HADUI DAHA' SIHU TUHAN 8
8
Saulus pekaté' kelunan Kristen
1 #
HST 7:58; 11:19; 22:20 Saulus pah sayu kenep marung daha' lematei Stefanus. Tegu anan pah nei nah katé' aya' té' daha' sidang ha' Yerusalem. Putat tua nah lim daha' alem lim daléh Yudea dahin Samaria, bi daha' aleng sihu Tuhan, melo' pa'en daha' ha' Yerusalem. 2#Mat 14:12 Té' kuri-kuri kelunan aleng tangen kenep té' Tuhan tei nanem Stefanus dahin namu iha' lelan. 3#HST 9:1; 22:4-5 Bi Saulus pekaté' daha' sidang, tei alem ha'ut-ha'ut uma mahin kelunan, laké' dahin daha' doh lim, metei daha' alem jin.
Petrus dawa' Filipus pedengah Tuhan ha' Samaria
4Té' pah kelunan aleng uh putat atih, panau nah daha' tei hiréh-hitih pedengah dahun Tuhan. 5#HST 6:5 Lun tei nah Filipus ha' ji daléh aya' ha' Samaria, pelalau pedengah men daha' marung tuk Kristus. 6Lim-lim kelunan pah pelemana' dahin ngioh dahin ji kenep marung ket aleng uh en Filipus bara atih, tegu daha' kelenghi dahin nyineng lim-lim tada' aleng en na' na. 7#Mk 16:17 Avin ngahum kelunan aleng té' to' nilung halem daha', musang nah to' atih dahin dekaya' pedéng daha'. Ngahum kelunan aleng perah matei uhat dahin kelunan kepé' pah en na' petagéh. 8#Yoh 4:40-42 Melu lelan nah daha' alem daléh anan.
9Bi té' ji la'ung kelunan aleng aran na' Simon, aleng pakei pusau-pusau alem daléh anan menuna', na daha' lim alem daléh Samaria ngeniheng, iha' pah kuma' iha' kelunan aleng dekaya'. 10Lim-lim daha' nyam ateng daha' aleng dekaya' pah kelenghi dahun na' dahin kuma', “Kelunan anih nah aleng hipun tingan Allah atih aleng daha' kuma' Tingan aleng Dekaya'.” 11Daha' atih kelenghi dahun na', avin uh dara iha' uh pekeniheng daha' té' pusau-pusau na'. 12#Mat 28:19 Bi tegu daha' atih nginah té' Filipus aleng pedengah dengah aleng sayu marung tuk keligem Allah, dahin pedengah aran Tuhan Yesus, lun duh nah daha', laké' dahin daha' doh lim. 13Simon pah nginah lahuh. Uh iha' duh, iha' pah pa'en tugung dahin Filipus. Ngeniheng nah iha' nyineng tada' dahin tingan aleng dekaya' aleng en na' na.
14 #
HST 3:1
Uh daha' aleng sihu Tuhan aleng ha' Yerusalem kelenghi marung kelunan Samaria hu'uh ngioh dahun Allah, en daha' nyihu nah Petrus dawa' Yohanes tei pala daha' hitih. 15Uh dawa' tei ateng, dawa' pah sebayang, ja daha' Samaria ala Belua' Ma'ang, 16avin Belua' atih nusi' payan nei nesun té' ji la'ung pah té' hang daha', bi daha' atih uh duh alem aran Tuhan Yesus. 17#1 Tim 4:14 Lun dawa' sihu Tuhan atih tei metei usu dawa' té' daha', daha' pah ala Belua' Ma'ang.
18Tegu Simon nyineng Belua' Ma'ang, en Tuhan uk tegu dawa' metei usu dawa' té' ujung kelunan, lun en na' geri nah ligit men dawa' anan, 19dahin kuma', “Uk nah men akui lahuh tingan anan, ja tegu akui metei usu kui té' ujung daha', daha' pah ala Belua' Ma'ang.” 20Bi ken Petrus men iha', “Sayu nah pirek ka' anan tasa' dahim, avin ika' ngio' ket aleng en Allah ih deng en melé' té' ligit. 21#NDI 78:37; Ef 5:5 Nusi' nah té' tulan ka' dahin aran ka' alem hadui anih; avin kenep ka' em tutau ha' unan Allah. 22Sayu nah im ngelisah men ji'ek ka' anan dahin sebayang kahi asi té' Tuhan, ja alem kenep ka' aleng ngio' anan en Na' bet. 23#Kel d M 29:18; Yes 58:6; Ib 12:15 Avin uh kitak nah halem ka' anih pa'i awi pero', ika' pah té' alem kaput sala.” 24Lun nyu'ei nah Simon, ken na', “Sayu nah kelo' sebayang kahi asi té' Tuhan men akui ja nun-nun aleng kelo' nira men akui anih em nei té' akui.”
25Dawa' atih, uh dawa' bara dahin pedengah dahun Tuhan, uli nah dawa' ha' Yerusalem dahin pedengah dengah aleng sayu atih men kuri-kuri uma ha' Samaria.
Ji kelunan men Etiopia en Filipus duh
26Bi ken ji meliket Tuhan men Filipus, ken na', “Biti nah im, tei bah ta'o matan dau pa'un ha' alan aleng tei ngiléh men Yerusalem tei ha' Gaza,” ken na'. Alan anan alem tana ngahit. 27#Yes 56:3-7 Tei nah iha' leka'. Bi té' nah ji la'ung kelunan Etiopia, iha' tih ji laké' aleng dekaya' aran na' alem hadui perintah Kandaké' aleng laja' doh daha' Etiopia, iha' nah aleng puboh ligit dahin lim daven na' aleng mahen, iha' pah uh ateng ngenep meju aran Tuhan ha' Yerusalem. 28Tegu anan pah uli nah iha', pelalau melo' alem kelita' na' basa' surat nabi Yesaya. 29Ken Belua' men Filipus, “Tei nah im jeleng kelita' anan, tei tugung iha'.” 30Pelalau tepurung nah Filipus tei ha' iha', na' kelenghi nah dahun kelunan anan basa' surat nabi Yesaya, pelalau ha' kuma', “Ket aleng im basa' anan, ateng ka' té' alem na' iah?” 31#Yoh 16:13 Kuma' nah iha', “Seng nuno' tuk akui jam iha' em té' daha' bara?” En na' duan Filipus melo' dahin na' hujung.
32 #
Yes 53:7-8
Té' pah ngavan aleng en na' basa' alem surat Tuhan anan, nunih dahun na',
“Awi jam duba aleng en daha' geri seng en tevek,
awi jam anak duba aleng tepaka' tegu daha' nguting bulun na' lahuh,
nunan pah Iha' em neng'eng ba Na'.
33Alem daha' peha'éh Iha' atih, daha' em na besara' aleng teneng marung Iha'.
Hi aleng deng seng nira pahu Na'?
Avin hengan Na' en daha' ala men usun tana.”
34Lun ken laké' atih men Filipus, “Akui meteng ika', marung hi nabi atih kuma' nunih, marung batung na' dep lo, marung kelunan ha' béh iah?” 35Uh anan Filipus matoh dahun na', matoh men surat Tuhan atih loh, pelalau na' petira nah men iha' marung Yesus. 36#HST 10:47 Alem dawa' panau té' alan anan, ateng nah dawa' té' ngavan ata'. Lun ken laké' atih, “Hinih té' ata'. Nun aleng ma'eng akui em duh alem Tuhan?” 37Lun nyu'ei nah Filipus, “Iha' ika' nginah dahin lan-lan kenep ka', deng kah ika' duh.” Nyu'ei nah iha', “Adang akui nginah té' Tuhan Yesus Iha' nah Anak Allah.” 38Na' nyihu nah kelita' atih ngeta', dawa' pah pelalau ngiléh ha' ata, lun en na' duh nah iha'. 39#1 Laj 18:12 Uh dawa' uli men alem ata' atih, Filipus en Beluan Tuhan geri, nusi' nah laké' atih jam iha' la'an, laké' atih pah tei panau la'an dahin sayu lan kenep na'. 40#HST 21:8-9 Pepsuk nah daha' dahin Filipus ha' Asdod, iha' pah panau pedengah dengah aleng sayu alem lim daléh anan, ateng iha' tei ateng ha' Kaisarea.
المحددات الحالية:
HADUI DAHA' SIHU TUHAN 8: TDK1990
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Bible in Today's Dahun Kayan Version © Bible Society of Malaysia, 1990.