Luka 15
15
1Leka wakuyupa nsongo woha na wene sambi wayii mu kumbandamila kunjufwanila. 2Na waFarisayo ni wakulembela kawili wakanionganiki, kujowa, Mundu uyu ayupa wene sambi, ni alya nawo.
3Leka akajowiti ngongo iyi kwa wombe, kujowa, 4Mundu wuli wa mwenga, pakuya ni mambelele mia, ni limonga lya gala litagiki, na kugaleka lepa ati tisaini na kenda pa lipululu, ni abita kulilonda lila litagiki mpaka alikolela? 5Na apa alikolili, aliwika pa mawega gake, kihekalile. 6Na apa afika ku nyumba yake, awakemela pamonga wakosi mundu na wenesi, kuwajowela, Muhekelele pamonga nu nenga, pakuya nilikolili limbelele lyangu lila likatagiki. 7Niwajowela kukita, wiwi yakiye kiheko kunani pa yumonga mwene sambi yuyu apela, kulutila pa wagolofu tisaini na kenda, wala nawombe walonda lepa kupela.
8Pangi ndala wuli pakuya ni ndalama kumi, wona yintagika yimonga, nakupamba nyali ati, ni kupyagila mu nyumba, ni kulondalonda ni ukiki mpaka ayikolela? 9Na pala ayikolili, akemela pamonga wakosi mundu ni wenesi, kujowa, Muhekelele pamonga nu nenga, ndawa niyikolili ndalama yila yikanitagiki. 10Wiwi niwajowela, kiyii kiheko palongolo pa wamalaika wa Mulungu panani pa mwene sambi yumonga uyu apela.
11Leka akajowiti, Mundu nunuyu akayili na wana wawili wagosi: 12nu nchoko wa wombe akajowiti kwa dadi mundu, Dadi, unipele lilundu lya kuniwambusa lya kyuma. Na akawagawili fya kulamila fyake. 13Na panyuma pa magono nukuya mingi mwana yula nchoko akawunganisi fyoha, nakahamiti ku ndima wa patali; ni kukulakula akayambanisi ifi fiyii kwake kilamile kufitagana. 14Leka apa akalili fyoha, ukayimi ulali ukulungu pa ndima wuwula; na fikatumbwili kunsowa yombe mwene. 15Na akabiti akiwungiti ni nkamba yumonga wa ndima wula; ni akampeliki mu ngunda wake kulisa maguluwe. 16Na akanyonyili kutupila ni mabasi gala gakalili maguluwe: na pakayili lepa mundu wa kumpela. 17Leka pakikilawukili akajowiti, Walinga wa kukoka wa dadi wangu wayii ni nkate kulemuka, leka nenga niyii kutagika ni njala apa! 18Yaniyime, ni yanigende kwa dadi wangu, ni yanitawile kwa yombe, Dadi, nikuhokili kunani ni pa miho pako: 19nukulinganila lepa kawili kukemaleka mwanawo: unikite ngati yumonga wa kukoka kwako. 20Ni akayimiti, ni akachiti kwa dadi mundu. Leka pakuya akona akayili patali, dadi mundu akambweni, nakatoliki ni lipyana, nakakimbili, nakagwili pa singo yake, nakammiangiti. 21Leka mwana akajowiti kwa yombe, Dadi, nikuhokili kunani ni pa miho pako: nukulinganila lepa kawili kukemaleka mwanawo. 22Leka dadi akajowiti kwa wawanda mundu, Manyata mupise mwingila wa kupambana, munfwike yombe; nu mumpele pete pa kiwoko kyake, ni filato pa njayo syake: 23ni mutole kang’ombe ka kunenepa, mukadumule, na tisangaluke pa kulya: 24pakukita uyu mwanangu akafwili, na alama kawili; akayili wa kutagika, na awoniki. Na wakatumbwili kusangaluka, 25Leka mwana mundu mbele akayili pa ngunda: baha na baha pa akayili mu kuhicha kuwandamila pa nyumba, akayufwini kuyimba ni kuhina. 26Na akikemili yumonga wa wapalo, nakakotiti findu ifi fiki. 27Nakajowiti kwa yombe, Afiki nung’unawo; nu dadiyu akadumwili kang’ombe kakunenepa, ndawa anjupiti wakusangaluka. 28Leka akadaditi, nakakaniti kuyingila: leka dadi mundu pakapititi, akampembisi. 29Leka akahigiti, nakajowiti kwa dadi mundu, Lola, miaka iyi yilinga nikayili mbandawo, na nisyetwiki lepa lipaulo lyako haka limonga: na nenga unipili lepa kamene nausi nisangaluke pamonga na wakosi wangu: 30koma apa akachiti mwanawo uyu, yuyu alili ngani fyoha fila ukalamili pamonga na wadala wa fiyaka, wenga undumulili yombe kang’ombe ka kunenepa. 31Na akajowiti kwa yombe, Mwana, wenga magono goha uyii pamonga na nenga, ni fyangu fyoha fiyii fyako. 32Leka kukalinganili kusangaluka ni kuhekelela: pakukita nung’unawo uyu akayili wakufwa, na alama kawili; akayili wakutagika, na awoniki.
Цяпер абрана:
Luka 15: MGS1937
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
First published by the British and Foreign Bible Society in 1937.