Luka 14
14
UYesu iinaniya mu kigono ikya Sabato
1Ikigono kimwinga kya Sabato, uYesu aaheliye kuliya ikyakuliya ku nyumba ya mukomi yumwinga va Vafwalisayo. Pe ali umo, aVafwalisayo na vangi vamuvandaga valole lwe ahadza iilima mu kigono ikyo.
2Pawutalo pa Yesu, aali pwali umwadaada yumwinga, ye aali nu wutamwa wa kutuna umuvili. 3Neke uYesu avawuudzage aVafwalisayo na vawulanidzi va milagililwe atigilage, “Ongo, lwikwidikwa ukunaniya avaanu mu kigono ikya Sabato?” 4Aveene viidzikaga dzidzidzi. UYesu akumupamyaga umutamwa uyo, akumunaniyaga, akumutawulaga ahelelage ukwawo.
5Kangi uYesu akuvawuudzaga iitigilaga, “Ye ani umwenyo, umunya muswamuve apangi isenga yaakwe, ngana yígwiliye mu kisima pa kigono ikya Sabato, baaho na baaho asilopola mu kigono ikyo?” 6Avaanu avo, vaali vangaya kya kulonga.
Ukwileevedza nu wusandzi
7UYesu avalolile avagendzi avaalaaliikwe, kye vaahaagulaga uwiikalo wa wutambule. Neke avalongelage ikihwananidzo atigilage, 8“Umuunu pe akukulaalika ku noolane, utanage ukwikala uwiikalo wa wutambule. Apangi álaaliikwe umutambule uyungi ye ákulutiye uveeve. 9Pe iikwadza ye ávalaaliike unyeenye vonda, ahadza akukulongela iitigila, ‘Umuhegele uyu apo pe wíikalile.’ Apo, uhadza wiiwona nyoni mbandu, pe wiihelela ku wiikalo wa kumbele.
10“Neke kangi pe úlaaliikwe, ufikilage ku wiikalo wa kumbele, ukuta pe iikwadza ye ákulaaliike, akulongele ukutigila, ‘Veya mudzeela vangu! Waadze wiikale apoono pa wuginalifu apa.’ Apo pe peene pe uhadza wiiginikwa pa miiho ga vonda ávalaaliikwe. 11Umuunu ye avedzaga ye akwiyinula, uNguluvi akumwisa. Neke kangi umuunu ye akwiyisa, uNguluvi akumwinula.”
12Apo, uYesu akumulongelaga ye ámulaaliike iitigilaga, “Pe wiilaalika avaanu ku kyakuliya kya pa muunyi, apangi kya pa kyamihe, utanage ukuvalaalika avadzeela vaako, enewuli avanyangʼolo vaako, enewuli va mu nyumba na ávafudiingʼiine avamosi, ukuta navo vaali vakulaalike vakuhombe lwe wavalimiye. 13Neke kangi pe wiigelanidza ulukeelanilo, uvakemeelage avahangala, avatenda imivili, avakitagenda na vabofu. 14Apo wiivedza nu lufuunyo, pakuva avo vangaya kiinu kya kukuhomba. UNguluvi alakuhomba, pe alavadzulubusa avagolofu.”
Ulukeelanilo lukomi
(Matayo 22:1-10)
15Pe vaali mu lukeelanilo, umulaalikwa yumwinga aaviye ápuliike amadzwi ga Yesu, akumulongelaga iitigilaga, “Ali kitendileme, umuunu ye alaaliya ku lukeelanilo ku wutwa wa Nguluvi!” 16UYesu akumuhigaga mu kihwananidzo iitigilaga, “Aali kwali umuunu yumwinga, ye aagelaniidze ulukeelanilo lukomi, akuvalaalikaga avaanu voloofu. 17Umusika gwa lukeelanilo gwaviye gúfikile, iitumaga umulimila-vangi vaakwe ku valaalikwa, ukuta akavalongele ukutigila, ‘Mwadzage, ifiinu fyonda fígelaniidzwe!’
18“Neke kangi vonda avaalaaliikwe vatigilage, vasiihelela. Uva kutala iitigilaga, ‘Ndígulile umugunda, ndífumbaniilwe ukuhelela kulola. Lino uumyanile, sindaadza.’ 19Uva kavili iitigilaga, ‘Ndígulile amakambako likyumi limwinga (10) ga kulimila, ndiihelela ukugagela. Uumyanile, sindaadza.’ 20Uva kadatu iitigilaga, ‘Ndíhumile ukutoola umudala, pa ulo sindaadza.’
21“Umulimila-vangi uyo iipilukaga, akumulongelaga umutwa dzonda. Neke umutwa uyo aviipage, amulongelage umulimila-vangi vaakwe atigilage, ‘Uhelelage kisaatu ku ngʼaasi na mu fikuya fya ndzenge, ukavaleete apa avahangala, avakitagenda, avabofu na vatenda imivili.’
22“Pambele umulimila-vangi uyo iipilukaga, akumulongelaga iitigilaga, ‘Mutwave, lwe ukaalagiidze lula ndílimile. Neke kangi uwiikalo waave.’
23“Umutwa akumulongelaga iitigilaga, ‘Lino! Uhelelage mu makaasi na mu migunda ukavagagiilidze, avaanu vaadze mu nyumba yangu, ukuta yimeme. 24Apo, ndikuvalongela unyeenye ukutigila, ve ndikavalaaliike avo, nambe yumwinga asilaaliya ifya lukeelanilo lwe ndígelaniidze uneene!’ ”
Uwutalamu wa kumuniniila uYesu
(Matayo 10:37-38)
25Ililugu likomi lya vaanu lyagendaga pamwinga nu Yesu. Neke umwene aliseedukilage, alilongelage atigilage, 26“Umuunu ye avedzaga ye iisaka ukuuniniila, aandzendage ukulutila ukumwenda udaadiye, ungʼina, umudala vaakwe, avaana vaakwe, avamaamiye, avanungʼuve na vahaadzave. Kangi aandzendage ukulutila uwuumi waakwe. 27Umuunu ye avedzaga ye asiitegula ikipindulihidzo kyakwe#Luka 9:23 nu kuuniniila, uyo iilemwa ukuvedza munyigendwa vangu.
28“Ye ani umwenyo pe iisaka ukudzenga umunaala ye asiitala tandi avalile uwutalamu wa kudzengela, nu kwiwuudza ngana ali na magoobeli agiikwila ukumaliidza? 29Ngana atane ukulima ewo, pe iivedza ádzengile uwaalo, iilemwa ukumaliidza indzengo yonda. Apo avaheleli-ngʼaasi vonda vahadza vakumuyeyewusa, 30viitigila, ‘Umuunu uyu aavangile ukudzenga, kangi álemiilwe ukumaliidza!’
31“Ndilonge ikihwananidzo ikingi ukutigila, ngana umutwa yumwinga umunya vahoma-magoha mbilima likyumi limwinga (10,000), pe iisaka ukuhelela ukumwaluka umutwa uyungi, asiitala iiwuudze tandi nde akumudwedza umutwa muyagwe, umunya vahoma-magoha mbilima makyumi gavili (20,000)? 32Ngana awone ukutigila iilemwa, apo akuvatuma kisaatu avaanu vahelele kwa mutwa uyungi pe ali kutaali, ukuta viiteepule.
33“Luli ewo na yuunye, sikwali nambe muunu yumwinga umwenyo ye iivagila ukuvedza munyigendwa vangu, ngana asikufileka fyonda fye ali nafyo.
Avanyigendwa va Yesu vavedzage ngita muunyo umunofu
(Matayo 5:13; Maluko 9:50)
34“Umuunyo munofu pa kukola mu kyakuliya. Ngana gúhuukile, gwisopwa kiki, ukuta gunoge kangi? 35Umuunyo ngita ugo, sigwinogela mu muganga, nambe kuhandza ni buuli, ugo viitaaga hela. Ye ali na masiikidza agiipulika, apulikage!”
Цяпер абрана:
Luka 14: BEZ
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© 2022 Wycliffe Bible Translators, Inc. All rights reserved.