Hechos 11
11
Pedro tsi' pejca xñopt'añob ya' ti Jerusalén
1Jiñi apóstolob yic'ot jiñi hermañujob año' bʌ ti Judea tsi' yu'biyob cha'añ jiñi gentilob tsa'ix i ñopoyob i t'añ Dios ja'el. 2Che' bʌ tsa' sujti Pedro ti Jerusalén, jiñi woli bʌ i ñopob tsep pʌchʌlel tsi' tsʌts bʌ pejcayob Pedro, 3tsi' su'beyob:
—¿Chucoch tsa' ochiyet ti' yotot wiñicob mach bʌ tsepbilobic i pʌchʌlel yic'ot chucoch tsa' c'uxu waj yic'otob?#11.3 Mi tic'bilob judíojob mi' yochelob ti yotot gentilob (Hch 10.28), ñumen tic'bil cha'añ mi' tem c'uxob waj yic'otob, come ti' tojlel gentilob ma'añic chuqui tic'bil cha'añ i bʌlob i ñʌc' (Hch 10.14).
4Jiñi cha'añ Pedro quepecña tsa' caji i su'b chuqui tac tsa' ujti, tsi' yʌlʌ:
5—Che' bʌ ya'añon ti tejclum i c'aba' Jope che' wolic pejcan Dios, añ chuqui tsa' q'uele tic ñajal lajal che' bajche' colem pisil cʌchbil bʌ ti' chʌmp'ejlel i xujc, tsa' ju'bi tilel ti panchan, tsa' c'oti ya' ba'añon. 6Che' bʌ tsa' c wen q'uele, ya'añ alʌc'ʌl, yic'ot jontol tac bʌ bʌte'el, lucum yic'ot te'lemut mu' bʌ ti wejlel. 7Tsa' cu'bi t'añ, tsa' bʌ i su'beyon: “Ch'ojyen, Pedro; tsʌnsan, c'uxu.” 8Tsa' c su'be: “C Yum, ma'añic, come ma'añic ba' ora tsa' wis ochi ti quej chuqui tac tic'bil yic'ot chuqui tac bi'bi'.” 9Jiñi cha'añ Dios tsi' jac'beyon ti' cha'yajlel: “Chuqui tac tsa'ix i sʌc-esa Dios mach yomic ma' ts'a'len.” 10Uxyajl tsa' c'oti jiñi t'añ tic tojlel, ti wi'il tsa' cha' chujqui letsel ti panchan ti pejtelel. 11Awilan, tsa' bʌc' tiliyob uxtiquil wiñicob, chocbilo' bʌ tilel c'ʌlʌl ti Cesarea, tsa' c'otiyob ti jiñi otot ba'añon. 12Jiñi Espíritu tsi' su'beyon cha'añ ma'añic mic bʌc'ñan majlel yic'otob. Che' ja'el tsa' majliyob wʌctiquil hermañujob quic'ot. Tsa' ochiyon lojon ti' yotot Cornelio. 13Tsi' su'beyon lojon che' bajche' tsi' q'uele juntiquil ángel wa'al ti yotot. Jiñi ángel tsi' su'be: “Choco majlel wiñicob ti Jope, cha'añ mi' pʌy tilel Simón, jiñi am bʌ i cha'chajplel i c'aba' ti Pedro, 14jiñi mi caj i su'beñet wen t'añ cha'añ mi la' taj la' coltʌntel, jatet yic'ot pejtelel año' bʌ ti a wotot.”#11.14 Q'uele Hch 16.15,31; jiñi año' bʌ ti yotot jiñobʌch ja'el jiñi x'e'telob. 15Che' bʌ tsa' cajiyon ti t'añ, tsa' aq'uentiyob Ch'ujul bʌ Espíritu ja'el, che' bajche' tsa' aq'uentiyonla ti ñaxan.#11.15 Ti ñaxan: Jiñʌch che' ti q'uiñilel Pentecostés (Hch 2.2-4). 16Che' jiñi tsa' c'ajtiyi c cha'añ i t'añ lac Yum tsa' bʌ i yʌlʌ: “Isujm, Juan tsi' yʌq'ueyetla ch'ʌmja' ti ja', pero jatetla mi caj la' wʌq'uentel la' ch'ʌm Ch'ujul bʌ Espíritu.”#Hch 1.5 17Mi Dios tsi' yʌq'ueyob i majtañ che' bajche' tsi' yʌq'ueyonla che' bʌ tsa' lac jac'be i t'añ lac Yum Jesucristo, ¿majquiyon cha'añ mic tiq'ue Dios?
18Che' bʌ tsi' yu'bibeyob i t'añ, ñʌch'ʌl tsa' cʌleyob, tsi' su'buyob i ñuclel Dios, tsi' yʌlʌyob:
—Dios tsa'ix i yʌq'ueyob gentilob ja'el i cʌyob i mul cha'añ mi' tajob i cuxtʌlel.
Xñopt'añob ya' ti Antioquía
19Che' bʌ tsa' chʌmi Esteban tsa' tejchi ca'bʌl i tic'lʌntel xñopt'añob. Jiñi wiñicob x'ixicob tsa' bʌ pam pujquiyob cha'añ i tic'lʌntelob; tsa' majliyob c'ʌlʌl ti Fenicia, ti Chipre yic'ot ti Antioquía.#11.19 Antioquía: Jiñʌch ñuc bʌ tejclum am bʌ ti' wenta Siria yic'ot jiñʌch i yuxp'ejlel ñuc bʌ tejclum am bʌ ti' wenta Roma (yañʌch bʌ jiñi Antioquía ti Pisidia mu' bʌ i tajtʌl ti Hch 13.14-52). Che' bʌ wolix i c'otel jiñi wen t'añ ti Antioquía, jiñʌch yom mi' yʌl cha'añ wolix i yochelob ba' ma'añic mi' ñopob Dios (Hch 1.8), isujm ya'ʌch añob ja'el ca'bʌl judíojob ya'i. Jiñi jach judíojob tsa' su'bentiyob jiñi wen t'añ. 20Pero ya'añ ja'el wiñicob ch'oyolo' bʌ ti Chipre, yic'ot ti Cirene, che' bʌ tsa' ochiyob ti Antioquía tsi' pejcayob griegojob ja'el, tsi' su'buyob jiñi wen t'añ cha'añ lac Yum Jesús. 21Añ i p'ʌtʌlel lac Yum yic'otob, wen ca'bʌl tsi' sutq'uiyob i bʌ cha'añ mi' ñopob lac Yum.
22Jiñi xñopt'añob mu' bʌ i tempañob i bʌ ti Jerusalén tsi' yu'biyob chuqui tac tsa' ujti; tsi' chocoyob majlel Bernabé#11.22 Bernabé: Ch'oyolʌch ti Chipre (Hch 4.36); jiñi versículo 20, mi' yʌl cha'añ añ xñopt'añob ch'oyolo' bʌ ti Chipre tsa' c'otiyob ti Antioquía cha'añ mi' su'bob jiñi wen t'añ. c'ʌlʌl ti Antioquía. 23Che' bʌ tsa' c'oti Bernabé#11.23 Bernabé: añ isujmlel ti lac t'añ: Mu' bʌ i xic'beñonla o mu' bʌ i ñuq'uesan lac pusic'al; q'uele Hch 4.36. ya' ti Antioquía, tijicña i pusic'al come tsi' q'uele añob ti' yutslel i pusic'al Dios. Tsi' xic'beyob ti pejtelelob cha'añ mi' chʌn ñopob lac Yum ti' xuc'tʌlel i pusic'al. 24Uts'at i pusic'al Bernabé, but'ul ti Ch'ujul bʌ Espíritu, ñopol i cha'añ i t'añ Dios ti jump'ejl i pusic'al. Ca'bʌl wiñicob x'ixicob tsi' ñopoyob lac Yum.#Hch 6.5
25Ti wi'il tsa' majli Bernabé ti Tarso cha'añ mi' sʌclan Saulo, [che' bʌ tsi' taja, tsi' pʌyʌ majlel ti Antioquía.]#11.25 Ili t'añ ma'añic ti yan tac bʌ Biblia: Che' bʌ tsi' taja, tsi' pʌyʌ majlel ti Antioquía. 26Jump'ejl ja'b tsa' tem ajñiyob ya'i yic'ot jiñi xñopt'añob mu' bʌ i tempañob i bʌ, tsi' cʌntesayob ca'bʌl wiñicob x'ixicob. Ya' ti Antioquía tsa' tejchi ti pejcʌntelob ti cristiano#11.26 Cristiano: Che'ʌch tsa' caji ti su'bentelob jiñi tsa' bʌ i tsajcayob Cristo: Hch 26.28 yic'ot 1 P 4.16. jiñi xñopt'añob.
27Ti jiñi bʌ q'uiñ, x'alt'añob#11.27 X'alt'añob: Q'uele 1 Cor 14.1; Hch 13.1; 15.32; 1 Cor 12.28; Ef 2.20; 3.5; 4.11; Ap 22.9. ch'oyolo' bʌ ti Jerusalén tsa' cajiyob ti ju'bel majlel ti Antioquía. 28Tsa' wa'le juntiquil i c'aba' Agabo.#Hch 21.10 Ti' p'ʌtʌlel jiñi Espíritu tsi' su'beyob tal wi'ñal ti pejtelel pañimil; jiñi wi'ñal tsa' caji che' woli ti yumʌntel Claudio.#11.28 Claudio: Jiñʌch yumʌl ti Roma che' ti ja'bil 41 c'ʌlʌl ti ja'bil 54 che' tilemix Cristo. Che' ti' yumʌntel Claudio tsa' tili wi'ñal, che' ti ja'bil 46 che' tilemix Cristo, tsa'ʌch i wen u'biyob wocol jiñi año' bʌ ti Judea, (Hch 18.2) 29Jiñi cha'añ, jiñi xñopt'añob tsi' ña'ta i chocbeñob majlel i coltʌntel jiñi hermañujob año' bʌ ti Judea che' bajche' c'amel mi mejlel i yʌc'ob ti jujuntiquil. 30Che'ʌch tsi' meleyob, tsi' chocoyob majlel ti' c'ʌb Bernabé yic'ot Saulo cha'añ mi' yʌq'ueñob jiñi ancianojob.#11.30 Ancianojob: Jiñobʌch año' bʌ i ye'tel ti tojlel xñopt'añob, ti griego (presbyteroi). Q'uele ja'el Gl 2.1-10; Hch 15.1-29.
Цяпер абрана:
Hechos 11: NTCH
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Biblia de Estudio en Ch´ol de Tumbalá, Chiapas, México © Sociedad Bíblica de México A.C. Active Translation in Process