Bisalu Bibilumbi 16
16
Timothee amawenda na Paul na Silas
1Paul amatola o Derbe na Lystre. Mudukitsi, diina diandi Timothee amatsananga guna; nguji andi amaba muJuif agumavayila Fumu yitu tumba taji andi amaba Grec. 2Baana balaji baLystre na baIconium bamamusingisila bumbeji buboti. 3Paul amaronda yiri Timothee owenda nogu kabogu mu diambu dibaJuif abamaba va mbura eni amamureba mu mbari botsu bamajabanga yiri taji andi amaba Grec. 4Bamayenalonsanga te na misiengi miotsu na bamalubusa baana bataji ukelisa migaga amimatabulu na bilumbi na bivunda o Jerusalem. 5Yitu yibisi dibundu yimafunanga na bamabuesungu basusu yilumbu na yilumbu.
O Troas Paul amalaba yiriariamu
6Bamalinganga te no yiari yiPhrygie na Galatie; Yinyunyi yiNsambi asamagaru yiri bolonsa o yiari yiAsie. 7Ava bamatolila o mandilu maMysie bamaronda uwenda o yiari yiBithynie tumba Yinyunyi yiJesus asamagaru. 8Kabogu bamavioga kuasa na bamatola o Troas. 9Ava mukolu Paul amalaba yiriariamu: muisi Macedoine amalabana nandi na amavosa nandi rie: Ruga o Macedoine utuwamusa! 10Vana vana tumakunsama uwenda o Macedoine mu mbari tumalaba yiri Nsambi atsitunengila usamuna Musamu Uboti guna.
O Philippes, Lydie amavayila Fumu yitu
11Tunogusuga o Troas, tumatunga dikuku uwenda sungingi o Samothrace na ava kedi tumatola o Neapolis. 12Tumarambuga vana uwenda o Philippes, musiengi utega udivula diMacedoine na musiengi agumarumu na bisi Rome. Avana tumasilama mua bilumbu. 13Yilumbu yitsona tumapala o musiengi na tumawenda o mugula umujamba aguna tumatasa yiri guvu mbura jidusambu jibaJuif. Tumatsana na tumavosanga na bagetu abamaba bagukama. 14Umosi, diina diandi Lydie agumaba muisi Thyatire, jandi amaba musumbisiti umatsanda maboti mabenga na amasambilanga Nsambi. Amatugulu na Fumu amamuvega murima ugulu notsiyisa ama Paul amalonsa. 15Amabatusu na bisi ndagu andi wandi. Mbana amatunengila novosa rie: Pa duilabi yiri nyivu mudukitsi uFumu, ruganu o ndagu ami noyetsana.
Amatunengila na yisuebiri kabogu tumawenda.
O tsugu o Philippes
16Yilumbu yimosi ava tumawendila o mbura aji tuisambilili tumabenguna na muana mugetu. Amaba muviga agumaba na yinyunyi yibi ayimamuveganga mangolu uresa. 17Ava amaresilanga bafumu bandi bamadilanga mbongu tsipuela. Amatudukanga jetu botsu na Paul na amagamuganga rie: Babaala bebaba baji basalitsi baNsambi aguvu uneni! Bodutsingulanga nana durungulila ugobulu!
18Amadivosanga te na bilumbu bipuela te na Paul amatoga, amageluga novosa na yinyunyi yibi rie: Mu diina diJesus Christ nyigurumi rie: Pala! 19Vana vana yinyunyi yibi yimapala. Bafumu bandi banolaba yiri mangolu mandi uresanga mamasuka na yiri bogomuedila mbongu tsieni 20bamagaanga Paul na Silas na bamababega ombu bivunda. Bamavosa na bivunda rie: Babaala bebaba bekungisi musiengi etu. 21Belonsi bifu abigaa biwelimina na migaga mietu na jetu bisi Rome tugorungula uduka bifu biogu.
22Yinombu yimarelama utoga; bivunda bamavula Paul na Silas bikutu na bamaruma bagora ubadimba. 23Banomana ubadimba mikasa, bamaruma mukelisi tsugu ubabindiga tindi ubindiga. 24Mukelisi tsugu anodila diruma dieni amabakotisa o tsugu o yibuku ayigari, amabatunga bivangu mu makulu.
25Ava gari wisi, Paul na Silas bamasambilanga na bamawimbilanga nyimbu tsiNsambi na bisi tsugu bamabagulungu. 26Vana vana vamaba disisana dineni dibutamba; mu dionyi mabandu matsugu mamapansiga. Muna diweru dieni maguyi matsugu mamadibuga na bapanga babisi tsugu botsu bamatabuga. 27Mukelisi tsugu amarambuga na ava amalabila yiri maguyi mamadibuga amasomuna dijenga diandi na amaronda ukeboka, amatasa yiri bisi tsugu bamarina kala. 28Tumba Paul amagamuga na diufi dineni rie: Guyakeboka, jetu botsu tuji vava.
29Mbana mukelisi tsugu anovonda lambi amakota na masuasu na amakebuaga noregama va gusu Paul na Silas. 30Mbana amabapalisa na amabawivula rie: Kokolu tsienu, yi nyuvaga yiri nyugobulu? 31Paul na Silas bamagabusila rie: Vayila Fumu Jesus yitu na ndeʼ gugobulu na bisi ndagu agu wandi.
32Bamalonsa mambu maFumu ombu gandi nombu bisi ndagu andi wandi. 33Vana mukolu eni mukelisi tsugu amayesusa mapura mogu; mbana bamabatusu jogu na bisi ndagu andi botsu. 34Mukelisi tsugu anobabega o ndagu andi amabalambila biguji. Jogu na bisi ndagu andi bamalaba nsangu mu mbari bamavayila Nsambi yitu. 35Wisi unotebuga bivunda bamasindiga bagora ombu mukelisi tsugu umutsingula rie: Palisa babaala beni.
36Kabogu mukelisi tsugu amavosa na Paul rie: Bivunda batsitinda yilumbi yiri jenu na Silas dupala. Kabogu tsie palianu na wendanu na buranga.
37Tumba Paul amavosa na bagora rie: Bamatudimba mikasa va gusu batu botsu, jetu atuvu bisi Rome. Basamaletutabulila bunsonsi tumba bamatukotisa o tsugu. Namunyi botupalisa o musuega? Tsatsabi! 38Baruyi jogu beni uyitupalisa. Bagora bamabega mambu meni ombu bivunda abamaregama ava bamagululu yiri baji bisi Rome. 39Bivunda bamawenda mambangu ubalembiyila rie: Kokolu tsienu, palanu na gusuganu vava. 40Paul na Silas banopala o tsugu bamawenda o ndagu Lydie. Avana bamabenguna na baana bataji; bamabawarisa mbana bamabaganina.
Цяпер абрана:
Bisalu Bibilumbi 16: PUU1992
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
La sainte Bible en langue Yipunu © Alliance Biblique du Cameroun, 1992.