HADUI DAHA' SIHU TUHAN 5
5
Marung tuk Ananias dahin Safira
1Té' nah ji laké' aran na' Ananias, doh na' Safira, en dawa' belé' nah tana dawa'. 2#HST 4:37 Pelalau iha' melo' balei legah na', hawan na' pah jam lahuh, pelalau en na' geri nah balei legah tana atih dahin ma'uk na' tei té' béh kudek daha' sihu Tuhan atih. 3#Yoh 13:2 Pelalau Petrus kuma', “U Ananias, nun tavit na' Setan penu alem kenep ka', ateng ika' pamoh Belua' Ma'ang, dahin melo' balei legah tana anan? 4Alem ka' em payan mebet na', bareng ha' em alem usu ka' iah? Ika' uh mebet na' pah lahuh ika' loh kah hipun na'. Nun tavit na' ika' pelemana' hadui anih alem kenep ka'? Nusi' ika' pamoh kelunan anih, bi ika' pamoh Allah.” 5Tegu Ananias kelenghi daho' anan, payah nah iha' pelalau, pelalau pah nah hengan na'. Takut lelan nah daha' lim aleng kelenghi tuk anan. 6Daha' nyemaké' pah peju tei nutun iha' pelalau pektang iha', geri iha' musang tei nepiha' iha'.
7Kio'-kio' telo' jam men'uh anan, doh na' pah nei dahin em jam nun-nun marung tuk aleng uh nunan. 8Lun ken Petrus men iha', “Bara nah men akui, lan kah kua' mebet tana kua' anan dahin nunan lan kah tuk legah na' iah?” Lun ken doh anan pah, “Lan, ketu legah na' kah anan.” 9Lun ken Petrus men iha', “Nun tavit na' kua' pakat pesek Beluan Tuhan? Ineng, kudek dalo' aleng uh nepiha' laké' ka' dih té' ha' ba ketamen. Dalo' anan pah seng musang pektang ika' lahuh,” ken na. 10Iha' pah pelalau payah lahuh té' béh kudek Petrus, pelalau pah nah hengan na'. Pelalau tei nah dalo' nyemaké' atih halem, dalo' nyineng doh atih uh matei; en dalo' geri nah iha' musang dahin nanem iha' té' béh laké' na'. 11Takut lelan nah lim daha' sidang dahin kelunan aleng kelenghi tuk anan.
Sidang Tuhan nei-nei nyi'an
12 #
HST 3:11
Ngahum nah tada' dahin hadui aleng avan daha' ngeniheng en daha' aleng sihu Tuhan atih na té' hang daha'. Lim daha' atih pah pepeng nah dahin ji kenep té' alem Awa Salomo. 13Daha' aleng ha' béh pah em makang peklet dahin daha' atih; bi en daha' ju nah daha'. 14#HST 2:47; 7:7; 21:20 Nei-nei pi'at kahum nah kelunan aleng nginah té' Tuhan, iha' tih kelalau ngahum daha' laké' dahin daha' doh lim; 15#Mk 6:56; HST 19:11-12 ateng daha' aleng perah pah en daha' geri musang ha' alan, en daha' lo' hujung tilem dahin hujung pagen, ja balei men daha' ga' lingei Petrus tegu iha' lalau daha'. 16Ngahum lan kelunan nei pepeng men daléh aleng teliling Yerusalem, nei geri kelunan aleng perah dahin kelunan aleng té' to' aleng tei nilung té' daha', lim daha' anan pah en na' petagéh lahuh.
Kelunan aya' pekaté' dalo' sihu Tuhan.
Dahun Gamaliel
17 #
HST 4:1,6 Bi imam aya' atih nei peju, dahin lim daha' aleng dahin na' (iha' tih kelunan Saduki), avin kenep daha' heléh lelan té' daha', 18pelalau mapuh dalo' aleng sihu Tuhan atih dahin metei dalo' alem jin. 19#HST 12:7 Bi té' ji meliket Tuhan nei neng'ap ba jin atih tegu malem, pelalau mebet dalo' dahin kuma', 20“Tei nah kelo' nekring alem Uma Allah, nengaran men daha' atih lim daho' marung urip anih.” 21Uh dalo' kelenghi daho' anan, tei nah dalo' alem Uma Allah jihima pesun, pelalau katuk daha'.
Nei nah laké' imam aya' dahin daha' aleng dahin na' mepeng daha' kemiti dahin lim daha' kelunan aya' té' hang daha' Israel. Pelalau iha' nyihu daha' tei ala dalo' sihu Tuhan men alem jin. 22Tei nah dalo' pulis atih, bi nusi' nah té' dalo' alem jin, pelalau nekulah nah dalo', bara daha', 23ken dalo', “Uma jin atih uh malen dahin tageng kitan alo', dahin daha' aleng pian ba ketamen atih té' lim kah daha' nekring ha'ut-ha'ut ba ketamen. Uh kalo' neng'ap na', en alo' nyineng ké', beleka' lengiau tua nah, ji-ji nun pah em té' halem na' la'an,” ken dalo'. 24Tegu pengulu' Uma Allah dahin daha' imam aya' kelenghi daho' atih, ngihau nah daha' marung dalo', avin daha' takut seng nuno'-nuno' tuk tei na' na'a. 25Nei nah ji kelunan nengaran men daha', “Ineng nah, kelunan aleng en kam tei alem jin di, uh té' nekring alem Uma Allah dahin pekatuk,” ken na'. 26Pelalau tei nah pengulu' atih tugung daha' pulis, ala dalo' sihu Tuhan atih, bi nusi' ha' dahin kenep bunget avin daha' takut bahi daha' aleng kahum nyeparik bato' te' daha'.
27Tegu daha' geri dalo' sihu Tuhan atih nekulah, en daha' tei nah dalo' ha' unan daha' kemiti, pelalau imam aya' atih duan dalo', 28#Mat 27:25; HST 4:18 ken na', “Uh kamé' em-em mun kelo' katuk alem aran anih di, bi en kelo' pedengah loh kah ket aleng en kam pekatuk anan ha' lim-lim daléh Yerusalem, té' pah kenep kam ngenep mepuk daha laké' atih té' kamé' anih.” 29#Dan 3:18; HST 4:19 Bi nyu'ei nah Petrus dahin dalo' sihu Tuhan aleng ha' béh, ken dalo', “Tekep kalo' ngioh Allah men'uh ngioh kelunan. 30#Kah d Is 21:22; HST 3:15 Té' pah Allah sepun tam uh meju Yesus aleng uh kam anih lematei dahin nekyung Iha' té' kayo'. 31#HST 2:33; Ib 2:10; 12:2 Iha' nah aleng bau kenan usu bah ta'o Allah, aleng jadi' Pengulu dahin Laké' Aleng Pekurip, ja Iha' ma'uk kenep aleng ngelisah men bengsa' Israel dahin mebet sala daha'. 32#Lk 24:48; Yoh 15:26-27 Kamé' anih nah teksi' marung lim tuk anih, nunan pah lahuh Belua' Ma'ang aleng en Allah uk men daha' aleng ngioh dahun Na'.”
33 #
HST 7:54
Uh daha' kelenghi daho' anan heléh nah kenep daha' dahin ngenep lematei sihu Tuhan atih. 34#HST 22:3 Bi peju nah ji laké' kemiti, iha' tih ji kelunan Farisi, aran na' Gamaliel, iha' anan guru tebara menuna', aleng en daha' atih lim ju, en na' nyihu nah daha' geri dawa' musang jaki. 35Lun kuma' nah iha' men daha' atih, “Dahuk men itam pahu Israel, tekep nah itam pelemana' sayu-sayu marung kelunan anih, nun aleng seng tam na. 36#HST 21:38 Avin menuna' nei peju nah Teudas, kuma' iha' ji kelunan aleng dekaya' aran na', kio'-kio' pat atuh kelunan laké' pah peji dahin na'. Iha' en daha' lematei, lim daha' aleng ngioh iha' pah putat tua, em tuman loh-loh. 37#Lk 2:2 Men'uh kelunan anan, peju nah Yudas kelunan Galilea, tegu daha' mujap kelunan ha'ut ngavan arei dih, pelalau iha' mejat kuri-kuri la'ung kelunan ngioh iha' na hadui ji'ek. Iha' pah en daha' nasa' lahuh, nunan pah kelunan aleng ngioh iha' putat-purat tua lahuh. 38#Mat 15:13 Kerei inih akui kuma' men itam, ngesahun nah itam men kelunan anih, bei nah daha' anih. Tana' daho' anih dahin hadui anih men kelunan pa'un na', adang ha' tasa' na'a, 39#HST 9:5 bi tana' ha' pa'un na' men Allah, nusi' tam deng pekalah daha'. Mina ha' tula itam melawan Allah lahuh.”
40 #
HST 22:19
Daha' kemiti atih lim pah ngioh dahun na'. En daha' uvui nah dalo' aleng sihu Tuhan atih, en daha' nyaman nah dalo' em mun dalo' nengaran alem aran Yesus, uh anan daha' akau nah dalo'. 41#Mat 5:10-12; 1 Pet 4:13 Dalo' sihu Tuhan atih pah tei men unan daha' kemiti atih dahin sayu lan kenep avin dalo' tekep seng ga' ha'éh avin Aran atih. 42#HST 18:5 Nusi' nah dalo' ngeta' pekatuk daha' ha'ut-ha'ut dau alem Uma Allah, dahin alem amin daha', dahin pedengah Yesus Iha' nah aleng Kristus.
المحددات الحالية:
HADUI DAHA' SIHU TUHAN 5: TDK1990
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Bible in Today's Dahun Kayan Version © Bible Society of Malaysia, 1990.