MARK 3
3
Jisu besami püh thi küsürho küsü
1Süsa Jisu Synagoguelü lalü, mu sülü besa kütami pühba. 2Süna pukoe Pu müjo kütola Pu kürülüzho nha süo thi küsührho sü tome lhoshi küti riba. 3Süce Jisu ube sakütao yisü, No midolüno süri te zisü. 4Sidie Pu süko yisü, kürülüzho nha mhaküve küthi thüzhotome mhaküsü küthi ta? Kürhühro küla küti me? Dokhri küti ta? Zisü. Eli puko kümükrethi ta. 5Süze puko lü kürüh lü püh Pu lüsü mu Pulü rüda die rürüh pra lico hico pedie puko pe die, thümao yisü n be sho süte, zisü mu pu shosü, sidie pube süo thi nve püh kükreco bi va. 6Süsa Phariseeko ceta vo mütha Herodianmiko züh die dibi die Pu müka va to shi küti rhüta.
Dzüde shico no thüma kükro Jisu sa müdzi küta
7Süri Jisu Pu müthaküyiko züh die ta sü dzüdeco vota, süze Galilee lüno. 8Thüma krode püh pusa müdzita, süzomoli Judea lü mu Jerusalem lü, mu Idumaea lüno mu Jordan cu küvo cori mu Tyre mu Sidon kümütu mütü lü makroe Pu dipüh thi sü shi küti se sü die ta Puce vori. 9Süze Pu müthaküyiko po püzu püh khapüh Pu müno süma nodie posü, kükrelamori makroo po Pu gü zo vo kütila. 10Kükrelamori, Puthüma kükro thi küsührho küsü la, u küthi künyi ne kütako pu nyi sü tezü die Pu whü züta. 11Süze müsakümo rüpüko pu ngo küsüsa rütu prü Pu mhuzülü zü die se zodie sü, No Jihova nuo, zita. 12Mo pu süko po pu popüh mi muse hino die puko khabüh mu küthi va.
Jisu apostle kürikünako küda küyi
13Süsa puta cejüthuyo kho Pu müdomiko ci sü, mu puko ri Puce vori. 14Sülize pu mi kürikünako küda püh süko po Puzüh ba kütola, mu kütsüh züyi küve zhopo thi sü kütola. 15Mu küthi künyiko thi küsührhoyi küto kuku bayi küto, mu küsü rüpüko huyi küto la. 16Süko Simon, puza thopüh Peter thi kütao. 17Mu Zebedee nu James sazüh-o John; Pu süni zatho püh Boanerges, puco tüküsüh nunyi; thisü. 18Süze Andrew mu Philip. Mu Bartholomew, mu Matthew, mu Thoma, mu Alfia nu James, mu Thaddaeus, mu Canaanmi Simon; 19Süsa Pu tüpü mi belü sü küva Iscariot Judas risa.
Jisu mu Beelzebub
20Süsa Pu ce pühlü vori küyice thüma kro künye püh la vorita, sidie puko po mhari tiyi süta. 21Süze pu züh kütako sü se sü die ta vo Pu tüyi tozu ta, kükrelamori, pukoe sü pu mutse tha mote zi die lü kütala. 22Mu Jerusalem lün kükiri lüsiküsekoe sü, Pu Belzebub züh bate, Pue küsü kükuko züh die küsuko huyo, zita. 23Süze pu süko cipün Pu müno süyi die; küzüve die puko ce po die sü, Dibi die. 24Satan Satan huyi veta? 25Mhaceno küde püh-e putho pu mütsu ta lize, süeprote, mu pu küde thayi kündi tato. 26Mu mhaceno Satan ri pu tho pu mütsu süri Ta lize die küpüphro ta lize pu küde thayi kündi tato. 27Mipühri kükumi püh celü lü die pu mhako mükayi yomo, pu süo tü püh pha va müra zo kümosa, süzi küva züh pu mhako mükayi küve zo. 28I neko ce potü süto, thüma nuko küphoma lünyiko mu puko Jihova kümütsu zü küpo thüthako mütü vapüh puko prüto. 29Süri thüma kühopühri Kümüsa Rüpü thayo lize pu külhüthe küjo va küprü ba samo, eli, lhülü pu müjo va küto kümüprüh lü bate. 30Süosü pukoe; Pu müsakümo rüpü züh ta, zi küta lazo.
Jisu zu mu Pu sazühneko
31Sülize Pu sazühneko mu Pu zu puko vori ceta tha die Pu küyi ba. 32Mu thüma kroo ba Pu mütu pü kübakoe pu yisü, Yhie Nzu mu n sazühnekoe ceta thadie n phuzü le zisü. 33Pu süko zü küla die, sopüh-e azu, mu sopüh-e a sazühzürako la? 34Süsa Pue Pu mütu pü die ba kübako pe die sü; 35Yhie; azu mu a sazühzürako sü; thüma kühopühri Jihova müdoko thiyo kütio sü a sazüh-o, mu alipü, mu azu zo, zita.
Цяпер абрана:
MARK 3: NAG5BSI
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Chakhesang Chokri Naga New Testament © Bible Society of India, 2015. Used by permission. All rights reserved worldwide.