Лукара йибкьыд Шадды Хабар 17
17
АгьӀдиет диш!
1Джуды шагырташде ГьӀасара рухьура:
– Аа сыджыдхӀыр йикисдиш,
амма себеб вишинийды диван ваъаси!
2Гьаасад гьалысна джацӀад на ад джыгаа джацӀад эдеми
гунаадыы гьеч силгад име?!
Нагагь гардана дынгы-хаталад духул ивир
дангызаа хаагъурийди гьанийс рагъӀат йиъий!
3– Гадакъ, АгьӀдиет диш!
Нагагь выды шура нагьакьды гвалах выъыхьвна, къӀывыхӀбыр гьаъ гьанийхда. Нагагь гьание вадаа «хыл лювуш!» гьухьухьна, багъышлемиш гьаъ. 4Нагагь гьа са йыгьа йыва нагьакь йишир, йыва бегеде хъиркьыхьвна, выдж «икьрар йиъи» гьухьухьвна, багъышлемиш гьаъ.
Дин
5– Ихьды инаамишвалды бала ваъ – рухьура шагырташе Илагьиеде.
6– Нагагь ваӀ са сук духъунды инаамишвалды адбыр диъинехъун йикӀе, – рухьура Илагьиере, – ваӀ гьеми хукада гьухьухьвна: «Угъубкьа ва вы гъваб ки хъуна, хьели дейрагьак кивирше» – гьа ваӀс икьрар викиси.
7ВаӀклаа гьалыхда-га ай-га йидзан ваъад я хӀыб ухӀуд къул. Ва гьанийде, гьа хуйяа хъиркьыйне «КӀыбди аа сукьа улесды улес» – гьухьусиме? 8Бес ва гьанийде гьухьусдишме: «Зас улесды гьыъыр, цухьрудыы сихьяъ, хьели кьулухълаа лаъ луза за улемаа не рагъамаа, хьели, сукьур, вас ки уле!» 9Ва къулас сагъулбыр гьаъара сукьусдиш эхир, гьание джу джуды гвалах лазим йиъид кал выъыри хьур.
10ВаӀ ки гьааса: ваӀ гьыъыр йигад гвалахбыр гьыъыйне, ваӀ ки гьихьяъ: «Е къул духъунды кар и, – е ихьды гвалах виъи выъыр ад».
ЙицӀыр джузанды
11ГьӀаса, Иерусалимдыхдана йиъине, Самариядид не Галилеядид саргьӀатаала тиниъ йиъина ай. 12Сада, Гьа мукъӀа аӀбчӀуд вахтинди, Гьанийды рыкъӀаӀ гыдылхӀаре йицӀыр джузанды. Хырыда кал луьздуьр, 13гьабише лал ваъара:
– ГьӀаса Тербие вылцӀад! Яхда язухь гьаъ!
14ГьӀасара, гакъыр, рухьура:
– Дырых, дибирешде гахъадкъас вияъ!
Тимбыр ки дуруъура, рыкъӀаӀ, диъине ад джигиди, темиз хъӀудире. 15Гьабишиклаа са, хъишид гьагуйне, хъургъур, гъигъене Йинчихьде шукур ваъара, 16ГьӀасад гъилаба ирхьур, сагъулбыр гьаъара.
Гьа йиъий самаришура.
17– Бес йицӀырси темиз хъидширдишме? – хулкара ГьӀасара. – Мадды гьучӀур гьили гьаадхӀыри? 18Бес секки хъидкьырдишме Йинчихьде шукур ваъас, са ми вырды элдиклаадынийыыла гъайри? – 19Хьели гьанийде рухьура ГьӀасара: – Луза, рых, вы выды инаамишваӀлире азад гьыъыр а.
Аллагьад ПагьӀчаалыгъвалды мыс выкьаси
20Фарисейеше ГьӀасадаа хулкара, мыс выкьасди Аллагьад ПагьӀчаалыгъ.
– Аллагьад ПагьӀчаалыгъ ливкьыйне, гьа гьувгас вуруъуд диш, – джываб хъывылцӀара ГьӀасара гьабишис. – 21Гьухьусдиш: «Мидиъ гакъ, гьа миди а», хьур, я «Ми гьавай!» хьур. Аллагьад ПагьӀчаалыгь гьамыъ ки выхьды арыди а,
22Джуды шагырташде ГьӀасара рухьура:
– Йыкьаси йыгъ, ваӀ илсанашды Духарды са йыгъ хъыгаӀдий рухьуд,
Амма гьахъагусдиш.
23ВаӀде гьухьуси: «Мидиъ гадакъ» я «Тиниъ гадакъ!»
Ледчир, хъимедурухь.
24ЦӀай рапыр, сиене хӀал ми суруула ти суруу йыкьамаа
йаӀкв ибхьуд кал, –
гьаасад йикиси илсанашды Дух
выдж хъиркьыд йыгъа!
25Амма суьхьде гьанийис балад гьӀазабыр йикиси,
ми къафлыдид илсанаше ки гьӀасаба гьаъасдиш.
26Шууна йиъийди НухӀды вахтинди,
Гьааса йикиси илсанашды Духарды йыгъырма ки:
27илсанаше улере, рагъара, выгглис дуруъура, къари раъара ай
таа ки НухӀ гемиди аӀбчӀуд вахтиндыы йыкьамаа,
хьели либхьура хьед – сиене дыкьыркьара.
28Гьааса йиъий Лотды вахтинди ки:
улере, рагъара, вылцӀара, лаӀбшура, езере, гьаъара ай,
29амма Лота Содом сабтыд йыгъа
накьудыы цӀай на сер саӀбчӀура –
сиене ки дыкьыркьара.
30Маа йикиси гьааса
Илсанашды Духара выдж гьагва гьыъыд йыгъа ки
31Выдж хылаа йишир, карбыр хала адгыдбыйды
саъ саӀхъӀмаӀбучӀухь
«гьабыр лаӀхъӀашус» хьур
Хуйе адбыйды хъумаругъ!
32Лотды къари йикӀыы харакь!
Джу джуды гьӀуьмир азад ваъас хьуднийе гьадид кьулис ваъаси.
33Выдж джуды кьулид дерде джишидбыйды азад йикиси.
34Дуьзене рухьура ваӀде,
гьа выше кьӀвар са месе дикиси –
са гыргаси, са аргаси;
35-36кьӀвар хьыдылды са рухӀа дикиси –
са лаӀршуси, са сартаси.
Гьа гедеэне шагырташе хулкара ГьанийдааӀ:
37– Гьили кал йикиси гьа, Илагьи?
– Къаджирмар джандакаа ягъмиш йикиси, – рухьура ГьӀасара.
Цяпер абрана:
Лукара йибкьыд Шадды Хабар 17: RUT
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© Библие мадды чӀилмыы хъывгад Институтара, 2004