Rute 3
3
Rute Na Boase Kegyaŋee Be Dee Feefui Aboŋ Keŋ
1Wee daale Rute wa awu Naomi yako e nyiaa, <<Me bu kaboena nyi maa gyae baale fa neŋ na n ke nyiŋ dekpaŋalaŋ kyaa na ŋolo ke kɛɛ n dɔɔ na ke de fa neŋ. 2Boase ŋon ɛmɛɛ na wa alebia ne yɛɛ tom nɛ ɔ yɛɛ da loŋto e. Gyɛŋ nelim nɛ waa gyu botɔɔ keŋ bee feefu aboŋ nɛ ɔ kaa feefu wa aboŋ. 3Mena dɔɔ sɔ na n ke tiu lafenta na n ke mia nideli na n ke gyu botɔɔ. Mɔna na lese n wose wola e ya kelii debaŋ keŋ waa di na waa nyɔɔ taŋ. 4N gyu na gyene botɔɔ keŋ waa doo nɛ. Ɔ doo na gyu ka fokaa ɔ kanyaŋ ɔ nawɔɔtɛɛ na n ke tisi doo botɔɔ. Ŋon gbagba waa wola neŋ kpene keŋ nya yɛɛ.>>
5Te Rute yako e nyiaa, <<Kpene kamasɛ keŋ n yako maŋ nyi maa yɛɛ na, maa yɛɛ.>> 6Mena dɔɔ Rute gyuu botɔɔ keŋ bee feefu aboŋ ŋan nɛ te ɔ ke yɛɛwɔ ŋgba mena keŋ wa awu be yako e nyi waa yɛɛ nɛ.
7Boase kedi na ɔ kenyɔɔ taŋ keŋ ɔ wɔe be fɛɛ e nɛ, ɔ gyuuwɔ ke tisi doo botɔɔ keŋ bɔɔ feefu aboŋ ŋan yilaa see nɛ atagbɛɛ. Keŋte Rute daŋeewɔ gyu ka fokaa ɔ kanyaŋ keŋ nawɔɔgbɛɛ te ɔ tisiwɔ doo botɔɔ. 8Kelii tɛɛ nsana nɛ Boase ŋeŋawɔ foŋ besena ɔ wose na, te ɔ naawɔ nyi alo doo ɔ nawɔɔtɛɛ. 9Botɔɔ te ɔ bɔɔsewɔ nyiaa, <<Nyaŋ amɔte ŋonaŋ?>>
Keŋte Rute tiranɔɔ nyiaa, <<Waaseda maŋ nya alebu Rute. Fɛlɛɛ n kanyaŋ nɔɔgbɛɛ wuu maŋ, nawolo nyi nyaŋ yɛna loŋto ŋon kaboena nyi nya kɛɛ de dɔɔ.>>
10Keŋte Boase yako e nyiaa, <<Me bu, Wurubuarɛ waa hiraa neŋ. Nya anokoare kedi keŋ n ba lese wola kei nɛ ta kela keŋ n be taŋgbɛɛ lese wola nɛ. N te sila bia tewulɛɛ baŋ be dana kɔba yaa ayematena ya. 11Mena dɔɔ me bu na yee ya. Maa yɛɛ kpene kamasɛ keŋ n ne gyae nɛ fa neŋ, nawolo nyi walaŋ kamasɛ ŋon ɔ kyaa donɔɔ kei man nɛ gyeŋ nyi n yɛɛ alo kpaakpaa e. 12Ke yɛɛ ampaŋ nyi me yɛɛ loŋto ŋon kaboena nyi maa kɛɛ ɛ dɔɔ, mɔna loŋto ŋolo kyaa keŋ waa kɛɛ n dɔɔ keŋ ɔ benaana n baale kela maŋ. 13Doo kɛbo nelim kei. Kyoo tɛɛ de naa te akpaa walaŋ ŋonaŋ de sɛɛ nyi waa kɛɛ n dɔɔ na yela waa kɛɛ n dɔɔ. Mɔna akpaa ɔ bɛɛ nyi ɔ be kɛɛ n dɔɔ ya nɛ, kenaŋ na ma te kɛɛ Degbeŋgyoo ŋon ɔ kyaa kekpaakekpaa nɛ nyi maa kɛɛ n dɔɔ. Mena dɔɔ doo kɛbo naasetɛɛ.>>
14Mena dɔɔ Rute doowɔ Boase nawɔɔtɛɛ botɔɔ naasetɛɛ. Mɔna ɔ karatɛɛwɔ koro bileŋ keŋ ŋolo be naa walaŋ gyeŋ e ya. Keŋte Boase yako e nyiaa, <<Na yele ŋolo ka gyeŋ nyi alo te kɔŋ aboŋ defeefui man kɛbo ya.>>
15Pɛ waa gyu nɛ Boase yako e nyiaa, <<Lese n kanyaŋbii keŋ gyakaa n degbaŋgbaŋ dɔɔ nɛ na n ke fɛlɛɛ ke lɔ tɛɛle man.>> Rute kefɛlɛɛ ke lɔ nɛ te Boase maa aboŋ temkuruwaa tɔɔse looro do ke man te ɔ kyaŋa ke seele e. Keŋte ɔ moo ke laŋ ɔ dɛɛ.
16Ɔ ke gyu dɛɛ nɛ wa awu bɔɔse e nyiaa, <<Me bu, n gyuuwɔ na botɔɔ yɛɛ sena?>>
Keŋte Rute mɔ yako e ŋan pou Boase be yɛɛ fa e nɛ. 17Rute besewɔ yako e nyiaa, <<Ɔ kpa me na mo nyiŋmaase wolo kɔŋ dɛɛ ya, mena dɔɔ te ɔ faa maŋ aboŋ temkuruwaase looro kɛŋa nɛ.>>
18Keŋte Naomi yako e nyiaa, <<Me bu, nyiŋ konɔɔ na n ke kɛɛ kpene keŋ Boase waa yɛɛ lee nombia kɛŋa man. Nyi ɔ te yɛɛ kolo lee nombia kɛŋa man gyɛŋ ya nɛ, ɔ wɔe be gyae ke fɛɛ e ya.>>
Цяпер абрана:
Rute 3: NTR
Пазнака
Капіяваць
Параўнаць
Падзяліцца
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
2026 Ghana Institute of Linguistics Literacy and Bible Translation