Rute 4
4
Boase Keyala Rute
1Nombia kɛŋa wɔle nɛ, Boase gyuuwɔ ke kyaa donɔɔ keŋ denaanɔɔ man botɔɔ keŋ kegyiise ne kyaa gyaŋee nɛ. Ɔ kekyaa botɔɔ nɛ te loŋto gbagba ŋon Boase be yako ɔ wose man nombia kaalaŋ nɛ kɔŋawɔ ɔ ne lam. Keŋte Boase baake e nyiaa, <<Me gyoo kɔŋ kaa kyaa me gyaŋ kɛbo.>> Mena dɔɔ ŋon mɔ gyuuwɔ kekyaa ɔ gyaŋ.
2Te Boase baake donɔɔ keŋ man kegyiise kufu (10) kɔŋ te ɔ yako wɔ nyiaa, <<Ɛ tisi kyaa kɛbo>> te baŋ mɔ tisiwɔ kyakee. 3Keŋte Boase yako loŋto gbagba ŋon nyiaa, <<Naomi ŋon ɔ ba lee Moabe tɛɛle man kɔŋ nɛ ne yɔɔ tɛɛle daale keŋ yɛɛ da loŋto Ɛlimɛlɛke wui. 4Mena dɔɔ ma nyeempɔ yɛna nyi nya lɛɛ ke kegyiise baŋ be kyaa kɛbo nɛ na donɔɔ kegyiise kɛwɔ siaman. Akpaa nyaŋ ke lɛɛ ke na yako daa kegyiise kɛwɔ siaman, te akpaa n be gyae n ke lɛɛ ke ya na yako maŋ na maa gyeŋ. Nawolo nyi ŋolo be dana gbɛɛ nyi waa lɛɛ ke ya gyisɛ nyaŋ. Te nyaŋ wɔle na maŋ gyakaala.>>
Keŋte balee ŋon yakowɔ nyiaa, <<Maa lɛɛ ke.>>
5Te Boase yako e nyiaa, <<Wee keŋ n ke lɛɛ tɛɛle keŋ lee Naomi na Moabe alo Rute gyaŋ nɛ, na gyeŋ nyi n ka mo Moabe alo Rute ŋon mɔ yala kpu. Na ɔ baale yere ŋon yele na wa dedii kenyiŋ dɔɔ dekpaŋalaŋ keŋ man.>>
6Botɔɔ te loŋto ŋon kaboena nyi waa kɛɛ be dɔɔ nɛ yakowɔ nyiaa, <<Akpaa mena te doo na, mɔɔ gyae maa tale lɛɛ tɛɛle keŋ ya. Nawolo nyi akpaa me lɛɛ ke na wee daale maŋ gbagba wui dedii gyae ka yo. Nyaŋ gbagba tɔ ka nyeeman kom. Maŋ be tale lɛɛ ke ya.>>
7Gyaŋgba Iseraetena kekyaa man nɛ akpaa ŋolo ne gyae waa tɔ dedii daale nyeeman kom yaa ɔ ne gyae waa mo kolo kyɛɛkeena kolo nɛ, ŋon ɔ ne yɔɔ ke nɛ na kpee ɔ nae man nkyokota fa ŋon ɔ ne lɛɛ ke nɛ. Gbɛɛ kei man te bɛɛ mo yɛɛ na kedi adansɛɛ lee kpene keŋ bɔɔ yɛɛ nɛ man.
8Mena dɔɔ loŋto ŋon kaboena nyi waa kɛɛ be dɔɔ nɛ yako Boase nyiaa, <<Nyaŋ gbagba mo tɛɛle keŋ lɛɛ.>> Keŋte ɔ kpee ɔ nae man nkyokota fa Boase.
9Keŋte Boase yako kegyiise baŋ na donɔɔ man kegyiise baŋ pou nyiaa, <<Gyɛŋ wee kei nɛ, ɛmɛɛ yɛna ma adansɛɛtena nyi ma te lɛɛ Ɛlimɛlɛke na Kilion na Malɔn dedii pou lee Naomi gyaŋ. 10Mena mɔ te me ta mo Malɔn lialo Rute ŋon ɔ ba lee Moabe nɛ yala kpu. Na ɔ baale yere ŋon yele na wa dedii pou ba yoo lee ɔ dekpaŋalaŋ na donɔɔ kei tɔna man ya. Ɛmɛɛ yɛna ma adansɛɛtena gyɛŋ.>> 11Botɔɔ te kegyiise na balaŋ baŋ pou bɔɔ gyaŋee donɔɔ keŋ denaanɔɔ man nɛ yakowɔ nyiaa, <<Ayi, daa yɛna nya adansɛɛtena. Degbeŋgyoo waa yela alo ŋon ɔ ne kɔŋ n dekpaŋalaŋ man nɛ ke yɛɛ ŋgba Rahɛle na Lea baŋ bɔɔ debodokoloŋ bake Iserae dekpaŋalaŋ nɛ. Waa yela n ke nyiŋ n wose Ɛferata dekpaŋalaŋ man, na n ke nyiŋ yele Bɛtelɛhɛm donɔɔ man. 12Degbeŋgyoo waa ta bia baŋ alebu kei waa lola fa neŋ nɛ dɔɔ yela n denimantena keyɛɛ ŋgba Pɛrɛse ŋon Tama ba lolo fa Yuda nɛ.>>
Naomi Kenyiŋ Bu Tobaale
13Mena dɔɔ Boase moo Rute yala te ɔ bese ɔ wɛɛle. Ŋon na e doowɔ te Degbeŋgyoo yela ɔ kyaŋa fulu te ɔ lola bu baale. 14Keŋte donɔɔ keŋ man ala baŋ yako Naomi nyiaa, <<Ɛ lese Degbeŋgyoo yele ŋgba ɔ te bɛɛse neŋ walaŋ ŋon waa kaa kɛɛ n dɔɔ ya nɛ. Waa yela bu kei ke lɛɛ yele Iserae tɛɛle pou dɔɔ. 15Waa yela n kekyaabii man ke de fa neŋ na waa kɛɛ n dɔɔ n degbanyaaretɛɛ. Nawolo nyi n bu alo ŋon ɔ ne gyae neŋ te ɔ dei kela bia tewulɛɛ nyetooro nɛ lolana e.>>
16Keŋte Naomi lɛɛ bu ŋon gyakaa ɔ yolaase dɔɔ te ɔ kɛɛ ɔ dɔɔ. 17Ala baŋ be kyaa benaana e nɛ yakowɔ nyiaa, <<Be ta lola bu baale fa Naomi>> te ba doo bu ŋon yele nyi Obedi. Obedi ŋonaŋ lolana Yese, te Yese mɔ lolana Dawide.
Dawide Duuluŋman Balaŋ
18Pɛrɛse duuluŋ man balaŋ yɛna kɛwɔ.
Pɛrɛse lolana Hɛseron.
19Te Hɛseron mɔ lolana Ram.
Ram lolana Aminadabe. 20Aminadabe mɔ lolana Nasɔn.
Nasɔn lolana Salemon. 21Te Salemon mɔ lolana Boase.
Boase lolana Obedi.
22Te Obedi lolana Yese.
Te Yese mɔ lolana Dawide.
Цяпер абрана:
Rute 4: NTR
Пазнака
Капіяваць
Параўнаць
Падзяліцца
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
2026 Ghana Institute of Linguistics Literacy and Bible Translation