Luka 14
14
1Na yikayili kukita, apa akayingili pa nyumba ya yumonga wa wakulungu wa waFarisayo pa sabato alye nkate, wakayili mu kundolalela. 2Na lola, palongolo pa yombe akayili nunuyu wa machimanga. 3Nu Yesu pakahigiti akajowiti kwa wa torah na waFarisayo, kujowa, Iyitikalika ati kulamisa pa sabato, pangi nukuyitikalika? 4Koma wakatemi kinunu. Na akankamwili, akandamwisi, akampili mwanja. 5Na akajowiti kwa wombe, Nani wa mwenga lipunda lyake pangi ng’ombe wona igwili mu liwumba, nakwifuta lepa hino apa pa ligono lya sabato? 6Na wakahotwili lepa kuhiga kawili kwa aga.
7Na akawajowili wala wa kukemeleka ngongo, apa akawalalili umu wakihagulili pandu pa liginiko; kuwajowela wombe, 8Baha yaukemeleke nu nunuyu ku nduwusi, usitama pasi pandu pa liginiko; asiye baha kwali mundu yuakemaliki nuyombe wa liginiko kulutila wenga, 9na wona afika yula akakemili wenga na yombe, yatawile kwa wenga, Umpele uyu pandu; na pala yautumbule kukoseka lihamu pa kupata pandu pa kunyuma. 10Koma baha ukemaleka, ugende utame pasi pandu pa panyuma nyamhope; nausi baha afika yula akukemili wenga, atawile kwa wenga, Nkosi, hegelela panani: bahalapala yauye nu kukwisika pa miho ga woha wala watama pasi pakulya pamonga nu wenga. 11Pakukita ayi yoha uyu ikwesa mwene yaseleseke pasi; na yula iselesa mwene yakweseke.
12Leka akanjowili kawili yula ankemili, Baha ukita kyakulya kya musi pangi kya kimihi, usikemela wakosiwo, haka wanung’unawo, haka walongowo, haka wenesi wakafi; wasikukemelela nawo kawili, na yaupate kulipiwa. 13Koma baha ukita kyakulya, ukemele wagaju, wanya filema, wa kuchipila, wakukoyoka miho: 14ni yauye wa kusengwa; pakuya wayilepe ni kya kulipa: pakukita yakutauke kwako pa kusyuka kwa wa malinga.
15Leka pakayufwini aga yumonga wakutama nako pa kyakulya, akajowiti kwa yombe, Wa kusengwa yula yalye nkate pa utwa wa Mulungu. 16Leka akajowiti kwa yombe, Mundu nunuyu akakiti kyakulya kingi kya kimihi; ni akakemili wa mahele: 17ni akatumiti mbanda mundu saa ya kyakulya kya kimihi kuwatawila wala wakemaliki, Muhichaye; 18pakuya fyoha fiwikiki ngani. Na hino apa wakatumbwili woha kwa mwoyo umonga kugwala. Wa kutumbula akajowiti kwa yombe, Nihemili ngunda, nikikisiki kubita kuuwona: nikupembesa unilekelekese. 19Na yungi akajowiti, Nihemili mangoli‐ngoli mhano ga ng’ombe, na nibita kugagesa: nikupembesa unilekelekese. 20Na yungi akajowiti, Nituwili ndala, na kwa ndawa iyi nihotola lepa kuyicha. 21Nu mbanda yula akachiti, akankokosili bambo mundu ifi fyoha. Bahalapala mwene nyumba pa akadaditi, akajowiti kwa mbanda mundu, Pita manyata mu machengo ni mu ndila sya likaya, ni uwayingise kuni wagaju ni wanya filema ni wa kukoyoka miho ni wa kuchipila. 22Nu mbanda akajowiti, Bambo, yikitiki yila ukatawiki, ni pasigili pandu. 23Nu bambo akajowiti kwa mbanda, Pita mu makuya ni mu mipaka ya migunda, ni uwakikise wayingile, nausi nyumba yangu yimeme. 24Pakuya niwajowela, pa waka yumonga wa wala wakemaliki yalose kyakulya kyangu.
25Leka wakalongosini pamonga nuyombe mapuga makulungu: na apa akang’anamwiki, akajowiti kwa wombe, 26Wona mundu anichila, ni ambipila lepa dadi mundu, nu nyina, nu mhanu mundu, ni wana mundu, ni wanung’una, na walumbu mundu, ena, ni wumi wake mwene, ahotola lepa kuya mwanafunsi wangu. 27Yula nuyombe alema kuupinda msalaba wake mwene, ni kuhicha munyuma mwa nenga, ahotola lepa kuya mwanafunsi wangu. 28Pakuya nani wa mwenga, pakulonda kujenga mnala, nakutama pasi huti ni kuwalanga uhemesi wake, ngati kwali ayii nafyo fya kuyenela kumalakisa? 29Haka kwali pala ajenga fya pasi, na ahotola lepa kwimalisa, woha wa kundola watumbula kumhepa, 30kujowa, Mundu uyu akatumbwili kujenga, na ahotwili lepa kwimalisa. 31Pangi mutwa wuli, wona abita kuwunganisa ngondo nu mutwa njini, nakutama pasi huti kupangana ngati kwali ahotola ni maelfu kumi kuwonangana nako yula ayicha panani pa yombe, yula ayii ni maelfu makumi gawili? 32Wona nukuya wila, apa yula ayii patali, yatume ntenga, ni kokota fya kindamba. 33Mumu ayi yoha wa mwenga yualema kukana fyoha ayii nafyo, nakuhotola lepa kuya mwanafunsi wangu. 34Mumu unofu mwinyu: leka wona mwinyu uyii teeke, yaunoge ni kiki? 35Nakulinganila lepa haka pa lidupi haka pa wayitila lifu: wautaga kunja. Yuyu ayii ni makutu ga kuyufwanila, ayufwanilaye.
Цяпер абрана:
Luka 14: MGS1937
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
First published by the British and Foreign Bible Society in 1937.