HADUI DAHA' SIHU TUHAN 10
10
Marung Kornelius ha' Kaisarea
1 #
Mat 8:5; HST 27:1 Ha' daléh Kaisarea té' nah ji la'ung aleng aran na' Kornelius, iha' atih ji laké' kopral men hang peng seladu aleng aran na' peng Italia. 2Iha' atih kelunan aleng nginah dahin takut té' Allah dahin lim-lim huang uma na', aleng ma'uk ngahum ket na' ih tua men daha' aleng pasi, dahin pa'en sebayang té' Allah. 3#HST 3:1 Té' kio'-kio' pukun telo' levi dau té' ji ket tula, en na' nyineng teneng ji meliket Allah nei halem uma na' dahin kuma' men iha', “U Kornelius.” 4Iha' pah nutok nyineng meliket anan, takut nah iha', pelalau kuma', “Ket nun anih, Tuhan?” Ken na' nah, “Sebayang ka' dahin ket im uk men daha' uh peju nah ngavan Allah hituk té' ika'. 5Kerei inih nyihu nah daha' tei ha' Yupe, ala ji laké' aleng aran na' Simon, aleng aran na' lahuh, Petrus, 6#HST 9:43 iha' té' nyakei té' amin ji kelunan aleng aran na' Simon aleng nemei anit tulan, uma na' jeleng benghé' banget.” 7Tegu meliket aleng tengaran dahin na' anan uh leka', pelalau iha' muvui dua' la'ung panyin na', dahin ji la'ung seladu aleng nginah men hang daha' aleng pa'en masi iha' anan. 8Hu'uh iha' nengaran lim-lim tuk anan men dalo', pelalau iha' nyihu dalo' tei ha' Yupe.
9Dau malah na' alem dalo' atih panau tei jeleng daléh atih, ma'un nah Petrus tei hujung kepang bato' aleng hujung, ngenep sebayang, iha' atih kio'-kio' pukun pulu-dua' dau negreng. 10Nei nah iha' la'o ngivah seng kuman; bi alem daha' petmei na', selap lan nah henoh na'. 11#HST 11:5-17 En na' nyineng nah langit nei neng'ap, pelalau nei nah ji na'an ket awi balun aleng berang jam na' nenguloh té' pat tukuk na' ateng ha' tana. 12Alem na' té' lim-lim na'an tulan aleng pat kudek, dahin ket aleng nganap té' tana dahin manuk aleng madang. 13Nei nah ji daho' aleng kuma' men iha', “U Petrus, peju nah im, tevek nah, kani nah.” 14#Lewi 11:1-47; Yehez 4:14 Bi ken Petrus, “Nusi ha' nunan, Tuhan, avin peletu akui em payan kuman ket aleng em tekep en daha' kani dahin aleng masep.” 15#Mat 15:11; Mk 7:15,19 Lun nei nah daho' anan la'an ha' iha' kedua' hangun na', kuma', “Ket aleng uh en Allah na ma'ang, meng im kuma' iha' em tekep.” 16Telo' hangun tuk anan uh nunan, pelalau balun anan peju uli ha' langit.
17Alem Petrus ngeniheng pelemana' alem kenep na' marung ket aleng tula aleng uh kitan na' anan, beka' té' nah dalo' aleng hu'en Kornelius tei ilau uma ngavan Petrus atih dih nekring hawang kelahen tih. 18Iha' nah dalo' duan, meteng, “Té' Simon aleng aran na Petrus dih hinih iah?” 19#HST 13:2; 15:28 Alem Petrus pelemana' ket aleng kitan na' anan, Beluan Tuhan pah kuma' men iha', “Nyineng té' telo' la'ung ilau ika'. 20Peju nah im, pelalau tei ngiléh, tei tugung dalo'. Meng kawah, avin Akui nah aleng nyihu dalo' anan.” 21Pelalau ngiléh nah Petrus tei jam dalo' anan dahin kuma', “Akui anih nah aleng kelo' ilau. Kelo' nei na' nun anan?” 22Lun ken dalo', “Kornelius aleng kopral iha' atih ji la'ung aleng teneng aleng takut té' Allah, aleng en daha' lim bengsa' Yahudi hek, hu'uh en Allah katuk té' ba ji meliket aleng ma'ang. Iha' nyihu muvui ika' ha' uma na' ja iha' kelenghi nun-nun aleng dahum.” 23#HST 11:12 Pelalau Petrus duan dalo' nei halem, pelalau en na' ala nah dalo'. Dau malah na' leka' nah iha' tei tugung dahin dalo' anan, té' pah kuri-kuri la'ung men dalo' peharin men Yupe tei ngioh iha'.
24Dau malah ji la'an, ateng nah dalo' tei halem daléh Kaisarea, Kornelius pah hu'uh mepeng daha' pahu na' dahin daha' aleng bakéh na' lan, dahin pidah dalo' anan. 25Tegu Petrus tei halem, nei nah Kornelius japa' iha' dahin nyepukun ha' unan na' dahin nyepida té' iha'. 26#HST 14:15; K Tula 19:10 Bi Petrus miti iha', ken na' “Biti nah im, akui pah kelunan lahuh.” 27Alem iha' tengaran dahin na', tei nah iha' halem, dahin pepsuk daha' kahum aleng uh pepeng. 28Lun ken Petrus men daha' atih, “Ikam pah hu'uh jam marung ji kelunan Yahudi pah em deng peji dahin nyakei dahin kelunan bengsa' ha' béh, bi Allah uh bara men akui ji la'ung pah ita' em deng kuma' em tekep dahin kuma' masep. 29Avin anan akui nei ateng anih dahin em mukin nun-nun tegu kelo' muvui akui. Akui meteng kelo', na' nun kelo' muvui akui anih?”
30Lun ken Kornelius, “Alem kepat dau aleng hu'uh, pukun telo' awi jam tuk anih kah akui ji'ek sebayang alem uma kui, beka' nekring nah ji kelunan ha' unan kui dahin kanan na' aleng kelalau malah, 31lun ken na', ‘U Kornelius, sebayang ka' uh en Allah kelenghi, dahin ket im uk men daha' pah uh en Allah hituk. 32Avin anan nyihu nah kelunan tei ha' Yupe muvui Simon aleng aran na' Petrus. Iha' aleng nyakei ha' uma Simon aleng nemei anit, jeleng ha' benghé' banget,’ ken na' men akui. 33Avin anan pelalau kui ji'ek nyihu dalo' nei duan ika'. Sayu nah ika' uh ateng anih. Avin anan kamé' lim uh tinih kerei inih ha' unan Allah seng kelenghi lim-lim tuk aleng uh en Tuhan katuk ika'.”
Petrus pedengah Tuhan ha' uma Kornelius
34 #
Kel d M 10:17; 1 Sam 16:7; Rom 2:11 Lun en Petrus atoh nah dahun na' dahin kuma', “Lelan ha' uh tula, Allah nusi' Ha' ngetuman té' kelunan, 35#Yoh 9:31; 10:16 bi té' hang ha'ut-ha'ut bengsa', hi-hi aleng takut té' Iha' dahin na hadui teneng, iha' nah aleng tei té' kenep Na'. 36#NDI 107:20; 147:18; Yes 52:7; Nah 1:15; Mat 28:18 Daho' anan nah aleng en Na' nyihu bara men daha' pahu Israel, iha' tih tei pedengah dengah sayu marung dena' aleng nei kenan Yesus Kristus. Iha' nah Tuhan aleng hujung ket lim-lim. 37#Mat 4:12-17 Kitan kelo' lim-lim kah tuk aleng uh en atoh men Galilea tei-tei halem lim daléh Yudea, aleng hu'uh en Yohanes katuk marung duh atih. 38#Yes 61:1; Mat 3:16 Daho' atih marung Yesus kelunan Nazaret atih, marung Allah hu'uh ngenyu Iha' té' Belua' Ma'ang dahin té' tingan, té' pah marung Iha' panau-panau na hadui sayu dahin petagéh lim kelunan aleng en Iblis peluvat avin Allah té' dahin Na'. 39#Kel d M 21:22 Kamé' pah aleng menglan marung lim-lim tuk ket en Na' na, ha' lim daléh daha' Yahudi nurei pah ha' Yerusalem lahuh. Iha' nah aleng en daha' lematei lahuh, nekayung Iha' té' kayo' salip. 40#1 Kor 15:4-7 Iha' en Allah ju murip tegu dau aleng ketlo', dahin petula Iha', 41#Yoh 14:19,22; 15:27; HST 1:4 nusi' Ha' men daha' lim atih tua, bi men kuri-kuri la'ung daha' aleng menglan na', aleng en Allah mili una', iha' atih men kamé' aleng uh peji kuman dahin du'i dahin Na' men'uh Iha' uh peju men patei. 42#HST 17:31; Rom 14:9-10; 2 Tim 4:1; 1 Pet 4:5 En Na' nangen nah kamé' nyihu kamé' pedengah men daha' lim, dahin bara marung Iha' anan nah Iha' aleng uh en Allah petneng seng jadi' Hakim lim kelunan aleng murip dahin aleng matei. 43#Yes 33:24; 53:5-6; Yer 31:34; Yehez 34:16; Dan 9:24 Marung Iha' atih nah lim-lim daha' nabi uh bara, marung ha'ut-ha'ut la'ung aleng nginah té' Iha' seng jam sala daha' pebet avin aran Na'.
Daha' bengsa' ha' béh ala Belua Ma'ang
44Alem Petrus nengaran daho' anan loh, nei nah Belua' Ma'ang nesun té' lim-lim daha' aleng kelenghi daho' anan. 45Lim dalo' aleng nginah anan aleng nei men peng adet sunat, lim dalo' aleng nei tugung Petrus atih, dalo' pah ngeniheng avin té' kelunan aleng bengsa' ha' béh pah Iha' muak Belua' Ma'ang, ket en Allah ih atih. 46#Mk 16:17; HST 2:4; 19:6 Avin dalo' kelenghi daha' atih tengaran dahin kuri-kuri na'an daho' dahin meju Allah. Lun ken Petrus, 47“Nuno', seng deng ji kelunan ma'eng daha' duh té' ata' alem daha' uh ala Belua' Ma'ang piah awi itam aleng uh ala anih iah?” 48#Yoh 4:40 Lun en na' nyihu nah meduh daha' atih alem aran Yesus Kristus. Men'uh anan en daha' akei nah Petrus san tinan kuri-kuri dau dara na'.
المحددات الحالية:
HADUI DAHA' SIHU TUHAN 10: TDK1990
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Bible in Today's Dahun Kayan Version © Bible Society of Malaysia, 1990.