MARK 4
4
Tsa küvao züve
1Süsa Pu dzüde shice no mi mütha la; mu makro künye püh vori Puce künguyi küta la Pü püzuo lülü die ku dzülü bayita, sidie makroo mütü dzüde shice cejü küsolü bata. 2Süze Pu züvelü no mha kükro püh mütha sü, sidie Pue Pu kümütha lüno sü. 3Rünyi süte; Yhie tsa küvami püh-e tsava toü prü, rü pu tsava küsüce hu, 4rütu shoshi prüta mu tüyo rako vori die süko müdoyi mu kükreko rütu kütsü, 5Tsüro cejü zü si ba kümolü prüta, süze züsi kümola süko tsü mha prari ta, 6Mu nace prari die phrü küsüce; süo ume ba kümo la ceta. 7Mu kükre hu rütu sü tsahu dolü prüta sidie tsahuko ma süri süko güyi die süko po use kürüthiyi mo ta. 8Sülize hu rütu sü cejü zü küve lü prüyi die use ji küthi mamayi, püh se sühmüri, püh se hieshorüh, mu püh se krapüh jiyi zi. 9Süze Pu süko yisü thüma kühopühri unyi ne die rünyiyi kütomi po rünyiyi te, zita.
Züve süh kütico
10Süsa Pu pu libi kübace Pu hupü kübako kürikünako züh sa die züveo co kütsota. 11Mu Pu süko yisü, Neko po Jihova küde zü kümüsüh seyi no die khasü ve, süri shozuco kübako la zoe züve lüno mha mütü thisü ze; 12Süna pukoe kürünyie rünyiyi ve eli seyi lho mu pukoe küngoe ngoyi ve eli seyi lho, mu kürünyie rünyiyi ve, süri lükükreyi lho, ukoe puko küdeyi die puko küphomako vayi ta mo kütola. 13Sidie Pu süko yisü, neko züve hio semo me? Sülize neko dibi die züve mütü seta? 14Tsa küvao sü züo püh va süyo. 15Mo hikohie shoshice tsao rütulü kütako zo, süri puko rünyi küyice, Satan ta mha vori die tsa puko lü prüh küsüo khipüh tata yo. 16Süsü bidie tsa rütu kütsü tsürolü prü kütakoe; züo seyi mu uko nüri die züh mhayi yo; 17Süri puko ume ba kümo la dopüh libi güyi yo, sidie künuco züoe kümüzhe küti mu kümüthi kümünyi süri küyice; pukoe unümo mhatayo. 18Sülize tsa rütu tsahu dolü prükütako sü hikohi pukoe zü rünyi yi yo. 19Süri cejü hio lünyiko, mu zütho kümo ceneko, mu umünyi kükrekre kütiko ulü lüri küyi ce züo tü müdi vayo, sidie use jiyi mota yo. 20Sülize tsa püh cejü küvelü so küsüko sü hikohi; pukoe züo rünyi die yi püh uzü thiyiyo, sidie use jiyi yo, hu se sümüri, hu se heshorüh, mu hu se krapüh. 21Süzomoli, Pu puko yisü, mi metobüh khapüh mürha khro mori thüzi khro sü ma tayo me? Sidie süo püh ubayo süma yo mo ma? 22Kükrelamori, mhapüri sühpra mi müsemüngo sü lho li die küva püh küma di, mori, mhapühri süh pra küvelü sü mo to die whüpü küma dizo. 23Unyi ne die rünyiyi kütomi po rünyiyite. 24Sidie Pu puko yisü, neko mha kürünyilü münuyi te. 25No didüpüh müde püh mi prü sü shili mi südü müde püh n prüto, mu khapüneko rünyiyo kütiko prü sa süto. Mha kübami kha prü sa süto; mu mha ba kümomi pu kübao ri khi yi tato.
Tülha tsü küprari
26Sidie Pu podie, Poo küdee mipüe tsa prüh püh cejü sü die vo züh tayo, 27Mu tüso süri lize co süri zi bayo, eli pu tsakoe dibi die tsü süri müma süri bayo sheli se bayo kümo bizo. 28Cejüo tho puse rüthi süyo, thüralü punyi, süsa pu krüh, sidie masü pukrüh chu süriyo tina. 29Sidie puseko ji pariyi ta mütha; süo kürüh tü kütasa mi zeküne khasü tayo.
Gakresi püh tüyo küde züh kümüde küsü
30Mu Pu podie sü; dipüh Poo küde müde süta, mori dipüh züve püh süo züh kümüde ta? 31Süo sü gakresi püh bizo, mi süo püh cejü prüh küsüce; süosü tsa dolü künyithoo zo. 32Süo prüh küsüce tsü süri die gako dolü künye püh thi tayo, mu pücoko ma süri die tüyo rakori po vori die pu khrikhro rüsühyi yo. 33Mu puko rünyiyi ve küba bidie, Pu süsü biti züve kükro süh die züpo püh puko ce sü. 34Süze züve sa mo die Pu mhapühri popüh puko ce sümo; Pue mi küdiceno mha mütü potsüh püh müthaküyiko kasü.
Jisu tükhra kükha züh küva
35Süze thüva vori kütace, Pu süko yisü, Uko ta lishico kuta khe, zisü. 36Sidie makroo kütsüh va die, pue ba küba dpüzuo mu Pu züh küba püzu künyikori sa Pu züh ta. 37Sücesü tükhra khrade püh vori die dpüzuo hüta, sidie dzü rüphü lüri süo chuyi ta züta. 38Süri Pue püzu meco pikhüpüh yono zühzü küta la pukoe Pu küsü die sü, Kümüthao, uko kata to küzühi nlü nyi mozo me? Zita. 39Süsa pu co süri die tükhra küthi diesü, dzüde yisü, no kümükre tate, zisü. Süsa tükhra lata, sidie rütüzüh ta. 40Süsa pu süko yihsü, neko dipüh la müprüh zo tala? Dibi die ne kümülü ta mo zoala? Zita. 41Süsa puko müprüh shuta die sü huhu yisü; Hiohi dibi ti mapüh ta? Tükhra mu dzüde thori Pu khü züh küta hi? Zita.
Цяпер абрана:
MARK 4: NAG5BSI
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Chakhesang Chokri Naga New Testament © Bible Society of India, 2015. Used by permission. All rights reserved worldwide.