John 5
5
De hagaieiangi o dahi daane i gaogao de vai
1Hanu laangi i muli mai ne hai dahi daonga a de gau Ssuu i Jerusalem, gai Iesu ne hano aagena. 2Gai gaogao de Haitoga o denga Ssiibi i Jerusalem, e dahi vai iai, gai e hagaingoo ange i muna Aramaic bolo go Bethesda,#5.2 Bethesda: hanu beebaa Greek ange laa e hai ange Bethzatha. gai e lima velanda i kilaa. 3Gai e soa hagadaagangaa magi nogo daakodo i de mommee laa — go de gau dee kide, go de gau baagia, aama de gau balagelage. [Gilaadeu e tali de ngalungalue o de vai laa. 4Go hiidinga dahi dangada de langi e hano iho i hanu masavaa ga hai gi kai age lo te vai laa; gai be goai naa huu ne iho i mua gi lo te vai laa i dua de kai age, gai ia e ieiangi mai i de hagadaagangaa magi oona e magi ai laa.]#5.4 Hanu beebaa Greek ange laa e dee dagodo ai de gubu nei. 5Gai e dahi daane i kilaa gu matolu ma valu ono ngadau ne magi ai. 6De masavaa a Iesu ne gidee ai ia e dagodo i kilaa, ma de iloo bolo gu daulooloa dono magi, gai ia ga ssili ange gi de ia, “Koe e lodo gi ieiangi goe?”
7Taane magi laa ne hai ange, “Tangada aamua, e deai donu se dangada e balea mai au e iho gi lo te vai, i de masavaa e kai age ai. Gai ga hanadu naa au e iho gi lo te vai, gai dahi dangada gee gu iho ma gu hano i ogu mada i mua.”
8Gai Iesu ga hai ange gi de ia, “Hidi age sabaia doo moenga ga seesee ai ga hano.” 9De masavaa laa donu huu gai taane laa gu ieiangi, gai ia ga hidi age ga saabai dono moenga ga seesee ga hano.
Gai laangi ne hai ai mee laa go de laangi o Sabbath. 10Gai de gau Ssuu ne hai ange gi taane gu ieiangi laa, “Anailaa nei go Sabbath; gai e dee alaange dau saabai doo moenga.” #Neh 13.19; Jer 17.21
11Gai ia ga hai ange gi gilaadeu, “Go taane ne hagaieiangi ina dogu magi ne hai mai gi de au, ‘Sabaia doo moenga mage seesee hannoo.’ ”
12Gai gilaadeu ga ssili ange gi de ia, “Goai taane ne hai adu koe gi sabaia de mee naa gi seesee ai?”
13Aagai taane gu ieiangi laa e dee iloo e ia be goai taane laa, i hiidinga Iesu gu hano gi magavaa o dangada soa laa.
14Muli mai gai Iesu ne hedae ange gi taane laa i de temple, ga hai ange gi de ia, “Tilo, koe gu ahe ange ma gu ieiangi! Koe gi dee haisala kana kii ange de baubau mee e hai adu gi de goe.” 15Aagai taane laa ne hano ga tala ange gi de gau Ssuu bolo go Iesu ne hagaieiangi ina laa ia.
16Deenei de hiidinga a de gau Ssuu ne vaivai hai ai laa Iesu, go hiidinga ia ne hai mee nei i de laangi o Sabbath. 17Aagai Iesu ne hai ange gi gilaadeu, “Dogu damana e hai hegau ga dae mai ai gi iainei, gai au e hai hegau hogi.” 18Deelaa ai, de gau Ssuu ne hagammahi ai laa e ssala de hai e daa ai ia gi magau; i hiidinga ia tee oha donu huu de laangi o Sabbath, aagai ia ne hagadaba bolo de Maadua go dono Damana, ia ne hagahedae ange ia gi de Maadua.
Ssauaa o Tama
19Gai Iesu ga hai ange gi gilaadeu, “Ni muna abodonu, ni muna abodonu aagu e hai adu nei gi goodou, Tama e dee maua donu i de hai dahi mee i de ia donu huu, gai ia e hai donu huu ana mee e gidee Tamana e hai; go hiidinga be se aha naa huu a Tamana e hai, gai deelaa hogi de mee a Tama e hai. 20Go hiidinga Tamana e aloha i Tama, ma de hagaago ange gi de ia mee alodahi aana e hai. Ia e hagaago ange naa donu gi de ia mee e hagalele mouli ange i mee nei, gai gi llele ai oodou mouli. 21Gai e bei donu de hai a Tamana e hagamouli age ai laa de gau maakau, ga gaavange gi gilaadeu de mouli, gai e bei ai hogi, Tama e gaavange de mouli gi gilaadeu aana e lodo e vange aagena. 22Gai Tamana e dee hagamodu muna o dahi, aagai ia gu dugu ange Tama gi hagamodu ina muna o mee alodahi, 23gai gi odi ai dangada alodahi i de hagadubu Tama, bei delaadeu hagadubu Tamana. Tangada e dee hagadubulia Tama e dee hagadubu hogi Tamana ne haia laa gi humai Tama.
24Ni muna abodonu, ni muna abodonu aagu e hai adu nei gi goodou, tangada e hagalaangona agu agoago ga hagadonusia de ia ne haia nei au gi humai e maua donu de mouli e dee ngado mai. Ia e dee hagaduasala, aagai ia gu hagaui gee i de magau ma gu kave de mouli. 25Ni muna abodonu, ni muna abodonu aagu e hai adu nei gi goodou, gu dae mai donu de aoaa a de gau maakau e langona ai de leo o Tama Daane a de Maadua; gai gilaadeu alodahi e langona e mouli age naa. 26Go hiidinga de mouli go daho Tamana iai, deenei ai, ia gu hai hogi gi dagodo de mouli i daho Tama, 27ma ssauaa e hagamodu ai muna, i hiidinga go ia Tama a Tangada.
28Goodou gi dee lele oodou mouli i de mee nei; go hiidinga e dae mai naa de aoaa o de gau maakau alodahi i lodo daanunga e langona ai dono leo, 29gai gilaadeu ga hiihidi age ga ssao mai; gilaadeu ne haia tanuaa, e mouli age naa ga kave de mouli, gai gilaadeu ne haia de baubau, e mouli age naa ga kave de hagaduasala.#Dan 12.2
De tala hagadonu dagodo o Iesu
30“Au e dee maua i de hai dahi mee i de au donu huu; gai au e hagamodu muna bei dagu hai gu langona ai laa i daho Tamana. Agu hagamodu e heohi, go hiidinga au e dee hai donu huu ogu lodo, gai au e hai gi bei lodo o de ia ne haia nei au gi humai. 31Noo au e tala hagadonu donu huu ogu dagodo, gai agu muna e tala hagadonu e dee ni muna abodonu. 32Gai e Dahi ange e daalaa hagadonu ogu dagodo, gai au e iloo bolo ana muna e tala ai ogu dagodo ni muna abodonu.
33Goodou ne hai gi hulo hanu gi daho John, gai ia ne tala hagadonu adu gi goodou ogu dagodo i de muna abodonu.#John 1.19-27; 3.27-30 34Au e dee kave muna a dangada e tala; aagai au e tala muna nei gi hagamouli ai goodou. 35A John e bei de laama ula e hagamaalama ai laa, gai goodou ne malangilangi i dono maalama i dahi damaa masavaa.
36Gai e dahi mee e daalaa hagadonu ogu dagodo e kii ange i de tala hagadonu a John. Go hegau a dogu Damana ne gaamai au gi haia gi lava — go agu hegau donu e hai nei — mee nei e tala hagadonu bolo go Tamana ne haia nei au gi humai. 37Gai Tamana ne haia nei au gi humai gu tala hagadonu hogi ogu dagodo. Aagai tigi ai donu soodou langona dono leo, aabe gu gidee ono hoolinga,#Mat 3.17; Mark 1.11; Luke 3.22 38gai ana muna e dee daakodo i oodou lodo, go hiidinga goodou e dee hagadonusia de ia aana ne hai gi humai. 39Goodou e kana ange ma e dau de Beebaa Dabu, i hiidinga goodou e maanadu bolo go muna nei oodou e maua ai de mouli e dee ngado mai. Gai go muna nei donu e daalaa hagadonu ogu dagodo, 40aagai goodou e dee llodo e loomai gi de au gi maua ai e goodou de mouli.
41Au e dee anga ange gi de mahamaha mai i daho dangada. 42Gai au e iloo oodou dagodo, bolo e deai donu se aloha o de Maadua e dagodo i oodou lodo. 43Au ne humai i de ingoo o dogu Damana, gai goodou tee abodonu mai gi de au. Gai noo dahi dangada ange e humai i dono ingoo donu huu, gai goodou e abodonu ange naa gi de ia. 44Dee hee doodou hai e hagadonu ai, gai goodou e hagadau tuhi donu huu goodou, goodou e dee ssala donu huu de tuhi mai i daho de Maadua?
45Goodou aude hagataba bolo au e hagabaubau ange goodou gi Tamana; tangada e hagabaubau ina goodou go Moses, gai go ia oodou e tali hagalodolodo ange naa aagena. 46Noo goodou e hagadonusia Moses, gai goodou e hagadonusia hogi au, go hiidinga ia ne sisi ogu dagodo. 47Aagai noo goodou e dee hagadonusia ana muna gu lava i de sisi, gai dee hee ai naa doodou hai e hagadonu ai agu muna?”
Цяпер абрана:
John 5: DBD
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© 2022, Wycliffe Bible Translators, Inc. All rights reserved.