John 6
6
De haangai o de limamano
(Mat 14.13-21; Mark 6.30-44; Luke 9.10-17)
1Dua mee nei, gai Iesu ne hano gi de baasi gee de Vai o Galilee (e bei go Vai o Tiberias). 2Gai dangada soa mmao ne daudali ange i de ia ga hulo ai gi kilaa, i hiidinga gilaadeu ne gidee ana hagailonga ne hai ga hagaieiangi ai denga magi. 3Gai Iesu ga hanage i de mounga ga noho i dahi mommee i kilaa madali ana dangada agoago. 4De masavaa laa gai gu baa ange donu gi Taonga Hagasili a de gau Ssuu.
5Gai Iesu ga galo iho gu gidee e ia dangada soa mmao e loomai gi ono daha, gai ia ga hai ange gi a Philip, “Go hee adaadeu e hagao ai hanu pelaoaa e gaimee ai de gau soa nei?” 6Iesu ne ssili ange muna nei gi a Philip e tilo ai dagodo o dono gai. Gai ia gu iloo donu be ni aha aana gu hagatau e hai ai.
7Philip ne hai ange gi de ia, “De lualau denarius e dee dohu i de hagao ai hanu gai e dagi de momo ai dangada.”
8Gai Andrew, dahi ana dangada agoago, gai go taina daane o Simon Peter, ga hai ange gi de ia, 9“E dahi gauligi daane i kinei e lima ana duudangaa pelaoaa barley aama e lua mamu, gai dee hee de hai e hai ai gi dohu dangada soa i mee nei?”
10Iesu ne hai ange, “Haia dangada gi nnoho gi lalo.” Gai kilaa e lagolago helii e ssomo ai; gai dangada alodahi ga nnoho gi lalo, agu made se limamano dangada. 11Gai Iesu ga poo mai denga duudangaa pelaoaa, gai ga lava huu i dono dalodalo, gai ia ga duha ange gi dangada gu noho laa gi lalo. Ia ne duha ange hogi denga mamu, gai dangada ga gaimee ai gu boobosu.
12Gai ga boobosu huu dangada, gai ia ga hai ange gi ana dangada agoago, “Hagabudulia denga amuamu mee e doe, e dee tili donu dahi mee daudahi.” 13Gai gilaadeu ga hagabudu denga dibaa pelaoaa barley e doe i de gaimee ai o dangada ga hhao ai e madaangahulu ma lua gede.
14Gai ga gidee huu e dangada de hagailonga a Iesu ne hai laa, gai gilaadeu ga hagataba, “Ni muna abodonu, deenei donu de Pelaabisi gu tala laa bolo e humai gi henua i lalo!” 15Gai ga iloo huu e Iesu bolo dangada gu paba ange e loomai e hai gi de mahi ia, e hai ai delaadeu hodooligi, gai ia ga hagalilo ange hogi ga hanage sogosogo gi de mounga.
De seesee o Iesu i honga de vai
(Mat 14.22-33; Mark 6.45-52)
16Gai ga ahiahi huu de mee, gai ana dangada agoago ga loiho gi de vai, 17ga kage i de boose e aahe ai gi Capernaum i de baasi gee o de vai. Gai de masavaa ne boo ai de mee gai Iesu tigi dae mai donu gi olaadeu daha. 18Gai gu daamada hogi i de beabeau i hiidinga de kona de ssau de madangi. 19Gai de masavaa olaadeu ne gabegabe ga hulo, agu made gu dolu be gu haa maele#6.19 gu dolu be gu haa maele: de Beebaa Greek e hai ange e madalua ma lima aabe e matolu stadia. olaadeu ne hulo ai, gai gilaadeu gu gidee adu Iesu e seesee mai i honga de vai, gai ia gu hagadagadaga ange donu de baa mai gi delaadeu boose. Gai gilaadeu gu maatagu mmao. 20Gai ia ga hai ange gi gilaadeu, “Go au deenei, goodou gi dee maatagu!” 21Deelaa ai, gilaadeu gu malangilangi ga hakage mai ia gi lo te boose, gai gu moolau donu de dau de boose i de henua olaadeu e hulo laa aagena.
De ssala a dangada Iesu
22De laangi i ono dua, gai dangada soa e doe laa i de baasi gee de vai ne gidee bolo e dahi donu huu boose nogo i kilaa, gai Iesu tee hano i de boose o ana dangada agoago ne hulo ai laa, go ana dangada agoago donu huu ne hulo ai. 23Gai hanu boose mai i Tiberias ne loomai laa gaogao de mommee a dangada ne gai ai pelaoaa i dua de hagaahe ange a Tagi Maolunga de abodonu. 24Gai ga gidee huu e dangada bolo Iesu ma ana dangada agoago e dee maleva i kilaa, gai gilaadeu ga kage i denga boose ange laa ga hulo ai gi Capernaum e ssala ai Iesu.
Iesu go de pelaoaa o de mouli
25De masavaa a dangada ne gidee ai ia i de baasi laa o de vai, gai gilaadeu ga ssili ange gi de ia, “Tangada Agoago, go ana hee oou ne humai ai naa gi kinei?”
26Iesu ne hai ange gi gilaadeu, “Ni muna abodonu, ni muna abodonu aagu e hai adu nei gi goodou, goodou tee ssala au i hiidinga goodou gu gidee hanu hagailonga, aagai goodou ne ssala au i hiidinga goodou ne boobosu i de gai pelaoaa. 27Goodou aude hai hegau ange gi gai e odi laa, aagai hai hegau ange gi gai e daakodo ange laa gi de mouli e dee ngado mai, go gai a Tama a Tangada e gaavadu gi goodou, i hiidinga Tamana go de Maadua gu lava donu i de hagailonga ia.”
28Gai dangada ne ssili ange gi de ia, “Ni aha amaadeu e hai, gai gimaadeu ga hai hegau a de Maadua?”
29Iesu ne hai ange gi gilaadeu, “Aanei hegau a de Maadua: goodou hagadonusia de ia aana gu hai gi humai.”
30Gai gilaadeu ne ssili ange hogi gi Iesu, “Ni hagailonga bee hee aau e hagaago mai gi hagadonusia ai e gimaadeu goe? Ni aha naa aau e mau i de hai? 31Omaadeu damana madagidagi ne gai manna i lodo henua, bei de hai gu sisi ai laa, ‘Ia ne gaavange gi gilaadeu hanu pelaoaa mai i de langi.’ ” #Exo 16.4, 15; Psa 78.24
32Iesu ne hai ange gi gilaadeu, “Ni muna abodonu, ni muna abodonu aagu e hai adu nei gi goodou, e dee go Moses ne gaavadu gi goodou de pelaoaa mai i de langi, gai dogu Damana e gaavadu gi goodou de pelaoaa abodonu mai i de langi. 33Gai de pelaoaa a de Maadua go de ia ne hano iho mai i de langi, gai ia e gaavange de mouli gi henua i lalo.”
34Gai gilaadeu ga hai ange gi de ia, “Tangada aamua, gaamai gi gimaadeu de pelaoaa naa i laangi alodahi.”
35Iesu ne hai ange gi gilaadeu, “Go au de pelaoaa o de mouli; tangada e humai gi de au e dee haihai donu ga hiigai, gai tangada e hagadonu au e dee haihai naa donu ga hieunu. 36Aagai e bei dagu hai gu tala adu ai gi goodou: goodou gu gidee au, aagai goodou e dee hagadonusia. 37Dangada alodahi a Tamana e gaamai gi de au e loomai naa donu gi de au; aagai au e dee haihai naa donu ga tili tangada e humai gi de au. 38Go hiidinga au tee hano iho i de langi e hai donu huu ogu mee e lodo ai, gai au ne hano iho e hai lodo o de ia ne haia nei au gi humai. 39Gai deenei de mee o de ia ne haia nei au gi humai e lodo ai, au gi dee dilia dahi gilaadeu aana gu gaamai gi de au, aagai gi hagamouli ina age gilaadeu i de laangi hagaodi. 40Gai deenei de mee o dogu Damana e lodo ai, tangada e gidee Tama ga hagadonusia ia e maua de mouli e dee ngado mai; gai au e hagamouli age naa ia i de laangi hagaodi.”
41Gai de gau Ssuu ga nnanu i de ia, go hiidinga ia ne hagadaba, “Go au de pelaoaa ne hano iho laa i de langi.” 42Gilaadeu ne hagataba, “E dee go Iesu tama daane a Joseph deenei, gai gidaadeu e iloo hogi be goai luoono maadua? Gai dee hee dana hai e hagadaba ai nei bolo ia ne hano iho laa i de langi?”
43Iesu ne hai ange gi gilaadeu, “Goodou aude nnanu i oodou magavaa. 44E deai donu se dangada daudahi e maua i de humai gi de au, noo Tamana ne haia au gi humai e dee haia ia gi humai gi de au, gai au ga hagamouli age ia i de laangi hagaodi. 45Gu sisi i lodo beebaa a denga pelaabisi, ‘Gilaadeu alodahi e agoago naa i daho de Maadua.’ Gai be goai gu langona ma de agoago i daho Tamana e humai gi de au.#Isa 54.13 46Tigi ai donu se dangada ne gidee e ia Tamana; go Tama donu huu ne humai laa i daho de Maadua, go ia gu gidee Tamana. 47Ni muna abodonu, ni muna abodonu aagu e hai adu nei gi goodou, tangada e hagadonusia gu kave donu de mouli e dee ngado mai. 48Go au donu de pelaoaa o de mouli. 49Oodou damana madagidagi ne gai manna i lodo henua, gai gilaadeu ne maakau. 50Gai au de pelaoaa ne hano iho laa mai i de langi, gai be goai e gaina de pelaoaa nei gai ia e dee magau. 51Go au de pelaoaa o de mouli ne hano iho mai i de langi; be goai e gaina de pelaoaa nei, gai ia e mouli ga hano ai. Gai de pelaoaa aagu e gaavange e hagamouli ai henua i lalo go dogu angaanga donu.”
52Gai de gau Ssuu ga daamada de hagadaumee ga hagataba, “Dee hee de hai a taane nei e gaamai dono angaanga gidaadeu gi gaina?”
53Iesu ne hai ange gi gilaadeu, “Ni muna abodonu, ni muna abodonu aagu e hai adu nei gi goodou, noo goodou e dee gai de angaanga o Tama a Tangada ma de unu ono dodo, aagai e deai se mouli i oodou daha. 54Be goai e gaina dogu angaanga ma de unu ogu dodo e dagodo donu de mouli e dee ngado mai i ono daha, gai au e hagamouli age naa ia i de laangi hagaodi. 55Go hiidinga dogu angaanga go gai abodonu, gai ogu dodo go mee unu abodonu. 56Be goai e gaina dogu angaanga ma de unu ogu dodo e noho donu i ogu lodo, gai au i ono lodo. 57Tamana e mouli laa ne hai au gi humai, gai au e mouli i hiidinga o Tamana, deenei ai, be goai e gaina dogu angaanga e mouli i ogu hiidinga. 58Go au de pelaoaa ne hano iho laa i de langi, gai e dee bei de pelaoaa a denga damana madagidagi ne gai laa, gai gilaadeu ne maakau. Gai be goai e gaina de pelaoaa nei e mouli ga hano ai.” 59Ia ne tala muna nei i lo te synagogue i dono masavaa ne agoago ai i Capernaum.
Muna o de mouli e dee ngado mai
60Gai ga langona huu e denga dangada agoago soa muna nei, gai gilaadeu ga hagataba, “Ni muna hai ngadaa aanei. Goai e maua i de kave?”
61Gai ga iloo huu e Iesu bolo ana dangada agoago soa e nnanu i dagodo o de mee nei, gai ia ga hai ange gi gilaadeu, “Goodou gu llodo baageaa naa i muna nei? 62Gai aahee naa oodou muna noo goodou e gidee Tama a Tangada e hanage gi de mommee oona nogo noho ai i mua? 63Go de Hagasaalunga ⌊Dabu⌋ e gaavange de mouli; de angaanga e deai ono haigamaiana. Muna aagu gu tala adu gi goodou go de Hagasaalunga ma de mouli. 64Aagai e hanu goodou e dee hagadonusia.” Gai Iesu gu iloo huu e ia mai i taamada age be goai gilaadeu e dee hagadonusia, gai goai e gaavange ia. 65Gai ia ga hai ange, “Aanei hiidinga aagu gu tala adu ai laa bolo e deai donu se dangada e maua i de humai gi de au noo Tamana e dee hai ia gi humai.”
66Dua de mee laa gai e soa ana dangada agoago gu aahe dua, gilaadeu gu dee daudali ange i de ia.
67Iesu ne ssili ange gi ana dangada agoago e dinoangahulu ma dogolua, “Goodou gu llodo naa hogi e hulo gee mai i ogu daha?”
68Simon Peter ne hai ange gi de ia, “Tagi Maolunga, gai go daho ai ange naa omaadeu e hulo aagena? Gai go oo daha iai muna o de mouli e dee ngado mai.#Mat 16.16; Mark 8.29; Luke 9.20 69Gimaadeu gu hagadonusia ma de iloo bolo go koe donu de Ia Dabu a de Maadua.”
70Iesu ne hai ange gi gilaadeu, “E aha, e dee go au ne hilia goodou, tinoangahulu ma dogolua? Gai dahi goodou se ia hagabaubau.” 71Gai ia e basa i dagodo o Judas, tama daane a Simon Iscariot, go dahi i magavaa o tinoangahulu ma dogolua, gai ia ne gaavange Iesu i muli mai.
Цяпер абрана:
John 6: DBD
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© 2022, Wycliffe Bible Translators, Inc. All rights reserved.