HADUI DAHA' SIHU TUHAN 3
3
Ji kelunan kepé' nei magéh
1Tegu jaka' sebayang, lun tei nah Petrus dawa' Yohanes ma'un Uma Allah, iha' tih pukun telo' levi dau. 2Té' nah ji kelunan aleng kepé' men alem butit hinan na' en daha' pektang, en daha' lo' ha'ut-ha'ut dau té' béh ketamen Uma Allah, aleng aran na' Ketamen Kajau, ja iha' deng kahi ket nun-nun té' daha' aleng tei halem Uma Allah. 3Tegu iha' nyineng Petrus dawa' Yohanes seng tei alem Uma Allah, iha' nah iha' kahi asi. 4Bi Petrus dawa' Yohanes ngehaneng nyineng iha', ken dawa', “Ineng nah kawa'.” 5Iha' pah pelalau nyineng dawa' atih dahin nginah seng ala ket té' dawa'. 6Lun ken Petrus, “Met dahin pirek nusi' té' té' akui, bi ket aleng té' té' akui, anan nah ek uk men ika', iha' tih: Dahin aran Yesus Kristus, kelunan Nazaret atih, panau nah im.” 7Lun en Petrus gem nah usu na' bah ta'o dahin miti iha', pelalau tu'a nah kudek na' dahin tulang sigi na'. 8#Yoh 5:14 Lun nepujo' nah iha', pelalau nekring dahin panau. Men'uh anan, tei nah iha' tugung dawa' tei halem Uma Allah, panau-panau nah iha' dahin nepujo' dahin meju aran Allah. 9Lim daha' atih pah nyineng iha' panau-panau dahin meju aran Allah. 10Daha' jam nelana' iha' laké' atih aleng melo' kahi asi té' béh ketamen Uma Allah, aleng aran na' Ketamen Kajau. Lim kelunan atih pah pah tua kenep daha' dahin ngeniheng lelan, avin hadui aleng uh tula té' kelunan atih.
11 #
HST 5:12
Bi alem kelunan anan gem Petrus dawa' Yohanes, tepurung nah lim daha' anan pala dawa' tei pepeng ha' awa aleng aran na' Awa Salomo, ngeniheng lelan nah daha'.
Tebara Petrus men daha'
12Tegu Petrus jam daha' kahum nunan pelalau kuma' nah iha' men lim daha' atih, “U ikam Israel, nun tavit na' ikam ngeniheng marung kelunan anih? Nun tavit na' ikam ngehaneng nyineng kawa' awi té' tingan awa' dahin ma'ang awa' dep aleng na kelunan anih panau? 13#Us 3:6; Yes 52:13; 53:11; HST 2:23; 5:30 Bi Tuhan Allah Abraham dahin Ishak dahin Yakub, Iha' tih Allah sepun tam, Iha' uh meju panyin Na' Yesus, aleng uh kam anih uk, aleng uh kam bet ha' unan Pilatus tegu iha' tangen kenep na' seng makau Iha'. 14#Mat 27:15-23 Bi ikam anih mebet Kelunan aleng Ma'ang dahin aleng Teneng atih, dahin kahi iha' makau ji laké' aleng uh lematei kelunan, seng en na' uk men ikam. 15#HST 4:10; 5:31; Ib 2:10 Té' pah ikam uh lematei Pengulu' Urip, bi Allah meju Iha' men hang kelunan matei. Marung tuk Iha' atih nah kawa' anih jadi' teksi'. 16Avin kalo' nginah té' aran Na', aran Na' anan nah aleng uh na laké' anih tu'a aleng kam nyineng dahin nelana' anih. Lan, kinah aleng nei kenan Yesus atih nah aleng na iha' magéh ha' unan kam lim nih.
17 #
Lk 23:34; 1 Tim 1:13 “Bi kerei inih, u kelo' harik lim, kitak kah ikam uh na hadui anih alem ikam em jam, nunan pah daha' aleng dekaya' pah em jam lahuh. 18#Lk 24:27 Bi té' tuk aleng nunan, Allah uh pela'ung na' té' ba lim-lim daha' nabi Na' aleng uh bara pekuna' menuna' marung tuk Kristus aleng en Na' nyihu atih adang ga' katé'. 19#HST 2:38 Avin anan, sayu nah ikam ngelisah kenep dahin pekuli, ja sala kam pebet, ja té' jaka' aleng havah nemei kenep nei men unan Tuhan, 20ja Iha' menei Kristus aleng uh Na' petmei men ikam menuna', iha' atih Yesus. 21Iha' nah aleng en Surga puboh ateng jaka' ket lim-lim nei temei, piah awi en Allah bara té' ba nabi-nabi Na' aleng ma'ang aleng men aring-aring usun tana. 22#Kel d M 18:15,18; HST 7:37 Avin Musa uh kuma', ‘Tuhan Allah seng meju men ikam ji la'ung nabi men hang harin kam awi akui anih. Té' Iha' nah ikam seng kelenghi marung ket lim-lim aleng seng en Na' bara men ikam. 23#Lewi 23:29 Ha'ut kelunan aleng em kelenghi dahun nabi atih, daha' anan nah seng ga' tasa' lahik-lahik men hang daha'.’ 24Lan, lim-lim nabi, matoh men Samuel, dahin lim-lim nabi aleng ngebaya té' iha' pah, daha' aleng uh nengaran, daha' pah uh bara marung urip anih.
25 #
Ar Kel 12:3; 22:18; Gal 3:8 “Ikam anih nah anak sau nabi anan, ikam nah aleng ala jaji aleng uh en Allah pejaji men sepun kam. Iha' kuma' men Abraham, ken Na', ‘Men alem sau ka' nah lim-lim na'an kelunan ha' usun tana anih seng jam Tuhan muak asi Na' té' daha'.’ 26#HST 13:46 Allah uh meju panyin Na' atih dahin menei Iha' men ikam una', ja Iha' muak asi Na' men ikam, iha' tih alem Iha' ngelisah ikam ha'ut-ha'ut la'ung men ji'ek kam.”
المحددات الحالية:
HADUI DAHA' SIHU TUHAN 3: TDK1990
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Bible in Today's Dahun Kayan Version © Bible Society of Malaysia, 1990.