HADUI DAHA' SIHU TUHAN 11
11
Dahun Petrus ha' Yerusalem: iha' meduh daha' bengsa' ha' béh
1Kelenghen daha' sihu Tuhan dahin daha' harin tam aleng té' ha' Yudea marung daha' aleng bengsa' ha' béh pah uh ala dahun Allah. 2#HST 10:45 Tegu Petrus tei ha' Yerusalem, daha' aleng ngioh adet sunat anan pah pehu'ei dahin na', 3#Gal 2:12; Ef 2:11 dahin kuma', “Ika' uh tei dahin kelunan aleng em payan sunat, dahin pahlung dahin daha'.” 4Bi Petrus matoh men pa'un na' dahin nengaran tuk-tuk anan, ken na',
5 #
HST 10:9-48
“Té' nah tegu akui té' ha' daléh Yupe, sebayang nah akui, beka' henoh kui nei selap, pelalau kitak nah ji ket tula. Té' awi ji balun aleng berang nei nenguloh men langit té' pat tukuk na', nei ateng té' unan kui. 6Tegu kui nutok nyineng na' ké', beka' ek ineng lim-lim tulan aleng kudek pat ha' usun tana dahin tulan aleng jera', dahin ket aleng nganap dahin manuk-manuk lahuh. 7Kelenghek nah ji daho' aleng kuma' men akui, ‘U Petrus, peju nah, tevek nah, kani nah.’ 8Bi kek pah nyu'ei, ‘Nusi' ha' nunan Tuhan, avin ket aleng em tekep dahin aleng masep nusi' payan peletu tei halem ba kui,’ kek. 9Bi kedua' hangun na' daho' atih nei men langit, kuma', ‘Ket aleng ma'ang kenan Allah, meng im kuma' ha' em tekep.’ 10Telo' hangun tuk anan jadi' nunan, pelalau lim na' pah peju tei ha' langit la'an. 11#HST 10:7,23 Pelalau tegu anan pah té' telo' la'ung kelunan nekring ha' jenawa uma ngavan alo' anan, aleng hu'en daha' Kaisarea nei ha' akui. 12Belua' pah nyihu akui tei tugung dalo' anan dahin em kawah. Dalo' harin telo' nem la'ung anih pah nei ngioh akui, pelalau kalo' tei alem uma Kornelius anan. 13Iha' pah na'lung na' men kalo' nuno' tuk iha' uh jam meliket anan nekring alem uma na' aleng kuma', ‘Nyihu nah kelunan tei ha' Yupe, muvui Simon aleng aran na' Petrus. 14Iha' seng nengaran men ika' daho' aleng ngavam ala urip, nurei pah lim-lim huang uma ka' lahuh.’ 15Alem kui matoh dahuk, nei nah Belua' Ma'ang nesun té' daha' anan piah awi té' itam men aring na' dih. 16#HST 1:5 Pelalau kui hituk té' dahun Tuhan, aleng en Na' kuma', ‘Lan pah Yohanes meduh té' ata', bi ikam anih seng duh té' Belua' Ma'ang.’ 17Avin anan, iha' Al ah uh menei men daha' piah Iha' menei men itam tegu itam nginah té' Tuhan Yesus Kristus, nuno' akui aleng ji'ek anih, deng kui seng nyura' dahun Allah iah?”
18 #
HST 13:48; 14:27 Tegu daha' uh kelenghi tuk anan, tepaka' nah daha', pelalau meju Allah dahin kuma', “Iha' nunan, men daha' bengsa' ha' béh pah uh en Allah uk alan avan daha' ngelisah kenep, ngavan daha' murip.”
Aring-aring sidang ha' Antiokhia
19 #
HST 8:14
Lim kelunan aleng uh tei putat-purat avin tavit katé' aleng nei tegu Stefanus matei arei dih, tei ateng ha Fenisia dahin Siprus dahin Antiokhia nah daha', bi nusi' daha' bara daho' men ji la'ung pah, bi men daha' Yahudi dep kah. 20Bi té' balei daha' kelunan men Siprus dahin men Kirene, tegu daha' ateng ha' Antiokhia daha' tengaran dahin daha' Yunani lahuh, pedengah marung Tuhan Yesus. 21#HST 2:47 Usu Tuhan pah masi daha', ateng daha' kahum nginah dahin ngelisah pala Tuhan.
22 #
HST 4:36
Tula nah dengah anan ha' daha' sidang ha' Yerusalem, pelalau daha' nyihu Barnabas tei ateng ha' Antiokhia. 23#HST 13:43 Tegu Barnabas uh ateng dahin jam asi Allah, iha' pah melu, pelalau nangen daha' anan ja daha' tangen lan kenep murip tageng dahin Tuhan. 24#HST 5:14; 6:5 Avin Barnabas anan ji la'ung aleng sayu, té' pah iha' penu té' Belua' Ma'ang dahin tangen nginah. Nei-nei pi'at nah kahum daha' aleng nginah té' Tuhan.
25 #
HST 9:30
Uh anan tei nah Barnabas ha' Tarsus ilau Saulus. 26#HST 26:28; Gal 2:11; 1 Pet 4:16 Tegu iha' uh pesuk iha' pelalau iha' geri iha' ha' Antiokhia. Ji duman dara na' dawa' pepeng dahin daha' sidang dahin katuk kelunan kahum. Ha' Antiokhia anan nah daha' anak sekulah aring-aring en daha' na aran daha' kelunan Kristin.
Dahun nabi Agabus
27 #
HST 13:1; 15:32 Tegu anan nei nah kuri-kuri la'ung daha' nabi men Yerusalem tei ha' Antiokhia. 28#HST 21:10 Peju nah ji la'ung men hang daha' anan, aran na' Agabus, iha' aleng bara alem tingan Belua' seng té' ji lien aya' nei té' ji usun tana anih. Lelan nah té' nah nunan alem urip Klaudius. 29#Gal 2:10 Pelalau daha' anak sekulah peji pakat seng kato' ket en daha' uk masi, kato' na' men daha' harin tam aleng té' ha' tana Yudea, ha'ut la'ung pah ma'uk ngioh deng daha'. 30#HST 12:25 Nunan nah lahuh daha' na, aleng en Barnabas dawa' Saulus geri men daha' aleng dekaya' atih.
المحددات الحالية:
HADUI DAHA' SIHU TUHAN 11: TDK1990
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Bible in Today's Dahun Kayan Version © Bible Society of Malaysia, 1990.