Luka 18
18
1Leka akawajowili ngongo kukita ngawasaliti magono goha, wakotoke kuchukwa; 2kujowa, Akayili mpausi pa likaya lya kitinu, uyu akanjogwipi Mulungu lepa, haka mundu anginika lepa: 3leka mfwili akayili pa likaya lililalila; na akanjichili yombe kawili kawili, kujowa, Unipawule kuhumila pa wa mitumba wangu. 4Na akalonditi lepa kwa lukumbi: leka panyuma pake akajowiti mugati mwake, Haka nakunjogopa Mulungu lepa, nukunginika lepa mundu; 5koma ndawa ya kunisokosa mfwili uyu, yaninkitile malinga, nausi akotoke kuninyenyemeka pa kunichila kawili kawili. 6Leka Bambo akajowiti, Muyufwane kiki ajowa mpausi wangali malinga. 7Na Mulungu yakite lepa ati kupaulila ngani wala wakuhagulika wake, wa kunkuwila yombe kilo na musi, nuyombe wakuyumalakila kwa wombe? 8Niwajowela mwenga kukita yakite kupaulila ngani kwa wombe manyata. Lema pa kuhicha Mwana wa adam, yakikolele kiyitakiso pa ndima ati?
9Leka akajowiti kawili kwa wala wa kwihuwalila kukita wayii wagolofu, ni kuhepa wakusigala wa wandu, ngongo iyi: 10Wandu wawili wakakweliti ku hekalu kusali; yumonga mFarisayo, na yumonga wa kuyupa nsongo. 11mFarisayo akayimiti nakasaliti wiwi nu mwene, Mulungu, nikusengusa ndawa niyilepe ngati wa kusigala wa wandu, wa kunyaka, wangali malinga, wa ukeme, haka ngati wa kuyupa nsongo uyu. 12Nikunga kyakulya kawili pa juma; nilipa kya kumi kya fyoha nifipata. 13Leka wa kuyupa nsongo akayimi patali, na alonditi lepa kunyanyamusa haka miho kunani, koma akayili mu kwipumunda pa kifimba kyake, kujowa, Mulungu, unipwelekele lipyana nenga na mwene sambi. 14Niwajowela, Akaselili yula pa nyumba yake akitiki wa malinga kulutila yuyulayula: pakukita ayi yoha uyu ikwesa mwene yaseleseke; koma uyu iselesa mwene yakweseke.
15Leka wakantolili kawili wana wawe wakeke, nausi awakwafye: leka wanafunsi pa wakaloliti, wakawalakalili. 16Leka Yesu akikemalili kwake, kujowa, Muwaleke wana wachoko wanichile, ni musiwasiwilakisa: pakuya utwa wa Mulungu uyii wa ntundu uwu. 17Chakaka niwajowela, Ayi yoha uyu alema kuyupa utwa wa Mulungu ngati kamwana, yayingile lepe mumu.
18Na nkulungu nunuyu akankotiti, kujowa, Mwalimu nnofu, nikite kiki nausi niyingile wumi wangamala lipwela? 19Leka Yesu akajowiti kwa yombe, Ndawa kiki unijowa nenga nnofu? pa waka nnofu, lema yumonga, yuyu Mulungu. 20Umanya mimbi, Usikita ukeme, Usikoma, Usiyiwa, Usikupakisa, Ginika dadiyu nu nyoko. 21Leka akajowiti, Ifi fyoha nifigohiti kitumbulile uchoko wangu. 22Leka Yesu pakayufwini, akajowiti kwa yombe, Kikona kimonga kila ulemwiki: fyoha fila uyii nafyo ufihemele, ni ufiwapele wagaju, ni yauye ni kikokoli kunani: ni uyiche, unikise nenga. 23Leka pakayufwini aga, akanionganiki nyamhope; pakukita akayili mwene kyuma nyamhope. 24Leka Yesu apa akandoliti akajowiti, Kunonopa wuli wala wayii ni fyuma kuyingila pa utwa wa Mulungu! 25Pakuya kiyii kya manyata ngamila yiyingile pa lilanga lya sindano, kulutila mwene kyuma kuyingila pa utwa wa Mulungu. 26Na wala wakayufwini wakajowiti, Nani ahotola kuyokoleka wila? 27Koma yombe akajowiti, Fila nakuhotoleka kwa wandu fihotoleka kwa Mulungu. 28Leka Petro akajowiti, Lola, tenga tilekiti fya tenga tawete, na tikukisiti. 29Leka akajowiti kwa wombe, Chakaka niwajowela, Pa waka mundu uyu alekiti nyumba, pangi mhanu mundu, pangi walongo, pangi wahogosi, pangi wana, ndawa ya utwa wa Mulungu, 30yuyu yayupe lepa kulutila pa lukumbi ulu, ni pa miaka yila yayihiche wumi wangali kumala.
31Leka akawatoliti kwake kumi na wawili wala, nakajowiti kwa wombe, Lola, tikwela ku Yerusalem, na fyoha fila filembiki nu wakulweta yafimalakasike pa Mwana wa adam. 32Pakukita yafumbulike kwa Mihuku, na yawankitile mihenje, yakitiwe likomo, na yafunyaliwe: 33na yawantowe na yawankome: na ligono lya kadatu yasyuke. 34Nuwombe wakawalalili lepa haka kandu ka findu ifi; ni lilowe ili likafihiki kwa wombe, na wakamanyiti lepa gala gajowiki.
35Leka yikayili kukita, pa kuwandamila yombe pa Yeriko, nunuyu wakukoyoka miho akatemi pa makigi ga ndila kiluwile: 36na pakayufwini lipuga liyii mu kuluta, akakotiti iki kiyii kiki. 37Na wakantawili kukita Yesu wa Nazareti ayii mu kipisana. 38Na akakuwiti kujowa, Yesu, mwana wa Daudi, unipwelekele lipyana. 39Na wa kulongolela wakandakalili, nausi atame kinunu: koma yombe akakwesiti malowe kulutila nyamhope, Mwana wa Daudi, unipwelekele lipyana. 40Nu Yesu akayimi, ni akataukili atoleke kwake: na apa akawandamili, akankotiti, 41Kiki ulonda nikukitile wenga? Leka akajowiti, Bambo, nausi nilole mu niho kawili. 42Nu Yesu akajowiti kwa yombe, Ulole kawili mu miho: kiyitakiso kyako kikuyokwili. 43Na hino apa akaloliti kawili mu miho, na akankisiti yombe, kunkwisa Mulungu: nu nsafi woha, pa wakaweni, wakampili Mulungu malumbo.
Цяпер абрана:
Luka 18: MGS1937
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
First published by the British and Foreign Bible Society in 1937.