelalau pah Iha' meteng iha' ketlo' hangun na', “U Simon, anak Yohanes, té' kah ika' dekaya' kenep té' Akui du?” ken Na'. Pelalau pah Petrus ji'ek kenep avin Iha' meteng iha' ketlo' hangun na' nunan, Iha' kuma', “Té' kah ika' dekaya' kenep té' Akui du?” Iha' nah Petrus kuma' men Iha', “U Tuhan, lim-lim ket nun-nun pa Ika' aleng jam na'. Ika' pah aleng jam akui dekaya' kenep té' Ika',” ken na'. Pelalau Yesus kuma' men iha', “Makan nah duba Kui. 18#16:22 “Dahuk lan men ika', alem ika' nyam, ika' dep kah ala basung ka', tei panau hino'-hino' aleng kenep ka', bi tegu ika' uh muku na'a sikah, ika' seng mejei tua usu ka', kelunan ha' béh aleng seng metei basung ka', dahin geri ika' ha' ngavan aleng em kenep ka',” ken Na'. 19#Yoh 13:36 (Iha' kuma' nunan anan bara marung patei Petrus aleng ngavan na' seng meju Allah). Uh Iha' kuma' nunan, Iha' kuma' men Petrus, “Ngioh nah Akui,” ken Na'.
20 #
Yoh 13:23
Nyili nah Petrus nyineng anak sekulah aleng ngavan Yesus halam atih ngioh lahuh, iha' nah anan aleng nyenéh té' usuk Yesus tegu dalo' pahlung malem arei dih, aleng kuma' men Yesus, “U Tuhan, hi aleng seng nebau ma'uk Ika' anan lo?” arei dih. 21Tegu Petrus nyineng anak sekulah atih, iha kuma' men Yesus, “Tuhan, seng nuno' tuk laké' anih lo?” ken na'. 22Pelalau Yesus kuma' men iha', “Awi Akui ngenep iha' té' pa'en ateng Kui nei nekulah, meng im ku'in té' atih. Ngioh nah im Akui,” ken Na'.
23Putat nah daho' atih té' hang dalo' peharin kuma' anak sekulah atih seng em matei. Bi nusi' Yesus kuma' iha' seng em matei, bi dahun Na', “Awi Akui ngenep iha' té' pa'en ateng Kui nei nekulah, meng im ku'in té' atih,” ken Na'.
Ka'uh daho'
24 #
Yoh 15:27
Anih nah anak sekulah aleng bara lim-lim tuk anih, dahin nyurat lim-lim tuk anih lahuh, itam jam dahun na' atih teneng.
25 #
Yoh 20:30
Té' kah kahum ket aleng ha' béh en Yesus na lahuh. Awi ita' ngalung lim-lim ket atih, kio' ta' lim usun tana anih pah em deng ngavan lim buhup atih aleng tekep en ta' na. 3
المحددات الحالية:
YOHANES 21: TDK1990
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Bible in Today's Dahun Kayan Version © Bible Society of Malaysia, 1990.