Bisalu Bibilumbi 15
15
Yibenguna o Jerusalem
1Babaala bamosi abamarugasana o Judee banotola o Antioche bamalonsa baana baTaji rie: Pa dugorebu nana mugaga uMoise uirumi dugorungula ugobulu. 2Paul na Barnabas bamatsunda nogu na mangolu kabogu bamatabula diambu yiri Paul na Barnabas na bisi Antioche basusu bowenda o Jerusalem uyevosa diambu na bilumbi na bivunda.
3Kabogu dibundu dimabaganina. Bamavioyila o Phenicie te no Samarie uyenatsingulanga nana jogu abagaa baJuif bamakalulila diela. Baana bataji banogulu musamu eni bamalaba nsangu. 4Banotola o Jerusalem, bamadilu na bisi dibundu na bilumbi na bivunda; bamatubula motsu ama Nsambi amabavayila. 5Mbana baJuif bamosi abamaba baPharisie abamagobulu, bamarelama noruma rie: Abagaa baJuif barebu wandi udugusu mugaga uMoise.
6Bilumbi na bivunda bamagukama ukelula diambu dieni. 7Banotsundanga, Pierre amarelama nobatsingula rie: Baana bataji duijabi yiri ubanda va kala Nsambi amansola yiri abagaa baJuif bogulu Musamu Uboti yiri bomuvayila yitu. 8Nsambi oyijabi batu amalasa yiri bavu bawelimina ava amabaveyila Yinyunyi yiandi munongu mosi nana amatuveyila. 9Asamavaga dupasu va gari jetu nogu; amabatandila masumu mogu ava bamamuvayila yitu. 10Kabogu mu mbari yi duimangili Nsambi namunyi ulasa badukitsi maguga ama jetu na bataji betu tusamarungula uwanla? Disawelimina! 11Tumamuvayila yitu na tumagobulu mu diambu dimaboti maFumu Jesus, munongu mosi nana jogu bamagobululu.
12Ava Barnabas na Paul bamavosilanga mu diambu dibimaga biotsu na bilimba abi Nsambi amavayila abasamaba baJuif dibuli diotsu dimaba sui. 13Banomana utubula motsu, Jacques amavosa rie: Jenu baana bataji kululuanu! 14Simon abanovosa nana Nsambi amalasila durondu duandi ombu abagaa baJuif ava amasolila bamosi va gari ogu muba abandi. 15Mbigulu jimubiyitsi jidiwarisi mu mbari mu Bisonu bisonugu rie:
16Adina dinovioga nyumueruga
na nyumuereliga ndagu David ajimaberuga,
nyugukiga bivongu abimapansiga
na nyumuejirungulila.
17Mbana bansialutsu boromba Fumu
na malongu motsu ama nyimanengila
bomuromba wandi.
18Anana Fumu omajabisa mambu meni amamavosila kala.
19Mbana Jacques amabuela rie: La dibandu nyina nsala yiri bagolasa abagaa baJuif abekaluli diela maguga. 20Uviolila ubueji yiri tubasonina ubatsingula rie: Duyaji biguji abimavagulu ombu bakosi, bivu muinsi; Duyamuevaga bumbembu; duyamueji bibulu abamasuekugu nesi malungu mabibulu. 21Mu mbari ubanda na kala batu belonsi migaga miMoise mu misiengi miotsu na bemirangi tsona tsiotsu mu Mandagu maBibenguna.
Muganda umatindu ombu abagaa baJuif abavu na yitu
22Dimaba rie: Bilumbi na bivunda na bisi dibundu bamatabula diambu usindiga batu ulinga na Paul na Barnabas ava bamagabuyila o Antioche. Bamasola Jude apnengulungu Barsabbas na Silas, babaala abamagobusu na bisi dibundu. 23Bamatinda muganda egugu nogu:
Jetu bilumbi na bivunda diwendi rie: jetu baana bataji benu, tuidutindili mamboiu, jenu baana bataji abagaa baJuif abetsani o Antioche na Syrie nesi o Cilicie. 24Tumagulu yiri babaala betu bamosi bamadupupisa mirima na posulu tsiogu. Jabanu yiri tusamabaruma udivaga. 25La dibandu tumasolila batu bebaba usindiga ombu genu. Jogu boruga va mosi na Barnabas na Paul 26abavu bambatsi betu abamabufuila mu yisalu yiFumu etu Jesus Christ. 27Kabogu aboruga Jude na Silas; bodusupulila ama tuisoni mu muganda egugu. 28Kabogu adivu diwelimina ombu Yinyunyi yiNsambi divu diwelimina ombu getu wandi. Tugerondi udubuesa puela mambu kabogu kelisanu migaga miemimi: 29Duyaji biguji abimavagulu ombu bakosi. Duyaji malungu. Duyaji bibulu biotsu abimasuekugu. Duyavaga bumbembu. Pa duikelisi miotsu mina duvu duwelimina. Kangualianu!
30Kabogu banoganina bisi dibundu bamawenda o Antioche. Banotola guna bamagukiga bisi dibundu na bamabavega muganda. 31Abamadila muganda eni bamalaba nsangu mu mbari umabawarisa. 32Jude na Silas abamaba babiyitsi, bamabawarisa na mambu mapuela. 33Banomana temu ogu vana baana bataji bamabagabila miula na bamabagabusa ombu jogu abamabasindiga. [ 34Yika Silas amaronda usiala.]
35Paul na Barnabas va mosi na basusu bamayenalonsanga Mbembu Fumu.
Paul na Barnabas ukakana bekakini
36Mua bilumbu binovioga Paul amatsingula Barnabas rie: Tʼwendi tulingula baana bataji o misiengi miotsu ami tumalesamuna Mbembu Fumu ulaba nana betsanini. 37Barnabas amaronda ubega Jean Marc nogu; 38tumba Paul amabusa mu mbari ava bamabila o Pamphylie amatsana na asamamueronda umanisila yisalu yiogu. 39Bamaba na mutsundu uneni; la dibandu bamakakinina. Barnabas amabonga Marc, bamayenawenda o nyingi jiChypre. 40Paul amasola Silas, mbana bamawakusu na baana bataji ombu Fumu. 41Jandi amalinga o Syrie na Cilicie uyenawarisanga mabundu.
Цяпер абрана:
Bisalu Bibilumbi 15: PUU1992
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
La sainte Bible en langue Yipunu © Alliance Biblique du Cameroun, 1992.