Лукара йибкьыд Шадды Хабар 18
18
Кьади не хиндадый
1ГьӀасара гьабишис са ихтилат гьаъара, гьабишис гьацӀын бадаана, мысга дугьӀабыр гьаъара, джваӀр джудаа хиджиидхьун бадаана.
2– Ай са шегьерди диван ваъад кьади, гьанийис я Йинчыыла гичӀед диший, я илсанашыыла рыхъӀ руъуд диший. 3Ай гьа шегьерди са хиндадый ки, мыс-га гьанийхда руръура, рухьуд: «Зас гьакь гьаъас куьмег гьаъ, ихьды гьӀаджетед кьатӀлаама гьаъ!» 4Гьа балад гедеэне рази джишир ай, хьели рухьура джу джуда: «Зас Йинчыыла гиджичӀенехъунки, зас илсанашыыла рыхъӀ ки джугъӀунехъунки, 5ми хиндадый хъӀахъӀраабчӀуд диш. Гьаъаси гьанийды кьатӀлаама, маа хьиджиркьыр, заа йыгъ хъыджыгын бадаана ки».
6ВаӀс ун ама, шыв рухьура, ади ми рыхъӀ адишды кьадиере? – рухьура Илагьиере. – 7Бес Йинчире джуды сур хакьыдбишды сур хакьасдишме, йыгьа ки выше ки джухьде дилегбыр гьаъара ад? Бес Гьание ыхьаӀ гьаъасиме? 8Рухьура ваӀде: Гьанийды диван гьакьды на кӀыбди викиси. Амма илсанашды Духарда, выдж накьудыы хъиркьыйне, гьаасад инаамишвалды ыхъывгасимихь?
Фарисей не налугбыр ягъмиш гьаъад эдеми
9Выдж джуды мисгинваӀлыы разидбишде не маддыбыр гьӀасаба джадаъадбишде ГьӀасара мисед ихтилат гьухьури;
10– КьӀвар эдеми дуруъура Йинчид Хала куб ваъас. Са фарисей ий, са – налуг ягъмиш гьаъад. 11Фарисейере, лузур, мисе рухьура ай джу джуклаана: «Джан Йиниш, сагъул вас зы маддыбыр каалды дишдидыхъаъ – сырыхчи, нагьакьды, чуьруькчи, чӀилис гьеми кире ягъмиш гьаъанийк киджикадыхъаъ. 12За гьӀафтидыы кьӀуне сив халкьара, гъараа аъ руъуд ризкьыд йицӀыбхьусды пай гебтӀва ваъара». 13Кире ягъмиш гьаъаднийе, хырыда кал лузур, улабыр ки хӀалихда лийес джишир, джу джуды мыхыр ветере, рухьура ай: «Гьай Йиниш, зак гунаабыр бала ки, заала хыл луьвуш!» 14Рухьура ваӀде: гьа хъӀугъӀуси хала Йинчис гирамиг йишир, фарисей ваъ.
Гьис хьуйне, гьӀар выдж лаъ гьаъас хьур хъичӀирхьыр ад
саъ йикиси,
выдж саъ гьаъад лаъ йикиси.
15ГьӀасад бегеде дыгыргыра кӀаъды хынимер, Гьа гьабишик кийкьын бадаана. МутагьӀлимеше гьабыр гъаъ эхъедере чалыш дуруъура. 16ГьӀасара, хынимер бегеде сес выъыр, рухьура:
– Дыкьыхь захда хынимер, гьабишис рахъӀ гъигъе мываъ. Йинчид ПагьӀчаалыгъ гьабыр каалдыбишисды виъи. 17Рухьура ваӀде, гьал Йинчид ПагьӀчаалыгъ, гьабыр кал, йикӀе уджувгъурди, гьа гьади агъусдиш.
Мыс-гад гьӀуьмир
18Са дур ад эдемиере хулкара ГьӀасадаа:
– РагьӀим ад МагьӀалим! Шыв гьыъыр йигара за, мыс-гад гьӀуьмир ывгын бадаана?
19– Гьис ва захда рагьӀим ад рухьура? – хулкара ГьӀасара, – гьалыхдана адиш рагьӀим, Йинчиыла гъайри. 20Гьанийды васи вас вацӀара: некягьӀ ад месис иянат маъ, дыкьыркьа мадаъ, дагулды маъ, мыхьчаӀбаӀс шигьидне лумабуз, дидды на нинды гьӀуьрмет хывакь.
21– Зы хыных гедаахъуъ гьааса гьаъад и, – джываб вылцӀара тиние ГьӀасас. 22Гьасара, гьадид ун йишийне, рухьура:
– Вас са кар кам и. Вахда ад сиене масак выр, касибешис гетӀва гьаъ. Гьа гедеэне вы хӀале варлы йикиси. Хьели йиркьыр, Захда хъуна йирхьа.
23Амма тинийис гьаммыд ун йишийне, хаджалат руъура: гьа лап бала ад варлы йиъий.
24ГьӀасара, гьанийис хаджалат йишид гьагуйне, рухьура:
25– Шудаъ четин йиъиди гакъ варлына Йинчид ПагьӀчаалыгъа аӀчӀус! Деве рубадаа хьуъ сивигас рагьӀат йиъи, варлы Аллагьад ПагьӀчаалыгъа аӀчӀусдыхъаъ.
26– Бес гьааса иди, гьалдаа азад йикис руъура? – хулкара хъадабцудбише ГьӀасадаа.
27– Илсанашдаа ляджагъӀудбыйды Аллагьадаа лягъӀуре, – джываб хъывылцӀара ГьӀасара.
28– Е, хьуйне, яхда аддухъундыбыр сатыр, выды джыбра диъи, – рухьура гьа гедеэне Петрара.
29– Дуьзене рухьура ваӀде, – хьури ГьӀасара, – гьӀар – хал, я къари, я шубаӀ, я дид-нин, я хынимер – Аллагьад ПагьӀчаалыгъ бадаана сатыднийис 30мибыйды девире гьадыхъаъ бала выси, мирджедбыйды девире – ладжваалтӀвад гьӀуьмир.
ГьӀасара маа выдж йикьидиклаа ихтилат гьаъара
31ЦӀыкьӀвар са суруу сес выъыр, ГьӀасара рухьура гьабишде:
– Гьамыъ йаӀ-ваӀ Иерусалимди диъина а, гьади пайгъампараше илсанашды Духарыклаа кихьир адухъундыбыр кьулуу йыкьаси. 32Гьа кафирешды хыле выси, Гьанийклаа иянатбыр гьаъаси, себыр гьаъаси Гьанийхда, Гьанийыы ту лаъаси, 33гъивхьиси Гьанийс, хьели йикье гьаъаси. Амма хьибыдхьусды йыгъа Гьа сыраа лухъузаси.
34Гьабыр амма Гьанийды чӀилмыхьде гедкьырдиш. Гьанийды чӀилмыд натыдже гьабишис ачых виширдиш, шивди ГьӀасара гьухьуд, – гьабыр гедкьырдиш.
ГьӀасара быркьӀыд хъаъара
35ГьӀаса Иерусалимдиди лийкьад гедеэне, рыкъӀыде са быркьӀ гий, кирхьара ад. 36Бейдаа хьуъ илсанашды кӀабал виъид ун йишир, гьанийе хулкара, шивди гьыъыр ад. 37Гьанийде рухьура: «Гьа бейдаа хьуъ йиъид Назарый ГьӀаса йиъи» хьур. 38Гьа лал ваъара кугъӀуре:
– ГьӀаса, Давыдды дух, захда язухъ гьаъ!
39Хьура гидбыр гьа гиихье гьаъас чалыш дишинире, руъурдиш. Тиние маабыйды гъигъене рухьура:
– Давыдды дух, захда язухъ гьаъ!
40ГьӀасара, лузур, быркьӀыд бегеде сес ваъара. Бегеде йиркьыйне, ГьӀасара хулкара быркьӀадаа:
41– Шиви За вы бадаана гьыъыр йигад? Вас шиви йигад?
– Илагьи, маа гьагус! – рухьура тиние.
42– Вас гьагуси маа! Вас выды инаамишваӀликлаа куьмег йишир а, – рухьура ГьӀасара.
43БыркьӀынийис гьади мадана гьахъабгура, хьели гьа ки ГьӀасад джыбра хъуна руъура, Йинчихьде шукур ваъара. Гьа гвалах гьувгуд сиенебише Йинчихьде шукур ваъара, Гьанийды гьӀайбатаа гьӀаламат гьаъара.
Цяпер абрана:
Лукара йибкьыд Шадды Хабар 18: RUT
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© Библие мадды чӀилмыы хъывгад Институтара, 2004