MARK 5
5
Jisu thürüküsü küzühmi thi mve küsü
1Süsa puko tasü dzü kütü shico Gadarenes mi rünalü voyi. 2Sidie Pu püzu lüno ta prari mütha küsürüpü po u kübü pü kütami püh mhakhreko lüno ta prari Pu züh küsüh. 3Thüma hio mhakhreko püh pu kübathi thiyo; mu mhapühri püh pu phayi yomo, thügiro zori phayi yomo. 4Kükrelamori, mi tsükünu bekharo mu thügiroko püh pu phayo, süzori pu thügiroko püthü küna thiva yo, mu bekharoko cethü kügü vayo, sidie mipühri pu kükha pü bayi kündi tata. 5Sidie tüso tüzüh cejüthuko yo mu mhakhreko lüno se mu kütsüko püh putho pu jo zi ba zota. 6Mu pu rapeco no Jisu ngo sü die ta vori die tüprü Pu rüsuta. 7Sidie pu se müto zodie, Jisu kürükrüthoo Poo nuo no azüh dipüh thita? I Poo zalü rushüh zo die shoyo, a müthi tahi zote! Zita. 8Kükrelamori, Pu süo yisü, küsü rüpü no pulüno ta prari tate, zi kütala. 9Mu Pu süo Yisü, nza sopüh la? Zidie kütso sü, mu pu küla die Azae Legion, kükrelamori, hako mi kükro ta tila, zita. 10Süze Pu po pu kütsüh pü rüna süo mücu va mo kütola shobü ta. 11Sücesü thüvo krode püh-e sü kümünoce mha ngüti ta mu küsürüpüko mütü. 12Pu ce shodie, hako kütsüh püh thüvoko ce süte, hako po süko lülüta küto la, zita. 13Süsa Jisu puko po vota no sü, süsa müsakümo rüpüko ta prari die tasü thüvoko lülüta; süze thüvo kro nyekünako ta kühu dzükütülü lü die mülhü khriva. 14Sülize, süko kükhükoe ta vo nadekolü mu yi kolü mice rükhrü sü, sidie thümakoe dipühthi ta shi küti pe tozu vori. 15Süze puko Jisu ce vori die thürüküsü puco Legion po kübü züh ta kütao khüne be münemu u mülü tsühyi die ba küta ngoyi die müprüh shuta. 16Süsa thürüküsü po u kübü küvorio yo mu thüvoko yo dipüh thita sheli küti küngokoe mha mütü püh mice posü. 17Süsa pukoe Pupo uko rünalüno tata no die uko müzhe mülo ta. 18Sidie Pu tata tozu die lü dpüzulü ba küyice thürüküsü po u kübü kütaoe Pupo pu züh tata no die shota. 19Süri Jisu mu ta die pu yisü, no ta n celü mu n thümako ce vo die Nyepooe nla dipüh thi sushi küti püh po süte, zita. 20Süsa pu ta sü Dekapoli lü vo die Nyepoo pula dipüh thi sü shi küti po püh mice za sü. Mu mi mütü u malhü thita.
Jaira nupü sührho küyi
21Süze Pu püzu lüno ta lishico ku la küyice, Pu dzükütü poce ba, mu thüma kroo Pu ce vori künguyi. 22Sücesü, Yhie! Synagoguelü küzhomi püh puza Jaira li küti püh ta vori die pungo küyice tü Pu phelü prü Pu ce sho die; 23A nupü sata tozü te, pupo ve mu sührholayi küto la no vori die n be yhio püh puyo sü zhie, zita. 24Mu Pu süo züh vota, süze thüma krode püh Pu whü tata.
Tse küriküna thüza krüh kütapü püh sührho küyi
25Sülize thünomi püh tse küriküna thüza krüh die kümüzheri ta küta püh daru küsemi kükrori po pu pe die. 26Sükola pu mha küne küdi mvo va zori ve küyio moli süku küta püh. 27Jisu vori küzü se sü die makro dolü vori die Jisu saco vo Pu khü nyisü. 28Kükrelamori, pue pu lüno, I Pu khü zori nyi sü lize sührhoyi tato, zi die lü kütala. 29Mu nyisü mütha puyo thüza krü kütao so mhata, sidie puyo küthi süo münüyi küta seyita. 30Süzita mütha Jisu Puyo no kuku pra küta seyi die rügü pra thümako pedie sü, sopühn a khü nyi sü laha? Zita. 31Mu müthaküyiko Pu yisü, thüma kroko n whü pü küta ngo zori, No sopühn anyi sü la zi tome? Zita. 32Mu Pue Pu nyi küsüpü ngo sü kütola rügü lico hico pe ta. 33Sücesü, thünopüo pütho puyo dipüh bi ta sü ti seyi die mu müprüh rüsü zodie ta vori tü Pu mhuzülü prü die pu jüh mütü püh Pu ce posü. 34Süsa Pu süpü yisü, A nupü, n kümülü tho nthi münü süho, nnü die tavo tate, mu n küthi po münü tsüh ta küyio thite; zisü. 35Pu züpo kübalü thüma hu Synagogue küzhoo celüno vori die sü, n nupü sate; dipühla kümüthao po kümüzhe la züta, zita. 36Süri. Jisu süo sesü mütha synagoglü küzhoo yisü, müprüh tahi, no mülütü zoyite, zita. 37Süze Pu Peter, James, mu James sazüh-o John neko zo kümosa mi kükre pühri züh sa muta. 38Sidie puko synagoglü küzhoo celü vori küyice mi kra mu thükri thipüh münyomünyi pü küzü ngoyita. 39Mu Pu celü lüri die puko yisü, neko dipüh la kra mu thükri thi hi bata? Unupü sata mo; eli züh küzü zo. zita. 40Süri süko Pu krünyita, Eli Pu mütüko po ceta vota die u nupü ne po mu pu zu, süze Pu züh kütako züh die tasü u nupü küzü thilü vota. 41Sidie Pu unupü be ceyi die puce, “Talitha cumi” puco, ngane I nce posüyo ho, ta süri te, zisü. 42Süzi sü mütha süpü süri die tayita, kükrelamori süpü tse küriküna kütala. 43Sücesü puko u malhü thi shühta, mu Pu mipühri po hihi se hizo no die posü, süsa Pu süko po lüva püh süpü po tiyi no die po sü.
Цяпер абрана:
MARK 5: NAG5BSI
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Chakhesang Chokri Naga New Testament © Bible Society of India, 2015. Used by permission. All rights reserved worldwide.