Matthew 19
19
Jisu küthikünyimiko thi küsührho küsü
1Süze Jisu zü hiko pothü küva sa Pu Galilee lüno tasü Jordan rü shi Judea mü rhelü vorita. 2Mo thüma kro küzho shuh püh Pu züh vori mo Pu süko mütü thi küsührho sü.
Thüno thüpü kükho küva ta küsü
3Sücesü Phariseeko Püce vori Pu müdephi die sü; mipüh-e mha kühopüh nari pü cemi kha küva thüzho me? zita. 4Pu sükoce po die sü, süprühlü thüma thi küsüoe thüpumi mo thünomi thi sü. 5Mo Pu po die, hihi na thüpuoe pupo puzu khava die pu cemi züh püh thita to; sidie unyi küzüh thipüh thi tato. 6Süna punyi mi küna thisa mota die küzüh thipüh thi tato. Süsü na Jihovae thi küsa sü küvao thüma po brükho vahi te; zita. 7Süko Pu yisü, Sülize dipüh na Moses-e thazü u nopüne va küva lüsi khasü die pu khava no küti po süa? zita. 8Pu sükoce po die, Nekolü kükhrikürüh na Mosae neko po u cemine khava no küsü zo, eli süprühlüe süzi sümo; zita. 9I nekoce po süto, thüma kühopühri kürügü kürüzü na zo kümosa pu cemi kha va die thüno kükre yi lize pu rügü rüzü ta zo; thüma kühopühri pu kha küvapü yi lize pu ri rügü rüzü tazo, zita. 10Pu müthaküyiko Pu yisü, thüma pu cemine yo süzi tayo lize ceyo kümoe veku; zita. 11Eli, Pu pukoce, küku kha u prü küsümi zo kümosa thüma zü hio zühtso küyi di. 12Kükrenamoli thüma ceyo mo küta hi humi uzune valüno münu püh vori tayo, humi thüma müdolüno süzi tayo, humi tüyo küde na u tho u ceyo thi mu tayo; thüma kühopühri zü hihi zühyi küvemi po zühyite; zita.
Jisu galiphi püh natsimiko küprü
13Sücesü mi Jisu po pu be shopüh nyi die sho süno die natsimiko züh Puce vori; eli Pusadziko süko küthita. 14Süri Jisu po die, Natsimiko po ace vorite, mo süko kha hite; Kükrenamoli, tüyo küdee süko züzo tina. 15Sidie Pu be shopüh süko yo süsü die Pu sülüno ta la ta.
Künemi püh vori mha kütso küti
16Sücesü Yhie, Mipüh Püce vori die sü, Kümütha keveo I küshothe kürhüh ngoyi küto na mha küve dipühpüh thi mosüa? Sidie kütso. 17Süce Pu süo yisü; No dithi-e a yisü küveo liyo la? Mipüh zo kümosa küve kükre di; süosü Jihova zo, süri no kürhühlü lünyiyo lize, no zü khaküsüko thi mo zühyi te, zita. 18Pu kütsola die, dipüh-o ta? zisü. Jisu po la die; No mi dokhri sü, no rügü rüzü sü no mi rügo sü, no kücezü zhopo thi sü, 19Npo nzu rhoyite, süze no n sühzanumi khrü püh ntho n kükhrü biyite, süzi püh kümüzüko zo, zita. 20Khresao sü Püce, I a natsilüno mha hiko mütü thimo züh sürite, dipüh ba sa lua? Zita. 21Jisu sü püce, No vezhosüyi nyi lize vo die n mha n züko zhüh püh küdimiko prü vate, sülize noe tüyo n cene neyi tato, sidie vori a sa müdzi tate, zita. 22Süri khresa hio zü süo se küyice pu thü susa die tata, kükrenamoli pu mhaküne shüh mi kütina. 23Süsa Jisu müthaküyiko, yisü, I nekoce potü süto, künemi püh tüyo küdelü lü küto rüh shüh zo. 24Sü sari I nekoce potü süto, Künemi püh Jihava küdelü lü küto ceri ut püh po thüprüh celü lü küta rüyiku zoto. 25Sücesü müthaküyiko zü süo se puko malhü thiri ta die sü, süzi ta lize sopühno külayi veta? zita. 26Süsa Jisu puko pe türü die sü puko yisü, Thümae hihi thiyi rüh zo, eli Jihovae mha mütü thiyi vezo, zita. 27Süsa Peter Pu zü küla die sü, Yhie ha mha mütü khatso va die n sa müdzita te; mo ha dipüh ngoyi ta? zita. 28Jisu pükoce po die sü, I nekoce po süto, Thümanuo Pu küde zapozale küthi balü ba die mha thi küsala küti tüce, neko ri küdeba kürikünalü ba die Israelmi shühye kürikünako ne küti to, zita. 29Süze thüma kühopühri, aza na uce ukro, mori u sazühzüra, u lipüne, mori u pone, mori u cemine, mori u zune, mori u tü u cejü kha küva mi pu südü thükra ngo layito, mo pu küshothe kürhüh ngoyi to. 30Süri kürami kükro nu tato, mo künumi kükro rata to zita.
Цяпер абрана:
Matthew 19: NAG5BSI
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Chakhesang Chokri Naga New Testament © Bible Society of India, 2015. Used by permission. All rights reserved worldwide.