HADUI DAHA' SIHU TUHAN 4
4
Petrus dahin Yohanes ha' unan kelunan aya'
1 #
Lk 22:4,52 Alem dawa' nengaran men daha' kahum atih nei nah daha' imam ha' dawa', dahin pengulu' Uma Allah dahin kelunan Saduki. 2#HST 2:38 Perah nah kenep daha', avin dawa' atih pekatuk daha' dahin nebara daha' marung kelunan deng nei peju murip men patei alem Yesus. 3#HST 3:1 Pelalau daha' atih mapuh dawa' sihu Tuhan atih, geri dawa' tei halem jin ateng dau malah, avin dau uh herep. 4#HST 2:47 Bi ngahum kelunan aleng uh kelenghi tebara atih hu'uh nginah; kahum daha' laké' té' kio'-kio' lima' libu'.
5Dau malah, pepeng nah lim pengulu' daha' dahin daha' aleng dekaya' dahin daha' aleng gem surat Tuhan ha' Yerusalem, 6dahin Hanas, imam aya' atih, dahin Kayafas, dahin Yohanes dahin Aleksandar, dahin lim-lim daha' aleng pahu imam aya' té' pepeng hitih. 7#Mat 21:23 Uh daha' tekring nah dawa' sihu Tuhan atih té' hang daha', pelalau daha' meteng, “Té' tingan nun dahin té' aran hi kua' anih na hadui anih?” 8#Mat 10:19-20 Pelalau Petrus aleng penu té' Belua' Ma'ang atih kuma', “U kelo' pengulu' dahin kelo' aleng dekaya', 9iha' ikam pesek kawa' dau anih marung ji ket aleng sayu aleng en awa' na té' kelunan anih aleng lema dih, dahin nuno' tuk kelunan anih magéh, 10#HST 3:6,13-16 sayu nah ikam lim jam dahin daha' lim bengsa' Israel pah jam, alem aran Yesus Kristus kelunan Nazaret aleng uh kam selepang, aleng uh en Allah ju men hang kelunan matei, kenan Na' nah kelunan anih nekring magéh ha' unan kam. 11#NDI 118:22; Mat 21:42 Yesus atih nah Bato' aleng en kam tukeng uma sau, Iha' nah aleng uh jadi' Bato' Tuvu. 12#Mat 1:21 Nusi' té' urip alem ji la'ung kelunan aleng ha' béh; avin hida langit anih nusi' té' aran ha' béh aleng en Na' uk men kelunan aleng ngavan tam ala urip.”
13Tegu daha' jam akang kenep Petrus dawa' Yohanes, dahin kitan daha' pah dawa' kelunan aleng em té' sekulah, ngeniheng nah daha' lim; iha' nah daha' jam dawa' anan uh peji dahin Yesus. 14#HST 3:8-9 Avin daha' nyineng kelunan aleng uh magéh atih té' nekring té' hang daha', ji nun pah daha' em deng nyu'ei la'an. 15Uh daha' nyihu dawa' atih musang men hang daha' kemiti atih, pelalau pakat nah daha' pedeng daha' dep, 16#Yoh 11:47 ken daha', “Nun aleng tekep tam na té' kelunan anih, avin uh tula nah té' daha' lim aleng ha' daléh Yerusalem ji tada' aya' anih aleng uh kenan dawa', ateng itam pah meng'i na' lahuh. 17#HST 5:28 Sayu nah itam mano' dawa' ja dawa' em nengaran alem aran anih la'an, men ji-ji kelunan pah meng dawa' nira na', ja daho' anan em tei putat té' hang bengsa' tam anih.” 18Lun en daha' uvui nah dawa' halem, pelalau mano' dawa', peletu em mun nengaran la'an dahin katuk alem aran Yesus.
19 #
HST 5:29
Bi nyu'ei Petrus dawa' Yohanes dahin kuma' men daha', “Sayu ikam pelemana', ano' seng teneng ha' unan Allah, ngioh ikam iah, ngioh Allah iah? 20Avin nusi' deng kawa' seng em bara marung tuk aleng uh en awa' nyineng dahin kelenghi.”
21Uh daha' nebara dawa' la'an, pelalau daha' makau dawa', avin daha' atih em jam ji nun-nun sala avan daha' seng mukum dawa', té' pah daha' takut daha' kahum atih lahuh, avin daha' lim meju. Allah marung hadui aleng uh jadi' atih. 22Kelunan aleng uh tagéh kenan tada' anan, urip na' huwi pat-pulu duman.
Daha' sebayang akei kenep aleng makang bara dahun Tuhan
23Uh dawa' takau, tei nah dawa' ha' bakéh-bakéh dawa', pelalau na'lung marung lim-lim tuk aleng uh daha' imam aya' dahin daha' aleng dekaya' uh kuma' men dawa'. 24#Us 20:11; NDI 146:6; Yes 37:16; Lk 2:29; K Tula 6:10 Tegu daha' atih kelenghi dahun dawa' nunan pelalau dekaya' nah dahun daha' meju Allah dahin ji kenep, pelalau sebayang,
“U Tuhan, Ika' nah aleng uh na langit dahin usun tana dahin banget dahin lim-lim huang na', 25#NDI 2:1-2 aleng uh en Belua' Ma'ang bara men ba sepuh amé' Daud aleng panyin Ka' dih. Avin Ika' uh kuma' nunih:
‘Nun tavit na' lim bengsa' kelunan tei pephau tua?
Dahin ha'ut pahu atih pelemana' na ket aleng tung-tung tua?
26Lim-lim laja' té' usun tana peju,
dahin daha' aleng dekaya' pah piah-piah pakat
ngenep melawan Tuhan dahin melawan Kristus Na'.’
27 #
Lk 23:1-12; Yoh 18:28-29 Avin lan alem daléh anih Herodes dahin Pontius Pilatus, daha' kelunan alem adet ha' béh dahin lim-lim bengsa' Israel pah uh pepeng melawan Yesus Panyin Ka' aleng ma'ang, aleng hu'uh Im ngenyu. 28#HST 2:23 Daha' pepeng seng na ket aleng uh Im nageng patem té' usu Ka' dahin té' kenep Ka' menuna'. 29#Ef 6:19 Bi kerei inih, u Tuhan, kelenghi nah dahun daha' aleng mano' atih; uk nah men panyin Ka' kenep aleng makang bara Dahum. 30Im jei nah usu Ka' petagéh kelunan, dahin na tada' dahin hadui avan daha' ngeniheng alem aran Yesus Panyin Ka' aleng ma'ang atih.”
31 #
HST 2:2,4 Uh daha' sebayang, pelalau mahnoh nah avan daha' pepeng atih, penu nah lim daha' té' Belua' Ma'ang, daha' pah bara dahun Allah dahin makang kenep.
Marung tuk daha' aleng nginah peji kenep
32 #
HST 2:44-45
Té' pah kelunan ngahum aleng uh nginah atih, murip ji kenep dahin ji urip, dahin ji la'ung pah em té' aleng kuma' daven na' anun na' dep, bi lim na' en daha' peji piah-piah. 33#HST 2:47 Dahin tingan aleng dekaya' daha' sihu Tuhan atih pedengah marung tuk Tuhan Yesus nei peju murip, dekaya' nah asi Tuhan té' té' daha' atih lim. 34#HST 2:45 Ji la'ung pah em té' aleng humé' té' hang daha' atih. Lim daha' aleng hipun tana dahin uma en daha' bet nah, pelalau geri legah ket en daha' bet atih, 35ma'uk na' tei té' béh kudek daha' aleng sihu Tuhan atih, pelalau daha' petulan na' men ha'ut-ha'ut la'ung daha', pelemana' marung humé' daha'.
36 #
HST 11:22,24; 13:4; 15:39 Té' pah Yusuf aleng en daha' sihu Tuhan atih na aran na' Barnabas (aleng aran na' Anak pehalau), iha' tih ji kelunan Lewi aleng pa'un na' nei men daléh Siprus, 37iha' pah hipun ji tana, lun en na' bet nah, pelalau en na' geri nah ligit atih dahin ma'uk na' lahuh tei té' béh kudek daha' sihu Tuhan atih.
المحددات الحالية:
HADUI DAHA' SIHU TUHAN 4: TDK1990
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Bible in Today's Dahun Kayan Version © Bible Society of Malaysia, 1990.