MATEO 24
24
Te Jesuse la yal te ya xjimot te mukꞌul temploe
1Te Jesuse yipal bael ta lokꞌel a te ba mukꞌul temploe. Tijilajik tal te jnopojeletik yuꞌune, lijk yaꞌbeyik yil te latsbil ton yichꞌoj te temploe. 2Te Jesuse la yaltalanbe:
—¿Me yipalex ta yilel spisil to? Jamal ya kalbeyex, spisil me ya xjimot. Ma me ayuk jpꞌejuk ton te kajal ya xjil ta sba te jpꞌej xan tone —xchi te Jesuse.
Señaetik te nopol slajibal kꞌaale
3Laj abi, bajtik ta wits Olivailtik. Teꞌ kꞌo snajkan sba a te Jesuse. Te jnopojeletik yuꞌune tal skꞌoponik ta parte. Jich a yalik:
—Ya jkꞌantik ya awalbotik te tut ora ya xkꞌot ta pasel te tut la awalbotike. ¿Tut señail ya xchiknaj ta ilel te tut ora ya xchaꞌtalate sok teme jaꞌix te slajibal kꞌaale? —xchiik.
4Te Jesuse la sjakꞌtalanbe:
—Ila me abaik, ma me ayuk machꞌa ya sloꞌlayex. 5Porke ay me bayal machꞌatik ya xtal ya skuy sbaik a te joꞌone. Ya me yalik: “Joꞌon Cristoon” xchiik me. Y bayal me genteetik ya sloꞌlaylan. 6Te jaꞌexe ya me awaꞌiyik sluwar te ay guerra liꞌto y lum to. Pero ma me xiꞌanik yuꞌun, porke puersa me jich ya xꞌkot ta pasel. Pero ma to me jaꞌuk te slajibal kꞌaale. 7Porke te jun nasione ya xlijk yut sbaik sok te jun xane. Sok te rey yuꞌun te jujun nasione ya me xlijkik ta guerra. Sok ya mex tal wiꞌnal sok chamel sok tulan jikichab ta yanetik luwar. 8Ta spisil to slijkibal to nax me te wokol ya xtale.
9“Ya me yakꞌelex ta utel sok ya me yakꞌelex ta milel. Ya me awichꞌik pꞌajel yuꞌun spisil genteetik joꞌon ta jkaj. 10Ay me bayal ta jtul ya xchꞌay xchꞌuunel yoꞌtanik yuꞌun. Sok ya me xlijk spꞌaj sbaik, sok talel bael me xlijk yakꞌ sbaik ta kꞌabal. 11Sok ya me xchiknaj bayal jlot-alwanejetik y ya me sloꞌlay bayal genteetik. 12Sok ay me bayal ta jtul ya xlaj slekil yoꞌtanik ta skaj te bayalix te tut ma tsaꞌamuk ta pasele. 13Yan te machꞌa ya xjuꞌ yuꞌun kꞌalal ta slajibale, ya me xkol. 14Sok ya me yichꞌ alel ta spisil balmilal te tutꞌil ay ta ajwalinel te Diose, yuꞌun jich me ya yaꞌibe sluwar spisil te genteetik te tutꞌil ay kꞌuxutayel yuꞌun te Diose. Jaꞌ to me ya xtal te slajibal kꞌaale.
15“Te jꞌalwanej yuꞌun Dios te jDaniel sbiile la yalbe jilel skꞌoplal te tut a te ma tsaꞌamuk te ya xꞌixlanwane. (Te machꞌa ya yil te tut tsꞌibabil liye, aꞌ me snaꞌbe sluwaril). Te kꞌalal ya awilik te ayix ta ba ay te chꞌul luwar te tut a te ma tsaꞌamuk te ya xꞌixlanwane, 16te machꞌatik ayik te ba Judea, aꞌ me anikuk bael ta witstikil. 17Teme ay machꞌa moem ta sba te snae, ma me xꞌoch ta yut sna ta slokꞌesel te stutik yuꞌune. 18Sok teme ay machꞌa baem ta kꞌaltike, ma me wakꞌ sujtuk tal yichꞌel te skꞌuꞌ-spakꞌe. 19Oꞌol me sbaik te antstike te ay tut staojik sok teme ay xchꞌin yalik te ya to xchuꞌune. 20Kꞌanbeyaik te Diose te manchuk yorailuk sik a, sok te manchuk skꞌaaleluk kuxo-oꞌtan aye. 21Porke ya me xtal bayal wokol te maꞌyuk jich kꞌoem ta pasel ta slijkibal te balmilale, sok te patil maꞌyukix jich ya xkꞌot ta pasel a. 22Te jichuk makꞌ xatꞌbe skꞌaalel te Diose, maꞌyuk machꞌa ya xkol te jichuke. Pero chapalix yuꞌun te ya yichꞌ komel ta skaj te machꞌatik tꞌujbil yuꞌune.
23“Teme ay machꞌa ya yalbeyex awaꞌiyik: “Ilawil, liꞌ ayix te Cristoe”, tem xchie, o ay yan ya yal: “Lum ayix to”, tem xchie, ma me achꞌuunik. 24Ay me ya xtal lotil Cristoetik sok lotil jꞌalwanejetik. Ya me yakꞌ ta ilel mukꞌ señaetik sok milagroetik. Ya me sloꞌlayik euk te machꞌatik tꞌujbilik yuꞌun Dios te yauk xjuꞌ yuꞌunike. 25La me kalbeyex nailuk. 26Jaꞌ yuꞌun teme ay machꞌa jich ya yalbeyexe: “Ilawil, lum ayix ba tꞌantꞌan kꞌinale”, tem xchie, ma me baaanik. O teme ya yalik: “Laꞌ ilawilik, liꞌ nakꞌalix ba yutil nae”, tem xchie, ma me achꞌuunik. 27Jich te tut ora ya xtal te Nichꞌanile, jich me ya xchiknaj tal te tutꞌil sansewaletik te ya xtil tal te ba xlokꞌ tal kꞌajkꞌale sok ba xchꞌay kꞌajkꞌale. 28Jich te tutꞌil ay ta alele: “Te ba pojol stiꞌbalul te tut chamene, teꞌ ya stsob sbaik tal euk te tsaꞌlose”, xchi me.
Te tutꞌil ya xchaꞌtal te Nichꞌanile
29“Teme kꞌaxix skꞌaalel a te wokole sok te ikꞌtinele, ya xꞌijkꞌub te kꞌajkꞌale, sok te ue makꞌ xtilix a. Sok ya me xtꞌuxaj ta koel te ekꞌetik ta chꞌulchane, sok ya me xtijtalanot te tutik ay ta yolil te chꞌulchane. 30Jich me ya xchiknaj ta chꞌulchan te seña te Nichꞌanile. Spisil ta jkaj te genteetik te ayik ta balmilale ya me xkꞌo yokꞌetay sbaik, y ya me yilik te Nichꞌanile. Ya me yilik te yipal ta talel ta tokal ta yolil te chꞌulchane sok jpoder sok bayal xojobil te stsaꞌamule. 31Te kꞌalal ya xꞌokꞌ tulan te kornetae, ya me stikon bael te chꞌul angeletik yuꞌune, ya me xba stsobik ta xchanmejchel balmilal te machꞌatik tꞌujbil yuꞌune.
32“Te tut ya kalbeyexe, nopaik te tutꞌil ay te ikuxe. Te kꞌalal ya xꞌachꞌub te skabkꞌabe sok teme yipalix ta yaxubel te yaꞌnimale, jich me ya anaꞌbeyik sluwar te xnopetix te jaꞌleltike. 33Jich mismo teme la awilik te yipal ta kꞌoel ta pasel spisil te tuti kalbeyexe, jich me ya anaꞌbeyik sluwar te ayix ta tiꞌpuerta kꞌoem. 34Jamal ya kalbeyex, ma to xchamik a te genteetik kuxajtik te ora to te spisil ya xkꞌot ta pasel te tuti kalbeyexe. 35Te chꞌulchane sok te balmilale ya me xlaj stukel. Yan te jkꞌope ma xlaj skꞌoplal stukel.
36“Pero maꞌyuk machꞌa ya snaꞌbey sluwar te tut orae sok te tut kꞌaalil te ya xkꞌot ta pasele ni ma snaꞌ euk te chꞌul angeletike sok ma jnaꞌ euk joꞌon te Nichꞌanilone. Jaꞌ nax ya snaꞌ stukel te jTatik Diose.
37“Jich tutꞌil ayik a te genteetik ta yorail te jNoee, Jich mismo ayik a te kꞌalal ya xchaꞌsujt tal te Nichꞌanile. 38Jich te kꞌalal ma to xtal a te nojel-jaꞌe, ben jun yoꞌtanik yipalik ta weꞌel, uchꞌbajel, sok ta nujpunel, sok yipalik ta chom a, jaꞌ to te la sta skꞌaalel te och ta arka te jNoee. 39Maꞌ snaꞌbeyik sluwar te tut ya xkꞌot ta pasele, tal te nojel-jaꞌe. Jicha laj spisilik. Jich me ayik a te genteetik te ya xchaꞌtal te Nichꞌanile. 40Jich teme ay cheb winketik ta kꞌaltike, jtul ya xꞌikot bael y jtul ya sjilesot. 41Sok ay cheb antstik te yipalik ta juchꞌunele, jtul ya xikꞌot bael y jtul ya sjilesot.
42“Jaꞌ yuꞌun te jaꞌexe, wikꞌa me asitik, yuꞌun ma xꞌanaꞌik tut ora xtalon joꞌon te awajwalonike. 43Jich me xꞌanaꞌik to: Te yajwal nae te yauk snaꞌbe sluwar te tut ora ajkꞌubalil ya xkꞌot te jꞌelekꞌe, xkuxoj yoꞌtan te jichuke, sok maꞌyuk machꞌa ya yakꞌ ochel ta sna te ya xꞌelkꞌanbot bael te stutik yuꞌune. 44Jaꞌ yuꞌun te jaꞌexe, chapalukex me ta maliwanej, yuꞌun kꞌalal ma chapalukex ae, jich ora ya xtal te Nichꞌanile.
Te lekil aj-aꞌtelil y te ma lekuke
45“Jich tutꞌil to te aj-aꞌtelil te jun yoꞌtan sok ay spꞌijil yoꞌtan, aꞌbot skanantay te yanetik jꞌaꞌteliletik ta sna te yajwale. Ya yaꞌbe sweꞌelik ta juju-chꞌoj te ya xweꞌike. 46Ben tsaꞌam te aj-aꞌtelil teme jich yipal ta spasel a te ya xjul taek yuꞌun te yajwale. 47Jamal ya kalbeyex, te yajwale ya me yaꞌbey skanantay spisil te tutik ay yuꞌune.
48Yan teme ma tsaꞌamuk yoꞌtan te aj-aꞌtelile, teme ya xlijk yal ta yoꞌtan: “Te kajwale ma to wan xtal ta ora”, tem xchie, 49ya xlijk yilbajin te sjoꞌtak ta aꞌtele, sok ya xlijk soyin ta weꞌel-uchꞌbajel te jyakꞌubeletike. 50Jich te yajwale jaꞌ me ya xtal a te tut kꞌaalil sok te tut ora chꞌayem yoꞌtan ta maliwanej te aj-aꞌtelile. 51Ya me yaꞌbe stoj ta kastigo. Teꞌ me ya xbajt a te ba ya xbajt te machꞌatik ma tsaꞌamuk yoꞌtanike. Teꞌ me ya xkꞌo yokꞌetay sba a sok teꞌ me xkꞌo xkꞌuxilan ye a —xchi te Jesuse.
Цяпер абрана:
MATEO 24: AMANNT
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Nuevo Testamento Tzeltal de Amatenango © Sociedad Bíblica de México, 2006.