HADUI DAHA' SIHU TUHAN 9
9
Saulus ngelisah kenep, jadi' sihu Tuhan
HST 22:6-19; 26:12-18
1 #
HST 8:3
Alem Saulus heléh lelan dahin bunget té' daha' anak sekulah Tuhan, ngenep lematei daha', tei nah iha' pala imam aya', 2kahi té' iha' kuri-kuri surat men uma sebayang ha', daléh Damsyik, ja tegu ha' pesuk daha' aleng ngioh Alan atih, daha' laké' pah, dahin daha' doh pah lahuh, en na' geri paget kaput ha' Yerusalem. 3#1 Kor 15:8 Alem ha' panau, tei jeleng ateng Damsyik, tenup-tenup nei nah ji alan men langit malah teliling iha'. 4Pelalau payah nah iha' ha' tana, pelalau kelenghen na' nah ji daho' aleng kuma' men iha', “Saulus, Saulus, nun tavit na' ika' pekaté' Akui?” 5#HST 5:39 Lun kuma' nah iha', “Hi kah Ika', Tuhan?” Lun nyu'ei nah Iha' dahin kuma', “Akui nah Yesus, aleng im pekaté' anih. 6Biti nah im, tei alem daléh, hinan nah Akui seng bara men ika' ket aleng tekep seng im na.” 7Kelunan aleng panau tugung iha' atih pah ngelenguen ngeniheng tua kelenghi daho' atih, bi ji kelunan pah em té' kitan daha'. 8Saulus pah peju men tana. Tegu iha' meting matan na' ji nun pah iha' em jam nyineng la'an, pelalau daha' ayak nah usu na' geri iha' tei ha' daléh Damsyik. 9Telo' dau dara na' iha' em jam nyineng nun-nun, nurei pah iha' em du'i dahin em kuman.
10 #
HST 10:17; 16:9 Alem daléh Damsyik nan té' nah ji anak sekulah, aran na' Ananias. Tuhan pah nei tula té' iha' muvui iha'. Lun ken Tuhan men iha', “U Ananias.” Ken Ananias, “Té' kah akui, Tuhan.” 11#HST 21:39 Ken Tuhan men iha', “Peju nah, tei nah im ha' alan aleng aran na' Alan Tutau, dahin meteng im uma Yudas, avin té' ji la'ung aleng aran na' Saulus, kelunan Tarsus, avin kerei inih iha' sebayang, 12dahin jam ji kelunan aleng aran na' Ananias nei halem dahin metei usu hujung na', ja iha' jam nyineng la'an.” 13Lun nyu'ei nah Ananias, “U Tuhan, uh kahum daha' bara akui marung tuk kelunan anan, avin kuri-kuri nah ji'ek aleng uh na' na men lim-lim daha' anak Ka' ha' Yerusalem: 14#22:16; 1 Kor 1:2; 2 Tim 2:22 hinih pah iha' uh ala daho' té' daha' imam aya' ngenep ngaput lim-lim kelunan aleng ngetalau aran Ka'.” 15#Rom 1:5; HST 25:13; 27:24; 2 Kor 4:7 Bi Tuhan kuma' men iha', “Tei nah im, avin iha' nah ji pigen aleng Ek mili men Akui, seng pedengah aran Kui men daha' aleng alem adet ha' béh, dahin men laja'-laja', dahin men bengsa' Israel pah lahuh. 16#HST 23:29; 2 Kor 11:23-28 Avin Akui anih seng bara men iha' kuri-kuri kahum katé' aleng tekep ga' té' iha' na'a avin aran Kui,” ken Na'.
17Iha' nah Ananias tei leka', pelalau tei halem uma atih, dahin metei usu na' hujung na', ken na', “U harik Saulus, akui anih en Tuhan nyihu, Iha' tih Yesus aleng uh petula Iha' té' ika' té' alan aleng ngavam nei anan di, ja ika' jam nyineng la'an, ja ika' penu dahin Belua' Ma'ang lahuh.” 18Tegu atih pah legak nah ket awi urap men matan na', iha' pah pelalau jam nyineng la'an; peju nah iha', pelalau duh alem aran Tuhan. 19Lun kuman nah iha', uh anan tu'a nah iha' la'an.
Lun melo' nah Saulus kuri-kuri dau peji dahin daha' anak sekulah ha' Damsyik.
Saulus pedengah Tuhan ha' Damsyik
20Tegu anan pelalau Saulus pedengah alem uma sebayang marung tuk Yesus, Iha' nah anak Allah. 21#HST 8:1; 9:1,14; 26:10 Bi ngeniheng nah daha' lim aleng kelenghi dahun na', pelalau kuma', “Bareng si' iha' em kelunan anih aleng lematei lim kelunan aleng metut aran anih ha' Yerusalem di iah? Iha' nei anih dahin kenep na' loh kah anih lahuh, ja iha' geri daha' paget kaput ha' unan daha' imam aya,” ken daha'. 22#HST 18:28 Bi Saulus pah sa' tu'a kenep na', dahin pekalah daha' Yahudi aleng melo' ha' Damsyik dahin bara lelan men daha' marung Yesus Iha' nah aleng Kristus.
23 #
HST 23:12-29
Hu'uh kuri-kuri dau dara na', tengaran nah daha' Yahudi ngenep lematei iha', 24#HST 23:16 bi kitan Saulus nah ugé' daha'. Daha' atih pah penga ba ketamen pah dau pah malem, ja daha' deng lematei iha'. 25#2 Kor 11:32-33 Bi daha' anak sekulah na' ala iha' tegu malem, en daha' uloh nah iha' hida men ujung kelehen bato' anan alem ket awi divo' dih.
Saulus ha' Yerusalem
26 #
Gal 1:17-19
Tegu iha' uh ateng ha' Yerusalem iha' ngenep tei peji dahin daha' anak sekulah atih, bi lim-lim daha' atih takut té' iha', nusi' nah daha' nginah iha' ji la'ung anak sekulah. 27#HST 9:20 Bi Barnabas aleng ala iha' dahin geri iha' men dalo' sihu Tuhan atih, dahin bara marung tuk Saulus nan hu'uh jam Tuhan té' alan dahin marung Tuhan uh duan iha', dahin nuno' tuk iha' uh hakéh pedengah dengah alem aran Yesus ha' daléh Damsyik. 28Iha' nah Saulus anan té' dahin daha' panau hiréh-hitih ha' Yerusalem, 29dahin hakéh pedengah alem aran Tuhan. Iha' pah tengaran dahin pehu'ei dahin daha' kelunan Yahudi aleng na dahun Yunani, bi daha' atih ilau alan ngenep lematei iha'. 30#HST 11:25; Gal 1:21 Tegu daho' anan tula té' daha' harin tam aleng nginah pelalau daha' geri iha' Kaisarea, dahin nyihu iha' tei ha' Tarsus.
31Pelalau daha' sidang té' lim tana Yudea dahin Galilea dahin Samaria anan pah dena' dahin sa' nei dekaya' alem Tuhan. Daha' pah sa'-sa' nei kahum alem daha' panau alem takut té' Tuhan dahin alem halau kenan Belua' Ma'ang.
Petrus petagéh Eneas ha' Lida
32Alem Petrus panau ji-ji daléh anan, nyangei nah iha' lahuh ha' daha' anak Tuhan aleng melo' ha' Lida. 33Hinan pah iha' pesuk dahin ji laké' aleng aran na' Eneas aleng ngeluven té' avan na' tudu saya' duman dara na', avin iha' perah matei uhat. 34Lun ken Petrus men iha', “U Eneas, bi Yesus Kristus nah aleng petagéh ika'. Peju nah im, nemei nah ngavam tudu anan.” Pelalau tegu anan pah iha' peju. 35Kitan daha' Lida lim nah iha' dahin daha' Saron lahuh, pelalau daha' nelunga' pala Tuhan.
Petrus pekurip Dorkas ha' Yupe
36Ha' daléh Yupe té' ji la'ung doh aleng anak sekulah Tuhan, aran na' Tabita, aleng halem aran na' kurin daha' Yunani, iha' tih Dorkas, doh anan kelalau na hadui aleng sayu dahin hituk té' daha' aleng pasi. 37Tegu anan pah iha' nei perah, pelalau matei. Uh patei na' en daha' duh en daha' tei nah patei na' atih alem amin aleng bah hujung. 38Avin daléh Lida anan jeleng béh Yupe, kitan daha' anak sekulah anan nah Petrus té' tinan, pelalau daha' nyihu dua' la'ung tei muvui iha', ken dawa', “Siga' im nei ha' kamé'.” 39Pelalau leka' nah Petrus tei tugung dawa'. Tegu dalo' ateng, en dawa' geri nah iha' alem amin aleng ujung anan. Lim-lim daha' debalo' pah nekring té' béh na' nangih dahin bara basung-basung dahin kanan aleng uh kenan Dorkas atih tegu iha' té' peji dahin daha'. 40#Mk 5:40-41 Bi Petrus nyihu daha' lim musang, pelalau nah iha' nyepukun sebayang, uh anan en na' nelunga' nah patei anan, dahin kuma', “U Tabita, ma'un nah.” Pelalau iha' meting matan na'. Tegu iha' nyineng Petrus, nei nah iha' peju ngelungun. 41#HST 9:32 Petrus pah mejeu usu na' dahin meju iha', dahin muvui daha' anak Tuhan dahin daha' debalo' anan, pelalau nah iha' ma'uk iha' murip men daha'. 42Tuk anan pah tula alem lim-lim daléh Yupe anan, kelunan kahum pah nginah té' Tuhan. 43#HST 10:6 Petrus pah melo' kuri-kuri dau ha' Yupe ha' uma ji la'ung aleng aran na' Simon aleng nemei anit tulan.
المحددات الحالية:
HADUI DAHA' SIHU TUHAN 9: TDK1990
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Bible in Today's Dahun Kayan Version © Bible Society of Malaysia, 1990.